اية اخبار Lancer 2000

[iBiZa]

انا بفكر اجيب لمراتى Lancer 2000 عشان شكلها عاجبنى اوى و اللى عاجبنى كمان انها مش منتشرة اوى و كمان عشان بنسافر كتير فا محتاج حاجة واسعة.

عايز اعرف المواصفات الاساسية اللى نازلة بيها مصر اية ؟؟

قطع الغيار جديد اخبارها اية ؟؟

انا شايف لها حاجات استيراد عند طوب الارض فا مش قلقان من الحاجة الاستيراد.

لو عايز اسقط موتور كويس عليها {1600 MIVEC} مثلا بعفشتة كاملة يتكلف كام ؟؟

هل شغلها ذى الكريستالة ولا يختلف عنها ؟؟

شكرا.

[Ahmed Samy]

حضرتك تقصد المكوة :)

بدأت أواخر 2000 و استمرت الى بدايات 2003

2002 و 2003 هما أفضل الموديلات

العربية نزل منها 1300 فقط طبعا في منها كاملة أوتوماتيك

و في منها كاملة اوتوماتيك فتحة سقف و جنوط (بس نااااااااادرة)

العربية كاربيراتير بتاخد بنزين 90 و انت طالع

اثبت من البوما على السرعات و في المنحنيات بشكل ملحوظ

قطع الغيار مناسبة بس الجديد ممكن تلاقيه غالي سنة لأن مش هاتلاقي الأساسيات تايواني

يعني أنا لسة مغير تلات كراسي موتور ياباني بـ 770 جنيه :)

انا عارف انهم في المجمل رخاص ..لكن لو قارنتهم بحاجات تانية هاتلاقيهم غاليين سنه

قطع الغيار متوفرة جدا جدا

طبعا العفشة و الموتور بسيط و كل الناس بتفهم فيها

العربية مميزة و شيك لأنها كلاسيك اكتر من البوما

بس هات عربية مش متهانة صالون و جسم

لأنك ما دام هاتغير مكنة يبقى هاتغير عفشة يبقى الكيلو متر مش مشكلتك

عيب العربية فعلا هو الموتور الــ1300

و لو اي استفسار تحت أمرك

[SAbuhashem]

هي صعب تلاقيها موديل ٢٠٠٠ علشان دة مازال شكل الكريستاله وسهل جداً تلاقيها ٢٠٠٢ و-٢٠٠٣

في الشكل دة ماينفعش الموتور ال-MIVEC ال-١٦٠٠ علشان دة يركب في الموديل إلي قبلها إلي هو الكريستاله _ أنا بكرة التسميات دي بس بقولها مغصوب :) _

دة لو عاوز تعمل حاجة مظبوطة مش قص ولزق

دي لها الموتور ال-MIVEC ال-٢٤٠٠ cc
أو ٢٠٠٠ GDI ودة المنتشر في مصر
أو ١٨٠٠ cc ٦ سليندر
أو EVO 7 أو 8 أو 9


بس إنت عاوز تجيب عربية لمراتك وتعدلها وتركب لها مواتير ؟!


Thanks
Eng.Sherif Shaker

[iBiZa]

حضرتك تقصد المكوة :)

يا باشا شكرا على المعلومات السريعة و الكاملة.

اساميها كتير بصراحة و انا بتوة فيها فا معلمها بالسنين

بالنسبة للاسعار دية بالنسبالى مش غالية لانى بجيب حاجة عربيتى المانى اصلى.

في الشكل دة ماينفعش الموتور ال-MIVEC ال-١٦٠٠ علشان دة يركب في الموديل إلي قبلها إلي هو الكريستاله _ أنا بكرة التسميات دي بس بقولها مغصوب :) _

دة لو عاوز تعمل حاجة مظبوطة مش قص ولزق

دي لها الموتور ال-MIVEC ال-٢٤٠٠ cc
أو ٢٠٠٠ GDI ودة المنتشر في مصر
أو ١٨٠٠ cc ٦ سليندر
أو EVO 7 أو 8 أو 9


بس إنت عاوز تجيب عربية لمراتك وتعدلها وتركب لها مواتير ؟!


Thanks
Eng.Sherif Shaker

انا مش عايز اقص و الزق, انا بحب اعمل الحاجة صح.

انا مش عاجبنى ال1300 بتاعها خالص و ناوى لما اجيبها اغير الموتور و العفشة كاملة عشان تقف و عشان الhandling فا طبعا عايز حاجة كويسة لانى بطلع سيناء و مرسى مطروح بليل كتير و بجرى و ببقى معايا ناس فا عايز مكنة تشيل الكلام دة كلة.

عايز حاجة 1600 او 1800 output عالى.

بس مش عايز 1800 6 سلندر, و في نفس الوقت مش عايز اطلع عن ال2000 عشان ضريبة و بنزين.

لمراتى عشان انا بحب الPolo بتاعتى اوى بصراحة و مش عايز ابيعها و فى نفس الوقت هى عايزة عربية فا منها كدة و منها كدة

[mohamedway]

موديل المكواه ده من افشل موديلات الانسر بدليل انو مقعدش كتير و قليله جدا بالنسبه للبوما و الكريستاله وانا انصحك بالكرستاله لانها احلى عربيه لانسر نزلت او بوما 1600cc هتلبى احتياجاتك.

