تقييم مبدأى لميتسوبيشى أتراج

[elsharkawy20]

امبارح روحت شوفت العربية عند أباظة فى اسكندرية ... لسه داخل على العربية كده لقيت الكاوتش ماكسس الصينى (بتاع نيسان صنى) متفائلتش بصراحة ، وفعلا بعد ما فتحت العربية لقيت تقفيلها سئ ,, التابلوه خاماته سيئة لو ضغطت عليه هتلاقيه بينزل تحت ايدك .. العربية قعدتها ضيقة شوية ومش شايف غير اول الكابوت فمتعرفش اول العربية فين .. اللحام فى الزوايا شكله وحش .. والباب 3 مرات ميقفلش معايا وعايز تزقه جامد عشان يتقفل

قارنتها بالصنى اللى واقفه جنبها فوجئت ان التقفيل المصرى احسن منها فى الخامات واللحام والتقفيل وقعدتها مريحة

انا بقارن بين الاتنين لانى كنت محتار بينهم فى الفئة السعرية دى ,,, مشكلتى مع الصنى فى تيل الفرامل اللى كل الناس بتشتكى منه ده .. مبقاش قدامى غير انى اجيب صنى او استنى شوية لحد ما اجيب تمن الياريس

انا حبيت انقلكم رأيى عشان انا كنت بسألكم عنها امبارح وياريت لو حد شافها ياريت يقول رأيه برده

[J A G U A R]

امال ايه اللى فيها طلع حلو !!

[mohamed hussei]

روح شوفها في معرض تاني ممكن تكون مخبوطة ومرشوشة

[manfromegy]

نصيحة إبعد عنها
دايموند توكيل فاشل في اللانسر اللي كل الناس حافظينها
فمابالك دي عربيه جديده هاتعمل صيانة فين و تجيب قطع غيار منين غير من التوكيل
نصيحة بالعقل بلاش

[د.ياسر]

امبارح روحت شوفت العربية عند أباظة فى اسكندرية ... لسه داخل على العربية كده لقيت الكاوتش ماكسس الصينى (بتاع نيسان صنى) متفائلتش بصراحة ، وفعلا بعد ما فتحت العربية لقيت تقفيلها سئ ,, التابلوه خاماته سيئة لو ضغطت عليه هتلاقيه بينزل تحت ايدك .. العربية قعدتها ضيقة شوية ومش شايف غير اول الكابوت فمتعرفش اول العربية فين .. اللحام فى الزوايا شكله وحش .. والباب 3 مرات ميقفلش معايا وعايز تزقه جامد عشان يتقفل

قارنتها بالصنى اللى واقفه جنبها فوجئت ان التقفيل المصرى احسن منها فى الخامات واللحام والتقفيل وقعدتها مريحة

انا بقارن بين الاتنين لانى كنت محتار بينهم فى الفئة السعرية دى ,,, مشكلتى مع الصنى فى تيل الفرامل اللى كل الناس بتشتكى منه ده .. مبقاش قدامى غير انى اجيب صنى او استنى شوية لحد ما اجيب تمن الياريس

انا حبيت انقلكم رأيى عشان انا كنت بسألكم عنها امبارح وياريت لو حد شافها ياريت يقول رأيه برده

دي اللي هيا ميراج قصدك ولا انا يتكلم عن حاجه تانيه اصل ميراج دي ياباني اصلي !!

[svneleven]

دي اللي هيا ميراج قصدك ولا انا يتكلم عن حاجه تانيه اصل ميراج دي ياباني اصلي !!

لا ديه حاجة تاني.

[tito32]

فى نيسان سنترا بص علها وقلى ايه رايك

[شيتوس]

متهيألي متتقارنش بالصني لان الصني 1500 والاتراج 1200 والمفروض انها موقره في البنزين ... موضوع التقفيل ده ممكن يكون زي ما تفضل الاخ الكريم وقالك شوفها في مكان تاني يمكن تكون مخبوطه منهم وعموما انا مبقتنعش باي عربية اقل من 1300 انا اشتري 128 وماشتريش عربية 1200 cc ولا 1100 ولا 1000
ولو علي موضوع توفير البنزين مانت هتصرفه بعد كده قطع غيار وهيه هيه ... مجرد رأي

[hugan]

و3سلندر كمان

[eng.m7md.ali]

يعني انت مستني تجمع فلوس الياريس؟

الياريس متستاهلش كل الفلوس دي ولا دي كمان تستاهل سعرها

[salah_86]

