استهلاك البنزين للبومة 1600 موديل 2008

[ahmedhosssamy]

ممكن تدلونى على معدل استهلاك البومة انا لسة جايبها كسر زيرو 2008 و فوجئت ان العربية بتاكل بنزين كتير - فى وسط البلد 320كم فى 40لتر؟؟ اعتقد داة كتير اوى . اريد تجاربكم لو سمحتم
و شكرا

[شاهين - بنز]

متقلقش استهلاك عربيتك طبيعي جدا وفعلا معروف عن اللانسر سواء ال 1300 أو ال 1600 أو أوتوماتيك أجير عادي إنها بلاعة بنزين

[amir]

ممكن تدلونى على معدل استهلاك البومة انا لسة جايبها كسر زيرو 2008 و فوجئت ان العربية بتاكل بنزين كتير - فى وسط البلد 320كم فى 40لتر؟؟ اعتقد داة كتير اوى . اريد تجاربكم لو سمحتم
و شكرا

وضح في بياناتك الشخصيه العربيه 1300 ولا 1600
و مانيوال ولا اوتوماتك
و سواء اي وضع الاستهلاك غير طبيعي اطلاقا
برجاء مراجعه التوكيل و عندك كمان في قسم الميتسوبيشي المهندس طارق من التوكيل اسئله

[amir]

متقلقش استهلاك عربيتك طبيعي جدا وفعلا معروف عن اللانسر سواء ال 1300 أو ال 1600 أو أوتوماتيك أجير عادي إنها بلاعة بنزين

ده كلام يطلع منك انت؟!!

[mahmoudzaied]

مين اللى قال ان ال 1300 بلاعة بنزين هوا استهلاك عالى نسبيا بالنسبة للكورولا والياريس بس مش كارثى (مش فرق كبير)
هيا موفرة بس من غير حرق ولا كبس ولا كيك دون
انا معرفش ال 1600 استهلاكها ايه بس استنى
دا بتوع البوما هنا كتير وان شاء الله هيردو عليك

[مصراوي جدا]

متقلقش استهلاك عربيتك طبيعي جدا وفعلا معروف عن اللانسر سواء ال 1300 أو ال 1600 أو أوتوماتيك أجير عادي إنها بلاعة بنزين

ايه يا عم شاهين بنز مش كده .. في موضوع ثبات اللانسر اللي هو احلى ميزة في البومة دخلت قلت اديها 0 على 10 في الثبات .. ماشي يا عم ده رأيك الشخصي وانت حر فيه

انما كمان في سؤال عن استهلاك البنزين تدخل تقول متقلقش دي بلاعة بنزين .. لأ كده كتير

استاذ احمد .. لأ طبعا استهلاك العربية مش طبيعي ولازم يتكشف عليها في مركز خدمة

[lovelorn]

على فكرة انا بردوا استهلاكى زى استاذ أحمد من 320 ل 350 وسط البلد ... العربية 1600 واوتوماتيك .

بس فى السفر بيكون حوالى 520 فى ال 40 لتر والتكييف شغال .

يا ترى ده طبيعى ولا فى مشكلة ؟

[samo9992003]

انا برده نفس النظام بلاعه بنزين وبلاعه كبيره كمان ده انا بطلت امشى بيها

[mohamedway]

على فكره ياجماعه موضوع الاستهلاك ده متغير بشكل واسع و أقدر أقول لكل الناس اللى شاركت فى الموضوع سواء موافقه أو معترضه على ان العربيه بلاعه بنزين انهم كلهم صادقين وان طريقه السواقه هى العامل المهم اللى بيعمل الفرق الكبير ده و هقولكم تجاربى الكتيره فى الموضوع ده (استهلاك العربيه ال1600 مانوال جوه البلد يتراوح من 160 كم/20لتر الى 230 كم /20لتر) وفى السفر من (250 كم/20لتر الى 300 كم/20لتر) شوفتوا الفرق شاسع قد ايه فى نفس العربيه؟! أنا كل الأرقام ده حققتها بعربيتى بس عشان تعمل 160 كم/20لتر جوه البلد يبقه لازم شد و حرق و تكييف و سواقه عنيفه جدا و عشان تعمل 230 كم /20لتر جوه البلد لازم سواقه هاديه جدا و من غير قرص غالص و تحسيس على دواسه البنزين و من غير تكييف ونفس الكلام فى السفر عشان تحقق 300 كم /20لتر تمشى بسرعه منتظمه من 90كم/س الى 110 كم/س بالكتير ومن غير تكييف و من غير ما تقرص على العربيه عشان توصل لهذه السرعه وعلى النقيض لو طول الطريق كابس دواسه البنزين على الأخر عشان تجيب سرعات عاليه أكتر من 140 كم/س و 160 و 180 و أكثر يبقه ما تحلم بأكتر من 250 كم /20 لتر. وأعتقد ان كل العربيات الانسر ال1600 كده حتى الأتوماتك هينطبق عليها نفس الكلام لأنه فتيس Cvt وأداؤه قريب من المانوال قوى.

[مصراوي جدا]

الكلام ده مظبوط يا باشمهندس محمد وعلشان كده لما بييجي عميل لمهندس الصيانة في التوكيل ويقول له العربية بتستهلك بنزين كتير داخل المدينة بتكون الاجابة ان داخل المدينة لا يمكن اعتباره مؤشر ثابت خالص للاستهلاك لأنك ممكن تستهلك بنزين كتير في مشوار واحد 4 كيلو على كوبري اكتوبر وهو مقفول مثلا

والفيصل هي الظروف اللي حددتها شركة ميتسوبيشي وهي تكون سايق على سرعة 90 كيلو متر في الساعة وبدون تكييف

بشكل عام اللانسر عربية طبيعية في استهلاكها للبنزين يعني محدش يقدر يقول انها موفرة واقتصادية في البنزين (الا لو بنتكلم عن المحرك 1300 وباستخدام هادي) وبرضه كلام غير صحيح مقولة بلاعة بنزين لأن في الاستخدام العادي والهادي فالعربية استهلاكها طبيعي زي غيرها

ومن الآخر لو كانت مقولة بلاعة بنزين صحيحة عمر ما كان الشعب المصري اقبل عليها بالشكل ده ابدا وكان ده عيب رهيب يلاحقها في كل مكان ويوقف سوقها نهائيا

[ahmedhosssamy]

انا عربيتى 1600 اوتوماتيك . على العموم اعتقد انى علشان العربية لسة جديدة معايا و كانت لمدة 8شهور مع حد تانى .هاجرب و احسب تانى . اعتقد لو تعمل 200 فى الصفيحة جوا البلد يكون معقول .بس انا عاوز اعرف هل حكاية النجكشن دى اونطة يعنى انها بتستهلك زى اى كاربراتير عادى

[mazen86]

27 لتر

بيعملوا معايا من 200ل250كيلو

[samyalgamal]

انا عربيتى 1600 اوتوماتيك رياضية موديل 2008 وبتعمل 200 فى الصفيحة جوا البلد وحوالي 215 على الطوالي بس على سرعة من 120 الى 160
هل ده طبيعي

[ahmedhosssamy]

انا جربت تانى عملت 370 فى 40لتر يعنى 185 فى الصفيحة جوا البلد مشاوير طويلة مع مشاوير مزدحمة هل كدة طبيعى ؟؟

[nobody]

اه كده حلو أوي