مشكله فى سحب عربيتى اللانسر

[mada121977]

من حوالى اسبوعين وسحب العربيه ( العربيه 1300 مانيوال موديل 2007 ماشيه 32الف كم )عندى قل جدااا واصبح صوتها مكتوم ودواسه البنزين بيبقى فيها رعشه على السرعه العاليه وبعدها قمت بتنضيف فلتر الهواء وركبته تانى فالسحب اتحسن ليومين فقط ورجعت العربيه تانى سحبها مكتوم وضعيف فقمت بتغيير فلتر الهواء الاصلى واشتريت فلتر تانى بس مش اصل لقيت ان صوت الموتور اكنه منفس وعالى (علما بان الفلتر الجديد نفس مقاسات الفلتر الاصلى بس سمكه اقل بحوالى 3 سم ) فمش عارف المشكله فيين بالضبط ؟؟؟ مع العلم برضه انى لسه عامل صيانه ال 30 الف كم من حوالى شهر ونصف فى مركز خدمه قليوب وقلت لموظف الاستقبال انه يخليهم يغيروا فلتر الهواء علشان حاسس انه خانق العربيه فقالى ان الفلتر بيتغير على 40 الف وقالى هما هينضفوه بالهوا !!!وبالرغم من كده لما جيت انضفه بعد الصيانه لقيته مطلع كميه تراب كثيره .... وانا حاليا مش عارف احدد المشكله فين هل فلتر الهواء ولا فلتر البنزين ولا ايه بالضبط ؟؟؟

[Ghamrawy]

نصيحتى ليك انك تغير فلتر الهوا بواحد اصلى و تغير فلتر البنزين و تفضى تنك البنزين و تحط بنزين من محطة نظيفة و ممكن كمان تجيب منظف رشاشات من محطة البنزين و تجرب

[mada121977]

نصيحتى ليك انك تغير فلتر الهوا بواحد اصلى و تغير فلتر البنزين و تفضى تنك البنزين و تحط بنزين من محطة نظيفة و ممكن كمان تجيب منظف رشاشات من محطة البنزين و تجرب

الاخ الفاضل gemino الف شكر على اهتمامك ... بس بالنسبه لفلتر البنزين هوا بيتغير كل 40 الف كم وهوا غالى فى حدود 400 جنيه فانا مضطر استنى لصيانه ال 40 الف فى التوكيل علشان اغيره ..وبالنسبه لمنظف الرشاشات انا بجيب المنظف الامريكى اللى بيتحط كل 10 الاف كم وباحطه مع تفويله البنزين

[Ghamrawy]

لا شكر على واجب
بس لو انت مخنوق اوى من سحب العربية للدرجة دى يبقى لازم على الاقل تجيب منظف دورة البنزين و تظبط فلتر الهوا و برضه شوف البوجيهات و لو انى و العلم طبعا عند الله ان الموضوع كله حايبقى فى البنزين

[nobody]

بص انا حقول لحضرتك حاجة غريبة
انا كنت باعاني من موضوع السحب برضه
بس الحمد لله عرفت المشكلة فين
المشكلة ان التيل اللي ورا كان مترجلش بزيادة فكان مكتف العربية
رفعت العجلة اللي ورا بالكوريك و لفيتها بتلف بصعوبة
فكيت العجلتين اللي ورا و خففت الرجلاش شوية العربية اتحسنت
بعدها فكيتهم تاني وخففت الرجلاش كمان العربية بقت بتسحب احسن و بقت انعم في السحب كتير
اللي قلي على المعلومة دي برضه بشمهندس mohamedway جزاه الله خيرا
جرب كده وقولي النتيجة

[mada121977]

بص انا حقول لحضرتك حاجة غريبة
انا كنت باعاني من موضوع السحب برضه
بس الحمد لله عرفت المشكلة فين
المشكلة ان التيل اللي ورا كان مترجلش بزيادة فكان مكتف العربية
رفعت العجلة اللي ورا بالكوريك و لفيتها بتلف بصعوبة
فكيت العجلتين اللي ورا و خففت الرجلاش شوية العربية اتحسنت
بعدها فكيتهم تاني وخففت الرجلاش كمان العربية بقت بتسحب احسن و بقت انعم في السحب كتير
اللي قلي على المعلومة دي برضه بشمهندس mohamedway جزاه الله خيرا
جرب كده وقولي النتيجة

الاخ الفاضل nobody جزاك الله كل خير وشكرا على اهتمامك ... مازالت المشكله مستمره فى العربيه بس ان شاء الله هاعمل اللى حضرتك بتقول عليه واشوف النتيجه ايه وربنا يسهل ان شاء الله

[mada121977]

