باركولي .. اشتريت لانسر عيون صفية

[رجل المستحيل]

باركولي .. اشتريت ميتسوبيشي لانسر عيون صفية 1991 نبيتي 1300 مانيوال مواصفات خليجية مكيفة بعد صلاة الاستخارة .. وسافرت بيها من محافظة لمحافظة تانية بعيدة في تاني يوم استلمتها ومحصلش حاجة, زي الفل =d .. والركاب كانوا سعداء وبيغنوا: الحياة حلوة للي يركبها =d

أخوكم سواق قديم, لكن دي أول عربية أشتريها في حياتي من حر مالي من شغلي .. لكني لا أعلم, ومن قال لا أعلم فقد أفتى .. أنا المفتي =d ومحتاج نصائحكم ورأيكم في لانسر عيون صفية بكل صراحة .. والعربية مريحاني جامد جدا بصراحة (الله أكبر .. اللهم صللي على النبي .. ما شاء الله لا قوة الا بالله) هيا محتاجة شوية سمكرة ودوكو بس .. ولما ربنا يكرم ان شاء الله ممكن أغير وأجيب كريستالة أو قرش لو ربنا كرمني أوي ان شاء الله, لأني عاشق الميتسوبيشي لانسر حتى النخاع

ورأيكم: هل أنا كده صح اني اشتريت لانسر عيون صفية ولا كنت اشتريت سوزوكي سويفت أو بروتون ويرا موديل 2000 ؟؟ مع العلم بأن العربيات دي كلها في نفس مستوى السعر, لكني فضلت لانسر عيون صفية لعدة عوامل .. وارجو عدم المقارنة بعربيات أخرى غير اللي ال 3 دولت .. والشكل والتصميم الخارجي هو أيضا أحد وجوه المقارنة الهامة .. هل سوزوكي سويفت أنعم من عيون صفية مثلا, هل تكييفها أقوى, هل تكنولوجيتها أحدث

كل واحد يقوللي رأيه .. وليه قال الرأي ده .. ونتقانش ونستفيد كلنا

[mo"men]

بقولك ايه
انا معنديش اجابة علي اي حاجة علشان معرفش بس
انا داخل اقولك الف مبروك و ربنا يديك خيرها و يكفيك شرها و يحفظك
السلام عليكو

[khaled edrise]

الف مبروك و يارب تستمتع بيهه و تكون وش السعد عليك

[رجل المستحيل]

بقولك ايه
انا معنديش اجابة علي اي حاجة علشان معرفش بس
انا داخل اقولك الف مبروك و ربنا يديك خيرها و يكفيك شرها و يحفظك
السلام عليكم

الله يبارك فيك .. الله يكرمك .. مجرد مشاركتك بس لوحدها كفاية .. ألف شكر نورت الموضوع
وعليكم السلام ورحمة الله وبركاته

[amr011111]

الف مبروك العربيه وطالما جبتها يبقى متقارنهاش بغيرها اهم حاجه تعمل السيرفيس ليها. يعنى تشوف تاريخ انتاج الكاوتش امتى بحيث تعرف حالته وقدامه اد ايه ويتغير امتى. وتغير كل الزيوت والسيور والفلاتر وتسجل قراءة العداد علشان تبقى عارف مواعيد تغيرهم الجايه. وهات للعربيه كمبريسور هوا لو الكاوتش تيوبليس وهات كوريك تمساح محترم وبالتوفيق

[رجل المستحيل]

الف مبروك و يارب تستمتع بيهه و تكون وش السعد عليك

ألف شكر يا سعادة الباشا .. آمين يا رب .. بس شكلها مجنني مميز ومثير خصوصا في النبيتي الميتاليك والسبويلر وشكلها شبه اللانسر القرش من قدام (بس على قديم شوية طبعا) .. الكشافات اللي قدام شبه القرش .. وشبه عيون الفنانة صفية العمري (الرموش أو كشافات الاشارة الأمامية) وكمان شبه عيون القطة لأنها مشقوقة (كشافات دبل) زي عين القطة .. فكده ممكن نسميها أي اسم من الأسماء التلاتة دي:

