مخالفه صف تاني

[ali ahmed]

السلام عليكم


انا مره كنت واقف صف تاني ورحت مشوار اجيب حاجه من محل ورجعت لقيت ورقه صغيره ملزوقه على قزاز العربيه مكتوب فيها صف تاني


هيا دي مخالفه صح ؟؟

ازاي ادفعها وادفعها فين ؟؟؟ ولو مدفعتهاش هيحصل ايه ؟؟؟

افيدوني

[Samooh_2003]

لما تيجي تجدد انشالله لو كانت نزلت هاتدفعها مع التجديد ماتقلقش مش لازم دلوقتي

[a_bahaa14]

ربنا يستر وميكونش عملهالك صف ثانى وتعمد تعطيل حركة المرور علشان المخلفة الاولى 20 جنية اما التانية يا مغيث ب500 يبقى الاجمالى 520 جنية بس برضة ممكن تتكتب وما تنزلش فى المخالفات وربنا يستر

[sno7y]

قدر الله ومشاء فعل الحمد لله

[mshmshm3]

يقدر يعمل كدة مع سواق مكروباص ؟
لو داس عليه مش هايبص ناحيته

[mshmshm3]

يقدر يعمل كدة مع سواق مكروباص ؟
لو داس عليه مش هايبص ناحيته

[momo44]

مش كل المخالفات دى بتنزل
المخالفات اللى بيكتبها الضباط مش زى الامناء مش زى العساكر

[lanos2004]

لو كلبش 40 جنيه
لو لزقه
سيبك يا ما اتلزق على الزجاج ومافيش حاجه جات

[salah_86]

معلش هو الركنة محيرة فعلا فى مصر بس ياريت بلاش صف تانى تانى الا لما تكون سايب حد مستنيك فى العربية علشان يحركها وقت اللزوم او يكلم الامين اللى هيعمل المخالفة ومتتاخرش علية وربنا يسترها علينا

[ali ahmed]

شكرا عشان افدتوني

اصلي انا عايش ف السعوديه

وهنا النظام غير مصر خالص

النظام هنا بتاخد مخالفه مثلا سرعه بالرادار يروح بعتلك رساله ع الموبايل يقولك رقم المخالفه وسعرها وتدفعها في اي بنك ولو اتاخرت شهر تروح تتدبل واقل مخالفه 300 ريال ولو اتاخرت شهر تبقا 600 ولو شهرين تبقا 900

وممكن تدفعها بالتلفون وانتا ف البيت وممكن بالنت

مفيش كمين يوقف ويسحب الرخص زي مصر

والعربيه اللي راكنه غلط يروح يسحبها بالونش على طول حتى لو كنت سايب حد جوا العربيه

فانا قلت يمكن ف مصر بتتدبل زي السعوديه وانا بغير عن مصر بالشهور ارجع الاقيها 5 الاف ولا حاجه :d

شكرا على الافاده

[wardet]

طيب حضرتك متقدرش تعمل كدا فى السعودية عشان المخالفة كبيرة وبتتدبل لو اتاخرت
ليه بتعمل كدا هنا
هو لازم حد يلسعنا عشان نبقى فى السليم
متزعلش من كلامى انت زى اخويا او ابويا وانا بكن ليك كل الاحترام
بس فعلاًَ احنا كمصريين مش ملتزمين فى بلدنا وبنلتزم بره

[ali ahmed]

بغض النظر عن الاسلوب اللي اتكلمت بيه

انا واضح من كلامي اني عايز اعرف ازاي ادفعها

انا طول عمري بره مصر وبجي مصر وبسافر على طول

لما خدت مخالفه سافرت ونسيتها ولسه اخويا بيقولي لقيت الورقه اللي كانت ملزوقه ع القزاز

انا كنت محتفظ بيها ف العربيه

قلت ادخل المنتدى اشوف بدفع فين عشان ادفع


مقلتش مش عايز ادفع ومقلتش اني وقف صف تاني عمد

انا مكنتش عارف ان دا صف تاني لقيت الناس كلها واقفه رحت وقفت معاهم



وقبل ما تيجي تعاتبني عاتب امين الشرطه اللي بيسيب السايس بتاع العربيات يركن للناس صف تاني عشان ياخد جزء من الفلوس اخر الليل

[wardet]

بغض النظر عن الاسلوب اللي اتكلمت بيه

انا واضح من كلامي اني عايز اعرف ازاي ادفعها

انا طول عمري بره مصر وبجي مصر وبسافر على طول

لما خدت مخالفه سافرت ونسيتها ولسه اخويا بيقولي لقيت الورقه اللي كانت ملزوقه ع القزاز

انا كنت محتفظ بيها ف العربيه

قلت ادخل المنتدى اشوف بدفع فين عشان ادفع


مقلتش مش عايز ادفع ومقلتش اني وقف صف تاني عمد

انا مكنتش عارف ان دا صف تاني لقيت الناس كلها واقفه رحت وقفت معاهم



وقبل ما تيجي تعاتبني عاتب امين الشرطه اللي بيسيب السايس بتاع العربيات يركن للناس صف تاني عشان ياخد جزء من الفلوس اخر الليل

يا اخى انا قلت لك متزعلش من كلام وانى بكن ليك كل احترام
وانا مقصدتش انك مش هتدفع
والاولي اننا نبدأ بنفسنا
واخد بالك من نفسنا دى مقلتش ابدأ بنفسك
كلنا ساعات بنعمل حاجات غلط
نهارك ابيض

[elpasha1]

يا باشا انا شغلى كان فى مجمع التحرير قبل الثورة
تخيل انك يوميا او على الاقل مرتين فى الاسبوع بتلاقى اللزقة دى محطوطة هتعمل اية
وبعدين فى الاخر ملقتش فى حاجة فى المخالفات
فمتقلقش وسيبها على الله