تقيم لانسركريستالة

[mandoxxt]

بس العربية واطية جدا ... وللاسف الكراسى بتاعتتها تحسسك انك قاعد عالارض...كان معايا واحدة مواصفات خليجى كان تكييفها بجد تلاجة

[ahmedhosssamy]

عربية خارج التقييم طبعا هايلة جدا جدا و ثابتة نفسها و سعرها دليل واضح

[medomuscles]

معايا من سنتها و عامله 130الف كيلو و الحمد لله لسه ملمستش الموتور ولا الفتيس ولا اساسيتها خالص بس حاجات بسيطه فى العفشه و شكرا جميله مووووووووووووووووت وبحبها موووووووت و متتغيرش الا بشارك فقط لا غير و تكون كامله هاى لاين كمان

[ahmsuez]

السلام عليكم
انا بفضل الله امتلك لانسر كرستالة موديل 2000
السيارة بفضل الله لم يتم تغيير اسطوانة حتى هذا اليوم ولا ديسك ولا بليه والموتور بحالته يعنى ما بيقولش زيت
السيارة تعرفها مع المطبات في نعومتها وسرعة العربية ما شاء الله 180 وثبات ما شاء الله بكون معايا اوزان في العربية والسرعة 160 والملفات منحنيات 140 السرعة التكييف رغم انها 1300 سي سي ولكن الله اكبر الكييف رائع
قطع الغيار معمره بشكل رائع والعبرة بصيانة العربية والمحافظة عليها ورأيت بعض الناس يمتلكون السيارة نفس الموديل وحطين اكسسورات داخل الصالون رائعة
ولكن السيارة لاتقارن بأي فئة من مسيلاتها الكورية ابداً ليس تعصبا مني ولكن حقيقة أن ركبت الأكسنت والدايو والفارق ملحوظ جداً
واليباني يباني والمتسوبيشي لا تنسو يا اخواني كانو يمتلكون صناعة قبل الحرب العالمية الأولى مش لسه بيدورو على حد يسرقو منه تكنولوجيا أو يقلدوه انسى كل شيئ اليابان غزت السوق الأوروبي والأمريكي من زمان بس احنا في بعضنا لس راكب سيارة
وميعرفش من الدول الصناعية
كيفاية كده والله لقد كتبت هذه السطور وانا في عجالة جداً ومشغول

[ainshouka]

اخويا عندوا العربية ماشاء الله مكانش بيعملها اى صيانة ولا تغيير اى حاجة خالص ولابوجيهات ولا فلاتر لمدة 125000 كيلو ولسه الميكانيكى ملاحظ ان الشكمان بتاعها مهبب بس يعنى عاوزة تغيير بوجيهات وتنظيف كربيراتير وحاجات الصيانة اللى المفروض يتعملها من زمان دا غير انها مستعملة وصاحبتها الاولانية مشيت بيها 100000 كيلو يعنى ماشاء الله عربيم فيها بركتها

[Eslam.Elrefaey]

العربية ياجماعة حسب الاستعمال أنا أعرف معاه كريستالة زبالة ماشية100000 كيلو زبالة والى معايه حاجة تانية خالص خالص

[MAGPC]

إيه دة هي العربية ديه كربراتير ولا إنجكشن؟
و كمان معلش أنا شايف إن الهوندا سيفيك ٩٢ أحسن منها؟على حسب السمع بس لو حد شايف حاجة غير كدة يقول بالراحة و يفهمني لأن أنا عايز أفهم .