لانسر عيون صفية
لانسر عيون صفصف
لانسر صافي
لانسر صفصف
lancer old shark
لانسر قطة
لانسر عيون القطة

ولا ايه رأيكم

كنت عايز أعرف رأيك يا باشا برضه لو تكرمت في الاختيار بتاعي من بين التلات عربيات سويفت وعيون صفية وويرا 2000 ؟

أخوكم عضو جديد لانج في المنتدى .. خدوا بايدي الهي ياخد بايديكم.. قال على رأي المثل: حسنة كتيرة تمنع بلاوي قليلة

[رجل المستحيل]

الف مبروك و يارب تستمتع بيهه و تكون وش السعد عليك

الله يبارك فيك .. شكرا الله يكرمك

[رجل المستحيل]

الف مبروك العربيه وطالما جبتها يبقى متقارنهاش بغيرها اهم حاجه تعمل السيرفيس ليها. يعنى تشوف تاريخ انتاج الكاوتش امتى بحيث تعرف حالته وقدامه اد ايه ويتغير امتى. وتغير كل الزيوت والسيور والفلاتر وتسجل قراءة العداد علشان تبقى عارف مواعيد تغيرهم الجايه. وهات للعربيه كمبريسور هوا لو الكاوتش تيوبليس وهات كوريك تمساح محترم وبالتوفيق

شكرا .. الله يبارك فيك .. هيا المقارنة بس لاكتساب مزيد من المعلومات لأني جايب عربية اعادة بيعها سهل وسريع جدا ومش هخسر فيها, فمش هزعل من المقارنة في جميع الحالات .. أنا بالفعل اشتريت فردتين استيراد (استعمال أوروبا) ماركة وحالة نضيفة وركبتهم قدام, وجبت استبن استيراد برضه, وغيرت زيت الموتور والفرامل, وغيرت سير الدينامو بس رغم ان الشحن مظبوط, بس لقيت سنونه متاكلة, والسيور التانية كان صاحبها مغيرها قريب وباين عليها, ولسه شاري فلتر بنزين بس مركبتوش لسه (هركبه بنفسي) .. أما العداد فأن كنت مستلمها شغال, لكن الميكانيكي الله يسامحه بوظ سلك عداد السرعة وهو بيظبط حاجات تانية (أنا مسامحه 100% من كل قلبي والله) لأنه محترم وخبرة وابن بلد .. فأنا معتمد على خبرتي السابقة في الكشف على حالة الزيوت ومعرفة أنا مشيت أد ايه بالخبرة برضه والقياس التقديري للمشاوير وتجميع الأرقام دي في دماغي بعد كل مشوار .. وأنا اشتريت واير سرعة لانسر أصلي ياباني ليه نفس الشكل والأطراف (الفيش) لكنه قصير ومعرفتش أرجعه لأني شاريه من محافظة تانية .. والكهربائي بيقول لازم نفس الطول والا مش هيركب (دي غلطتي اني مخدتش السلك القديم معايا عشان أجيب نفس طوله, لكن الحمد لله) .. واشتريت منفاخ قدم بعداد ضغط (يدوي مش كهربا) .. لأن الكهربا جربته زمان على عربية قديمة ولقيته ضعيف جداااااااااا الا لو كان سعره 150 جنيه .. واليدوي أنا بعتبره أحسن لأنه مبيعطلش ومش متعب زي ما الناس متخيلة وبيأدي الغرض .. وطبعا الكاوتش كله تيوبلس .. والكوريك اللي مع العربية شغال لكنه متعب لكنه بتاع الفابريكة , لكن طبعا التمساح أسهل بكتير ومبيفلتش, لما ربنا يكرم بفلوس هشتريه ان شاء الله

[رجل المستحيل]

متنسوش تجاوبوا على الاستطلاع يا جماعة

[miam0502788391]

