سعر الاكصدام و فوجات زينون لانسر بومة

[sheerin91]

عايزة اسال عن سعر الاكصدام الاصلى وللى مش اصلى ؟
وعايزة اركب فوجات زينون عايزة اعرف الاصلى بكام وللى مش اصلى ؟
وعايزة عن فوانيس الشبورة ايه الفايدة منها انا سالت ف المتخصصين هيعملى فوانيس شبورة والفوجات دية 1500 ج بيقولى اصلى الكلام ده صح ؟؟

[AlphaCharlie]

الاكصدام الأصلي من 750 الي 1500 حسب الحالة والموديلات سواء كانت كلاسيك أو سوبر اكشن.
والي مش اصلي 250 جنيه. تايواني
الفوج الأصلي الواحد 1500 جنيه. والصيني اللتنين 350 جنيه بالكتاوت والضفيرة والفيش واللمبات. وانصح بالصيني لأنه اشيك واعرض ونوره أقوى وطبعا ثمنه حلو.

الزينون يبدأ من 300 جنيه حسب النوع لحد 1000 جنيه لكن أبو 300 شغال.

فائدة الفوج هو إضاءة اسفل السيارة أو الجزء الي أمام اسفل السيارة مباشرتا بدون مضايقة المعاكس بالنور الكبير. وأيضا من اسمه باستخدام الشبورة لأن اضائته قوية.

[lancer06]

السلام عليكم ورحمة الله وبركاتة
مرحبا أختى الكريمة
أكصدام الانسر البوما تايوانى الصنع (يعنى مش أوريجينال)
سعرة 260 جنية وبيجى لونة أسود وبيترش لون العربية
الأكصدام المستورد سعرة بيبقى غالى شوية تقريا 1100 جنية
وبرضة هيترش لأنك مبتقدريش تتحكمى فى درجة اللون لأنة بيكون مفكوك من عربية متقطعة يعنى بيستوردو نص عربية وبيفكو منها قطع الغيار اللى تنفع تتباع
ولو جة نفس لون العربية فممكن يكون أغمق درجة او افتح درجة أنتى وحظك
وظيفة فوانيس الشبورة انها بتنور قدامك مسافه قريبة بتقدرى تكشفى بيها الطريق من غير ما تأذى اللى قدامك بالنور العالى والواطى ولأن مكانها تحت بتكشف أدق التفاصيل فى المسافة اللى قدامك زى الصورة اللى ضفتيها
فوانيس الشبورة اللى فى الصورة أسمها فوجات عريضة لان فى نوع تانى زى اللى بيجى مع العربية بيكون مدور وصغير
فوانيس الشبورة التايوانى والصينى بتعمل 320 جنية
المستورد اللى موجود الصغيرة مش الكبيرة
ودى معرفش سعرها
الزينون فى منه انواع كتيرة من 200 جنية و 300 وفى ماركات اغلى من كدة بكتير

[sheerin91]

هى مقصات العربية ليها مدة معينة عشان تتغير ؟ عربيتى لانسر بومة
والمقصات اسعارها ايه ؟ وتيل الفرامل بكام ويتغير بعد اقد ايه؟
وليه الزينون بسعر والفوجات بسعر واشتريهم منين انا من القاهرة وشكرا ع المساعدة

[lancer06]

هى مقصات العربية ليها مدة معينة عشان تتغير ؟ عربيتى لانسر بومة
والمقصات اسعارها ايه ؟ وتيل الفرامل بكام ويتغير بعد اقد ايه؟
وليه الزينون بسعر والفوجات بسعر واشتريهم منين انا من القاهرة وشكرا ع المساعدة

المقصات ملهاش وقت محدد لأنها على حسب الأستخدام وظروف الطرق اللى بتمشى فيها العربية
يعنى لو طرق مكسرة مبتعش كتير ولو طرق سلسة ومعتدلها عمرها هيكون اطول
علشان تعرفى المقصات فيها مشكلة ولا لأ
خلى ميكانيكى عفشة يشوفها
او لو عندك صوت تزييق او تخبيط فى الطرق الخشنة او المكسرة يبقى فى احتمال المقصات يكون فيها مشكلة
سعر المقصات التايوانى للطقم الأمامى 270 جنية
-----------------------
بالنسبة للزينون فهو عبارة عن جهاز بيركب فى العربية بيبقى واصل للفوجات
او للفوانيس
اللمبات بتاعتةأضاءتها زى البرق
يعنى الفوجات دى هى الفوانيس اللى بتركب فى اكصدام العربية من تحت
والزينون اضافة ليها بدل اللمبات الهالوجين ( اللمبات الصفراء )
اى مكان بيبيع اكسسوارات واضاءه هتلاقى عندة اجهزة الزينون
ويفضل الكهربائى اللى هيركبة تسأليه على الماركات المتداولة اللى مشاكلها قليلة قبل ما تشترى

[AlphaCharlie]

هو السؤال ليه الزينون؟ هل نور العربية ضعيف؟ لا أظن لأن معايا لانسر ونورها رائع.

لو النور ضعيف يبقى الفوانيس مش أصلية أو محتاجة تتظبط. او اللمبات تعبت محتاجة تتغير. وفي الحالة دي يبقى غيري بنوع كويس زي فيليبس حتلاقي الموضوع اختلف تماما.

اما لو انت من النوع الي بيسافر كتير علي طرق سريعة بالليل يبقى ممكن.

عموما انا رأيي ركبي الفوج لايت الأول وبعدين لو لقيتي النور مش عاجبك ابقى ركبي الزينون.

[AlphaCharlie]

وبالنسبة للتركيب علي حسب مكان حضرتك.
في أدريان مثلا ليه أكثر من فرع في أماكن كتيرة.

[sheerin91]

عايزة مكان مضمون يكون العنوان بتفصيل عشان اقدر اوصل للمكان اركب فيها الفوج لايت وشكرا ليكم