حد عندة فكرة عن اسعار اللانسر الحالية

[اسامة عبد العزيز جابر]

السلام عليكم
ياترى حد عندة فكرة تقريبا عن سعر الموديل super action فى مصر كام
انا لسة جاى من عند العيسائى (توكيل لانسر فى جدة) وشفت هناك المويلات الموجودة ولاحظت الأتى:
درجة الألوان مش هى نفس الدرجة الى بتنزل فى مصر رغم انها نفس الدرجة اللى فى الكتالوج (بالنسبة لللأزرق هنا افتح من مصر) العربية ال 1600 automatic لا تحتوى على جنوط ولا على air bags ولكن تحتوى على فتحة السقف والسبويلر وانا كدة مش عارف تصنف تحت اى نوع فى مصر المهم تمنها 51000 ريال وانت وشطارتك ممكن تنزل حاجة بتاع 5000 - 7000ريال وواحد قال لى انة لسة منزلها قال انة دفع عليها 45000 جنية جمارك يعنى بحسبة بسيطة العربية تقف بحوالى 110000 -113000 تتباع أزاى فى مصر (الكويتى بنفس مواصفات ال super action) ب 107000 شاملة air bags وجميع الكماليات انا مش عارف اجبها من هنا وانزل بيها ولا اشتريها من مصر.
نسيت اقول ان قوة المحرك 122 حصان فهل هى نفس قوة العربية اللى بتتباع فى مصر
شكرا جزيلا على اهتمامكم للرد
اخوكم
اسامة عبد العزيز :roll:

[Dr Ahmed]

يا دكتور أسامة هات العربية من مصر.. مصر فيها الخليجى بأنواعه والمصرى ومش هتحتار، وارحم نفسك من تعب الشرا من هناك والشحن والجمارك والترخيص وخلافه...
اللانسر هى هى فى كل مكان فى العالم وكل الاختلافات شكلية...

تيجى بالسلامة

[Nader]

بس اعتقد ال1600 الهنا في مصر مش 122hp مش عارف اعتقد ان دة ممكن يكون لة علاقة بالكومبريشن راشيو بتاعت البنزين (95 مثلاً). اعتقد ارخصلك واضمنلك تجيبها هنا من مصر بدون وجع دماغ وشحن وجمارك.

[اسامة عبد العزيز جابر]

انا معاك فى كدة يا دكتور احمد لكن انا اصلا كنت متردد كتير فى الشراء وخايف لو استنيت لحد مانزل فى الأجازة ان شاء الله اكون غيرت رايى اصلك ماتعرفنيش ممكن اغير رأييى فى موضوع العربية دة 10 مرات فى اليوم يعنى من شوية فكرت تانى فى الأسبرانزا 2000 وانا كنت رسيت على اللانسر بعد سنة تفكير وبمساعدة بعض الأخوة فى كونتاكت مثل الأستاذ شريف المصرى و المهندس حسام منير
اخوك
اسامة عبد العزيز :roll:

[اسامة عبد العزيز جابر]

الف شكر استاذ نادر
بس السبب هو انى عاوز اخلص من الحيرة فى الشراء قد يكون سبب مش مقنع لكن اللانسر عربية اعتقد الواحد مايندمش على شرائها
اخوك
اسامة عبد العزيز :roll:

[Nader]

اتفق معك يا استاذ اسامة انك مش هتندم على شرائك لللانسر بس من لانسر لاسبرنزا اعتقد دى حاجة صعبة اوي خاصاً لو بتقارن يباني بصيني. بس انا عاوز اوضحلك برضة ان المقارنة بغض النظر عن كون ان الاسبرنزا صيني هتكون ظالمة للانسر 2000cc بكماليات كثيرة جداً امام 1600cc بكماليات اقل كثيراً. بص من ناحية الانتشار وتوافر قطع الغيار وسهولة الصيانة --داخل وخارج التوكيل-- هتكسب اللانسر باكتساح اما اذا كنت تميل الى الفخامة وعايز --برستيج-- فانت عارف هتختار اية!!

[اسامة عبد العزيز جابر]

الف شكر نادر باشا
يبقى خلينا فى اللانسر وخلى الحكومة تشتريها وامرى لله بعد 20 سنة جواز يبقى كل اللى بأسمى هو الرقم القومى وجواز السفر
اهو احسن من مافيش :lol: :lol: :lol: :lol:
اخوكم
اسامة عبد العزيز :roll:

[Dr Ahmed]

يبقى خلينا فى اللانسر وخلى الحكومة تشتريها وامرى لله بعد 20 سنة جواز يبقى كل اللى بأسمى هو الرقم القومى وجواز السفر
اهو احسن من مافيش :lol: :lol: :lol: :lol:
:roll:

ربنا يخليكو لبعض يا دكتور..
فيه بس حاجة أخيرة: موديلات اللانسر الجديدة نازلة ان شاء الله فى الربع الأخير من السنة .. يعنى لو مش مستعجل ممكن تستنى لحد ماينزلوا وهتبقى 2007 و 2008 موجودين ، انما لو مش عاجبك الشكل الجديد أو مستعجل يبقى برضه مش هتندم على شراء أى لانسر بإذن الله..