سؤال لكل عضو

[mohamedaamm]

انا قريت فى الجرايد (الاهرام) مقال ان اسعار العربيات حترخص و بلاقى السعر مش بيقل بل بالعكس بيزيدو الناس بتقول ان عاى بداية 2009 الاسعار حتقل و انا نفسى اشترى عربيه فهل انتظر حتى بداية العام ام اشترى الان (برجاء كل انسان عنده معلومة سليمة الرد لانى مشوش ؟؟)
و شكرا لكل انسان مشارك معى فى الراى
اخوكم محمد

[civilpharaoh]

بص يا باشا انا مش عايز افتيلك بس الي سمعته من اكتر من واحد و منهم واحد من رجال الجمارك(والد احد اصدقائي)ان سعر السيارات الياباني لن ينخفض بالشكل الملحوظ بسبب ارتفاع الين امام الدولار. اما مسألة ارتفاع الاسعار فده من التوكيل لما يلاقي كثرة الطلب علي السيارات زي مثلا اللانسر السوبر اكشن ب 129000؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟واللانسر الكاملة الشكل الجديد ب160000؟؟؟؟؟؟؟؟؟؟؟؟؟؟؟؟؟؟؟؟ ومش توكيل ميتسوبيشي فقط لأ وتوكيل تويوتا كمان لدرجة ان سعر اليارس ب124000؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ يا تري ايه الي هيحصل تاني:K14:

[أبو إياد]

انا معلوماتى ان اسعار العربيات فى مصر مالهاش علاقه بالدولار انما بالين اليابانى واليورو بالتالى انخفاض الدولار او زيادته مالوش علاقه بالسيارات .
اما على المستوى الخاص هاقولك حاجه حصلت معايا,,,
فى تاريخ 5/2007 لانسر 1300 مانيوال كانت بـ 82500 جنيه ولما نويت اشترى
فى تاريخ 6/2007 نفس العربيه سعرها كان بـ 93000 جنيه واشتريت لانى كنت عاوز اشتريها وكل وقت وله ادان

[mohamedaamm]

شكر لردكوا بس انا سمعت ايضا علشان اتفاقية الجات الاسعار يتاعة العربيات حترخص ابتداء من اول 2009 هل ده صحيح ؟؟

[asbeats]

انا واقع في نفس الورطة دي
اشتري العربية والاقيها رخصت

اعتقد والله اعلم ان ده صعب اوي يحصل هنا في مصر وموضوع اتفاقية الجات ده بيتكلموا عنه من سنين وياما اتكلموا على اتفاقيات بالشكل ده وفي الآخر الأسعار بتغلى مش بترخص ابدا!!!

وفي الغالب لو ده حصل بتكون العربيات اللي هترخص متقفلة في الدول المجاورة لمصر زي اتفاقية اغادير بينا وبين المغرب وطبيعي عمر الواحد ما هيفكر يشتري عربيات بالمنظر ده

انا مثلا عمري ما هاشتري عربية زي البيجو Pars اللي متقفلة في ايران
يسموها عقدة خواجة ,مش مهم
المهم اني ادفع فلوسي في حاجة تستاهل

وبعدين لو الواحد محتاج العربية عشان ترحمه من قرف المواصلات وزحمتها وقلة ادب وسفالة السواقين بمختلف اشكالهم وفصايلهم يبقى حقيقي طظ في الفلوس, وانا تقريبا كده قررت اتوكل على الله واشتري - لانسر 1300 مانيوال - ان شاء الله

غليت بقى ولا رخصت دي حاجة مش هتزودني ولا تنقصني ومتفرقش معايا في حاجة لأني مش هتاجر فيها!!!
اهي فلوس واتصرفت في الغرض اللي ربنا رزقنا بيها عشانه


انا صليت استخارة في شراء العربية واللي ربنا كاتبه هيكون

[engwalid]

السؤال ده بيتسأل كتير وده كان ردى على نفس السؤال فى منتدى هيونداى ... والله أعلم ...

فيه ناس بتقول السيارات هترخص علشان الازمه الاقتصاديه وحالة الكساد اللى بتزيد فى العالم وإنخفاض مبيعات الشركات المصنعه للسيارات فالشركات دى هتحاول تروج لسياراتها عن طريق خفض الاسعار.
وفيه ناس بتقول السيارات هتغلى علشان الشركات المصنعه مع تخفيض انتاجها لازم ترفع السعر علشان تحافظ على ربحها وتقدر تستمر.

رأييى الشخصى إن كل ده الله أعلم بيه ومحدش يقدر يحسم الموضوع ده. يعنى مين يعرف الدولار والين واليورو هيبقوا بكام ؟

يعنى مثلا لو سعر السياره نزل وسعر العمله ارتفع ، أو سعر السياره إرتفع وسعر العمله نزل ، هتبقى النتيجه اسعار ثابته تقريبا.
ولو سعر السياره نزل وكمان العمله سعرها نزل هتبقى الأسعار فى الأرض , ولو سعر السياره ارتفع وكمان سعر العمله ارتفع هتبقى الاسعار نار.

