هل الأتراج هي الميراج

[kar!m]

السلام عليكم ورحمة الله

دلوقتي أنا كل ما أدور في ويكيبيديا على ميتسوبيشي أتراج يطلع لي ميتسوبيشي ميراج !

طول عمرنا عارفين ان الميراج من العربيات الجامدة وناس كتير كانت بتعدل اللانسر بتاعتها لميراج .. حتى في اعلانات العربيات تلاقي اعلان مكتوب فيه "لانسر معدله بالكامل لميراج" دليل على ان العربية جامدة.

ده شكل الميراج و اللي ناس كتير كانت بتعدل عربياتها ليه



Mitsubishi Mirage - Wikipedia, the free encyclopedia

اللي مكتوب في ويكيبيديا ان الجيل السادس من ميتسوبيشي ميراج اسمه أيضا ميتسوبيشي أتراج أو ميتسوبيشي ميراج G4 .. و هي مصنوعة في تايلاند اعتمادا على الموديل الهاتشباك و موتورها 1200 سي سي.









يعني نفس العربية اللي في مصر بتنزل بره ميتسوبيشي ميراج

ده على كده العربية دي جامدة جدا واحنا مش حاسين

[hesham fawzy h]

صعب بيتهيالى

لو بتنزل برة باسم ميراج و نزلوها فى مصر باسم اتراج .. دة يبقى قمة فى الغباء .. لان ميراج اسم معروف جدا
واسم العربية هيسوقلها

[Mo.Alaa]

اتراج : دى النسخة السيدان ودى اللى بتنزل مصر

ميراج : النسخة الهاتشباك من الاتراج و دى مبتنزلش مصر

يعنى بره مصر فيه ميراج ( هاتشباك ) و اتراج ( سيدان ) انما فى مصر الاتراج بس

[ZOoOoMA]

اتراج : دى النسخة السيدان ودى اللى بتنزل مصر و لكن ميراج : النسخة الهاتشباك من الاتراج و دى بتنزل مصر برضو بس لسه منتشرتش

[NaderNabil]

ببساطة الميراج هي الهاتشباك و الاتراج هي السيدان و كنت شوفت في فيديو تقييم للاتراج ان غالبا اسمها جاي من Attractive Mirage = Attrage

الاتنين موجودين في مصر بس الميراج على ما اتذكر الرواس هو اللي جايبها و ماشوفتهاش في الشارع غير مرة واحدة

و دول ملهمش علاقة تماما بالميراج القديمة اللي هي اصلا كانت اللانسر الامريكاني

[kar!m]

ببساطة الميراج هي الهاتشباك و الاتراج هي السيدان و كنت شوفت في فيديو تقييم للاتراج ان غالبا اسمها جاي من attractive mirage = attrage

الاتنين موجودين في مصر بس الميراج على ما اتذكر الرواس هو اللي جايبها و ماشوفتهاش في الشارع غير مرة واحدة

و دول ملهمش علاقة تماما بالميراج القديمة اللي هي اصلا كانت اللانسر الامريكاني

ازاي مالهمش علاقة؟ اذا كان كلهم بنفس الاسم بس بأجيال مختلفة.
يعني زي ما حضرتك قلت .. الأتراج الموجودة حاليا هي النسخة السيدان من الجيل السادس من الميراج اللي كانت بتنزل زمان .. يعني هي هي نفس العربية .. يبقى ازاي مفيش علاقة بينهم و بين بعض؟

[Mo.Alaa]

بعد إذن صاحب الموضوع ...

الميراج بتنزل مصر ؟؟ ممكن لو حد عنده فكرة عن سعرها و الاوبشنز اللى فيها يقولى ؟

[memo_p910]

المييراج موجوده عند الرواس ب 103 وعربيه جامده بصراحه

[Mohamed.Ramah]

العربية فى فئة تويوتا ياريس هاتشباك والتعتبر أكبر من الميراج فى الابعاد الخارجية

مواصفات السيارة :
المحرك :
1.2 - 3 سليندر - 78 حصان

ناقل الحركة : cvt

التجهيزات الاساسية :

