ممكن تسعرولي العربية دي ؟

[bougee]

معروض قدامي عربية بومه ودي مواصفاتها :

موديل 2013 - عامله 10000 كيلو - سوبر أكشن - اعلى فئة فابريكة بالكامل - صيانة بالتوكيل - أول يد رخصة سنة ..
والسعر المطلوب فيها 135 ألف جنيه

هل ده كتير عليها ولا أيه الأخبار ؟ ياريت تفيدوني بالله عليكم

أنا معرفش صاحبها ولكن قولت أسأل أهل الخبرة قبل ما أتصل بيه

[عبده غريب]

سعر مناسب لو بنفس المواصفات دى

[amr elsisi]

حرام عليك بالمبلغ دة تركب مستعمل

[David Micheal]

كمل عليها و خليها 140 وهاتلك شارك احسن ولا بيجو 301

انا معايا بومه و زي الفل و كل حاجة بس خلاص قدمت و راحت عليها و كمان الموديلات الجديده ديه العفشه بتاعتها مش حلوه زي الموديلات القديمه بيحطولها عفشة ال 1300 من غير عمود اتزان وراه
والفتيس اتوماتيك عادي ستبترونيك مش cvt زي موديلات 2007 و 8 و 9

[J A G U A R]

شوف شارك فئه اولى افضل

[Omar Mahmoud]

واضح انه بيحلم
الشارك اول فئة ب136000 و ده بيبيع ب 135000
انا لو مكانك يا اشتري شارك او بيجو 301

[hhhhhm]

حرام عليك بالمبلغ دة تركب مستعمل

+1111111111111111111111111111111111111111111111111 1111

[bougee]

والله ياجماعة السوق كله بقى بيستهبل
الجديد نازل كله عيوب إلا العربيات العاليه قوي زي ال bmw والمرسيدس .. الخ من الموديلات الهاي كلاس
وماعدا ذلك التوكيلات بقت بتستهبل وتنزل عربيات ورق وتقريبآ فرز رابع وخامس ...

إيلي خلاني أدور على عربية قديمة شوية أو كسر الزيرو إني مش عارف ألاقي في موديلات 2014 حاجه من غير مشاكل في التصنيع أو توكيلات محترمه ...

يعني البيجو 301 كلها عيوب وفرامل بتهرب وكرسي تيجي ترجعه لوره يتكسر وحاجات بجد وحشة خالص .. حتى وإن كانت حالات قليلة بس ظاهرة وفي شهور قليلة من ساعة ظهور العربية ..

والفلوانس تلاقي التقفيل الداخلي فيه بعض العيوب ومذكورة في قسم الرينو ...

وتبص على التويوتا تلاقي التوكيل بيتعامل مع بعض العملاء على أساس إنهم مش فاهمين أي حاجة .. عندنا عربية أفانزا فيها عيب فتيس ومرميه في التوكيل بقالها شهرين ولسه بيقولوا انهم بعتوا يطلبوا قطع الغيار من بره ولسه مافيش رد ... على أساس إن التوكيلات بتصلح بالقطعه مثلا ..

ونزلت بصيت على الأتراج في معرض من يومين ... حسيت إني قاعد جوه طشت غسيل بلاستيك وللأسف بكام ؟ 113 ألف جنيه وثلاثه سلندر و1200 سي سي ..

وفي بعض العربيات الزيرو تلاقي الزيت بينقص لوحدو وعربيات تانيه تلاقي الفتيس بيعلق وإنته ماشي وشغل سحر كده وكلام مبتدئين

بصراحة .. الواحد يسافر بره يشتري عربية ويرجع يدفعلها الجمارك ويريح نفسه من هم العربيات المصنعه خصيصآ للسوق المصري دي

أنا في حيرة من أمري ومش عارف أشتري أيه وبكام بس يكون

- عربيه إعتماديه
- توكيل محترم
- والعربية تكون مصنوعة للبشر ( مش للكتاكيت ) مع كل إحترامي للكتاكيت لحسن يزعلوا وتبقي أزمة فراخ :)

[S O P H O S]

لا تشتري زيرو احسن

[bougee]

لا تشتري زيرو احسن

إتصلت بصاحب السيارة وقالي إنها إتباعت خلاص

أشكركم جميعآ

وأشكر كل عضو شاركني بالرأي والمشورة

وكل عام وحضراتكم جميعآ بخير