ميتسوبيشي أتراج و لا كيا بيكانتو

[sue214]

السلام عليكم .. أنا عضوة جديدة في المنتدى، أنا كان معايا نيسان صني 2013 بس للأسف عملت بها حادثة و ال أير باجز فتحت والتأمين ما رضيش يصلحها و قال هيعتبرها توتال لوس .. أنا دلوقتي في إنتظار الشيك بتاع التعويض من شركة التأمين .. للعلم هي مصر للتأمين .. وإن شاء الله ناوية أجيب عربية تانية ،، بس ميزانيتي لا تسمح اني أجيب صني تاني .. مع انها كنت كويسة جداً معايا .. أنا كنت عملة بها 6000 كيلو ساعة الحادثة والعربية ما ضايقتنيش طول ال فترة دي ف أي حاجة تذكر .. الميزانية إلي معايا دلوقتي في حدود 105 ألف مش أكتر .. ما أقدرش أزود عن كدة .. فكنت محتارة بين الكيا بيكانتو ال أوتوماتيك الفول أوبشن وبين الميتسوبيشي أتراج الجديدة .. كل وحدة فيهم فيها حاجة أنا قلقانة منها . قلقانة من الأتراج إن لسة ما حدش يعرف عنها حاجة و شراها هيبقى زي البطيخة !! زائد انها 1200 سي سي و-78 هورس باور .. أنا صحيح مش بجري في سواقتي (سواقة حريمي بقى) بس إفرض حبيت أسافر بيها اسكندرية مثلاً هيبقى إيه الوضع .. بس فيما عدا كده الإمكانيات المعلنة بتاعتها كويسة جداً .. و هو ده إلي أنا محتاجاها و مش هحتاج أكتر من كدة .. بس لسة بقى لأدام العيوب بتاعت العربية هتتكشف .. لإن زي ما قلت هتبقى زي البطيخة .. هههه .. ف قلقانة من كدا
وعلى الناحية التانية البيكانتو معروفة في السوق و منتشرة و عيوبها و مزاياها معروفة و الميكانيكية فاهمين فيها وتوكيل كيا محترم غير دايموند موتورز بتاعت ميتسوبيشي ناس كتير بتشتكي منه .. بس بقول لنفسي خسارة فيها أوي ال-105 ألف .. ومعنى اني أجيب بيكانتو إن ما حدش هيركب معايا العربية خالص لإنها بصراحة تخنق إلي قاعد ورا .. ههه .. فأنا محتارة .. ف ياريت تفيدوني

[Ibrahim Nabil]

عليكم السلام، طبعا على المستوى الشخصى واعتقد ايضا العام انا شايف ان الامر محسوم لصالح الميتسوبيشى ,,, عربيه حجمها معقول وامكانياتها كويسه جدا على سعرها ,,, وبالنسبه لموضوع قدرة المحرك دا مفيش منه قلق تماما وممكن حضرتك تسافرى بيها اى مكان بدون قلق ان شاء الله لان طبعا تكنولوجيا المحركات اليابانيه وخصوصا هوندا وميتسوبيشى غنيه عن ان احنا نتكلم عنها ,,, وبالتوفيق

[hardmind_doc]

اولا : حمد الله على سلامتك وفداكى مليون عربية
ثانيا : انا مع الاتراج هى طبعا سعرها مبالغ فيه بس برضو البيكانتو سعرها مبالغ فيه اكتر
الناس اللى جربو الاتراج بيقولو سحبها كويس ومابتاثرش بالتكييف اوى علاوة انها ميتسوبيشى يعنى ايا كان العيوب مش هتبقى قاتلة يعنى الموتور والفتيس مضمونين
صلى استخارة واركبى الاتنين وشوفى هتستريحى لايه

[J A G U A R]

رغم ان الاتنين ميستهالوش سعرهم وش والاتنين لداخل المدينه بس انا شايف ان الاتراج هاتكون احسن وهاتنفع اكتر فى السفر ولو مش هاتنفع فهى احسن من البيكانتو فى السفر ... بس رأيي ممكن تشوفى جين 2 .

[mshmshm3]

البيكانتو تفضل من حيث الشكل و الاوبشن و شياكة التبلوه و هاتش باك و صغيرة (بناتي )
الاتراج شوفتها ماشية شكلها مش حلو
لو هتحتاجي تسافري كل شهر مثلا و مفيش عربية تانية هاتي الاتراج طبعا لكن لو سفر مرة او مرتين في السنة و في عربية تانية البيكانتو افضل

[د.عماد صلاح]

اتراج....شكلها حلو شفتها في الطارق من جوا شبه الافيو شويه وواسعه ...عيبها الوحيد انها لسه ماتجربتش كفايه

[sue214]

