العربية بقت حولة

[Ahmed Samy]

و بعد طول صبر
قررت أحن على العربية و اشتريلها طقم فوانيس بدل اللي أصفروا و اتشرخوا و اتحرقوا

المهم

نزلت و معايا 900 بندق أشتري فانوسين قدام و فانوس و را

رجعت بربعميت بندق يعن التلات فوانيس تمنهم 500 بندق مصري فقط لاغير

و ربنا يخلي ميتسوبيشي و ديبو و تايوان
(أنا كنت شاري فانوس استيراد قدام ب400 جنيه لوحده)

طبعا ايدي كلتني أتنيل وأركبهم
و قد حصل و ركبوا في نص ساعة و كله تمام

حتى أسدل الليل أستاره

اكتشفت الواقعة

الفانوس اليمين ضارب قدام و يمين قوي يعني باشوف الرصيف و الشارع لأ
و الفانوس الشمال يا حبة عيني ضارب يمين بس فوق بقى يعني ما لوش أي لازمة الا انه في عين اللي جاي قدامي من غير عالي ولا حاجة


العربية بقت حولة رسمي

أنا أعرف ان فيه مسامير بتظبط وضعية الاضاءة و عايز أعملها و ماروحش لكهربائي (أيوة أنا جلدة)

حد ممكن يفيدني و ياخد هو التلاتية جنيه اللي كنت هاديهم للكهربائي ؟؟؟

أيوة مش قولتلكو جلدة

[salehgharib]

إعد تثبيت اللمبات بشكل صحيح لو 3 ريشة خلى 2 ريشة أسفل 1 بالأعلى

[aaaaaaaaaaaaaaaaaaaa]

يا باشا انا سمعت ان فية مسامير ورا الفانوس بتظبط الفانوس وعلى فكرة اللمبة مالهاش غير وضعية واحدة بس ماينفعشى تقلب فيها كمان الظبط دة مش محتاج كهربائى مش عشان نوفر التلاتة جنية لآ عشان هو هايعملهم كدة و بردو مش هايتظبطو قوى انا سمعت هنا فى المنتدى ان عشان تظبط لازم تقف ادام حيطة على بعد 20 متر تقريبا و تشوف العالى و الواطى و تظبط المسامير المشكلة دلؤتى مش فى الحيطة المشكلة ان فين المسامير دى؟؟؟

[mohamedway]

مسمارين في ظهر الفانوس محتاجين مفتاح بلدى أو بيبه 8 أو 10 مش فاكر والمسمارين دول فيهم واحد تحت ناحيه الخارج بالنسبه لحوض الموتور و التانى فوق ناحيه الداخل و قريب من الردياتير (اللى تحت هتلاقيه بيحرك النور فوق و تحت و اللى فوق يمين و شمال). وطبعا اضبطها بالليل و خلى عربيه تكون واقفه قدامك بضهرها على مسافه معقوله و كأنها ماشيه قدامك فى شارع داخل المدينه و أضبط النور بحيث يكون عن أول شنطه العربيه اللى قدامك مش أعلى من كده عشان ما يدايقش اللى قدامك فى المرايه و هى ده الضبطه اللى انا لاحظتها و ضبطاها الفابريقه من أول لما جبت العربيه زيرو.

[ahmedel_rayies]

و بعد طول صبر
قررت أحن على العربية و اشتريلها طقم فوانيس بدل اللي أصفروا و اتشرخوا و اتحرقوا

المهم

نزلت و معايا 900 بندق أشتري فانوسين قدام و فانوس و را

رجعت بربعميت بندق يعن التلات فوانيس تمنهم 500 بندق مصري فقط لاغير

و ربنا يخلي ميتسوبيشي و ديبو و تايوان
(أنا كنت شاري فانوس استيراد قدام ب400 جنيه لوحده)

طبعا ايدي كلتني أتنيل وأركبهم
و قد حصل و ركبوا في نص ساعة و كله تمام

حتى أسدل الليل أستاره

اكتشفت الواقعة

الفانوس اليمين ضارب قدام و يمين قوي يعني باشوف الرصيف و الشارع لأ
و الفانوس الشمال يا حبة عيني ضارب يمين بس فوق بقى يعني ما لوش أي لازمة الا انه في عين اللي جاي قدامي من غير عالي ولا حاجة


العربية بقت حولة رسمي

أنا أعرف ان فيه مسامير بتظبط وضعية الاضاءة و عايز أعملها و ماروحش لكهربائي (أيوة أنا جلدة)

حد ممكن يفيدني و ياخد هو التلاتية جنيه اللي كنت هاديهم للكهربائي ؟؟؟

أيوة مش قولتلكو جلدة

ممكن توديها مستشفى عيون خاصة هناك بيعالجوا الحول بالليزر

[ahmed_h_g]

دور على أماكنهم فى الكشاف القديم وجرب الزوايا فيه بعد كده طبق اللى جربته فى اللى راكب

[ahmed_h_g]

لو معرفتش وديها لكهربائى وأنا هبعتلك ال30 دينار ولو عرفت ياريت تبعتهملى رصيد يا مان