[MoMohsen]

انا معايا 2001 و هى عربية محترمة اوى و ثباتها ملاحظ ان اعلى من البومة و ان كان يعيبها موتورها 1300 بيخلى العربية تقيلة اوى و مش جراية و معدل البنزين بردة يعتبر عالى بتعمل 180 كم فى الصفيحة جوة البلد مع التكييف.ولكن شكلها اشيك بكتير من البومة و بالذات الوش من قدام تحس ان العربية وحش هياكل الطريق بس للاسف موتورها بيخايها تتاكل.يا ريت لو تعرف سعر موتور 1600 او 2000 انجكشن اسيراد تقولى يعمل فى حدود كام.

[mohamedway]

مين اللى قال ان موديل المكواه اثبت من البومه؟؟؟؟!!!!!!!!!!!!
الكلام ده غلط لان الاتنين زى بعض بالضبط لو المكواه وحشه يبقى الاتنين وحشين ولو حلوه يبقه الاتنين حلوين و ده لسبب بسيط قوى هو ان البومه هى المكواه بالضبط بس عدلوا الاكصدام والفوانيس قدام و غيروا الشنطه و الفوانيس ورا انما بقيه البودى و السقف و الابواب و القوايم و الشاسيه كله عموما هو هو بالضبط و العفشه هى هى فيبقى ازاى المكواه اثبت؟!!! ده حتى التابلوه و الصالون استامبه واحد....

الفرق الجوهرى بين الاتنين ان البومه موتورها انجكشن و متوفر فيها ال 1600cc
وكماليتها اكتر وعلى فكره كمان لو هنقارن بالبومه ال1600cc فى موضوع الثبات ده البومه هتكسب لانها فيها عمود اتزان زياده فى العفشه الخلفيه مش موجود فى ال1300cc ولا فى المكواه كلها وكمان جنوطها عريضه و 15 بوصه مش 14 بس.؟!!!

[mohamedway]

العربيه الانسر الاكثر رشاقه وثبات و نعومه هى الكريستاله وال98 و هو ده الموديل اللى بانحنيلو دايما على الرغم من بعض العيوب اللى فيه زى ضعف الصاج وانها 1300 غالبا بس موتورها بجد انعم و ده اكتر عربيه لانسر ركبتها و استمتعت بيها جدا

[iBiZa]

ده لسبب بسيط قوى هو ان البومه هى المكواه بالضبط بس عدلوا الاكصدام والفوانيس قدام و غيروا الشنطه و الفوانيس ورا انما بقيه البودى و السقف و الابواب و القوايم و الشاسيه كله عموما هو هو بالضبط و العفشه هى هى فيبقى ازاى المكواه اثبت؟!!! ده حتى التابلوه و الصالون استامبه واحد....

معلش يا باشا, عايز استوضح حاجة. يعنى معنى اللى انت بتقولة دة ان نفس المواتير تنزل عادى خالص من غير اى مشاكل على نفس القواعد و نفس الضفيرة ؟؟

[mohamedway]

قواعد الموتور هى هى بس الضفيره مختلفه لان الانجكشن ليه توصيلات كتيره مش موجوده فى العربيه الكربراتير

[iBiZa]

انا المهم بالنسبة لى طبعا قواعد الموتور, انما موضوع من كربراتير لانجكشن دى مش صعبة ان شاء الله.

[MoMohsen]

يعنى يا iBiZa باشا هو ينفع تحويلها من كربراتير لانجكشن؟ بس بنفس موتورها 1300

[iBiZa]

فى حالة انك عايز تقلب من كربراتير الى الانجكشن فا انت محتاج الecu + الرشاشات كاملة بكل حاجتهم + حساسات كتير (حسب الموتور) + طرمبة بنزين + خرطوم راجع + بهدلة ملهاش لازمة + صنايعى غالبا مش هايعرف يظبط الحاجات دية كلها مع بعض = تكلفة اكتر من الموتور الاستيراد بمصنعياتة

الاسهل انك تجيب موتور انجكشن بضفيرتة و كونترولة ينزل علاطول و كل اللى هتزودة هيبقى طرمبة بنزين كهرباء جمب التنك و خرطوم بنزين للراجع.

[iBiZa]

انا كنت فى الحرفيين امبارح و شفت واحد بتاع قطع غيار استيراد Lancer بس.

قلت لة ان معايا 1300 عادة و عايز موتور 2000 اوتوماتيك

قاللى هتدخل دة فى دة ؟؟

قلتلة ايوة

قاللى ماشى, يبقى انا كدة هاخد منك 4000 جنية فرق.

انا شايف انة كلام معقول و دة انا معرفوش و عديت اسال كدة, يعنى لو دورت على وسايط و الموضوع وصل 3500 هبقى مبسوط. و انا شايف ان الاسعار دية مش غالية بصراحة.

[MoMohsen]

لو كدة فعلا هيبقى السعر زى الفل بس يا ترى لو غيرت الموتور هعدل حاجة فى العفشة او فية اى تعديلات تانية هاحتاجها؟