باركولي جبت لانسر كرستالة :] ... ساعدوني بقا :]

[ahmed2adel]

اشتريت كرستالة من كام يوم كدا وعايز بقا شوية مساعدة ... طبعا مفيش غير رجالة المنتدي هما اللي يفيدوني جامد
مواصفات العربية ... كاملة اوتوماتيك .. 1300 .. موديل 2000 .. Glx
اولا الصيانة ... لو في حد قريب من الشرقية يكون كويس
عايز اعرف الصيانة اللي المفروض تتعمل اول ما اجيب العربية زي مثلا تغير الزيوت وسير الكتينة وكدا اعمل ايه بالظبط ومين احسن حد اجيب منو قطع الغيار وياريت يكون كلوا جديد علشان مبحبش المستعمل وايه الانواع اللي تعيش معايا مش كل يوم ميكانيكي
في كام حاجه كدا لاحظتها في العربية وعايز اعرف ممكن يكون ايه سببهم واعملهم عند مين
1-السخان مش شغال لما بدور الصبح بتبقى العربية واطية قوي ولازم استناها لما تسخن
2-سحب العربية ضعيف شوية او ممكن تكون علشان اوتوماتيك معرفش بس انا حاسو ضعيف :]
3-العربية مش راضية تجيب اكتر من 140-150 مع انها بتبقى علي 2.5 rpm
4-العربية راكب عليها كاوتش كبير 195-14 لما تحمل كتير في العربية الكاوتش من ورا بيحك في العربية ايه الحل
---------------------------------------------------
ندخل بقى علي الاكسسوارات
1-عايز اعرف مقاسات سماعات الباب كام يعني ممكن اركب عليها jpl 16" ولا لأ
2-عايز اجيب دي في دي محترم مكان الكاسيت بس يبقى حاجه سعرها حنين كدا اجيب ايه (انا عارف ان المفروض دة في قسم الصوتيات بس قل بالمرة بقا :])
3-غطا محترم بقا علشان نحافظ عليها منين

[محمد طايع]

ألف مبروك عليك العربيه وربنا يديك خيرها ويكفيك شرها
واسمحلى ارد على حضرتك فى الحاجات الى اعرفها

بالنسبه للصيانه الى المفروض تتعمل

- هتغير ال 3 سيور
سير الكاتينه و سير الدينامو وسير التكييف
وخلى الميكانيكى يبصلك على بلية الكاتينه لو كده غيرها بالمره

- هتغير زيت الموتور + فلتر الزيت وتغير زيت الفتيس لأنك اوتوماتيك

- وتخلى الميكانيكى يبص على فلتر البنزين وفلتر الهوا و البوجيهات
الكويس سيبه والتعبان غيره

- تشيك على الفرامل قدام وورا علشان تعرف حالة التيل اخبارها ايه ولو فيه حاجه حالتها تعبانه تغيرها فورا

- لو الريداتير فيه ميه خضرا يبقى تمام اما لو ميه عاديه هتروح تنضف دورة التبريد وتحط ميه خضرا

كده يبقى انتهينا من الحاجات الأساسيه - اى حاجه تانيه بقى بتختلف من عربيه لأخرى ودى هتبان معاك فى الأستخدام

1- بالنسبه للسخان العربيه بتدور معاك الصبح علطول ؟ ولا بتبطل اكتر من مره ؟
لو بتدور علطول يبقى ما تلعبش فى السخان هو كده تمام
والطبيعى ان العربيه بتاخد حوالى 5 دقايق علشان تسخن لكن انا بسخن دقيقتين تقريبا وبطلع على الهادى بدون سحب او حرق لغاية ما العربيه توصل لدرجة الحراره الطبيعيه ( مؤشر الحراره تحت النص بشويه )

2- سحب العربيه مش هقدر افيدك فيه لأنه نسبى شويه ممكن يكون سحبها ممتاز على موتورها بس لأنك نازل من عربيه موتورها اكبر فحاسس بكده
علشان كده يفضل انك تجرب عربيه تانيه نفس النوع والمواصفات اذا تيسر
وما تنساش طبعا ان العربيه 1300 سى سى وكمان اوتوماتيك

