سؤال للمهندس طارق قبل ما اشتري

[mazen86]

ان شاء الله هجيب بوما بس زي ما حضرتك عارف كل صاحب معرض بيشكر في الي عنده وخلاص انا محتار بين المصري والخليجي واحد يقولي زيك زي المصري الي بالضمان انتا هتدفع وهوا هيدفع في الصيانات الدورية كل الي هتاخده من الضمان لو عندك عيب صناعة ودي بتحصل مرة في المليون وكمان لو جبيت تركب اي حاجة لازم تروح التوكيل عشان يركبوها وطبعا هتدفع كتير جدا ولو ركبت برة ورحت التوكيل هيوقلك دايرة الكهربا طلعت من الضمان عشان انتا لعبت فيها والتركيب دا مكنش عندنا والتاني بيقولي خد المصري وعلي ضمانتي بصراحة انا عايز اركب زينون ووحدات رفع وسماعات وعايز اكون براحتي مش عايز كل يوم مشوار التوكيل وادفع قد كدا قفلت اجيب الخليجي بس برضة لما يكون مع العربية ضمان هبقا مرتاح اوي

فانا عايز اسال هستفيد من الضمان اية ؟وهل لو عايز اركب حاجة في العربية ايا كانت لازم اركبها في التوكيل ؟؟؟؟
دا سؤالي لحضرتك وانا عارف ان حضرتك مشغول جدا .

احلي نكتة بقا في الحوار الراجل قلي دا انتا لو حبيت تعمل فرش للعربية لازم تروح التوكيل فانا ضحكت بصراحة ومعرفتش ارد عليه لانه بجد اكدلي انه عايز يبيع وخلاص بس انا حبيت اتاكد من حضرتك

[مصراوي جدا]

اهلا يا استاذ مازن .. ربنا يوفقك في عربية كويسة

طبعا كلام بائعي المعارض ملهوش حل ودايما اقول ان معظمهم بيقول اللي يمشي بضاعته وخلاص وهو جاهل تماما باللي بيقوله.
التوكيل مش بيركب اي اكسسوارات ولا حتى كاسيت ولا انذار ولا خلافه.
العربية اللانسر 1300 و 1600 العادية مش السبورت بتنزل بدون كاسيت وبالطبع بدون انذار فشيء طبيعي ان اللي اشترى العربية عايز يركب كاسيت وانذار بنقول له طبعا تقدر تركبهم بس بننصح تركبهم في مركز متخصص من المراكز المشهورة (واحنا بننصح بمراكز أدريان) ولكن مش عند كهربائي عادي علشان ميأثرش على وحدة الكمبيوتر بالعربية

موضوع مصري ولا خليجي وضمان ولا مش ضمان فدي اختلف فيها الناس فيه كتير بيشتروا الخليجي بدون ضمان ويقولوا العربية مش بيحصل لها حاجه انما برضه فيه كتير بيفضلوا يشتروا العربية بالضمان خاصة انه 3 سنوات او 100 ألف كيلو
الضمان يتطلب عمل الصيانات الدورية في التوكيل او مركز خدمة معتمد وهي صيانة الألف ثم كل 10 آلاف كيلو مترفيه صيانة وانا رأيي ان ده افضل حتى للمحافظة على العربية انك تعمل الصيانات الدورية في مواعيدها وحسب تعليمات الشركة المصنعة للعربية مش عند اي ميكانيكي عادي

[mazen86]

شكرا للاهتمام حضرتك

اولا شكرا علي توضيح موضوع الاكسسوارت وشاكر لحضرتك مجهودك الكبير الي بتعملوا هنا
انا مش معترض علي الصيانات لاني كدا كدا هروحها حتي لو جبت خليجي انا اقصد لو حبيت اجيب الخليجي الي الي هيفرق معايا في الضمان غير الصيانات بين الخليجي والمصري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا اسف لاني بتعب حضرتك معايا

شكرا

[youssefmustang]

والله الواحد محتار جدا في الانسر دى بصراحة وفى ناس كتيييييييير عاجبها الشكل القديم (البومة) عن الجديد (الشارك) مع ان الشكل الجديد جامد ويحسسك انك راكب وحش وشكلها سبور
كفاية انها نازلة لعبة NFS Prostreet و NFS Undercover :k4::k4:
اخوكم يوسف

[مصراوي جدا]

انا مش معترض علي الصيانات لاني كدا كدا هروحها حتي لو جبت خليجي انا اقصد لو حبيت اجيب الخليجي الي الي هيفرق معايا في الضمان غير الصيانات بين الخليجي والمصري ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الضمان معناه ان اي قطعة غيار تتلف في العربية عيب صناعة خلال فترة الضمان هيتم تغييرها مجانا وده يشمل كل العربية ما عدا الزيوت والسيور والفلاتر وتيل الفرامل واسطوانة الدبرياج (وبالتأكيد أي تلف نتيجة حوادث)

في التوكيل يتم هذا التغيير على حساب الشركة الأم (بتتحمل تكلفة قطعة الغيار وتكلفة مصنعية التركيب كمان)

فيه ناس بتشكك ان الوكيل (اي وكيل) بيماطل في ان تلف قطعة الغيار عيب استخدام مش عيب صناعة علشان ميغيرهاش وانا بارد عليهم بأن ايه مصلحته في كده طالما هو مش دافع حاجه انما الشركة الأم هي المتحملة

[mazen86]

شكرا جدا لحضرتك علي التوضيح وماشاء الله حضرتك بتوضح للواحد كل حاجة بسهولة
شكرا جزيلا لحضرتك

وشاكر لحضرتك تعبك ومجهودك