احذروا سرقة اللانسر بالذات

[nasr-eldeen]

يا إخواني البشمهندس طارق إستشاري ميتسوبيشي رد على هذه الإشاعة

سؤال مهم:-
هل مفتاح اللانسر المشفر بيطلع برقم شاسية العربية؟
سؤال تانى , يعنى لو اى حد شاف رقم شاسية اى عربية ممكن يطلع مفتاح؟
ولو الاجابة بنعم زى ما انا اعتقد اية الحل عشان دى تبقى مصيبة خاصة ان العربيات الخليجى كلها رقم شاسيها واضح امام الجميع.
وشكرا

سؤال مهم جدا طبعا لكن اطمن يا استاذ أنسي .. الاجابة قاطعة لأ


الموضوع بوضوح وبساطة كالتالي :


لما تيجي حضرتك عاوز تطلع مفتاح مشفر تاني للعربية لايمكن عمل مفتاح بنفس الشفرة الآولى ولكن نقول لك احضر المفاتيح القديمة لأنه بيتكون كود جديد او شفرة جديدة يتم اعطاءها للمفاتيح الثلاثة ولجهاز الايموبيليزر


وبذلك لو كان فيه مفتاح ضاع بنقول لك احضر المفتاح القديم وسيتم تشفيره مع المفتاح الجديد بشفرة جديدة وبذلك فالمفتاح الضائع ممكن ان يفتح الأبواب لكن لن يستطيع تدوير المحرك لأن الشفرة تغيرت

وطبعا حل ان المفتاح الضائع لا يفتح الابواب كمان ان الكوالين تتغير


نقطة مهمة كمان للحماية والأمن

ان لازم اللي يعمل الموضوع ده صاحب العربية شخصيا اللي اسمه في الرخصة او من معه توكيل رسمي منه

وكذلك لو العربية عليها حظر بيع من بنك لازم تجيب خطاب موافقة من البنك بعمل مفتاح اضافي

عفوا استاذ طارق انا قصدى الحرامى لما يشوف رقم الشاسية سواء شافة على الرخصة او على طابلوة العربيات الخليجى, مش لو ضاع منى وطبعا حضرتك عارف ان دلوقتى فى اماكن كتير ممكن تطلع مفتاح بسهولة حتى من غير ما تتأكد من شخصية مالك العربية ودة طبعا عشان الفلوس, فهل فى الحالة دى ممكن يسرق العربية.... يعنى مثلا لو موظف الترخيص لو شاف رقم الشاسية ومعاة العنوان من الاوراق ممكن بسهولة يروح يعمل مفتاح ويجى على عنوانى بسهولة ويسرقها! انا مش فاهم ياريت تطمنى وتطمن كل اللانسراوية عشان دة فعلا موضوع مهم جدا.

لأ يا استاذ انسي رقم الشاسيه ليس له اي علاقة بالموضوع ده .. وزي ما قلت لحضرتك ان الشفرة القديمة لا يمكن تكرارها لأنها عشوائية وبالتالي اللي بيتم هو تكوين شفرة جديدة يتم تسجيلها على كل المفاتيح وعلى وحدة الايموبيليزر علشان يحسوا ببعض

هو ده اللي بيحصل في التوكيل واعتقد هو اللي بيحصل في محلات المفاتيح اللي بتعمل مفاتيح مشفرة (حتى لو مش بتاخد اثباتات من العميل انه صاحب العربية) وممكن تتصل بمحل المفاتيح اللي موجود في منتدى( خدمات نايل موتورز للأعضاء ) اللي بيعمل خصم للأعضاء وتقول له : هل ينفع اعمل نسخة مفتاح اضافي لمفتاح مشفر معايا من غير ما تكون العربية موجودة (أو من رقم الشاسيه).

اعتقد الاجابة هتكون : لأ مينفعش لازم تجيب العربية علشان هنعيد تشفير العربية مع المفاتيح كلها بنفس الشفرة

الموضوع اهو :
http://www.nilemotors.net/Nile/showthread.php?t=24919


وهنا كريم بيشرح اللي بيتم وهتلاقيه زي ما قلت لك كده لازم العربية تكون موجودة مينفعش من غيرها واكيد لازم يتأكد انك صاحبها

karim_monir
اولا انا مش بكود ومش انا اللي صاحب المحل
اما عن التكويد فانا جربتة فعلا على عربيتي وناجح جدا
جاب مفتاح وعمل العارد كوبي على المكنة وجاب المفتاح الاصلي حطة ف يالكونتاكت عندي وحط الجهاز الموضح بالصورة في في فيشة علبة الفيوزات عندي واتسجل علية الشفرة وشال المفتاح الاصلي وحط المصطنع وكتب علية الشفرة المفتاح دور العربية بكل سهولة
ادي الحكاية والصورة للتوضيح اثناء ما كان شغال

http://www.nilemotors.net/Nile/newreply.php?do=newreply&p=504846

[hossameid]

يا جماعة كل الانسر ال 1300 لايوجد فبها immobilizer و عشان كدا كل اللى بيتسرقوا 1300 مش 1600, والوضوع ده يخلى اى واحد حيشترى عربية يفضل اللى فيها immobilizer ,انا اعرف واحد اشترا لانسر 1300 زيرو وبعد كام اسبوع اتسقت من تحت بيته

[re3ooo]

انا معنديش عربية بس عندي فكرة حطولها رزة وقفل

[ouba2]

معاك حق فعلا موضوع اللانسر بالذات سمعته اكتر من مره

[kimoboy]

I think the best and cheapest method is to install car alarm and put like 2 loud sirens and make it the motion detection sensitive so once the thief tries to open the door the alarm will sound and it will be loud,, so he will get scared and run away and if you want it more louder install it to the horn.