3- بالنسبه لسرعة العربيه انا برضه عربيتى مش بتجيب اكتر من 140 بالرغم من انها مانيوال
ده ممكن يكون بسبب ان الكاربيراتير مش مظبوط - انا لسه ما ظبطتش الكاربيراتير وعاوز انزل مره القاهره اظبطه على الجهاز فى توكيل الرواس الناس هنا بتشكر فيه - عموما انا لسه جايب العربيه قريب برضه فما اهتميتش قوى بالموضوع ده خصوصا انى مش بزود عن 120 الا نادرا
لكن هيه بتجيب اكتر من كده لو مظبوطه

4- مشكلة الحكه دى كانت عندى فى الفيرنا لأنى كنت شاريها بجنوط 15
الحل الى وصلتله انى رحت لبتاع العفشه ركبلى حاجه اسمها صدادات جلد
وخلى بالك صدادات مش علايات ( بتبقى حاجه عامله زى اسطوانه كاوتش كده بتركب على المساعد باين )
يعنى العربيه ما عليتش ولا سنتى لكن نزولها لتحت فى مطبات الهوا ولما حد بيركب ورا هو الى بقى محدود
"بفكر اركبهم برضه فى الانسر عندى علشان العربيه بتوطى اكتر من الازم لما ناس بتركب معايا ورا"

* مقاس سماعات الأبواب كنت سالت وانا بركب السى دى الراجل قالى 16"
لكن انا لسه ما غيرتهاش فمشوفتش بعينى

الديفيدى ما اعرفش عنه حاجه :) والغطا هستنى معاك راى الزملاء لأنى عاوز واحد ههههههه

ألف مبروك عليك مره تانيه وما تنساش تطلع حاجه لله علشان ربنا يبعد عنك العين ويباركلك فيها

[salah_86]

مبروك وربنا يديك خيرها ويكفيك شرها

[bmya]

مبروك العربيه واستاذ محمد طايع قالك المفيد
بس العربيه كانت معايا كانت بتجيب 160 اخررها معايا وبتفرق طبعا انت الهوا معاك ولاا عكسك
مسأله السخان ده مش اي حد هيقدر يصلحهولك عاوز ميكانيكي بيفهم فعلا

[ابوهاشم]

الف مبروووووووووووووووووووووووووووووووك

[ahmed esam]

ألف مبرررررررررروك

[AbO MosTaFa]

الف مبروك ياباشا
ربنا يديك خيرها ويكفيك شرها

اخوك محمد من الزقازيق ومعايا لانسر برضه :)) بس 97

شوف احسن واحد فاهم في الزقازيق واحد اسمه مدحت قورة علي طريق هرية الجديد وهو هايكشف علي العربية والي ناقص هايقولك غيره والسليم هايقولك سيبة

[MITSUKERO]

بص ياباشا من خبرة 14 سنه مع العربية دي هقول التالي:

تغيير سيور الكاتينة و الدينامو و التكييف
تغيير اويل سيل كامة و كرنك اصلي و موجودين في توكيل الرواس
شداد الكاتينة غيرة لانه لو قفش هيبوظلك الموتور

السحب الضعيف و السخان يبقي تنظيف كربيراتير فورا و تصليح السخان و اصل العربية انك تدور و تطلع و متستناش لو انت مستعجل انما الصح انك تسخن العربية (انا شخصيا بسخنها دقيقتين فقط و بتحرك عادي جدا و العربية مش بتقطع بعد تصليح السخان)

المكان المفضل ليا هو ورشة المتخصصون لانهم كلهم شغالين في توكيل قليوب و حافظين العربية صم بالاضافة الي توافر قطع الغيار الاصلي و التقليد و الاستيراد عندهم

فلتر الزيت اوعي تجيبة مضروب و هنزل موضوع عن المواتير اللي اتكسرت من جوة بالصور بسبب فلاتر الزيت المضروبة

زيت الفتيس لازم يتغير و للعلم الفتيس اللي معاك ده بالذات ممتاز جدا و بيتصلح و خالد اللي في ورشة المتخصصون حافظة صم و متدرب علي ايد خبراء يابانيين علي اصلاح جميع انواع الفتيس

الكاوتش اللي بيحك ملهوش علاقة بمقاس الكاوتش ده له علاقة بال اوف سيت بتاع الجنط و انت كده راكب عندك جنوط مش بتاعة العربية

عايز جنوط 14 بحيث متغيرشي مقاس الكاوتس هات جنوط البومة ال 1300 هتركب علي نفس الكاوتش و الطنابير و مش هتحك

ربنا يوفقك و العربية دي فعلا ممتازة جدا جدا ربنا يباركلك فيها انا عامل بيها 480 الف من الزيرو و فعلا بتستحمل بشرط الصيانة الصح في المكان الصح و الحرص في اختيار قطع الغيار


والله اعلي و اعلم

[M.Elgergawy]

الف مبروك
ومحمد طايع وكريم جاوبوا على كله
وبالنسبه لمقاس الكاوتش
الاصلي 13/175/70
14/185/60
15/195/50
وبالنسبه للسرعات العربية بتجيب لغاية 180 كم بس لازم تكون عاملها صيانة دورية وايدك فيها عشان الكربراتير

[S O P H O S]

الف مبروك ..

