التقييم المبدئي للانسر شارك 2014

[mhmd_farouq]

بسم الله ... ده تقييم مبدئي للشارك 2014 الفئه الثانيه موتور ماييفك 1600 سي سي

تقييم مبدئي ... مع العلم تجربتي قياده السيارات الاتيه ( بي ام اكس 1 ... النترا الشكل القديم والجديد ... اكسنت ار بي وماتريكس .. لانسر بومه كانت عندي ... كورولا 2009 و 2014 ... نوبيرا ولانوس .. كيا برايد .. سيريون .. ابيزا 2009 .. نيسان صني.. لادا الحبيبه .. ) مش فاكر الباقي اوي .. مع العلم اني سوقت العربيات لمسافات ومدد طويله جداا مش قصدي حاجه ده عشان اقولكو التقييم جه ازاي

فالتقييم هيكون على اساس القياده السابقه للسيارات المختلفه مع اضافه بعض الاراء على تقييم الاعضاء السابقين

نبدأ بالمميزات... العربيه ماشاء الله كا تقييم كامل ممتازه ..

- الثبات رائع .. تحس انك سايق عربيه تثق فيها مع انها عاليه بس عفشتها وتقلها محسسينك انك سايق حاجه من ريحه الايفو.. الدركسون ثابت جداا حتى على السرعات العاليه اتزان ممتاز

- التسارع .. والله انا في فتره التليين بس بحب اقرص عالمكنه من الوقت للاخر عشان افتح الموتور .. التسارع في اوله مش بطال ( مش سوبر ) بس مرضي جداا ... فوق ال 60 كيلو العربيه بتفتح معاااك يا ريس وولا اكنك سايق طياره.. االمفروض الار بي ام ميعلاش عن 3 والسرعه القصوه 90 كيلومتر ( معاك لحد 120 كيلومتر فى فتره التليين )

- الهاندلينج بتاع السياره فوق الممتاز . كان احد الاعضاء كاتب ان الباور تقيل بس انا محستش بكده .. الدركسيون استجابته ممتازه ما شاء الله

- التكييف ممتاز .. في التليين برضه لا يفضل انك تفضل مشغله بس انا بحب اجرب كل حاجه عشان اطمن .

- العدادات شكلها رياضي جميل تحسسك برضه انك راكب ايفو

- الشكل الخارجي شرس ذو طابع رياضي بحت

- الصالون واسع والتابلوه مش بطال ..

- تحس وانت بتقفل الباب انك بتقفل عربيه الماني محترمه ..

- الفرامل كويسه جداا بالذات معا ال abs وال ebd

- الفتيس مرن سهل التعامل . والنقل بين التروس مرن ومبتحسش بيه

- العدادات بتنور بلون احمر .. فيه ناس قالت انه مزعج وناس قالت انهم متعودين انه لون تحذيري .. رايي الشخصي انه مش مدايقني اوي .. ممكن تتجاهله لو مركز في الطريق

- العربيه عاليه جدااا .. تاخد اي مطب وانت مستريح حتى لو معاك اوزان .

- العفشه قويه جداا .. وانا شايفها مش بطاله يعني مش ناشفه انها تدايقك في الركوبه .. فيه ناس اشتكو انها ناشفه .

- السياره ممتازه بالنسبه للفئه السعريه بتاعتها .. سعر اعاده البيع هيرجع كويس انشاء الله لانها انتشرت بشكل غير عادي في الشوارع

نييجي بقا للعيوب .. بعضها زي مالساده الاعضاء قالو .. والبعض حسب رأيي الشخصي

- الشنطه ضيقه بسبب وسع الصالون .. بس مش لدرجه انها تعملك ازمه

- الرؤيه الخلفيه صعبه شويه عشان الشنطه عاليه حبتين

- العزل وحش فعلا .. بتسمع الاصوات اللي حواليك .. وممكن تسمع صوت الموتور بتاعك ( بس ده ميزه ليا عشان احس بقوته )

- كنت متعود اسيب البومه على وضعيه ال N واشيل المفتاح طبعا هنا مينفعش ( حال عربيات اتوماتيك كتيير ) هي الفكره ان عندي في الشغل بسيبها مموره للسايس عشان مبحبش اسيبله المفتاح .. بس هما عملينها حمايه للعربيه ( مش مشلكه كبيره يعني )

- لو افتكرت عيوب تانيه هكلمكو عنها انشاء الله .. العربيه مكنتش واخده حقها فى السوق عشان الموتور ال 1500 سي سي القديم مكنش كويس ..

