أسباب اختيارى لللانسر!!!!

[MAX_PIN]

اولا احب اشكر كل الاعضاء الموجودين فى المنتدى

الى اكتر من رائع والى بالتأكيد افاد ناس كتير جدا سواء مصريين أو غيرهم

بالنسبة لموضوع انى اشترى عربيه فاهوا من أصعب القرارات الى اتخذتها فى

حياتى والسبب فى كده انى بحب ماركات كتير وكنت محتار جدا جدا فضلت تقريبا

كذا شهر فى حيرة ولكن ربنا أراد ووفقنى واشتريت لانسر(بومه) سبورت 2009 جى إل اكس أوتوماتيك ضمان الوكيل

وده لينك لصور العربيه http://www.mypicx.com/04122009/lancer/

اسباب اختيارى للعربيه ديه كالأتى:
1-طبعا اصدقائى الى معاهم العربيه ديه وشغاله معاهم ماشاء الله زى الفل وبيطحنوا فيها ومش بتقول لأ

2- بما انى من سكان الصعيد عفشة العربيه مناسبة جدا لطرق الصعيد والى هي اشد قسوة من اى طرق تانيه والعفشه مش محتاجه كل شوية ارفع وربط

3-الثبات الرائع على السرعات مع انى مش بفضل ابدا ابدا السرعات العاليه مهما كان نوع العربيه

4-التكيف الفوق ممتاز لأن الجو فى الصعيد اكيد انتوا عارفين فى الصيف جهنم الحمرا وفى الشتا تلج بمعنى الكلمة

5-الفتيس المريح جدا والى مش بيحسسك بالنقل خالص وبيوصل للسرعات العاليه بكل سهوله

6-عزم المطور شديد ولما تشد عليه شوية تحس اكتر بالعزم وتسمع صوت الزئير بتاعه

7-ارتفاع العربيه عن الارض انا لما كنت جاى من مصر بعد ماعملت صيانه الألف كيلو وكان معايا اربع اشخاص ف العربيه ده غيرى طبعا وعديت كل المطبات الى عندنا فى الصعيد والى تشبة لحد كبير الجبال والحمدلله عديت من عليهم بدون اى حكه ولا تقولى خد المطب بالطول ولا بالعرض

8-شكلها الخارجى حلو ورياضى (ديه طبعا اذواق)

9-التابلوة جميل جدا وشيك مش محتاج اى افتكاسات يعنى سهل التوصل لأى حاجة واضاءة العدادات مريحه للعين وسهله

10-الكاسيت رائع والراديو مفيش انقى من كده واستقباله رهيب لكل المحطات

11-السى دى جميل والسماعات صوتهم نقى وقوى وانا ظبط الكاسيت على أعلى بيز وأعلى تويتر على درجة 6 وبرغم من كده مهما تعلى الصوت مش بيوحش

12-الكاوتش التيورنزا المصنف من ضمن الكاوتشات الرياضيه لبريدجستون وبحجمه 195 يعتبر ممتاز ع العربيه مع ان فى ناس كتير بتقول ان صوته عالى بس بصراحه تاخد منه كفائة تشغيل عاليه وده بشهادة ناس كتير عندنا فى الصعيد

بس اول لما رحت استلم العربيه وبفتح الشنطه وببص على الأستبن فضلت مستغرب شوية لما لقيت كلمة Made In China طبعا مكتوبة ع الأستبن بس بعد كده رجعت فكرت تانى وقولت اكيد
الشركة ليها مصنع هناك واكيد حاجة زى ديه بتتصنع تحت رقابة الشركة الأم ومش معقول يضحوا بالعربيه كلها مقابل الجنط وقولت فى نفسى بلاش الوساوس تشتغل دلوقتى

بس ليا كام سؤال وانشاء الله أكيد هلاقى الاجابة عندكم:

دايما لما باجى اركن العربيه بحط عصاية الفتيس على N وبرفع فرامل اليد مع ان فى ناس قالتلى لازم تخليه على P وبصراحه بخاف لحسن يكون العربيه محمله على ترس
وارجوا التوضيح للأستعمال الصحيح للسى فى تى!!

