اخيرا اشتريت الكريستالة

[dr-mohamed]

بعد لف ودوخة حوالى شهر اشترك معايا في جزء منها الاخ الدكتور وليد من الموقع هنا واتفرجنا على العجب العجاب من عربيات راشة دواخل وعاملة حوادث ويقولك فبريكة الى اخره اخيرا ربنا كرمني واشتريت واحدة يوم الاربعاء و مواصفاتها كالتالي
لانسر 1300 سي سي gl اوتوماتيك موديل 99 وطبعا كشفت عليها في بنزينة حالة الفبريكة دواخل كما خرجت من المصنع وواخدة خبطة في الرفرف اليمين والكبوت فيه خبطات خفيفة على الحرف
التكييف بحالة جيدة جدا
كبس الموتور 75%
صيانتها دايما في التوكيل واخر صيانة كانت في شهر فبراير اللي فات
العربية عاملة 89 الف كيلو
محتاجة مساعدين وسوست على المدي البعيد شوية عشان ترفع العربية وكمان علبة دركسيون
اشتريتها ب50 الف
رحت ضبطت الكربراتير عند الاسطي رضا اللى في الهرم وغيرت البوجيات برغم انها كانت لسة كويسة احتياطي
ايه رايكم وايه نصايحكم

[M.FOUAD]

الف مبروك و ربنا يكفيك شرها
شيك على كل السبور و شوف الزيوت كلها باور و فتيس و دركسيون و كلة
ربط على العفشة
راجع على التكييف و شوف ان كان محتاج يتزود شحن

[lovelorn]

ألف مبروك على العربية .. بس هو 50 ألف مش كتير ؟؟ ... اصل من شهرين كانت قدامى لانسر 99 . 1500 cc مش 1300 واوتوماتيك بتاعت واحد قنصل جايبها معاه من فلسطين ... وكلمته عليها لقيته باعها ... بجد ندمت عليها أوى .. العربيه دى لا تعوض ..

ربنا يباركلك فيها ويكفيك شر الطريق .

طبعا كشفت عليها في بنزينة

هوا مش الكشف بيكون فى التوكيل أو عند سمكرى أو بوياجى .... ايه علاقة البنزينة بالموضوع ده ؟؟

[M.almaghraby]

عربية جميلة يا باشا الف مبروك

بس مش عايز افتي ,,,, بس 50 الف كتير شوية؟

بس عربية تستاهل و يارب نعجبك

[أبو إياد]

الف مبروك وربنا يديلك خيرها ويكفيك شرها

ولازم ولابد من تغيير جميع السييور مع قراءه العداد عند التغيير وتغييرها كل 60000كم بالكتير
وتغيير الزيوت (موتور وفتيس )

[faron525]

الف الف ميروك

[batviser]

الف الف مبروك يا دكتور محمد و ربنا يباركلك فيها و يكفيك شرها ، ادعيلى اشترى حاجه كويسه كده زى بتاعتك انشاء الله

[dr-mohamed]

الله يبارك فيكم يا جماعة كلكم ومتشكر جدا لكل واحد بارك لي ومساعداتكم بقة يا رجالة
وعقبالك يا دكتور وليد يا رب وتكون احسن منها مليون مرة

[shrifelmasry]

لو عربية كريستالة و حالتها كويسة ... السعر دة مش قليل فيها ، بالعكس دة ممتاز
ربنا يبارك لك فيها و يعطيك خيرها و يكفيك شرها