مش كل حاجة التوكيل

[salah_86]

بسم الله الرحمن الرحيم
السلام عليكم ورحمة الله وبركاته
باختصار ياجدعان انا اول ما اشتريت العربية زيرو كنت كل شوية اجرى على التوكيل ودى صيانة ايه ودى مش عارف ايه والعربية خليجى فكنت بتخيط تمام
المهم
من فترة مش قريبة تيل الفرامل الاصلى السيميانتو الاخضر ابو 550 جنيةخلص وانا على الزراعى رايح مصر ومكنش كمل 13 الف كيلو
وقفت فى الحرفين ( جنب شغلى ) ودخلت على عفشجى غيرلى التيل بتيل ريمسا اسبانى ب 100 جنية
ودى كانت اول نقرة انا كنت اى حاجة حتى الكليبس اجيبة من التوكيل
المهم بدات اعرف المنتدى هنا اكتر وبدات اروح ورشة المتخصصون لقيت اسعارهم اقل من التوكيل وبرضة عندهم قطع غيار اصلية معاملة الاسطى خالد كويسة وهما محترمين
المهم رحت فى يوم توكيل قليوب اللى هو المصرية ودا توكيل تبع الرواس يعنى مش الوكيل الرسمى واحد يرد ويقولى مروحتش ليه دايموند هقولة رحت وهحكيلكم حصل ايه معايا قبل كدا
المهم دخلت على الباب سلام عليكم عاوز اعمل حاجات فى العربية
تؤمر بايه قلتلة عاوز اكشف على ظبط زوايا العربية وكشف على العفشة لان عندى صوت شخلخلة فى المطبات وكمان العربية بتترجرج مع الفرامل ومع السرعة خدو بالكم مع الفرامل ومع ايه السرعة
المهم دخلت العربية قعدت جوا حوالى 4 ساعات
بعد اول نص ساعه ندهولى حضرتك لازم تروح عند العربية انا قولت فى مصيبة قالولى حضرتك ماستر الفرامل الامامى شمال مقطوع ولازم يتغير ولو غيرناه هنغير معاه الزيت قلتلهم ماشى تمام غيروة
المهم طلعلى مهندس وخد العربية وهو مبيفهمش فى اى حاجة وجرب العربية وقالى الصوت دا من قدام قلتلة لا الصوت من ورا قالى لا قدام قلتلة حضرتك دى عربيتى وانا عارف انا بقولك ايه الصوت جاى من ورا يقولى عموما عربيتك عاوزة 4 مساعدين
ليــــــــــــــــــــــــه دانا محسوك وباخد المطبات على الهادى وهيا سفرية واحدة فى السنة اللى بتبقى طويلة يا الساحل يا الغردقة وباقى السنة من القاهرة لشبين وخلاص
المهم طيب حضرتك والرعشة قالى دى الطنابير هتتخرط
قلتلة مهى الرعشة مع الفرامل والسرعه كمان قالى لا هيا الطنابير ساعتها حسسنى انى جاهل ومبفهمش المهم
بعد الكلام دا بساعة بعتولى تانى ايه ياجدعان جنوطك كلها بايظة عاوزة تتغير
ليه ياجدعان فيها عالى وواطى واحنا حطينالك انضف اتنين قدام ولازم تغيرهم
دفعت يوميها 482 جنية
وروحت
وانا مقرر هعمل ايه بقى :-
1 - هركب جنوط جديدة
2 - هغير المساعدين
روحت شبين وتانى يوم روحت لمكان عندنا بيبيع جنوط بالقسط
اخترت الجنوط اللى عجبتنى وكمان جبت طقم كاوتش جديد
وتانى يوم نزلت شارع دمشق اشتريت مساعدين kyb
وغيرتهم والعربية لسة بترعش وكمان الصوت بتاع الشخللة لسة موجود صرفتلى بتاع 5 الاف ولسة العربية بايظة
المهم الفامية بتاع عربيتى حتة منه كدا كانت اتقطعت فرحت عند محل الاكسسوارات اللى بتاعامل معاه يركبلى االفامية تانى
المهم بحكى معاه قالى ى واحد بتاع عفشة ممتاز جنبنا هنا رحتلة تخيلو الشخللة دى طلعت ايه
صدادة المساعد الخلفى ها خدو بالكو الخلفى
عدلها وخد 5 جنية تمام التمام
ولما شكيت فى المساعدين جبتلة القدام يبص عليهم قالى مالهم يابية انت خلعتهم ليه اصلا دول احسن من اللى راكبين فيها دلوقتى
دى اول حاجة
تانى حاجة
الرعشة
بحكى مع واحد صاحبى على المشكلة دى قالى دا كوبلن داخلى كانت عندى نفس المشكلة ورحت محل الفلانى وعملهالى رحت للمحل اللى قال علية وخد 100 جند وصلحلى الكوبلن طلعت الكاوتشة بتاعته مقطوعة وسرب الشحم اللى فيه
شفتو بقى
اجمالا انا بقيت بجيب قطع غيارى كلها المهمة من التوكيل حتى لو غالية اما باقى الحاجات من برة عادى
ميكانيكا شهادة لله مشفتش احسن من المتخصصون اللى فى الاميرية
عفشة الواد اللى عندنا فى شبين طلع كويس
حد يقولى مكملتلناش حكاية دايموند اقولكم وقت الحملة المجانية اللى كان عاملها دايموند رحت المصيلحى اللى فى قليوب وكشفولى على العربية من غير ما يخلعو الطاسات بتاعة العربية لسة مكنتش ركبت جنوط ماشاء الله عرفو ان العربية عاوزة تيل فرامل وجلب مقصات والعربية كانت عاملة 37 الف كيلو بس