نفسى اغير الزجاج واجيب زجاج لونه عسلى هل متوفر فى مصر ؟

أية أفضل نوع زيت محرك احطه للعربيه؟ انا فى الصيانه الاولى التوكيل حط موبيل وان وخصوصا بقى ان العربيه هيبقى استخدامى ليها سفر فقط

عاوز اركب زينون عالى فقط هل بيحتاج كتاوت ولا لأ واية أفضل نوع ؟

عاوز ألون الفرامل بنفس لون العربيه(نبيتى) ورا وقدام يترى تتكلف كام تقريبا؟

افضل نوع مياة خضرا للردياتير؟

أفضل نوع منظف دورة وقود؟

هل توجد مشاكل اذا غسلت العربيه فى بنزينه؟وهل غسل المطور كويس؟

امتى العربيه تتغسل من تحت يعنى العفشة والاجزاء التانيه وهل فى ضرر لو العفشة اتغسلت اترشت بسولار؟

ازاى يتنضف فلتر الهواء؟ وياريت بالصور

هل توجد فعلا فلاتر هواء لللانسر(البومه) تزود فى الباورهورس؟

هل يوجد عازل للصوت للبومه زى الى فى الشارك؟

اية افضل ماده يتنضف بيها العربيه سواء ماده ملمعه او شمع او معالجة الخدوش؟

اية افضل ماده تلميع ومحافظه ع تابلوة العربيه؟

هل ينفع اركب كاوتش بريدجستون مقاس 205 على الجنط الأصلى؟

هل ينفع اركب الشبكه الاماميه الى على شكل شرايح بدل الى على شكل مربعات أو معينات وتتكلف كام؟

واسف جدا جدا على الاطاله وتحياتى ليكم

[onsi]

اولا مبروك العربية وما شاء الله جميلة ربنا يحفظهالك ويكفيك شرها ويديك خيرها
1 يفض يكون على N لان الناس عندنا اغبية ممكن واحد وانت راكن يحاول يطلع بعربيتة ويزقها يكسرلك ترس ولا حاجة فخلييك فى السليم احسن
2 الزجاج بتاع اللانسر مش ابيض بيور دى مدى على خضار شوية بسيطة وانصحك بلاش تركب زجاج الوان عشان الرخامة بتاعت المرور
3 طول ما انتا فى الضمان يبقى لازم تحط زيت موبل 1 ولا يجوز استعمال غيرة فى فترة الضمان لكن لو حبيت تعرف النوع الموازى لية يبقى علطول شيل هييلكس
4 الزينون لا يحتاج لكتاوت ولا اى شيى فقط تركب جهاز اسمة الميدول بيجى معاة بس اعتقد انك لو ركبتة العربية هتخرج من الضمان وممكن تسأل المهندس طارق فى الموضوع بتاعة انت تسأل ومستشار متسوبيشى يجيب
5 الفرامل اللى تمشى مع لون عربيتك بالظبط هى فرامل البيريمبو وثمنها اكثر من 800 جنية للعجلة الواحدة
6 الا مياة خضراء كويسة واسمها كولر لكن لو عايز حاجة مضمونة عشان معظمها كلة متعبى فى جراكن ومصرى يبقى علطول تجيب الكولر اللى فى علبة كانز(صفيح) بيكون مستورد
7 منظف الوقود انواعة كثيرة لكن ممكن تجيب اف 1 على سبيل المثال
8 ممكن تغسل فى اى بنزينة او كار كيير وغسل المتور كل 6 شهور قريبا او سنة وعن طريق فوم مخصوص وممنوع غسلة بالماء مطلقا فى البنزينة
9 لو قصدك غسيل الكارتيرة اللى فوق العجل دى مع كل مرة تغسل فيها العربية يعنى مع الغسيل العادى لكن غسييل العربية من تحت ممكن كل شهريين او ثلاثة او حسب الحالة والاماكن والرش بالسولار من تحت غير مفضل لان العربية ممكن تكون سخنة خاصة الشكمان او اجزاء المتور وسط العجل
10 فلتر الهواء يتم فتح الكبوت وهتلاقى علطول علبة مربعة وعليها كلبسات يتم فكها وخروج الفلتر ثم نفخة بكمبريسور هواء ثم اعادة تركيبة بنفس الخطوات وهو سهل جدا ولا يحتاج لاى صور وانا اسف ماعنديش صور
11 فلاتر الهواء الرياضية الاسنانلس وهى تساعد اكثر على تخفيف حرارة المتور خاصة لو اتركبت صح لكن تزود الهورس باور .... الله اعلم لا افتى
12 لا يوجد عازل للبوما على قدر ما اعلم لكن كل شيى ممكن عملة وتركيبة فى مصر بسهولة
13 يوجد العديد من الانواع ايضا سواء فى غسيل العربية او الخدوش او التلميع وممكن اى كمباوند يقوم بالواجب
14 ملمع التابلوة يبقى فوميولاا 1 علطول وتجيب معاة السفنجة بتاعتة وترش على السفنجة الاول وبعدين تلمع بيها مش ترش مباشرة من العبوة وهذا لضمان التوزيع الجيد للملمع , وكمان فى فكرة كمان قالها واحد فى المنتدى انك ممكن تستعمل الجلسرين لكن انا مجربتوش بصراحة
15 ينفع تركب الكاوتش الجديد على نفس الجنت وممكن مزيد من النصائح من اسأل المهندس نجاد وكيل بريدجستون فى مصر والمنتدى بتاعة
16 ممكن الشبكة تتغير لكن انا مش عارف انتى عايز تغيرها لية خاصة ان العربية لسة زيرو لكن لو شكلها مضايقك او عايز تروشها يبقى هتلها جريدة نيكل مثلا ... وفى النهاية ارجو ان اكون ساعدتك ولو قليلا ودى يا جماعة اجتهادات كلها ماعدا السهو او الخطأ وشكرا

