الرعشة لا تزال فى سيارتى

[salah_86]

ياخونا انا غيرت الجنوط والرعشة زى ما هيا رحت خرط الرينجات فى مخرطة وبرضة غيرت الفردتين اللى قدام وجبت اتنين رودستون جديد كورى ب 780 جنية وبرضة الرعشة موجوده هغير بكرة الردتين اللى ورا ان شاء الله كمان علشان ابقى كملت كل حاجة
بس تفتكرو يبقى فى حاجة فى العفشة ؟
انا لسة مركب انهاردة 4 مساعدين جداد و فى ورشة المتخصصون بصولى على العفشة قالو سليمة
اعمل ايه
محدش يقولى ترصيص علشان رصصت ولحد الاخر جنطت وغيرت الكاوتش وبرضة لسه بترعش من 80 لحد 100

[AHMED1718]

لو الرعشة بتختفى لما تجيب الفتيس على المور وانت ماشى يبقا كوبلن داخلى وش

[salah_86]

بص مجربتش بس الرعشة بتيجى وانا دايس بنزين اما لو شيلت رجلى من على البنزين والعربية على سرعة 90 مبترعشش
اما لو دوست بنزين تانى ترعش
دا كوبلن كدا؟

[salah_86]

غالبا هتبقى فعلا حاجة فى العفشة يعنى الحل اجيب جوز كبالن داخلى واركبهم ؟

[aldesha989]

جرب الاول زى ما قالك احمد وشوف ان شاء الله خير وربنا يقويك على العربيه انا تعبت :d

الكوبلن مخلى الفتيس يجيب زيت علشان اويل سى معفن :s

[amz2011]

كوبلن داخلى يا ياباشا للاسف

[amro0000]

جبت ال 4مساعدين بكام ياريت تقول سعر الاتنين الي قدام وسعر الي ورا ونوعهم اية يا ابو صلاح

[AHMED1718]

متتعبش نفسك مع فتايين العفشجية خلاص كده كوبلن داخلى

[salah_86]

صباح الخير ياجماعه ازيكم عاملين ايه
للأسف فعلا هو الكوبلن الداخلى انا لسه حالا قافل مع صاحبى بتاع عنده النترا وكانت بترعش برضة من بعد ال 80 لحد 100 وكان راح لحد خرطلة الكوبلن الداخلى واول كلمة قالهالى النهاردة سالنى الرعشة بتيجى مع دوسة البنزين لتله اه قالى يبقى كوبلن داخلى ياباشا

[salah_86]

الطريف بقى انى غيرت الجنوط بجنوط اسبور ب 1400 جند وجبتلهم لوك ب 200 جنية علشان ميتسرقوش وامبارح غيرت فردتين قدام ب 780 جند
الاجمالى (2380 ) جنية غير المصنعيات طبعا
دا غير ان العربية كانت عاوزة مساعد ورا ومساعد قدام فغيرت الاربعة ب 1500 kybغير المصنعية
وكمان كان طقم الدبرياج بيرجرج فى الطلعه غيرتة وجبت يابانى ب 500 جنية غير المصنعيات
يبقى كله 4380 دا طبعا غير الزيت الفتيس ب 75 جنية ومصنعة تغير الطقم الدبرياج والاربع مساعدين 450جنية
وفى الاخر يطلع كوبلن
اضحك ولا اعمل ايه انا مش عارف ولا اعيط
يعنى المصرية توكيل ميتسوبيشى بجلالة قدرهم مهماش عارفين ان العيب كوبلن
خلونى غيرت جنوط وجبتلهم لوك لانهم فى الاول قالولى عيب جنوط وبعد ما غيرت الجنوط ورحت تانى قالولى غير فردتين كاوتش اغيرهم وبرضة يطلع العيب مش منهم
سيبكم من طقم الدبرياج والمساعدين لانهم فعلا طقم الدبرياج كان عاوز يتغير والمياعدين فعلا انا سالت مينفعش اغير مساعد واللى قدامه لا
وانا كان عندى القدام يمين بيجيب زيت واللى ورا شمال بيطلع صوت طرقعة
لا وكلة كوم والزجاج اللى اتكسر كوم تانى
انا باينى معمولى عمل على ضهر جمل

[salah_86]

جبت ال 4مساعدين بكام ياريت تقول سعر الاتنين الي قدام وسعر الي ورا ونوعهم اية يا ابو صلاح

ال 4 جبتهم kyb يابانى ب 1500 من العالمية فى شارع دمشق

[salah_86]

الحمد لله قبل كل شئ
انا مش عارف افرح ولا ازعل
الرعشة فعلا ياجماعه طلعت من .............................................. ها
كوبلن داخلى يمين
طلع الكاوتشة بتاعته مقطوعه ومفضية الشحم اللى جواها
انا رحت لبتاع كبالن فكه وحط كاوتش جديد وشحم وشحم الشمال برضة
والنتيجة هاااااا
راحت الرعشة
وخد كام 100 جنية
تخيلو الفشل الزريع لتوكيل مصرية ميتسوبيشى قليوب فى تشخيص العيب ويخلونى اروح اغير الجنوط والكاوتش وفى الاخر يطلع العيب من حاجة تانية
عاوز اقول كلمة قبيحة بس انا كاظم غيظى قوى
امال خدو منى يومها 482 جنية على ايه
فعلا مفيش حاجة عدلة هنا فى مصر حتى التوكيل
اشكرى يا انشراح

[salah_86]

الحمد لله وصباح الف على كل الناس وبشكركم بجد يا خوانى انكم افدتونى بالعيب بالضبط ا
العيب الذى حير التوكيل والصنايعية

[alkawther60]

السؤال الرخم بقى يجي هو يعني ايه كوبلن داخلي
هو فيه كوبلن داخلي وفيه كوبلن خارجي مش فاهم

انا كان عندي العربية فيها طقطقة كده في الملفات وانا بلف وغيرت الكبالن والصوت راح هو دي الكبالن اللي قصدكم عليها ولا حاجة تانية
فيه خارجي وداخلي ؟؟؟؟؟؟
معلش سؤال رخم للاستفادة بس

[egyptiandiver]

أنا بقى يا أستاذ صلاح الرصاصة لازالت في جيبي! معلش القافية حكمت يا ريت كنت أقدر اساعد حضرتك و أكيد الاخوة هيقومو مع حضرتك بالواجب... و الحاجات إلي غيرتها دي بردو مش خسارة هي صيانة و بتعلي الاداء إن شاء الله على أي حال الحمد لله متصرفوش على مستشفى ولا جت فيك أو أسرتك الكريمة الفلوس دي أهون حاجة عشان احنا إلي بنعمل الفلوس و مش العكس... عادي خدها بروح رياضية و أهو بردو في النهاية الحمد لله تاني المشكلة إتحلت - أحمد سامي