باختصار أكبر تأثير على سعر السيارات هو سعر العملة ولا يعلمه الا الله.
ومثال على عدم سهولة توقع السوق سعر الذهب فى الفتره الاخيره اكبر محلليين واقتصاديين فى العالم قالوا سعره هيستمر فى النزول واللى حصل العكس فالجرام زاد حوالى 15 جنيه فى خلال الاسبوعين الماضيين.

رأييى إن كل واحد يشوف مصلحته فين يعنى لو محتاج سياره ضرورى يتوكل على الله ويشترى دلوقتى ولو مفيش إحتياج ضرورى ليها يحوش القرشين اللى معاه مش علشان اسعار السيارات هتتغير او كده ولكن لأن فيه أيام جايه محدش عارف شكلها ايه.

على فكره انا مش تاجر سيارات علشان محدش يفتكر انى بشجع الناس على الشراء لمصالح شخصيه ولكن دى طريقة تفكيرى واللى أنا فكرت بيها لنفسى ودلوقتى بدور على سياره اشتريها.

والأهم من كل ده التوكل على الله واليقين بأنه لايعلم الغيب الا الله والاجتهادات والتحليلات فى الايام دى صعبه علشان السوق متلخبط عالميا.

وأسف للإطاله .. وتحياتى للجميع ..

[ouba2]

استنوا لغاية شهر يناير وبعدين قرروا

[Dr.SherifMansy]

بصراحة انا ماعرفش ان كانت الأسعار هاتنزل ولا لأ و لكن اللى اعرفه ان تجار العربيات فى مصر حتى لو الأسعار العالمية انخفضت هايخلى السعر زى ماهو علشان يرفع هامش الربح بتاعه و يمكن كمان يزود السعر علشان يكسب بدل الطاق طاقين ، ماهى الجمارك قبل كده نزلت و بقت 60% فقط و لكن اسعار السيارات زادت ، ازاى ؟؟ الله اعلم ...فاكرين ولا لأ ؟؟ و عموما الأيام جاية و هانشوف

[engwalid]

بصراحة انا ماعرفش ان كانت الأسعار هاتنزل ولا لأ و لكن اللى اعرفه ان تجار العربيات فى مصر حتى لو الأسعار العالمية انخفضت هايخلى السعر زى ماهو علشان يرفع هامش الربح بتاعه و يمكن كمان يزود السعر علشان يكسب بدل الطاق طاقين ، ماهى الجمارك قبل كده نزلت و بقت 60% فقط و لكن اسعار السيارات زادت ، ازاى ؟؟ الله اعلم ...فاكرين ولا لأ ؟؟ و عموما الأيام جاية و هانشوف

حضرتك بتقول ان الجمارك قبل كده نزلت ولكن الاسعار زادت .. ده مش حقيقى لأنى كنت اشتريت لانسر زيرو 1300 اوتوماتيك موديل 2004 بـ 115 ألف وبعد نزول الجمارك نزل سعرها زيرو لـ 95 ألف .. ولكن دلوقتى غليت تانى علشان سعر الين ارتفع ....

[Dr.SherifMansy]

حضرتك بتقول ان الجمارك قبل كده نزلت ولكن الاسعار زادت .. ده مش حقيقى لأنى كنت اشتريت لانسر زيرو 1300 اوتوماتيك موديل 2004 بـ 115 ألف وبعد نزول الجمارك نزل سعرها زيرو لـ 95 ألف .. ولكن دلوقتى غليت تانى علشان سعر الين ارتفع ....

استاذى الفاضل فيه نقطتين احب اوضحهم لحضرتك هنا
سعر العربية نزل 20000 حسب كلامك .. صح ؟؟
قبل التخفيض كان الجمرك يتراوح من 115% الى 215% حسب العربية و سعتها الللترية و كمالياتها ، فلو اخدنا اقل جمرك 115% (من غير ضريبة المبيعات و ممكن تراجع الجداول القديمة) و اصبح 40% (لأن 60% تشمل ضريبة مبيعات و CIF وارد) يعنى الفرق 75% المفروض تنزل من ثمن العربية ، فهل ال 20000 هى الفرق ده ؟؟

ثانيا فيه عربيات كتير سعرها نزل همسة و بعدين غلى تانى ، أول مانزل شكل الكورولا اللى بعد العيون و قبل الشكل الحالى (كان تقريبا 2003) و قبل تخفيض الجمارك واحد صاحبى اشتراها ب 109000 و بعد تخفيض الجمارك اشترى واحدة تانية لأن بنته اخدت الأولى و جاب الجديدة ب114000
و على فكرة نفس المعرض (التوكيل) و انا كنت معاه فى المرتين ، يعنى على عينك يا تاجر مش بيضحك عليا

اخيرا اسأل سؤال ، سعر العربيات بقاله كذا سنة عمال يعلى فى حين ان حكاية غلو الين سمعنا عنها فى 2008 فقط ، عندك تفسير لكده غير جشع التاجر علشان يزود هامش ربحه ؟؟

و تحياتى