تقرير مبدئى عن لانسر شارك 2016

[Fadi Ezzat]

تقيمى للانسر شارك 2016 فءة تانية شرق اوسط
المسافة المقطوعة 150 كيلو
ايوة 150 كيلو مش 150 الف
انا هبتدى التقرير بناءا على عدة عربيات بتوعى مش شارك بس
اسكودا اوكتافيا بعتها
مرسيدس c200 2004 معايا
لانسر سوبر اكشن بعتها
بى ام دبليو e46 2004 بعتها
نتكلم على الشارك بقى ماشاء اللة عليها جميلة جدا بالنسبة لفءتها السعرية وهيا احسن عربية فى الفءة دى
ثباتها جميل جدا بس مش زى مالناس بتوصف يعنى فوق الخيال وتمشى 190 وتاخد غرز ضيقة اوى والكلام دة
لا هيا ثابتة جدا بس خفيفة شوية من ورا ممكن تعمل under steer خفيف فى الملفات الشديدة جدا ودة علاجة سهل
جنوط 17 وكاوتش 225/50/17 ويكون traction AA
السحب جميل بعد 100 ودة مش علشان الماتور 500 حصان لا دة علشان الفتيس اربعة غيار فبعد المية انتا على الغيار الرابع فهتاخد اقصى باور واعلى تورك على غيار واحد مش اكتر
بالنسبة للعزل الى الناس كتير ظالماة انا شايفة كويس جدا
اة ممكن يكون صوت الكاوتش عالى شوية بس مش للدرجة بس بردة صوتة عالى لانة فءة sport
ودة على فكرة comfotable بتاعة هيبقى قليل شوية و db هيبقى معدى 70 ديسبل
لكن كمجمل كويس مش وحش
صوت الماتور كويس مش عالى للدرجة
العفشة مريحة جدا ومش عايز حد يقول دى ماكفيرسون ودة مالتى لنك ان شاللة تبقى ماشية على قرب انا ماليش دعوة
طالما الثبات عالى والعفشة مريحة
التكييف حلو جدا من اول لما تشغلة بصراحة انا علشان على كول راكب المانى اتبسطت جدا جدا بية
نقدر نلخص التقرير فى الاتى
مميزات
ثبات عالى 7.5 من 10
عفشة 9 من 10
سحب 8 من 10
عزل 7.5 من 10
العيوب
الشنطة بس هيا مش ضيقة لكن ارتفاعها قليل ودة ممكن تعالجة بانك تشيل الاستين وتجيب الاستبن الرفيع من الحرفيين وبعد كدة تشيل الفبر الزيادة الى هما خاطينة ودة بمفك صليبة وكام مسمار وشكرا
وتنزل الفرش مباشرة على الشنطة
وعلى فكرة الشنطة ارضيتها اصلا عالية علشان العربية برة مجهزة تبقى دفع رباعى ففى مكان للكرونة وعمود الكردان
الاكصدمات ورا وقدام طرية جدا وضعيفة اوى
يعنى لو كد دخل فيك ورا او قدام شكرررا
ودة بقى علاجة فوم بيتحط ورا الاكصدامات
او تجيب فوم مضغوط وتعملة ورا الاكصدامات بس مش مسئول عن النتائج لو حد مبيعرفش يستخدمة
الثبات ممكن يزيد شوية بالطريقة الى قولتها 225/50/17
دة بصراحة الخلاصة فى المشوار الى رحتة
ويارب اكون افدتكم واى استفسار انا تحت امركو
م.فادى عزت

[salahudin solt]

تسلم ياكبير

[ابو ياسمين]

تقرير احترافى من الدرجة الأولى

تسلم ايدك

والف مبرووووووووووووووووووك

[abou-yahia]

تقليل الضغط للكاوتش الخلفي
حيساعد

[monamize4]

ربنا يباركلك فيها و يحفظها

هيا احسن عربية فى الفءة دى

انت قصدك ف الفئة السعرية دى ? و لا قصدك ايه بالظبط ?

[د.هشام]

تحياتي ليك، اللي يطلع تقرير دقيق كده من 150 كيلو سواقة بس، يبقى واحد محترف.
العربية فعلا رائعة، النهاردة جريت بيعا على 180 بس أقل من دقيقة، العربية كانت ما شاء الله ماسكة في الأرض وتدي إحساس انك ماشي على 120 مش 180. وطبعا مش فاهم يعني ايه understeer

[Eslam.Elrefaey]

ممكن تقارنها بالعربيات الى انت بعتها او لسه معاك

[Galnaza]

استاذ فادى انت فعلا راجل محترف و محترم جدا فى تقريرك خصوصا لما عرفت ان حضرتك جربت كذا موديل و من ضمنهم المانى .. تحياتى ليك

[khaled edrise]

انهه افضل من وجهة نظرك استاز فادي بما انك خبير و تحليلك ممتاز بروتون بيرسونا ولا شارك بس ياريت تديني المقارنة بشكل يبتعد عن ده ياباني و ده ماليزي يعني عربيه اصاد عربيه

[Fadi Ezzat]

تحياتي ليك، اللي يطلع تقرير دقيق كده من 150 كيلو سواقة بس، يبقى واحد محترف.
العربية فعلا رائعة، النهاردة جريت بيعا على 180 بس أقل من دقيقة، العربية كانت ما شاء الله ماسكة في الأرض وتدي إحساس انك ماشي على 120 مش 180. وطبعا مش فاهم يعني ايه understeer

حبيبى ربنا يخليك
understeer
يعنى العربية تتزحلق من ورا

[Fadi Ezzat]

ممكن تقارنها بالعربيات الى انت بعتها او لسه معاك

صعب تتقارن ب46 وc200

[Fadi Ezzat]

انهه افضل من وجهة نظرك استاز فادي بما انك خبير و تحليلك ممتاز بروتون بيرسونا ولا شارك بس ياريت تديني المقارنة بشكل يبتعد عن ده ياباني و ده ماليزي يعني عربيه اصاد عربيه

بصراحة انا مركبتش بيرسونا بس كشكل
الشارك افضل وكاعادة بيع الشارك افضل طبعا

[miam0502788391]

تسلم ايدك
تقرير جميل
بس ايه رأى حضرتك فى جودة الخامات الداخلية والصالون لأن فى ناس بتشتكى انها مش بجودة الموديلات الاولى من الشارك 2008-2009

[Fadi Ezzat]

هيا مش جلد للاسف بس اخمات كويسة
بالنسبة ل 2008 و 2009
مشفتش خاماتها الحقيقة

[د.هشام]

الفئات الاعلى في الشارك فيها الفتيس والدريكسيون جلد، أبانوس اسود في التابلوه والابواب، اكر نيكل، فرش جلد في الابواب، والتابلوه فيه منه اسود وفيه لونين اسود وبيج.