مشكلة فى الشارك

[just_magdy1]

السلام عليكم
من كام يوم بدور العربيه لقيت لمبه صفرا منوره فى التابلوه وبدوس بنزين لقيت الاستجابة ضعيفه جدا يعنى لغاية نص الدواسه مافيش استجابه وقفت بالعربية وفتحت الكابوت مالقتش حاجه غير طبيعية دورت العربية ومشيت لقيت الاستجابه على الدواسه رجعت لطبيعتها بس اللمبه الصفرا لسه منوره المهم خلصت مشوارى وانا راجع اللمبه انطفت فنسيت الموضوع بس للاسف الموضوع اتكرر تانى النهاردة طبعا انا قررت اروح التوكيل بس كنت عايز اعرف ايه المشكلة منكم

[pioneerahmed]

لو العربية فيها رعشة يبقي موبينة بوجية بتهرب و لو مفيش رعشة يبقي حساس الشكمان باظ

[john55]

اسكانر هيبين فيها اي مشكله ممكن رشاشات من البنزين

[just_magdy1]

انا حاسس انها طلمبة البنزين

[Optiplex]

لو فتحت فلتر الهوا ابقى شيك علية تانى لو مش هو اطلع اكشف زى ما السادة افادو

[محمد معاطى]

نظف البوابه

[anwar ex]

ياباشا المشكله دي موجوده في جميع موديلات الشارك وبتحصل معايا كمان عباره انك لما تيجي تدوس بنزين تلاقي العربيه روحها رايحه وكان الدواسه بتكبس هوا مش بنزين والمشكله في البوابه وسخه حتى لو غيرت بوابه البنزين هتحصل تاني المفروض الشارك يتحطله بنزين 95 بس طبعا غالي في مصر عندنا فانت كل شهرين او لما تحصل معاك المشكله دي هتظطر تروح لميكانيكي كويس يفكلك بوابه البنزين والحساس بتاع البنزينالي جنب البوابه ويتنظف وتخليه يغسلك البوابه كويس بالبنزين وهو فاككها متخلهوش ينضفها وهي راكبيه علشان الهباب الاسود مش بيتشال غير لما البوابه تتفك ونصيحه متغيرش البوابه غير لما تجيب اخرها علشان المشكله هتتكرر تاني لو بتحط بنزين اقل من 95 فالحل انك تنظف كل كام شهر وبالنسبه لللمبه البرتقاني بتاعت التشيك تروح لواحد يكشف عليها كمبيوتر ولو كشفت قبل متنظف البوابه هتلاقي العيب في البوابه عاوزه تتنظف متخليش الراجل يشتغلك ويقولك البوابه محتاجه تتغير

ونصيحه اتأكد من انك بتمون من بنزينات كويسه علشان البنزين اليومين دول بقا زي الزفت ومحدش عارف ايه الي بيتحط في العربيه وحاول تبعد عن 90 يعني كل متقل نسبه الرصاص في البنزين المشكله دي بتقل وتقدر تتأكد من الكلام ده في التوكيل

[MITSUKERO]

بص

اول ما لمبة الاتشك انجن تنور يبقي لازم سكان فورا

ليه ؟

لان اللمبة لما بتنور العطل بيتسجل علي الكمبيوتر بتاع العربية برقم معين و الرقم ده بيظهر علي جهاز الكشف فقط

طيب تعمل ايه بقي ؟

تروح التوكيل او ورشة المتخصصون لان هم دول اللي فيهم البرنامج الاصلي فقط

هيعملوا ايه يعني ؟

هيحطوا العربية علي الجهاز و يشوفوا الحساس اللي مسجل عطل و ينضفوه الاول لو اشتغل يبقي خلاص لو لسه مسجل العطل بعد مسحه اول مرة بالكمبيوتر يبقي هيتغرولك الحساس

والله اعلي و اعلم

[emam_co]

بالفعل العطل ده ظهر عندى و كان الكمبيوتر سجل إنه حساس البوابة فكه بتاع مركز الصيانة و نضفه بإسبراى هو و البوابة بس للأسف نظف البوابة و هيا راكبة بالإسبراى ما فكهاش لو إتكرر الموضوع تانى حخليه يفكها و ينضفها .....

بس كلام الأستاذ العضو عن إن البنزين هو السبب كلام مضبوط جدا

ياريت لو إفادة كمان عن إزاى و إمتى نغير فلتر البنزين علشان سمعت إنه غالى فى الشارك

[anwar ex]

بالفعل العطل ده ظهر عندى و كان الكمبيوتر سجل إنه حساس البوابة فكه بتاع مركز الصيانة و نضفه بإسبراى هو و البوابة بس للأسف نظف البوابة و هيا راكبة بالإسبراى ما فكهاش لو إتكرر الموضوع تانى حخليه يفكها و ينضفها .....

بس كلام الأستاذ العضو عن إن البنزين هو السبب كلام مضبوط جدا

ياريت لو إفادة كمان عن إزاى و إمتى نغير فلتر البنزين علشان سمعت إنه غالى فى الشارك

عود نفسك تنظف البوابه والحساس كل فتره يا باشا علشان متحصلش المشكله معاك في الشارع وخلي معاك اسبري تنظيف علشان لو حصلت معاك في الشارع في مره تعملها على الماشي كده بدل متوقف حالك

بانسبه للفيلتر الاصلي غااااااااالي تقريبا حوالي 780 جنيه تقريبا
هات التايواني زي الفل سعره بيبدأ من 220 لحد280 حسب المكان الي انت بتجيبه منه وبيتغيركل 60 الف كيلو لو الاصلي انما التاوياني ممكن تغيره بدري عن كده 10 او 20 الف كيلو مش هيقول لا معاك وبيركب في التانك

[M_Marwan]

موضوع البنزين ده غير صحيح العربيه ماشيه معايا من 2009 وعملت معايا نفس الحركه مره واحده بس والسبب ان عامل البنزينه ركب فلتر الهوا غلط وبتلتالى كل الهوا ايلى داخل للموتور كان مليان تراب وبالتالى البوابه بتتسد والحل كان عند الرواس تنضيف البوابه باسبراى امريكى وتركيب الفلتربطريقه صحيحه
ومن ساعتها مبخليش حد يفتح العلبه بتاعة فلتر الهوا غير التوكيل فقط

وبرده ايلى مركب فلتر هوا مضروب احتمال كبير يحصل معاه الموضوع ده كذا مره

دى الخﻻصه والموضوع بسيط ما تقلقش

[just_magdy1]

متشكر جدا يا جماعه وفعلا انا روحت التوكيل والمشكله كانت البوابه بتاعة البنزين محتاجه نضافه

[محمد معاطى]

ما انا قلت كدا من الاول يلا الحمد لله ربنا يبارك لك فيها