مشكله بوما 2007 "ارجوا الافاده ضروري"

[Mahmoud ElNady]

عربيتي بوما 2007 اوتوماتيك 1300 CC
المشكله اللي مش لاقي ليها حل ان العربيه و هي علي " N " بيكون فيها هزه والعربيه بتترج علي خفيف لكن لو مشغل التكييف الرجه دي بتزيد جامد جدا و العربيه كلها بتترج حتي علي ال " D " لحد ما ازودلها بنزين تتظبط بس لو شيلت رجلي تترج تاني ؟! لفيت بيها علي مليون كهربائي و ميكانيكي و مفيش حد افادني

[ahmed_eng2001]

ممكن حضرتك تشوف حساسات الايدل و الكرنك كمان .... و كنت سمعت ان فيه حاجة فى الفتيس الاوتوماتيك ممكن تعمل الرجة دى

[Fawzy.Abdelnour]

شوف قواعد الموتور يا باشا.
و اكشف عليها فالتوكيل او حد بيفهم كويس، لو خدت خبطه صغيره قبل كده فالوش ممكن يكون الموتور مزند.
يعني في كبسه صغيره، كان عندي المشكله دي و قالولي فس سعودي ان الموتور مزند.

[Mecha]

شوف قواعد الموتور يا باشا.
و اكشف عليها فالتوكيل او حد بيفهم كويس، لو خدت خبطه صغيره قبل كده فالوش ممكن يكون الموتور مزند.
يعني في كبسه صغيره، كان عندي المشكله دي و قالولي فس سعودي ان الموتور مزند.

ياريت توضح بزياده حكاية المتور مزند

[Fawzy.Abdelnour]

كنت رايح بظبط كام حاجه فالعربيه عند سعودي، ده صيانه معتمده علي طريق اسماعيليه.
قابلت المهندس قالي الموتور مزند، يعني في كبسه صغيره فالصدر من قدام او حاجه زي كده.
سألته تأثيره ايه قالي يعمل رعشه و ساعات رجرجه.
كان يتعدل عنده بزرجينه تتكلف 1000 تقريباً، بس كنت مسافر تاني يوم و بعد كده ماروحتش إلا بعد فتره.
الموضوع ده كمان ممكن يجيب قواعد، يعني لو الموتور مزند يخلي العربيه تقطع قواعد كتير.
القواعد كمان لو مقطوعه تعمل الرعشه دي، حتي لو الموتور مش مزند.
روحت بعد فتره طويله، و كنت غيرت قواعد و سمكرت العربيه بره و فكيت الاكسدام و عدلت الصدر و كده، بقوله اعمل زرجينه عشان انت قولتلي قبل كده الموتور مزند، كشف عليها و لقاها بطلعت ترعش و كله تمام، حتي قعد فتره يشوف الرعشه و يحط ايده علي نقط معينه فالعربيه عشان يشوف.
قالي ممكن يكون السمكره اللي عملتها عدلتها.
ده اللي حصل معايا، شوف القواعد، لو لقيتها مقطوعه غيرها.
و هات الاصلي، القواعد المضروبه بتعمل رعشه و هي سليمه، و الكلام ده عن تجربه.
و نصيحه فالعربيه دي لو تقدر هات كل قطع غيارها اصلي، انا ركبت مسمار الميزان مضروب غيرته بعدها بشهر، العربيه مش ماشيه عدل معاه.

[Mecha]

ايوه ايوه
هو يقصد خبطه طالت المكان اللي عليه القواعد زي القنطره.فالمكنه مش مريحه مكانها زي واحد واقف في اتوبيس ومحشر مكانه .هو دا التزنيد
شكرا

[lancer06]

الرجه ليها سببين يا اما كراسى (قواعد) الموتور فيها كرسى مكسور وعددهم ٣
كرسى القنطره ومكانه تحت الريدياتير فى المنتصف
وكرسى الجمل ومكانه وراء الموتور فى المنتصف بإمتداد القنطره
وكرسى الفتيس ودا مكانه بالتقريب تحت البطاريه
ممكن تتأكد بنفسك بمساعده حد معاك بإن حد يقعد جوه العربيه ويدورها ويوس فرامل وينقل بالتناول الغيارات من r الى d بالتكرار والشخص التانى يكون واقف قدام العربيه ويأكد من استجابه الكراسى هل فيها قطع ام لا وفى حاله وجود تلف فى احد الكراسى هتجيبه اصلى جديد وابعد عن التايوانى وغيره لانهم اما ناشفين زياده او طريين زياده وفى الحالتين مش هيقومو بوظفتهم كويس
السبب التانى حساس الإيدول انه يكون بيخرف يعنى يكون اقل من المعدل الطبيعى بتاعه ٧٥٠ لفه فى الدقيقه ودا بيسبب رجرجه فى الموتور وتحس ان العربيه هتبطل فالما بتدوس بنزين الوضع بيبقى طبيعى
وفى الحاله دى بيتم تنظيف حساس الإيدول والبوابه بطريقه صحيحه بعد كده بتظبط

[أبو إياد]

عيب قواعد موتور ولازم الاصلى وسعر التلاته فى حدود 2000ج ولو مش اصلى هايعملوا 900ج وهاتغيرهم بعد شهر بالكتير

[amhotib]

اكشف عالايدول كونترولر