عليكم السلام، طبعا على المستوى الشخصى واعتقد ايضا العام انا شايف ان الامر محسوم لصالح الميتسوبيشى ,,, عربيه حجمها معقول وامكانياتها كويسه جدا على سعرها ,,, وبالنسبه لموضوع قدرة المحرك دا مفيش منه قلق تماما وممكن حضرتك تسافرى بيها اى مكان بدون قلق ان شاء الله لان طبعا تكنولوجيا المحركات اليابانيه وخصوصا هوندا وميتسوبيشى غنيه عن ان احنا نتكلم عنها ,,, وبالتوفيق

شكراً جداً لحضرتك .. أنا كمان كنت بقول لنفسي دي ياباني يعني و أكيد ميتسوبيشي عمرها ما هتصنع عربية تعبانة .. بس من قرايتي للمواضيع في المنتدى .. لقيت في ناس كتير بتشتكي من موديل من موديلات اللانسر نزل 1300 سي سي و أوتوماتيك و كانو بيقولو عليها بطة بلدي .. فده خلاني أشك في الأتراج .. وقلت ما بالك بقى الأترج دي 1200 سي سي و على بودي مش صغير برضه

[sue214]

اولا : حمد الله على سلامتك وفداكى مليون عربية
ثانيا : انا مع الاتراج هى طبعا سعرها مبالغ فيه بس برضو البيكانتو سعرها مبالغ فيه اكتر
الناس اللى جربو الاتراج بيقولو سحبها كويس ومابتاثرش بالتكييف اوى علاوة انها ميتسوبيشى يعنى ايا كان العيوب مش هتبقى قاتلة يعنى الموتور والفتيس مضمونين
صلى استخارة واركبى الاتنين وشوفى هتستريحى لايه

الله يسلمك و شكراً جداً لحضرتك

[sue214]

البيكانتو تفضل من حيث الشكل و الاوبشن و شياكة التبلوه و هاتش باك و صغيرة (بناتي )
الاتراج شوفتها ماشية شكلها مش حلو
لو هتحتاجي تسافري كل شهر مثلا و مفيش عربية تانية هاتي الاتراج طبعا لكن لو سفر مرة او مرتين في السنة و في عربية تانية البيكانتو افضل

شكراً جداً لحضرتك

[sue214]

اتراج....شكلها حلو شفتها في الطارق من جوا شبه الافيو شويه وواسعه ...عيبها الوحيد انها لسه ماتجربتش كفايه

اه أنا كمان شفتها في الطارق إللي في مول العرب .. عيبها بردو إن الكاوتش مكسس .. ههه

شكراً جداً لحضرتك

[sue214]

رغم ان الاتنين ميستهالوش سعرهم وش والاتنين لداخل المدينه بس انا شايف ان الاتراج هاتكون احسن وهاتنفع اكتر فى السفر ولو مش هاتنفع فهى احسن من البيكانتو فى السفر ... بس رأيي ممكن تشوفى جين 2 .

في نقاط سلبية كتير في ال gen2 عرفتها من المنتدى و من البحث .. قطع غيارها غالية أوي .. زائد العربية مش منتشرة .. و في إعادة البيع بتخسر جامد

شكراً جداً لحضرتك

[Ibrahim Nabil]

شكراً جداً لحضرتك .. أنا كمان كنت بقول لنفسي دي ياباني يعني و أكيد ميتسوبيشي عمرها ما هتصنع عربية تعبانة .. بس من قرايتي للمواضيع في المنتدى .. لقيت في ناس كتير بتشتكي من موديل من موديلات اللانسر نزل 1300 سي سي و أوتوماتيك و كانو بيقولو عليها بطة بلدي .. فده خلاني أشك في الأتراج .. وقلت ما بالك بقى الأترج دي 1200 سي سي و على بودي مش صغير برضه

يافندم لاشكر على واجب احنا كلنا هنا فى المنتدى للافادة والاستفاده ،والبنسبة لموضوع البطه البلدى دى :) هيه فعلا البومه 1300cc اداءها مش اد كده مع التكييف وخصوصا الاوتوماتيك ولكن مثلا لو جربتى الكريستاله 1300 هتلاقيها كانت ممتازه وسحبها كويس فالموضوع مش مقياس وخصوصا ان حجم الاتراج مش كبير فلا داعى للقلق اطلاقا طالما دى حدودك ، وتوكلى على الله وبالتوفيق

[sozana]

مقارنة صعبة فعلا :)
بيكانتو ممتازة لكن حجمها مش مناسب واتراج يابانيه قويه لكن الوكيل سئ وفي طور التجربة واكتشاف المشاكل

[MaZaGAngeE]

البيكانتو متجربة و ليها سوق
اتراج لسه نازله بس ماركة موثوق فيها بس اتاكدي من انها ياباني مش تايلاندي

[mhkorayem]

البيكانتو متجربة و ليها سوق
اتراج لسه نازله بس ماركة موثوق فيها بس اتاكدي من انها ياباني مش تايلاندي

مفيش اصلاً اتراج ياباني