الف مبروك ربنا يديك خيرها

[رجل المستحيل]

الف مبروك ربنا يديك خيرها

الله يبارك فيك .. شكرا على مرورك الكريم

[ihabyossef]

اولا الف مبروك وربنا يديك خيرها ويكفيك شرها

ثانيا : انا معيايا عيون صفية من حوالي سنتين العربية بسم الله ما شاء الله زي الفل وما تقلش عن اي عربية جديدة بس خد بالك من صيانتها كويس جدا والزيوت والفلاتر

وبالنسبة لقطع الغيار هي قطع غيار الاكسيل

واي حاجة في الصاج او الفوانيس عليك وعلى بنك الاسكان في بورسعيد في تجار شغالين بس في عيون صفية لأنها منتشرة بغباء هناك

ارخم حاجة فيها مريات الجنب لو عندك الاصلي خلي بالك منها
و ربنا يبارك لك فيها

[رجل المستحيل]

اولا الف مبروك وربنا يديك خيرها ويكفيك شرها

ثانيا : انا معيايا عيون صفية من حوالي سنتين العربية بسم الله ما شاء الله زي الفل وما تقلش عن اي عربية جديدة بس خد بالك من صيانتها كويس جدا والزيوت والفلاتر

وبالنسبة لقطع الغيار هي قطع غيار الاكسيل

واي حاجة في الصاج او الفوانيس عليك وعلى بنك الاسكان في بورسعيد في تجار شغالين بس في عيون صفية لأنها منتشرة بغباء هناك

ارخم حاجة فيها مريات الجنب لو عندك الاصلي خلي بالك منها
و ربنا يبارك لك فيها

الله يبارك فيك .. ألف شكر على مرورك الكريم ومشاركتك ومعلوماتك القيمة .. أول مرة أعرف معلومة بورسعيد .. معرفش انها منتشرة جدا هناك .. المرايات تمام مفيهاش حاجة .. وأنا فعلا مركبلها حاجات اكسيل وحاجات كريستالة وبطة

ولو عند حضرتك وقت اقرأ المشاركة الجاية دي علطول .. وهي عبارة عن جزء من ردي على أحد الأعضاء المحترمين في موضوع آخر بخصوص عيون صفية برضه

[رجل المستحيل]

****ده جزء من ردي على أحد الأعضاء المحترمين في موضوع آخر بخصوص عيون صفية برضه: ****

متخافش من قطع غيارها نهاااااااااااااااائي لأنها موجودة عند البقال زي ما بيقولوا .. أنا ساكن في محافظة كفر الشيخ وفي منطقة ريفية بعيدة جدا عن قلب كفر الشيخ (سفر) ومع ذلك جميع قطع غيارها موجودة هنا عفشة وميكانيكا وكهربا (رغم ان العربية نفسها نادرة هنا), ما عدا بعض الحاجات الغير أساسية والكماليات زي وش الفانوس مثلا وسلك عداد السرعة موجود في المدينة الصناعية في قلب كفر الشيخ .. وقطع غيارها هيا نفسها الياباني الجديدة والاستيراد موجودة برضه في الحرفيين والتوفيقية ووكالة البلح وعلي زيدان في الدقي وملح تاني في الدقي مش فاكره وأماكن تانية كتير أنا معرفهاش

وخللي بالك انه بيركب عليها حاجات كتيرة جدا من الهيونداي اكسيل (لأن الاكسيل هي التقليد الكوري للانسر عيون صفية) وحاجات من اللانسر الكريستالة .. وحاجات كتيرة من اللانسر البطة .. وبعض الحاجات من الهيونداي أكسنت .. وكل العربيات دي منتشرة جدا هيا وقطع غيارها ... عرفت ليه بقولك ان قطع غيارها آخر حاجة تفكر فيها ؟ رغم ان العربية نفسها نادرة أو قليلة جدا بسبب قلة المعروض منها (حوال 10 عربيات فقط في الشهر معروضة للبيع على 90 مليون مصري !!!) ان اللي معاه العربية ما بيبعهاش .. واللي بيبعها بيبعها اما مش عارف قيمتها واما عاوز مزيد من الرفاهية في عربية أحدث (التجديد والتحديث) .. وليس مزيد من التوفير .. أحسن عربيات هيا عربيات التسعينات في التوفير وفي تكاليف وقلة الأعطال كمان (أحسن من التمانينات بكتير جدا وأحسن من الألفينات) .. واللي هيعترض على قصة الألفينات دي هشرحله شرح فني واقتصادي مستفيض ودقيق بالحجة والدليل العملي القاطع