انا روحت التوكيل يوم الخميس اللى فات وبعد عذاب شديد ومعاناه مع الاساتذه اللى هناك اللى شغالين فى مكتب الاستقبال (مع خالص احترامى وتقدير للباشمهندس طارق زويل طبعا ) وصلت هناك الساعه 7.30الصبح وماشى من عندهم الساعه 2.30 الظهر كل ده علشان المشكله اللى عندى وقالولى ان العربيه محتاجه تغيير بوجيهات وفلتر هواء تخيلوا سبع ساعات كامله علشان تغيير فلتر هواء وبوجيهات اى عيل ميكانيكى يغيرهم فى خمس دقايق ولما مشيت وطلعت بالعربيه على الطريق لقيت نفس العيب فى العربيه طبعا كنت متغاظ جداااااا وحاسس انى هافرقع من الغيظ بعد السبع ساعات دول فكلمت الباشمهندس طارق وقلتله ان العربيه لسه زى ماهيا قالى هاتها يوم السبت وفعلا روحت يوم السبت من الساعه 7.30 الصبح ودخلوا العربيه تانى للورشه وعلى الساعه 10 قالولى اطلع اجرب العربيه وجلربتها ولقيت ان سحبها بقى كويس جدااا فسألت المهندس اللى كان معايا عن سبب المشكله قالى بالحرف (ان سلك الاكسراتير مكنش محطوط فى مجراه الطبيعى ) وبصراحه العربيه تحسن السحب فيها ليومين فقط .... والان رجعت المشكله زى ماهيا ... فيه حد عنده تفسير ؟؟؟؟

[nobody]

والله أنا لسه قبل ما أقرا المشاركة بتاعت حضرتك كنت حقولك شد سلك الاكسراتير شوية وشوف كده
انا شديته عندي (مفتاح 10 يستحسن بيبة 10) و بقى تمام الحمد لله
ممكن برضه تزود رجلاش مسمار الidle حاجة بسيطة نص لفة مثلا ( حتحتاج مفتاح 8 )

[salehgharib]

سؤال هل لما بتزود بنزين وغنت واقف بتحس إن العربية مخنوقة

ما دامت العربية إتحسنت مع وضع واير الأكسراتير فى مكانة
يبى المشكلة هنا حاول تستبعد فلتر البنزين وفلتر الهواء وطبعا إنت غيرت البوجيهات

حاول وضعة فى مكانة الصحيح مع التثبيت الجيد وإذا إحتاج شد لا بأس

هناك إحتمال أخر وهو وحاول تركز

ممكن دواسة البنزين تحتها حاجة مبتوصلش للأخر موكيت تحت الدواسة

إحتمال أخير وهو عمل ضبط للمحرك بالكمبيوتر فى التوكيل وده حل أخير وممكن تسبق الخطوة دى بتغيير فلتر البنزين

[mada121977]

االاخ الفاضل nobody والاخ الفاضل salehgharib الف شكر على اهتمامكم

انا لما كنت فى التوكيل اخر مره ضبطولى المحرك بالكمبيوتر واتكلف 140 جنيه وبدون اى نتيجه تذكر وبالنسبه لفلتر البنزين فهوا بيتغير على 40 الف كم فهاضطر انى استنى 8 الاف كم علشان اغيره وبالنسبه لسلك الاكسراتير فانا شفته النهارده لقيته مرخى شويه ومش مشدود فهل ده ممكن يكون السبب ؟؟

[nobody]

العفو يا باشا على ايه
انا رأيي شد السلك شوية بس مش جامد
تعرف ازاي انك ما شديتوش جامد:
1- قم بشد السلك قليلا ثم اربط المسمارين
2- قم بالضغط على دواسة البنزين قليلا ثم خفف رجلك تدريجيا حتى تشيلها خالص من على الدواسة لو rpm بقى أعلى من 800 ارجع تاني رخي السلك شوية لحد اما تكرر نفس الحركة 2 و ال rpm يكون على 800 مش أعلى من كده
3- يجب ان يكون ذلك بعد مشوار قصير عشان يكون ال rpm وطي (يعني بعد ما تسخن)

[salehgharib]

عرفنا عملت ايه

عرفنا عملت ايه ووصلت لأيه عشان أعضاء المنتدى السبب كان ايه وعلاجة حتى يكون الموضوع مكتمل

[mohamedway]

العفو يا باشا على ايه
انا رأيي شد السلك شوية بس مش جامد
تعرف ازاي انك ما شديتوش جامد:
1- قم بشد السلك قليلا ثم اربط المسمارين
2- قم بالضغط على دواسة البنزين قليلا ثم خفف رجلك تدريجيا حتى تشيلها خالص من على الدواسة لو rpm بقى أعلى من 800 ارجع تاني رخي السلك شوية لحد اما تكرر نفس الحركة 2 و ال rpm يكون على 800 مش أعلى من كده
3- يجب ان يكون ذلك بعد مشوار قصير عشان يكون ال rpm وطي (يعني بعد ما تسخن)

مع احترامى لكلام حضرتك بس مش هى ده الطريقه الصح لضبط رجلاش سلك الأكسلاتير لأن الRPM متغير على السلانسيه(زى مثلا لو العربيه بارده شويه أو التكييف شغال و الموتور بيقدر يفتح و يقفل الهوا شويه من سكه تانيه بعيدا عن بوابه الأكسلاتير ليستطيع عمل مثل هذا التحكم و من الممكن انه يشد السلك زياده عن اللزوم و الموتور هيحس بكده و هيعرف يوطى الRPM لمعدله الطبيعى ر غم ان السلك مشدود و النتيجه ان العربيه هتاكل بنزين كتير منه........

