العربية بتطلع دخان ابيض علي ازرق

[Ahmed_21583]

السلام عليكم ورحمة الله وبركاته
اخباركم ايه ياشباب
بصو بقي انا عندي سيارة لانسر 94 بطلع دخان ابيض او مائل للزراق شويه المهم قبل الدخان كمان كان سحب العربيه بطيء شويه رحت لميكانيكي قالي اسطوانة دبرياج المهم غيرتها وكانت العربية فله مفيهاش حاجه روحت غيرت زيت وبعدها بكذا يوم لاحظ ظهور الدخان رحت لميكانيكي واتنين وتلاته واحد يقولي دي طقم شنبر والتاني يوقلي دي جوان وش السلندر وواحد تاني قالي محتاجه عمرة كامله المهم رحت لواحد قالي دا من الكربراتير ورحت لواحد متخصص في الكربرتاير المهم نضفه وقالي امشي بالعربية 3 تيام ولو الدخان لسه موجود غير زيت وامشي 3 تيام لو فضل الدخان غير جوان جلد البلوف المهم بعد ما نضف الكربراتير فعلا الدخان قل بس لسه موجود روحت لواحد تاني قالي عشان تنهي الدخان اضرب ميه في الشكمان وهي تنضفه بس بعض الميكانيكيه مصرين انه شنبر
اسف اني طولت بس حبيت اشرح الموضع من الاول يمكن حد يكون قابل نفس المشكله وهل لو عملت موضوع الميه اللي في الشكمان دا في غلط علي الماكينه ولا حاجه
شكرا

[_hema]

ياباشا العربيه كده عايزه طقم شنبر

واعمل حسابك للطوارئ للى ممكن تقابلها اما تفك الموتور


تحياتى لحضرتك

[SAMEH_FOUAD]

ريح دماغك وقيس كبس المحرك طالما فية شك

[hugan]

الدخان الازرق مؤشر ان الموتور خلاص بيودع
عموما شوف مقدار الزيت بينقص معاك بين كل غيار

[eslam3344]

الدخان الابيض مؤشر ان موتور حضرتك خلاص بيسلم نمر ومن وجهة نظر شخصيه حاول انك تشتري استيراد لانك صدقني انت كده هتدخل في متاهات زي ما حصل معايا اشتري استيراد وخلي موتورك الحالي قطع غيار تستخدم منه ما تشاء لانك لو بيعته مش هيجيب فلوس انا واحد عرض علي في موتور بتاع لانوس 120 جنيه قولتلوا لا انا هعمله حصاله وخليته وفعلا استعملت منه حاجات كتير فيما عدا البساتم والصباب اما الباقي فهو شبه الجديد

[egyptiandiver]

20 سنة تقريباً شغل.... مم كتر ألف خير العربية - عربية حضرتك عملة كام ألف كيلو؟ و أعتقد حضرتك جيب موتور إستيراد موديل حديث إنجكشن يكون أفضل... و بردو اسئل الناس إلي ليها خبرة في الانسر هما عدرة مني، و بالتوفيق إن شاء الله أخوك أحمد سامي

[ramyayash]

ركب موتور جديد او اعمل توضيب مكينة كامل لكن الافضل موتور يركب طبعا.. انا مستغرب من اللي بيقولك اضرب مياه في الشكمان واللي بيقولك فتيس.. الناس دي انت متاكد انهم صنايعية؟ معروفة ان دخان ابيض على ازرق شوية يبقي بلوف المكينة بتهرب والزيت بيتحرق خلاص

[MITSUKERO]

موتورك خفيف طبعا

شوف التقرير ده و قرر بعديها

خلي بالك : المواتير الاستيراد مركونة بقالها مثلا مثلا 10 سنين لان موديلك قديم فأنت كده هتجيب موتور اغلب الاويل سيلز بتاعته ضاربة و الشنابر ممكن تكون قافشة و جلد الصبابات ناشف !!!

لو موتورك كويس صلحة

http://www.nilemotors.net/Nile/329008-99.html

والله اعلي و اعلم