[ahmed2adel]

ألف مبروك عليك العربيه وربنا يديك خيرها ويكفيك شرها
واسمحلى ارد على حضرتك فى الحاجات الى اعرفها

بالنسبه للصيانه الى المفروض تتعمل

- هتغير ال 3 سيور
سير الكاتينه و سير الدينامو وسير التكييف
وخلى الميكانيكى يبصلك على بلية الكاتينه لو كده غيرها بالمره

- هتغير زيت الموتور + فلتر الزيت وتغير زيت الفتيس لأنك اوتوماتيك

- وتخلى الميكانيكى يبص على فلتر البنزين وفلتر الهوا و البوجيهات
الكويس سيبه والتعبان غيره

- تشيك على الفرامل قدام وورا علشان تعرف حالة التيل اخبارها ايه ولو فيه حاجه حالتها تعبانه تغيرها فورا

- لو الريداتير فيه ميه خضرا يبقى تمام اما لو ميه عاديه هتروح تنضف دورة التبريد وتحط ميه خضرا

كده يبقى انتهينا من الحاجات الأساسيه - اى حاجه تانيه بقى بتختلف من عربيه لأخرى ودى هتبان معاك فى الأستخدام

1- بالنسبه للسخان العربيه بتدور معاك الصبح علطول ؟ ولا بتبطل اكتر من مره ؟
لو بتدور علطول يبقى ما تلعبش فى السخان هو كده تمام
والطبيعى ان العربيه بتاخد حوالى 5 دقايق علشان تسخن لكن انا بسخن دقيقتين تقريبا وبطلع على الهادى بدون سحب او حرق لغاية ما العربيه توصل لدرجة الحراره الطبيعيه ( مؤشر الحراره تحت النص بشويه )

2- سحب العربيه مش هقدر افيدك فيه لأنه نسبى شويه ممكن يكون سحبها ممتاز على موتورها بس لأنك نازل من عربيه موتورها اكبر فحاسس بكده
علشان كده يفضل انك تجرب عربيه تانيه نفس النوع والمواصفات اذا تيسر
وما تنساش طبعا ان العربيه 1300 سى سى وكمان اوتوماتيك

3- بالنسبه لسرعة العربيه انا برضه عربيتى مش بتجيب اكتر من 140 بالرغم من انها مانيوال
ده ممكن يكون بسبب ان الكاربيراتير مش مظبوط - انا لسه ما ظبطتش الكاربيراتير وعاوز انزل مره القاهره اظبطه على الجهاز فى توكيل الرواس الناس هنا بتشكر فيه - عموما انا لسه جايب العربيه قريب برضه فما اهتميتش قوى بالموضوع ده خصوصا انى مش بزود عن 120 الا نادرا
لكن هيه بتجيب اكتر من كده لو مظبوطه

4- مشكلة الحكه دى كانت عندى فى الفيرنا لأنى كنت شاريها بجنوط 15
الحل الى وصلتله انى رحت لبتاع العفشه ركبلى حاجه اسمها صدادات جلد
وخلى بالك صدادات مش علايات ( بتبقى حاجه عامله زى اسطوانه كاوتش كده بتركب على المساعد باين )
يعنى العربيه ما عليتش ولا سنتى لكن نزولها لتحت فى مطبات الهوا ولما حد بيركب ورا هو الى بقى محدود
"بفكر اركبهم برضه فى الانسر عندى علشان العربيه بتوطى اكتر من الازم لما ناس بتركب معايا ورا"

* مقاس سماعات الأبواب كنت سالت وانا بركب السى دى الراجل قالى 16"
لكن انا لسه ما غيرتهاش فمشوفتش بعينى

الديفيدى ما اعرفش عنه حاجه :) والغطا هستنى معاك راى الزملاء لأنى عاوز واحد ههههههه

ألف مبروك عليك مره تانيه وما تنساش تطلع حاجه لله علشان ربنا يبعد عنك العين ويباركلك فيها

