سؤال بخصوص لانسر كريستالة

[amr_mahmood2000]

السلام عليكم الموضوع بدأ ان العربية سخنت جامد وزودت مياة وانا مبطل العربية ثم رحت لميكانيكي قاللي غير جوان وش السلندر ومروحة لف المياة وبعدما خلص العربية لما اجي ادورها بتبقي بتنط زي الضفدعة ولما اسبها علي المور تفضل دايرة عادي اجي ازود بنزين علي المور او اي غيار تبطل رحت تاني كان كل شوية يقوللي غير حاجه شكل زي الفلاتر وحاجات تانية المهم انا مش عارف اعمل ايه وياتري ايه السبب عشان لما اروح لحد تاني ما اجبش حاجات وفي الاخر المشكلة تفضل زي ماهي - انا من سكان مدينة 15 مايو

[mohammedabdallh]

معنى كلامك ان العربيه بتقطع وتننتش
طب الكلام ده وهى بارده ولا بعد 5 دقائق من التدوير ؟؟؟

[amr_mahmood2000]

السلام عليكم شكرا ياباشا علي ردك السريع بالنسبة للعربية هي علي وضع المور سواء باردة او بعد خمس دقايق طبيعي جدا لكن مجرد ما ادوس علي دواسة البنزين سواء علي المور او اي غيار تاني كأنني ادوس علي الفرامل العربية بتقف وممكن تبطل كمان وده او ماتكون العربية الصبح بدري لكن في ملاحظة كنت مسافر بردة الصبح ورايح المنصورة وكان الجو بارد ولما قربت علي المنصورة كنت بجري وبعدين لقيت مؤشر الحرارة نزل للاخر ولقيت بردة فيه تنتيش بس اقل من بتاع الصبح

[amr_mahmood2000]

وعلي فكرة عشان اطلع بالعربية الصبح بعد مااسبها حوالي 10 دقايق لازم ادوس بنزين جامد اوي عشان العربية متقطعش لحد مااحس ان الموتور هينفجر هفل ده ممكن يؤثر علي الموتور

[mohammedabdallh]

كدا شكل السخان عندك مش شغال الصبح

وبص برده على البوجيهات والسلوك بتاعتها
وفلتر البنزين ((وده مهم اوى وكتير العيب بيبقى منه))
وفلتر الهوا
وجرب كدا وان شاء الله خير

[amr_mahmood2000]

شكرا ياباشا علي اهتمامك بس ممكن اعرف اتأكد منين ان السخان هو اللي بايظ عشان انا غيرت فلتر زيت وهواء وبنزين وبوجيهات عشان العيب ده مخصوص ولسه موجود انا بس عايز اتأكد قبل ما اغيرة عشان مغيروش علي الفاضي وممكن اعرف اركب نوع ايه وبكام وشكرا لسيادتك.

[husseinsalah]

السخان مالهوش اى دور فى انتظام دوان الموتور السخان وظيفتة تعلية الاكسلاتير والمحرك بارد فقط (كانك دايس سنة على دواسة البنزين)

[amr_mahmood2000]

شكرا استاذ حسين بس ايه افضل حل علشان مش عايز اغير حاجة قبل ماأتأكد انها هي فعلا القطعة المطلوب تغييرها لان الميكانيكي قاللي غير بوجيهات وفلاتر وفعلا عملت كده ولكن محصلش اي تغيير بعد كده قاللي غير موبينة فقلت طيب ماانا ممكن اغيرها ويستمر العيب كما هو ؟!

[MITSUKERO]

شكل الميكانيكي اللي بتتعامل معاه كفتجي

انت كده محتاج تنضف الكربيراتير كله حته حته و نصيحة مش اي حد يلعب في الكربيراتير ده

[mohammedabdallh]

بص خد بعضك وروح مركز الصغا ينضفولك الكربراتير ويشوفوا العربيه بتقطع منين ويظبطولك السخان لو فيه حاجه

[amr_mahmood2000]

شكرا ياباشا بس هوه فين عنوان مركز الصفا بالظبط

[MITSUKERO]

نصيحة لوجه الله والله ما اقصد اي حاجة بس بلاش الصفا روح المتخصصون احسن

تجارب الكريستاله مع الصفا مش تمام و الكربيراتير معقد شوية عليهم

[amr_mahmood2000]

بس فين ياباشا عنوان المركز

[mohammedabdallh]

نصيحة لوجه الله والله ما اقصد اي حاجة بس بلاش الصفا روح المتخصصون احسن

تجارب الكريستاله مع الصفا مش تمام و الكربيراتير معقد شوية عليهم

على فكره انا اقصد المتخصصون
بس مش عارف جت الصفا ازاى
معلشى غلطه كيبورد

[mohammedabdallh]

بس فين ياباشا عنوان المركز

الطريق من الجيزة :

اول طريق تاخد صلاح سالم لحد نادي ضباط الحرس الجمهوري و تلف و ترجع و تدخل نفق الخليفة المأمون علي روكسي علي كوبري الطاهرة و تنزل تمشي لحد بنزينة التعاااااون مش موبيل و اول شارع يمين كبير يقابلك بعد البنزينة هن علي شمالك اول ما تدخل


تاني طريق : كوبري اكتوبر لحد نزلة الحدائق و تنزل و تسال علي طريق السواح او عبود او الاميرية مباشرة هتوصل برضة عند بنزينة موبيل و بعديها التعاون و هوب تبقي وصلت

تالت طريق : دائري ثم نزلة شبرا و تدخل اتجاه احمد حلمي مش الكورنيش يعني تفضل في الشمال و بعديها تنزل من كوبري عبود تدخل يمين و تنزل نفق عبود و تكمل هتلاقي محطة الكهرباء علي ايدك اليمين و محطة الغاز تكمل علي طول في الاخر الشارع هياخدك يمين بالعافية لانه هيخلص تدخل معاه و تكمل اول ما الشارع يلف شمال تاني تخليك في الشمال و تكمل علي طول بعد بنزينة شل هتلاقيهم الناحية التانية علي ايدك الشمال تلف و ترجع و تدخل الشارع بتاعهم

01221512918 رقم الاسطي خالد عشان لو توهت او عشان تربط معاه قبل ما تروح
منقول

http://www.nilemotors.net/Nile/320944-a.html