نصيحة لوجة الله انا شايف ان الصنى افضل من الاتراج ولو عاوز رأيى فلوسك تجيبلك سيفيك 2009 حالة نضيفة او شارك موديل 2010 مثلا وكماليات عالية وممكن فلوسك تجيبلك جيتا حالة ممتازة موديل 2008 او 2009
اما لو ناوى على زيرو هات صنى حلوة بس ابقى غير الكاوتش وهاتها سوبر صالون انضف واحسن
وعلى فكرة انا معايا بومة موديل 2009 ماتور 1300 كنت شاريها زيروولو هغير هجيب شارك او سيفيك زيرو بس قسط طبعا

[Sherif Mandoor]

الاتراج cc 1200 3 cylinder 2 cam

[sozana]

1200-1600
ممكن اعرف سعه المحرك او قوته cc بتفرق في ايه ؟؟
بمعني ضعف المحرك بتفرق السرعه مثلا - التسارع- الطلعه-ولابيسبب مشاكل في السياره بعد كده يعني يضعف اداؤة يتلف اسرع من المحرك الاقوي ؟؟

[S O P H O S]

لو تقدر تصبر وتجيب الياريس
يبقي افضل طبعا

[sameh1982elola]

السلام عليكم ....الاتراج على كلامك تعبانة وبما انها 1200 هتموتك فى السحب والتكييف فى المستقبل لما الماتور يتهلك شوية فبلاش اتراج وبعدين لسه نازلة مش هتلاقى كل قطع غيارها ولو لقيتها هتكون غالية جدا....نيجى للنيسان :::معظم الناس فيها بيشتكوا من تيل الفرامل والطنابير والماستر وعلى فكرة فيه ناس جايبة 2014 وكل ما يغيروا تيل يفضل يصفر وده عادى فى النيسان وبعدين يا سيدى اعرف واحد خد غرزة على الواسع وماشى على سرعة 100 العربية قلبت منه بس الحمد لله هوه كويس الان....واعرف واحد تانى عمل حادثة بالعربية من شهرين ولحد الان مش لاقى قطعة اسمها دونجل خلفى ولف على كل التوكيلات فى كل جمهورية مصر العربية ومفيش....واوعى حد يشتغلك يقولك النيسان يابانى لأن العربية هندى ممكن شركة نيسان فتحت فرع فى الهند وده اللى بيصنع العربيات دى ده غير ان كاوتش العربية صينى وفيه مكونات جوه العربية صينى والزجاج مصرى والتقفيل مصر وخلى بالك اوعى تفرح بالاير باج اقسم بالله فى واحد كان كاتب انه بعد ما عمل الحادثة وخرج بره العربية هوه وصاحبه وبيبصوا على الخساير من بره مع العربية التانية الاير باج فتح لوحده.....واى شخص عند النيسان هيقولك العربية خطرة فى الملفات بشكل ملحوظ واى حد يقول غير كده حط صباعك فى عينيه ...انا كنت ناوى زيك اول صلاة استخارة شوفت حادثة نيسان صنى 2014 وبعدها بيومين شوفت حادثة تانية وامبارح صليت تانى استخارة لسه شاف عربية مقلوبة اتعقدت من العربية الزفت دى ......انصحك لو عايز حاجة اصبر وكمل وبلاش نيسان ولا اتراج .....انا عن نفسى قررت اجيب الافيو علشان قطع غيارها وانا عارف عيوبها ...على فكرة النيسان فى السعودية ارخص من الافيو وعندنا العكس.....وياسيدى افتح دوبزيل واكتب نيسان صنى 2014 وهتلاقى العربية بتتباع كتير اوى مستعملة مع انها لسه نازلة وده دليل على انها عربية زبالة وكلها عيوب....وجرب تعمل على الافيو مش هتلاقى افيو2014 اتوماتيك للبيع الا واحدة ده اذا لقيت اساسا .......بس لو ممكن تستنى بلاش تتسرع وشوف حاجة فئة اعلى من النيسان والاتراج والافيو لو عايز توفر وتريح دماغك هات افيو وعلى فكرة الافيو كان فيها عيوب فى 2013 كان عيب عداد ار بى ام وعيب فتيس تقريبا وغيروا الحاجات دى بعكس النيسان اللى سايبه عملائها يضربوا دماغهم فى الحيط ....لو تقدر تصبر كبر دماغك من النيسان والافيو والاتراج وشوف حاجة اعلى ومقدرش اديك اسم حاجة معينة لانى بقالى اسبوعين ببحث فى الفئات من 100 الى 115 الف ومعنديش معلومات فى الحاجاات الاعلى من كده ....ومتنساش صلاة استخارة قبل اى حاجة وربنا يرزقك بالافضل لك