بجد الف الف شكر ليك يا أ-محمد ان شاء الله انزل في اقرب فرصة اظبط الصيانة دي ونشوف الميكانيكي هيقول ايه علي العربية مع اني مبقتنعش بكلامهم وربنا يقدم اللي فيه الخير

[ahmed2adel]

الف مبروك ياباشا
ربنا يديك خيرها ويكفيك شرها

اخوك محمد من الزقازيق ومعايا لانسر برضه :)) بس 97

شوف احسن واحد فاهم في الزقازيق واحد اسمه مدحت قورة علي طريق هرية الجديد وهو هايكشف علي العربية والي ناقص هايقولك غيره والسليم هايقولك سيبة

اخبارك ايه يا محمد باشا حبيبي ايوة كدا رجالة تظهر وتبان :] الله يبارك فيك يا كبييييير الف شكر
مدحت قورة دة بتاع الزوايا اللي قدامو مطبات كتير دة :] انت بتتكلم علي الورشة اللي قدامو صح؟ انا عارف المحل نفسو معرفش الورشة دي تبعو ولا لأ بس هوا فعلا بشوف عندو لانسر كتيييييييييير والعربية دي نفسها كانت بتتصلح عندو قبل ما اشتريها

[ahmed2adel]

بص ياباشا من خبرة 14 سنه مع العربية دي هقول التالي:

تغيير سيور الكاتينة و الدينامو و التكييف
تغيير اويل سيل كامة و كرنك اصلي و موجودين في توكيل الرواس
شداد الكاتينة غيرة لانه لو قفش هيبوظلك الموتور

السحب الضعيف و السخان يبقي تنظيف كربيراتير فورا و تصليح السخان و اصل العربية انك تدور و تطلع و متستناش لو انت مستعجل انما الصح انك تسخن العربية (انا شخصيا بسخنها دقيقتين فقط و بتحرك عادي جدا و العربية مش بتقطع بعد تصليح السخان)

المكان المفضل ليا هو ورشة المتخصصون لانهم كلهم شغالين في توكيل قليوب و حافظين العربية صم بالاضافة الي توافر قطع الغيار الاصلي و التقليد و الاستيراد عندهم

فلتر الزيت اوعي تجيبة مضروب و هنزل موضوع عن المواتير اللي اتكسرت من جوة بالصور بسبب فلاتر الزيت المضروبة

زيت الفتيس لازم يتغير و للعلم الفتيس اللي معاك ده بالذات ممتاز جدا و بيتصلح و خالد اللي في ورشة المتخصصون حافظة صم و متدرب علي ايد خبراء يابانيين علي اصلاح جميع انواع الفتيس

الكاوتش اللي بيحك ملهوش علاقة بمقاس الكاوتش ده له علاقة بال اوف سيت بتاع الجنط و انت كده راكب عندك جنوط مش بتاعة العربية

عايز جنوط 14 بحيث متغيرشي مقاس الكاوتس هات جنوط البومة ال 1300 هتركب علي نفس الكاوتش و الطنابير و مش هتحك

ربنا يوفقك و العربية دي فعلا ممتازة جدا جدا ربنا يباركلك فيها انا عامل بيها 480 الف من الزيرو و فعلا بتستحمل بشرط الصيانة الصح في المكان الصح و الحرص في اختيار قطع الغيار


والله اعلي و اعلم

طيب كمل جميلك بقا وقولي عنوان ورشة المتخصصون دة فين بالظبط :] شكرا علي الرد يا كبير

[ahmed2adel]

انا مش عارف اعمل اقتباس لاكتر من مشاركة اذاي المهم .... الف الف شكر لكل اللي ردوا علي الموضوع بالسرعه دي ... المهم بقا اني نازل من عربية 128 لميتسوبيشي طبعا فرق السمة والارض بين ال 2 بس حاسس استجابة الفيات احسن في التسارع علشان مانوال طبعا ولا ايه النظام

[MITSUKERO]

انا مش عارف اعمل اقتباس لاكتر من مشاركة اذاي المهم .... الف الف شكر لكل اللي ردوا علي الموضوع بالسرعه دي ... المهم بقا اني نازل من عربية 128 لميتسوبيشي طبعا فرق السمة والارض بين ال 2 بس حاسس استجابة الفيات احسن في التسارع علشان مانوال طبعا ولا ايه النظام

لا انت بس عربيتك عايزة صيانة محترمة و هتبقي ممتازة بأذن الله