رأيي في البوما 2014 بعد تجربتها لمدة شهر

[محمد هاني]

عربية ممتازة ثباتها حلو اوي وجرايه جدا والتكييف فوق الممتاز الحمد لله
وان كنت بشعر انها بتكن شويه كده مع التكييف بس عموما انا مش من النوع اللي
بيقرص ع العربية ويجري زياده عن اللزوم
العفشة جيدة جدا - العربية عالية
العزل مش عاجبني اوي بحس اني سامع الاصوات بره اكتر شويه مما كنت بسمعها في الماتركس اللي كانت معايا قبل كده لكن في العموم العربية جيدة جدا وبدأت تمزجني
مفيش حاجه عكرت مزاجي منها غير موضوع الازاز الخلفي اللي اتكسر
والعربية بجد في رأيي مش ناقصها غير حاجتين عشان تاخد امتياز
انذار وايه بي اس
عموما انا قررت اركب انذار في التوكيل الاسبوع القادم ان شاء الله
الكلام الكتير اللي بيتقال عن العربية دي بدأت اقتنع انها تستحقه
رغم اني مكنتش مقتنع في اول اسبوعين
والحمد لله رب العالمين

[hugan]

10000مبروك
ربنا يبارك لك فيها ويكفيك شرها

[beshomilan]

مبروك هى عربيه محترمه من زمان

[hossamalsadik]

مبروك وربنا يبركلك فيها ان شاء الله
وشكرا على التقرير

[delaga]

اللانسر عربية محترمة والا ماكنتش استمرت كل ده
وكمان انت معاك 2014 امال لوجربت 2007 او 2008 فى رأيى انهم احسن موديل نزل فى البومة وفيهم abs وانذار وكل حاجة

[Silent~Dream]

مبروك يا باشا و ربنا يديلك خيرها و يكفيك شرها

[Ahmed TRAVCO]

طبعا عربية محترمة وبزعل لما الناس بتهاجمها لمجرد انها لسة مستمرة وكأن ده ذنبها... والله العربية دي على الطريق -بغض النظر عن قلة الاوبشنز- افضل من عربيات احدث منها واغلى منها بكتيييير...

ربنا يباركلك فيها...

[Waleed maher]

تحياتي و مبروك بس عندي تحفظ علي الموتور العربيه مش سريعه ال ١٨٠ آخرها و بصعوبة جوز أختي لسه جايبها طلعت منه بسهوله و علي كل السرعات بسيفيك ٩٩ موتور ١٥٠٠ بس الشهادة لله عفشه و تكييف محترمين حسيت أن ال ٢٠٠٨ اشد بكتير في الموتور

[sonybony]

مبروووووووووووووووووووك

[salah_86]

ربنا يديك خيرها ويكفيك شرها

[amro0000]

ربنا يديلك خيرها ويكفيك شرها والف مبروك علي العربية

[azahranm]

الف مبروك و ربنا يكفيك شرها هي فعلا عربيه جميلة و تستحمل و مصاريفها كويسه جدا

[Ahmed TRAVCO]

تحياتي و مبروك بس عندي تحفظ علي الموتور العربيه مش سريعه ال ١٨٠ آخرها و بصعوبة جوز أختي لسه جايبها طلعت منه بسهوله و علي كل السرعات بسيفيك ٩٩ موتور ١٥٠٠ بس الشهادة لله عفشه و تكييف محترمين حسيت أن ال ٢٠٠٨ اشد بكتير في الموتور

مستحيل الـ180 دي... صديقي اللي معاه بومة 2013 أول فئة أوتوماتيك لسة جايب بينا الـ190 على طريق مرسى علم...

[S O P H O S]

مبروك يا باشا
ومشكورر عالتقيم

[أبو إياد]

مبروك وربنا يباركلك فيها ويكفيك شرها

بدايتى مع الميتسوبيشى عموما بدات مع الماكوه 2001 وكنت لما بركبها بحسها عربيه رياضيه جدا خصوصا مع الجنط bbs العريض وصالون واسع وعصرى جدا ( طبعا فى وقتها ) وثبات ماشاء الله عليه عيها انها كاربراتير واخرها معايا كان 180

تانى عربيه كانت 2005 كامله 1600 ( جنط عتب اسبويلر صالون بيج abs فوجات ) ماعدا فتحه السقف وهنا حسيت بالفرق بين العربيتين رهيب خصوصا الموتور والاتوماتيك cvt والعربيه كانت بتوصل لغايه 200 مرتاح جدا وبسهوله

بعدها 1300 مانيوال 2007 خليجى
و1300 مانيوال 2008 ( بتاعت الحاج رحمه الله عليه )
وسوبر اكشن 2007 العربيه دى اتفك كل مسار فيها وتم تركيبها من اول وجديد وتغيير جميع القطع المستهلكه لانها كانت عامله حادثه وبصراحه من افضل الفئات اللى ركبتها

فى النهايه العربيه من العربيات المحترمه والشبابيه والعائليه وفيها كل ما تحتاجه
بس كفايه عليها كده بصراحه فى مصر