عزونى الزجاج الأمامى إتشرخ

[salah_86]

وانا راجع من القاهرة حالا دلوقتى كنت ماشى على 80 وجنبى تريلا محمله طوب احمر وخدو بالكم ان التريلا ماشى اقصى الشمال وطاير وفجأة لقيت طوبتين نطو من التريلا على الزجاج الامامى عندى واتنطرو تانى على الطريق
الزجاج مباش نافع تانى لازم يتغير حد يعرف سعر الاصلى فى التوكيل بكام؟
المهم ان انا ساعتها كنت بفكر هجيب منين فلوس اشترى كاوتش جديد علشان الكاوتش عندى طلع بايظ والمفاجاة ان المتخصصون قالولى ان العربية عاوزة 4 مساعدين
واهو بقيت محتاج زجاج امامى كمان
الحمد لله الذى لا يحمد على مكروه سواه

[midooo_119]

دكتور جريش مصنع العاشر من رمضان

[salah_86]

تسلم ياميدو انا هحاول اسئل على الاصلى الاول بس دك جريش احسن ولا امان دا فى حالة ما الاصلى طلع غالى

[Ahmed_Ramadan]

مش لازم الأصلى .. د/جريش بيبقى عنده درجات و Finish بتاعه كويس

[أبو_يوسف]

ايه موضوع الدرجات اللي عند جريش دا؟
لان جريش عن تجربة سيء .. وأمان زيه
مفيش زي الأصلي والفرق في السعر مش شوية..
يعني لو جريش ب 400 تلاقي الاصلي ب 3000ج
http://www.nilemotors.net/Nile/334539-a.html

[Ahmed_Ramadan]

ايه موضوع الدرجات اللي عند جريش دا؟
لان جريش عن تجربة سيء .. وأمان زيه
مفيش زي الأصلي والفرق في السعر مش شوية..
يعني لو جريش ب 400 تلاقي الاصلي ب 3000ج
http://www.nilemotors.net/nile/334539-a.html

أسف مكنش قصدى الدرجات .. أنا قصدى أنواع

[HaNo_ELBeh]

ايه ياابوصلاح انتا شكلك حد حسدك معلش قدر الله وماشاء فعل ولا يهمك يمكن كانت جت فى حاجه اكبر من كده ولا تزعل
الازاز طبعا من دكتور جريش وهو ليه فرع فى شارع دمشق مصر الجديده جنب محل ابراهيم للاكسسورات وهو ممتاز عن تجربه لكن الاصلى غالى جدا وديك شايف فى ثوانى الازاز راح بسبب الاهمال حرام عليك تجيب الاصلى
ونصيحه منى هات مساعدين استيراد من الحرفيين احسن وارخص وساعات بيجيبوا عربيات متقطعه بتبقى لسه زيرو لكن انتا كده هتدفع فلوس كتير وانتا شايف الظروف فى البلد عامله ازاى انتا اولا بكل قرش حاول تفكر كويس قبل ماتعمل حاجه ولو عايز حاجه انا تحت امرك فى اى وقت
نصيحه من اخوك وانشاء الله موفق

[catmaw]

يا جماعة انا سمعت ان الزجاج الغير اصلى بيبقى فيه تمويجة بس مش عارف ان دكتور جريش فيه كده ام لا.

[أبو_يوسف]

يا جماعة انا سمعت ان الزجاج الغير اصلى بيبقى فيه تمويجة بس مش عارف ان دكتور جريش فيه كده ام لا.

جريش فيه..
وأمان فيه..

[salah_86]

شكرا ليكم جميعا
انا لسة راجع من مصر
طلعت على مصنع دكتور جريش فى العاشر ركبت الزجاج وهو كويس جدا بالنسبة لتمنة طبعا وتركيبة عجبنى جدا جدا انا كنت قلقان انهم يبوظو الجريد وباكية المساحات ولكن هما فعلا شغلهم نضيف
الزجاج بالتركيب تمنة 315
الزجاج فى التوكيل ب 2200 بدون التركيب وبدون السيلكون

[alkawther60]

يلا الحمد لله انها جت على اد كده هي العربيات تقريبا كلها بقت مووايل وبيوت تانية
عربيتي كانت جايبة فتيس عشان كاتينة الفتيس اتقطعت فكرت هلم الدور على اد سعر الكاتينة وخلاص اللي هو الف جنيه والمصنعية كمان وخلاص
للاسف اتدبست وجبت فتيس ب 3000 ومن غير حساسين الضغط ولسة مخلصناش ويعالم لسة الميكانيكي هيطلع مشاكل ايه تانية والدور هيتقفل على كام

ربنا يعوض عليك يا ابو صلاح

[salah_86]

يارب
لحسن انا استويت والله خلاص

[HaNo_ELBeh]

مبروك ياابوصلاح وربنا يجعلها اخر الاحزان

[sherif309]

انا لسه مغير زجاج السيارة الامامى بومه 2006 عند جريش لانى ساكن فى العاشر من رمضان ب 315 شامل الضريبه
ومميزات جريش انه مورد ل99% من مصانع السيارات الموجودة فى مصر فبيركب باتقان وحرفيه شديدة(تركيب مصنع)
والفنيين الى عندة مدربين كويس جدا على اعلى مستوى فى التركيب والفنش ودة اهم حاجه ولا تسريب ميه ولا صوت هوا ولا سيليكون زيادة من برة او من جوة. وادى للفنى اكراميه 10 جنيه مثلا هيشلك العربيه على راسه يعنى هيشيل الزجاج القديم والكاوتش من غير ما يبوظ حاجه ولا يجرح حاجه وينضف العربيه بالهوا كويس
دى اللينك بتاعتهم ar.drgreiche.net
العنوان: المنطقة الصناعية الثالثة أ ١ ‘ ، مدينة العاشر من رمضان، مصر.
تليفون :
(٠٠٢) ٠١٥ ٤١٠٠٠٤
(٠٠٢) ٠١٥ ٤١٠٠٠٥
فاكس : (٠٠٢) ٠١٥ ٤١٠٠٠١
(٠٠٢) ٠١٥ ٤١٠٠٠٢
بريد الكترونى : info@drgreiche.com
مواعدهم من 8 : 5 كل يوم ما عدا الجمعه والسبت

[salah_86]

فعلا هما نضاف جدا جدا وانا لما عجبنى الشغل واتبسط قوى انه راكب مش باين انه مش اصلى وركبة مرتاح جدا اديت العامل 10 جنية وكان نفسى اديلة اكتر لان شغلة عجبنى بس العملية اصلا كانت مقصرة معايا والحمد لله