الطريقه الصح بقه انك تخلى شخص يدوسلك على دواسه البنزين على الأخر أو تحط عليها حاجه تقيله بحيث تضمن انها فى نهايه مشوارها و تتأكد ان السلك راكب فى جميع كلبساته لغايه فبره البوابه و تيجى على قطعه الحديد اللى ماسكه السلك قبل الفبره علطول (اللى فيها الرجلاش) و تهوى المسمارين بتوعها شويه و ترجعها للخلف بأيدك لغايه ما تلاقى فبره البوابه ملفوفه على أخرها فى اتجاه فتح البوابه و مفيهاش أى حركه بعد كده و تربط المسمارين على هذا الوضع و بكده تبقه ضامن انك لما تدوس بنزين على الأخر البوابه هتبقه على الأخر و ما فيهاش تانى و بعد كده حرر دواسه البنزين و سيبها ترد تانى لوضعها الطبيعى و ما تشغلش بالك بالبوش اللى ممكن يكون موجود فى الدواسه لفوق لأن ده هيبقه البوش الطبيعى اللى الشركه عملاه عن قصد لحريه ضبط الرجلاش ومش هيضرك فى حاجه(أهم حاجه ان الدواسه لما تبقه على الأخر الفبره هتبقه ملفوفه على الأخر).

[mada121977]

عرفنا عملت ايه ووصلت لأيه عشان أعضاء المنتدى السبب كان ايه وعلاجة حتى يكون الموضوع مكتمل

انا اتفقت مع الباشمهندس طارق جزاه الله كل خير على الذهاب الى التوكيل للمره الثالثه لاصلاح العيب ان شاء الله يوم الخميس او السبت وربنا يسهل الامور والمشكله تتحل وان شاء الله اعرفكم باللى حصل

[nobody]

مع احترامى لكلام حضرتك بس مش هى ده الطريقه الصح لضبط رجلاش سلك الأكسلاتير لأن الRPM متغير على السلانسيه(زى مثلا لو العربيه بارده شويه أو التكييف شغال و الموتور بيقدر يفتح و يقفل الهوا شويه من سكه تانيه بعيدا عن بوابه الأكسلاتير ليستطيع عمل مثل هذا التحكم و من الممكن انه يشد السلك زياده عن اللزوم و الموتور هيحس بكده و هيعرف يوطى الRPM لمعدله الطبيعى ر غم ان السلك مشدود و النتيجه ان العربيه هتاكل بنزين كتير منه........

الطريقه الصح بقه انك تخلى شخص يدوسلك على دواسه البنزين على الأخر أو تحط عليها حاجه تقيله بحيث تضمن انها فى نهايه مشوارها و تتأكد ان السلك راكب فى جميع كلبساته لغايه فبره البوابه و تيجى على قطعه الحديد اللى ماسكه السلك قبل الفبره علطول (اللى فيها الرجلاش) و تهوى المسمارين بتوعها شويه و ترجعها للخلف بأيدك لغايه ما تلاقى فبره البوابه ملفوفه على أخرها فى اتجاه فتح البوابه و مفيهاش أى حركه بعد كده و تربط المسمارين على هذا الوضع و بكده تبقه ضامن انك لما تدوس بنزين على الأخر البوابه هتبقه على الأخر و ما فيهاش تانى و بعد كده حرر دواسه البنزين و سيبها ترد تانى لوضعها الطبيعى و ما تشغلش بالك بالبوش اللى ممكن يكون موجود فى الدواسه لفوق لأن ده هيبقه البوش الطبيعى اللى الشركه عملاه عن قصد لحريه ضبط الرجلاش ومش هيضرك فى حاجه(أهم حاجه ان الدواسه لما تبقه على الأخر الفبره هتبقه ملفوفه على الأخر).

جزاك الله خيرا على التوضيح
بس أنا قلت انه يشد السلك بعد مشوار عشان تكون العربية سخنت وال rpm ثبت
انا العربية اول ما اشتريتها كان السلك فيه شوية بوش الشركة عاملاها عن قصد
بس بصراحة انا جربت السلك مشدود و جربته وهو فيه بوش ايضا
و هو مشدود افضل كتيرا يمكن عشان العربية اتوماتيك فبحس اوي بموضوع سلك البنزين
لان اي لمسة على الدواسة بتفرق خصوصا عند الكيك داون العربية مش بتعد تتنح بتستجيب علطول لو السلك مشدود