باور ستيرينج
4 زجاج كهربائى
مكيف هواء عادى
مقود متعدد المهام
قفل مركزى مع خاصية تحكم عن بعد
النظام السمعى :مشغل إسطوانات سعة 6 cd + mp3 + aux
الجنوط رياضية قياس 14 بوصه
تحكم كهربائى فى المرايات الجانبية
abs متوفر مع ebd
وسائد هوائية 1 للسائق

الابعاد :

الطول 3710 مم
العرض 1665 مم
الإرتفاع 1490 مم
قاعدة العجلات 2450 مم
الوزن الصافى 855 كجم
سعة خزان الوقود 34 لتر

السعر : 116.000 جنية

[kar!m]

طيب ده يؤكد كلامي ان الاتراج دي النسخة السيدان من الجيل السادس من ميتسوبيشي ميراج .. يعني عربية تاريخها حلو و معروف.

أنا شايف ان الناس بس قلقانة من موضوع 3 سلندر .. و لو الناس تفتكر زمان كانت العربيات الأمريكاني كلها 8 سلندر .. و بعدين الثقافة اتغيرت بعد الحرب العالمية التانية و السوق طلب ان العربيات السي سي بتاعها يقل.

مين عارف .. يمكن بعد عشر سنين ولا حاجه نقول فاكرين لما كنا بنركب عربيات 4 سلندر :-)

[NaderNabil]

ازاي مالهمش علاقة؟ اذا كان كلهم بنفس الاسم بس بأجيال مختلفة.
يعني زي ما حضرتك قلت .. الأتراج الموجودة حاليا هي النسخة السيدان من الجيل السادس من الميراج اللي كانت بتنزل زمان .. يعني هي هي نفس العربية .. يبقى ازاي مفيش علاقة بينهم و بين بعض؟

اللي انا أقصده ان الفلسفة التصميمة بتاعة الأتراج و الميراج الجداد ملهمش علاقة بالميراج القديمة...

الميراج القديمة كانت هي اللانسر اللي عندنا بس بمواصفات أمريكي...يبقى لو بنفس المنطق...الميراج الجديدة تبقى النسخة الأمريكي من اللانسر ex هاتشباك مثلا.

لكن اللي عملته ميتسوبيشي انها أخدت الاسم الناجح بتاع الميراج و حطته على عربية صغيره كنوع من التسويق و جزب الزبائن

[مؤمن حمزه]

الاتراج هى الميراج الهاتشباك بس دى النسخه السيدان منها.....الميراج عربيه ممتازه و محققه مبيعات خرافيه فى دول كبيره زى امريكا بسبب قوتها و قوة موتوروها و فتيسها المتطور فى نفس الوقت استهلاكها الرائع للبنزين....الاتراج ايضا بنفس الروعه و احسن كمان...عربيه محترمه

[kar!m]

الاتراج هى الميراج الهاتشباك بس دى النسخه السيدان منها.....الميراج عربيه ممتازه و محققه مبيعات خرافيه فى دول كبيره زى امريكا بسبب قوتها و قوة موتوروها و فتيسها المتطور فى نفس الوقت استهلاكها الرائع للبنزين....الاتراج ايضا بنفس الروعه و احسن كمان...عربيه محترمه

أنا كنت فاكر انها نازلة كعربية صغيرة تنافس في الأسعار القليلة .. زي اللوجان كده لما شركة رينو نزلتها .. انما أنا كده أخدت بالي انها عربية ممتازة .. و بصراحة تستاهل تمنها عن جدارة.

[horas3000]

الميراج كان اسم اللانسر الكريستاله في امريكا
و بعد كده وحدوا اسم لانسر من اول البومه

فاسم ميراج مش مشهور و لا معروف الا في امريكا
فلما ميتسوبيشي قررت تنزل عربيه هاتش باك صغيره قالوا يستغلوا الاسم و نزلوها بيه في العالم كله بما فيه امريكا
الاتراج بقي هي النسخه السيدان منها و دي مش بتنزل لكل دول العالم فعشان كده اغلب النتائج هتلاقيها من اسواق شرق اسيا او منطقتنا

[Moh. Aboraia]

اللينك ده هيجاوبك على كل حاجة وبيشرح مميزات وعيوب العربية ... واحشنى والله يا كريم

https://www.youtube.com/watch?v=MrkvExIUm8E