[Abdallah2025]

السلام عليكم
انا اريد ان اعرف كيف يتم تركيبه وعند مين ولما اعوز اشغله بغلق كونتاكت العربية ثم اشغله ولو جيت اشغل العربية افتحه الاول ولما يجي واحد بعدى مش هيشغلها وهل فى هذه الحالة انذار السيارة يشتغل ولا لأ؟

[ringoo84]

سؤال بجد اشمعنى اللانسر؟؟؟؟؟؟؟؟

[nasr-eldeen]

أخيراً يا جماااااااااااااااعة
أخيراً عرفت الحرمية بيفتحوا باب السيارة إزااااااااااااااااااااااااااي وأي سيارة مش اللانسر بس ؟
بس هي اللانسر الأكثر شهرة لسهولة تصريف قطع الغيار بعد تقطيع السيارة .
المهم عارفين بيفتحو الباب إزااااي بكل سهولة ؟؟؟؟؟
أنظر للصورة !!!!!!!!!


أه بيكسر الزجاج ؟
تركت السيارة يوم الإثنين الماضي 5/1/2008 الساعة الثالثة إلا عشر دقائق عصراً وعدت إليها الثالثة وثلث عصراً وجدت الزجاج مكسور ، ظننت أني تركت الموبيل في السيارة فطمع فيه شخص ما وكسر الزجاج وسرقه لكن لا الموبيل في جيبي ؟؟؟؟
قولت يمكن الشمس لكن لا الجو جميل وبعدين الشمس هتكسر الزجاج وتفتح المسوجر وكمان درج التابلوه ؟؟؟؟؟
عند إذن علمت أنه سارق حرامي لص يعيس في الأرض فساداً ، والأدهى من ذلك أن هدفة لم يكن تقليب السيارة ، ولكن كان الهدف سرقة السيارة ككل والدليل أنه لم يأخذ الإستبن وشنطة العدة والكوريك والغطاء ؟؟؟
فهناك حقيقة وإحتمالين ؟؟؟
الحقيقة أن السارق مرابط في المكان ومتابع جيد !!!!
الإحتمالين ؟
الأول أنه بالطبع هو شاهدني وأنا أركن السيارة وبعد دخولي المكان ( شارع خاتم المرسلين العمرانية ) وأنا لست من سكان هذا الشارع أنا عابر سبيل المهم كسر هو السيارة وحاول تشغيلها وعند خروجي من المكان شاهدني فهرب ولذلك لم يستطع سرقتها .
الإحتمال الثاني أنه لم يستطع تشغيلها بسبب الإيمبولايزر فترك السيارة .
وأنا أنظف الزجاج المكسور بعد الحادثة شاهدت شخص وانتابني شعور نحوه بأنه الفاعل لكن لا أستطيع مواجهته لأنه بعيد عن مسرح الجريمة لمجرد الظن، وسبب شكي فيه هو حملة لمضرب هوكي ومظهره لا يدل على أن له صلة بهذه الرياضة من قريب أو بعيد فظننت أن هذا المضرب الذي قام بكسر الزجاج به ؟
الدروس المستفادة ؟
ـ نحمد الله على أن الأمر توقف عند هذا الحد ( ربنا لك الحمد حمداً طيباً مباركاً فيه كما ينبغي لجلال وجهك ولعظيم سلطانك ) ، وإلا كانت السيارة الأن في عداد قطع الغيار وقسمت أشلاء في إنتظار من يحتاج أبواب ورفارف وأرباع وأنصاف .
ـ تركيب جهاز إنذار مما يسبب إرتباك للسارق عند فتح الباب في منطقة مأهولة مثل تلك ( إنما لو في مكان نائي فلا ينفع معه ) .
ملحوظة تم تركيب زجاج آخر اليوم في توكيل مصرية قليوب بمبلغ 712.8ج.م. شامل التركيب والضريبة .

[mada121977]

الحمدلله انها جت على قد الازاز...واهم حاجه ان حضرتك بخير ... ربنا يسترها معانا كلنا ويبعد عنا الحراميه دول

[nasr-eldeen]

الحمدلله انها جت على قد الازاز...واهم حاجه ان حضرتك بخير ... ربنا يسترها معانا كلنا ويبعد عنا الحراميه دول

ألف شكر يا باشا وربنا يبعد عننا الإذى جميعاً بكل أشكاله .
والحمد لله

[bishoy02010]

يا جماعة جهاز الباروت اللى اتكلمتوا علية اللى ب الفين جنية و 600 تركيب ممكن اعرف بيتباع فين و بيركب فين و متوافق مع كل السيارات ولا إيه واى معلومات تانى عنة وشكرا

[popeto]

اسهل حل ربى كلب فى العربيه
و ربنا يكفينا شرهم

[lovelorn]

قدر الله وما شاء فعل ..

نحن السابقون وانتم اللاحقون .. بس انا سرق الكاسيت وقطع ضفيرة الكهربة والانجكشن علئ بسبب قفلة الكهربة .... منهم لله وربنا يجحمهم ويبعدهم عنا .

[powerofhelll]

الله يكون في عون الناس الي اتسرقت دي من فتره في اسكندريه عندي واحد صاحبي كان معاه نوبيرا هوا و خطيبته و 3 سكنين معاه في العماره عربيتهم اتسرقت كلها بس الحرامية مخدوش الا الصالون و تركوا السياره من غير بريبيز امامي و خلفي و التابلوه بمحتوياته و الكراسي و الطاره

[opel77777]

زرار الكهربا مينفعش يا اخونه عشان العربيه علي كارتات وياريت نصحصح شويه