اخبار لانسر 2008 من الوكيل والاسعار المصريه

[م/محمد صلاح]

ياجماعه انا جبتلكو كل الاخبار اللى عند الوكيل

اللانسر الجديده وصلت عند الوكيل فى 3 أ شارع رمسيس (موتور تريند)
الاسعار تبدأ من 124 الف للمانيولا وتنتهى عند 147 الف للاوتوماتيك جميع الكماليات السبورت

وده كلام مدير المعرض نفسه وان العربيه هاتكون متاحه للعرض فى العنوان المذكور الساعه السادسه مساءا

وبماصفات اعلى من الخليجى ويكفى انها بضمان الوكيل مصريه

يبقى تشترى خليجى ب 152 الف ولا مصرى بضمان الوكيل ب 147 الف ؟

[أبوسيف]

بصراحة أكتر حاجة كانت بتخلى الواحد يفكر فى اللانسر هى انها عربية يابانى بسعر الكورى ، لكن بالأسعار دى أعتقد صعب انى أفكر فيها ، ولو معايا ال 150 ألف أعتقد مش هافكر فى اللانسر ، ساعتها ممكن أجيب الهوندا سيفيك أو أجيب أوبل أو حتى أفنسيس. بكدة تبقى العربية خرجت من الشريحة اللى من 80 ل 110 ودخلت فى شريحة الكبار اللى المنافسة معاهم هاتكون صعبة جدا على اللانسر ، وأعتقد بكدة هاتكون نهاية لإنتشار اللانسر الرهيب فى شوارعتا

[Eng.Salah Mahdy Salama]

أنا شفت واحدة خليجي في معرض و سعرها 145 جنية بس و لونا فضي
و بصراحة العربية أفخم كتييييييييييييييييييييييييييير من الشكل القديم لا تقارن بيها أصلا

[م/محمد صلاح]

ياجماعه كلكو عمالين تقولو سيفيك سيفيك انتو مش داريين بالدنيا ولا ايه؟
الوكيل (الفطيم) قفل باب الحجز والموزعين بيبيعوها ب 158 الف جنيه اووفر برايس

يعنى اللانسر هاتكون ارخص منها ب 11 الف جنيه وكمان كماليات اللانسر الجديده اعلى من كماليات السيفيك الموجوده فى مصر

[م/محمد صلاح]

أنا شفت واحدة خليجي في معرض و سعرها 145 جنية بس و لونا فضي
و بصراحة العربية أفخم كتييييييييييييييييييييييييييير من الشكل القديم لا تقارن بيها أصلا

فعلا العربيه الجديده افخم كتير جدا ومن جوه اوسع
كفايه الزينون الاصلى وان الفوانيس الاماميه بتتحرك يمين وشمال مع الدركسيون وكمان ممكن تتحكم فى ارتفاعها

وكمان صندوق الطابلوه مبرد يعنى فيه تلاجه

العربيه من جوه ياجماعه فخمه مووت الطابلوه باللونين الاسود و البيج وبينهم ابانوس بنى غامق وده للابواب برضه

من الخر خطيييييييييييييييييييييره

[sherif Anton]

من وجهة نظري ان كل شريحة لها مايناسبها من حيث مواصفات السيارة و سعرها .... وبالتالي زبون اللانسر سابقا مش راح يكون هو زبون اللانسر مستقبلا ... لان العربية دخلت في فئة مختلفة تماما ... وهي ونصيبها ... ياتقدر على المنافسة ... ياتخرج بره اللعبة :roll:

[م/محمد صلاح]

بالعكس اللانسر انتشارها هايكتر لانها كده هاتكون متواجده فى جميع الفئات
وماتنسوش كده بقى فيه 1300 سي سي و 1500 سي سي و 1600 سي سي
والاسعار تتراوح بين 87 الف ( 1300 مانيوال ) و 147 الف ( 1500 الشكل الجديد اوتوماتيك سبورت)
يعنى كده هاتخدم شريحه كبيره جدا
انا عن نفسى واحد من الناس كنت بحب اللانسر بس بكره الشكل القديم وكنت احب انها تكون بشكل احسن وامكانيات اكبر حتى لو زادت 20 الف جنيه ودة اللى حصل

[sherif Anton]

ماهي المشكلة ان ال 1300 (اللي هيا الشكل القديم) مأعتقدش ان راح يكون عليها طلب زي الأول ... انت عارفنا كمصريين غاويين المظاهر... يعني اللي هايروح يشتري عربية زيرو شكل قديم وييجي يفرجها لواحد صاحبه او واحد قريبه هيحسسه انها موضه قديمة وازاي يضييع فلوسه في شكل قديم ويقعد ياخد في تأنييب بتمنها واكتر ... وفي نفس الوقت انا مقلتش ان الشكل الجديد مش هايتباع ... لأ ... لكن هايتباع لزبون من فئة اخري غير زبون اللانسر الحالي (لأن السعر اعلى بكتيير ... زي ما انتو متوقعين) ... وبالتالي الأنتشار السابق للسيارة لفئة عريضه من الشعب و الناتج من المنافسة السعرية راح يقل لانه طلع لفئة اعلى ... والله اعلم