يعني تقدر تعتبرها العربية الوحيدة في مصر النادرة بعض الشيء لكن قطع غيارها منتشرة زي الرز في كل شارع في مصر حتى في الأرياف والمناطق النائية .. وده عكس القاعدة السائدة في عالم السيارات .. بسبب ان قطع غيارها هيا نفسها بالظبط قطع غيار عربيات شهيرة جداااااااا ومنتشرة جدااااااااا في مصر زي ما شرحت فوق .. هو ده السر

عيون صفية أعطال قليلة جدااااااااااا (مش بتاعة حركات) واعتمادية وعملية وامان عالي جدا .. واقتصادية جدا في (الأعطال - التصليح - استهلاك قطع الغيار - عمر قطع الغيار - البنزين)

وشكلها كأنها عربية رياضية سبور خصوصا لو مركبلها اسبويلر ولونها ميتالك زي بتاعتي .. ومقدمتها وفوانيسها جريئة جدا وشرسة وبيظهر عليها جدا أي تعديل رياضي ولو بسيط بيبان جامد عليها .. وفي نفس الوقت تجمع بين الرزانة والأناقة وشبابية وعائلية في نفس الوقت

اعادة البيع سريعة جدا من يوم واحد ل 7 أيام بالكتير تكون بعت العربية !! أنا فضلت 3 شهور أتصل بالناس يوميا ويقولولي اتباعت !!! علبال لما لقيت واحدة كويسة معروضة من يومين ولحقيتها واشتريتها

العربية ماسكة سعر بشكل غريب رغم انها 1991 لأنها مطلوبة جدا وسمعتها سابقاها (فيه عربيات موديل 1999 و 2000 مش مطلوبة بسبب مشاكلها الكتيرة وفي نفس سعر لانسر 1991 زي فورد سكورت وبروتون ويرا وشاهين 2006) لكن العربيات دي هتدخلك في متاهات ومشاكل فنية واقتصادية خطيرة جدا وكارثية بدون الدخول في تفاصيلها دلوقتي

وهي من 88 ل 92 , ويستحسن موديل 90 أو 91 واتأكد انا الكربراتير بتاعها بستم (أبو سوستة) مش بوابات .. وان الاسبراتير الكتروني مش عادة .. لأن لو 88 أو 89 فيه احتمال انه ميكونش كربراتير بستم واسبراتير الكتروني .. لو بوابات وعادة اوعى تشتري العربية حتى لو كانت حالتها ممتازة .. دي نقطة جوهرية وحيوية جدااااااااا لأن دي التكنولوجيا الجديدة اللي بتريح دماغك من الأعطال .. اوعى تشتري من السوق بتاع مدينة نصر أو اسكندرية .. اشتري من عالنت من دوبيزل وهتلاقي دوت كوم الخ .. واوعى تشتري من تاجر

أكيد في حاجات تانية كتير لسه مكلمتش عليها .. لكن أنا معاك واتفضل اسأل براحتك لو محتاج حاجة

[رجل المستحيل]

شكرا لكل اللي صوتوا في استطلاع الرأي المرفق في أعلى الموضوع .. وأتمنى وأرجو المزيد من المشاركة في الاستطلاع .. والحقيقة ان نتائج الاستطلاع حتى الآن مبهرة بالنسبة لي .. فقد اتفق الكل بالكامل على سيارة واحدة من الأربعة المذكورين !!! يعني اجماع =d