[carlans58]

مبروك الصيانة يا باشا و ربنا يعوض عليك في قطع الغيار الي جبتها وياريت تقولي علي العفشجي الي رحتلة علشان عندي نفس المشاكل دي و متسوح عند العفشجية كل عفشجي يشخص العربية تشخيصة شكل

[Silent~Dream]

التوكيلات فى مصر ما شاء الله كلها استغلال ما بعده استغلال و عدم الفقه فى تكنولجيا السياره بالدرجه الكافيه طبعا الا من رحم ربى و دول قليلين

[delaga]

طب انا بروح للمتخصصون على طول
هما كويسين قى العفشة ولا ايه؟؟؟؟؟ علشان انا لسه ماعملتش حاجة فى العفشة الحمد لله لحد دلوقتى

[salah_86]

الشهادة لله هما ممتازين فى الميكانيكا
اما العفشة انا مجربتهومش فيها كفاية ثانيا بجد وبمنتهى الامانة متغيرش اى حاجة فى عربيتك الا لما تسال هنا فى النتدى مرة واتنين وتلاتة علشان فى ناس هنا فى المنتدى بتكون خبرة بس مش متواجدة على طول

[delaga]

ما هو ده اللى بعمله مابتسرعش بقعد اسال كذا مرة علشان افهم واستفيد

[vip74]

سبحان الله مع ان التوكيل المفروض يكون ارخص
والتوكيل بيشتغل في عربية واحده المفروض يكونوا حفظينها
ايه أفضل فرع لديموند علشان أعمل فيه صيانات العربية
العربية لانسر 2014

[ma7oo]

الحقيقه انا بروح علطول المصريه اللى فى قليوب وعملت صياناتى كلها هناك يمكن عشان صيانات عاديه بس هما فاهمين فى العربيه اكتر من دايموند بكتير وفى حاجات فى العربيه لو حصلت مبتتصلحش فعلا غير فى التوكيل لكن لو اى حاجة عاديه ممكن اى صنايعى بره يعملها

[mohamedxsayed]

هى فين التخصصون دى

[HaNo_ELBeh]

هى فين التخصصون دى

ورشه المتخصصون فى الاميريه
تحياتى

[HaNo_ELBeh]

والله ياابوصلاح انا راى كده من زمان مش لازم اعتمد على التوكيل فى كل حاجه
انا الاحسن انى اعرف اكتر من مكان علشان ماحدش يشتغلنى فى اى حاجه
تحياتى

[salah_86]

والله ياابوصلاح انا راى كده من زمان مش لازم اعتمد على التوكيل فى كل حاجه
انا الاحسن انى اعرف اكتر من مكان علشان ماحدش يشتغلنى فى اى حاجه
تحياتى

هانى باشا مقلتليش عملت ايه جبت شارك ولا كورولا