[temoit]

بصراحه اللانسر كريستاله 99 قعدت معايا 3 سنين علي طول سفر جري ثبات مالوش حل واشفتش منها اي مشاكل

[ae_mat7welsh]

an 3ndy lancer 99 nefsy arkblha mivec 1600 cc ya tara yrkblha wala l2a

[elansary]

لا طبعا محدش يقدر ينكر ان الكرستالة عربية ممتازة واللي يقول غير كدا يبقي مش عادل في تقييمة وكمان اية اللي جاب الكوري للياباني معلش يعني اوسخ عربية ياباني برقبة انضف عربية كوري ودة التاريخ اللي بيقول كدة

[shabmuslim]

يا جماعة ، فيه ناس كتير مبيعرفوش يفرقوا بين أنوع العربيات ، يمكن يكون الأخ يقصد الماروتي ولا ال 128

[ahmed_soft89]

حضرتك بتقول العربيه تعتبر كوري ولا تمثل اليابان في شيء
طيب معلش مداخله صغيره
ومقارنه بين الفئه التي تمثلها من الكوري الذي تقوم بالتشبيه اليه
هيونداي اكسنت
العربيه دي مع اصحابي زيرو موديل 99
مغيرين لحد دلوقتي
كوبلن (مرتين)
طنابير اماميه
مساعدين
اسطوانه وديسك وبليه (مرتين او تلاته كمان)
الصاج طبعا مش هحكي عليه علشان معروف
انا هتكلم علي الصالون
علشان حضرتك مش عاجبك صالون الكريستاله
صالون الاكسنت كله بلاستيك بلاستيك بلاستيك
لدرجه ان التابلوه بيتكسر يعني بيحصل فيه شرخ متخيل انت
وبعدين مقارنه بالكريستاله صالونها ضيق جدا جدا جدا
نيجي للكريستاله اللي هي المفروض تكون كوري
العربيه ناعمه جدا جدا
موتور عمره الافتراضي مالوش حل
عربيه ماسكه كيانها لحد دلوقتي
ونيجي بقي للصالون المنظر بس
حضرتك لما تركب العربيه ابقي اعرف خامه التابلوه كويس
وشوف ازاي هو بلاستيك
يعني لما تدوس عليه ابقي أتأكد انه بلاستيك
علشان باين ان حضرتك ماقارنتش كويس
وهقولك علي حاجه صغيره جدا
شوف دي سعرها كام ودي سعرها كام ؟؟؟؟؟؟؟

انا معاك الراي
كوري مين جنب الكرستاله
الكرستاله عربية تستحق الاحترام العيب الوحيد فيها انها واطه علي الارض بس
عربية معمرة جدا وحماله اسيه ومفيش وجه مقارنه بيها والاكسل اصلا
علشان الاكسل مش عربية ولا العربيات الكوري كلها ليها لزمة من اساسه
الا عربيات محدودة كده

[mirage8582]

انا الحمد لله معايا كريستالة99 وبالرغم انى سقط فيها ماكنة ميراج 1500بعد معاناه مع الكربيراتير بتعها بس بالامانةوبدون تحيز العربية دى حلال الفلوس اللى بتدفع فيها حمالة اسيةفعلا روحت بيها فى كلحتةعمرها الحمد لله ما زنقتنى خالص

[usamax]

الكريستاله
يا جمالها العربيه الوحيده اللىثابته سعر للان لو ملاحظين
ثانيا قطع غيارها طبعا اللى معاه العربيه مجرب
انها ارخص قطع غيار وغير كده احنا بنسميها العربيه اللى بتستر صاحبها يعنى متوقفشى غير اما تكون المكنه مش موجوده فيها اصلا
طبعا استهلاك بنزين زى الفل
صالون احسن من رائع طبعا ده ايامها لان فيه ناس هتقولى دا الماركه الفلانيه صينى وعاملين تابلوه وهم
هى بكل المقايسس عربيه تحفه وحلال فيها الفلوس

[amadjoo]

10 سنين كريستالة...عشرة يعنى
بصراحة عمرها ماكسفتنى أو وقفت منى أو عملت أى فصل بايخ
انا حاسس انها واحدة من العيلة...مشكلتى الوحيدة معاها انها واطية وى وبحس وانا نازل منها انى طالع من تحت الأرض بس للأمانة غير كده هى عربية زى الفل من حيث:

1) سهولة الصيانة
2) سعر قطع الغيار
3) الإعتمادية
4) جودة خامات التابلوه
5) الشكل الخارجى اللى ممكن تلعب فيه كل شوية وتحس انك جبت عربية جديدة كل ماتغير حاجة فيها

وحاجات تانية كتييييييييييييييير