[Eng.Salah Mahdy Salama]

رأي الشخصي إن السعر على الإمكانيات بتاعة السيارة دة يعتبر مش غالي مقارنة بالأسعار المصرية ( في رأي طبعا إن السوق المصري اسعارة مبالغ فيها جداااااااااااااااااا)
لكن بصراحة كدة يبقى فعلا السيارة خرجت من فئتها القديمة و اللي حقيقي السيارة كسبت كتييييييييير من وجودها في الفئة دة وسط سيارات كتير أخري مش ياباني
لكن كرأي شخصي لو انا : يبقى مش هدفع المبلغ دة في متسوبيشي خصوصا إن شايف إن برضة شكلها من برة و الفخامة الداخلية ليها لسة معدتش الإلنترا 2007 الأتوماتيك مع إن إمكانيتها طبعا أكتر

فلو هدفع المبلغ دة في عربية يبقة هشتري سيفيك أو أعلى شوية و أجيب جيتا مثلا !!!

[م/محمد صلاح]

بالعكس انت لو شفت اللانسر الجديده على الحقيقه زى مانا شفتها هاتقول انها افخم واشيك من اللالنترا مليون مره
وعلى فكره انا لما شفتها كان واقف جمبها النترا كامله من كله Fully Loaded اللى هى اغلى حاجه فى الالنترا (122 الف)

[abo3bdolrahman]

يا جماعة الخير إنتوا بتتكلموا فى آلافات زى ما يكون بتتكلموا فى ملاليم او كل واحد عنده مطبعة فلوس فى بيته :twisted:
طبعا كده اللانسر خرجت بره المنافسة فى الفئة دى و ده نتيجة إستهبال الوكيل طبعا
لأن بره مصر ما فيش الإستعباط الغبى ده
أما المصيبة بقى فى الشعب الطيب بتاعنا اللى التجار بتاكل على حسه الشهد :twisted:
طبعا المساكين بتوعنا كل اللى نفسه يجبها هايقعد يعصر على نفسه و يدبق من هنا و من هنا علشان يجمع تمنها و يجبها علشان يبقى برستيج :!:
و التجار تغلى باستعباط و إحنا نشترى بعبط
و بعدين نرجع نقول كل حاجة بتغلى و ليه و إزاى و إشمعنا مع إننا اللى عاملين فى نفسنا كده
و بصراحة بقى اللى ما يستغلش الشعب ده يبقى أهبل و عبيط كمان و خلى الشعب يعيش :twisted:
:lol: 8) :lol:

[hazem_khidr]

ا جماعة الخير إنتوا بتتكلموا فى آلافات زى ما يكون بتتكلموا فى ملاليم او كل واحد عنده مطبعة فلوس فى بيته
طبعا كده اللانسر خرجت بره المنافسة فى الفئة دى و ده نتيجة إستهبال الوكيل طبعا
لأن بره مصر ما فيش الإستعباط الغبى ده
أما المصيبة بقى فى الشعب الطيب بتاعنا اللى التجار بتاكل على حسه الشهد
طبعا المساكين بتوعنا كل اللى نفسه يجبها هايقعد يعصر على نفسه و يدبق من هنا و من هنا علشان يجمع تمنها و يجبها علشان يبقى برستيج
و التجار تغلى باستعباط و إحنا نشترى بعبط
و بعدين نرجع نقول كل حاجة بتغلى و ليه و إزاى و إشمعنا مع إننا اللى عاملين فى نفسنا كده
و بصراحة بقى اللى ما يستغلش الشعب ده يبقى أهبل و عبيط كمان و خلى الشعب يعيش

+1

[mtema99]

انا رأيي
اننا نقاطع التجار
مثلا حد من المنتدى لو يعرف تاجر و معاه رخصه نستورد عربيات من بره و بأسعارها الحقيقيه
إذا كان في المانيا حصل كده بجد في سنه
و على اساسه توكيل سكودا و سيات بقت اسعار عربيتهم في الارض الناس بطلوا يشتروا منهم

[mina_ramsis]

ايه يا جماعة الاسعار الغريبة ديه انا كنت فى معرض القوات المسلحة فى الرمل و كان كاتب ورقة على الباب فيها اعلان عن اللانسر الجديده لضباط الجيش و كان سعرها التداءا من 102 الف حتى 124 الف و كان بيحجز ب 50 الف فى الاول
مش عارف يا جماعة بس الاسكندرانية هيعرفوا الكلام اللى انا بقوله ده

[boody2]

ايه يا جماعة الاسعار الغريبة ديه انا كنت فى معرض القوات المسلحة فى الرمل و كان كاتب ورقة على الباب فيها اعلان عن اللانسر الجديده لضباط الجيش و كان سعرها التداءا من 102 الف حتى 124 الف و كان بيحجز ب 50 الف فى الاول
مش عارف يا جماعة بس الاسكندرانية هيعرفوا الكلام اللى انا بقوله ده

اعتقد ان الاسعار دية اسعار الشكل القديم 2008