[MAX_PIN]

ألف ألف شكر ياأستاذ onsi وربنا يبارك فيك كفاية ياباشا انك كلفت نفسك ورديت على الاسئلة الكتيرة دية وبجد افادتتنى كتير

[mohamedway]

[COLOR="Black"]بس اول لما رحت استلم العربيه وبفتح الشنطه وببص على الأستبن فضلت مستغرب شوية لما لقيت كلمة Made In China طبعا مكتوبة ع الأستبن بس بعد كده رجعت فكرت تانى وقولت اكيد
الشركة ليها مصنع هناك واكيد حاجة زى ديه بتتصنع تحت رقابة الشركة الأم ومش معقول يضحوا بالعربيه كلها مقابل الجنط وقولت فى نفسى بلاش الوساوس تشتغل دلوقتى

أنا معايا بومه 1600 2006 و عمرى ما شوفت Made in china فيها فى أى مكان ولا حتى على الإستبن.........ممكن أعرف شوفتها مكتوبه فين بالضبط؟؟ ده حتى الكاوتش عندى Made in japan??????????!!!!!!!

[nobody]

مكتوبة على الجنط الاسبور

[MAX_PIN]

بتبقى مكتوبة على الجنط الاسبور فقط من الضهر يااستاذ محمد زى ماأستاذ nobody ماقال لكن الكاوتش والعربيه كلها يابانى

[mohamedway]

بتبقى مكتوبة على الجنط الاسبور فقط من الضهر يااستاذ محمد زى ماأستاذ nobody ماقال لكن الكاوتش والعربيه كلها يابانى

أول مره أعرف الحكايه ده و لكن ما دام مبدأ ان العربيه فيها جزء صينى كده عينى عينك يبقه أكيد أكيد فى حاجات تانيه صينى وده مش معناه ان هى وحشه لأن الصين بتعمل حاجات حلوه و حاجات وحشه على حسب المنتج نفسه و لكن اللى انا متأكد منه دلوقتى ان طنابير الفرامل الأماميه فى الانسر صينى و من النوع الردىء كمان

[hfekry]

الف مبروك . ونعم الإختيار , ربنا يديك خيرها ويكفيبك شرها
انا ليا عندك سؤالين :
1 - العربية تمنها كام ؟
2 - انا كنت أعرف ان الصالون البيج والتابلوه البيج ده بينزل فى العربيات الخليجى بس
هى العربية دى الموديل الـ سبورت ولا الـ السام أكشن
ربنا يبارك لك فيها

[MAX_PIN]

الله يبارك فيك ياأستاذ hfekry انا لما اشتريتها كان فى يوم 12/2/2009
ب124.000 كاش بس عن طريق واسطة عشان السعر كان ازيد من كده باألف أو ألفين تقريبا
بالنسبة لتابلوة العربيه أولا العربيه مواصفات مصرية بضمان مصرية مش مواصفات خليجى
ولون التابلوة ده انته الى بتطلبه سواء بيج او فيرانى او اسود زى ماتحب
موديل العربيه السبورت أو الرياضيه الكامله والفرق بينها وبين السوبر أكشن ان فى السوبر أكشن
الكراسى جلد طبيعى والفوانيس الى قدام عاديه مش غامقه والفوانيس الى ورا حمرا مش شفافه او كريستال وطبعا السوبر أكشن أغلى عشان فرش الجلد فقط