ده تقييم مبدئي وانشاء الله هكمله ..

شكرااا جزيلا .

[semsem5144]

ربنا يبارك لك في العربية , تقييم في نظري صح 100 %
اللي يعيب الشارك قلة كماليتها بالنسبه للعربيات المنافسه واحنا في 2014 , بس مع فرق السعر لصالح الشارك
فلو حد عاوز يركب عربية مميزه بمعنى الكلمه يشتري شارك هاي لاين ويزود عليها بعض الكماليات البسيطه زي الزينون والباركينج سينسور والسوند سيستم , بدي كيت ايفو مع جنط 18 وكاوتش طري زي اليوكوهاما اللي بيقلل مشكله العزل الارضي بنسبة كبيره , كل ده هيكلف في حدود 20-25 الف لو كل حاجه اصلي يعني برضو العربية تحت ال 200 الف وهتكون احسن من اي عربية بتنافسها .

[mhmd_farouq]

ربنا يبارك لك في العربية , تقييم في نظري صح 100 %
اللي يعيب الشارك قلة كماليتها بالنسبه للعربيات المنافسه واحنا في 2014 , بس مع فرق السعر لصالح الشارك
فلو حد عاوز يركب عربية مميزه بمعنى الكلمه يشتري شارك هاي لاين ويزود عليها بعض الكماليات البسيطه زي الزينون والباركينج سينسور والسوند سيستم , بدي كيت ايفو مع جنط 18 وكاوتش طري زي اليوكوهاما اللي بيقلل مشكله العزل الارضي بنسبة كبيره , كل ده هيكلف في حدود 20-25 الف لو كل حاجه اصلي يعني برضو العربية تحت ال 200 الف وهتكون احسن من اي عربية بتنافسها .

الله يبارك في حضرتك يا باشا .. هيا كانت مظلومه اوي مع الموتور القديم وانشاء الله تاخد فرصتها .. مشكووور يا باشا الله يكرمك .

[mhmd_farouq]

تكمله للعيوب .
- الاناره داخل المقصوره ضعيفه
- مفيش مخرج usb في الفئه التانيه
- مفيش مسند للسائق

[Hamada524]

مبرووووووووك يا باشا ماقلتلناش جيبتها لونها ايه في الاخر؟؟....

وانا اتفق معاك في اغلب الي قلته فعلا... وعلى فكرة انا برده بعشق صوت الموتور.. وده بيبقى مقصود اصلا في عربيات كتير انه يوصل للسائق خصوصا لو صوتها جميل زي العربية دي..

[mhmd_farouq]

مبرووووووووك يا باشا ماقلتلناش جيبتها لونها ايه في الاخر؟؟....

وانا اتفق معاك في اغلب الي قلته فعلا... وعلى فكرة انا برده بعشق صوت الموتور.. وده بيبقى مقصود اصلا في عربيات كتير انه يوصل للسائق خصوصا لو صوتها جميل زي العربية دي..

الله يبارك في حضرتك .. اللون فضي الحمد لله بعد بحث استمر شهرين .. كان نفسي في الفيراني بس ملقتش غيره .. الحمد لله اتعودت عليه ومبين شكل العربيه.. مشكووور حماده باشا .

[S O P H O S]

صوت الماتور دايما بشوفه ممكن يكون ميزة مش عيب
ربنا يباركلك فالشارك يا باشا

[mhmd_farouq]

صوت الماتور دايما بشوفه ممكن يكون ميزة مش عيب
ربنا يباركلك فالشارك يا باشا

الله يبارك في حضرتك والله انا بحب اشوف مشاركات حضرتك في كل المواضيع، وفعلا زي ما حضرتك قلت صوتها العالي من احلى الحاجات اللي فيها تسلم يا باشا

[S O P H O S]

ربنا يبارك فصحتك علي زوقك
واخلاقك الطيبة