ما هي أفضل سيارة لانسر؟

[أبوعبدالرحمن]

السلام عليكم ورحمة الله وبركاته...

إخواني الأعزاء أخوكم مقيم في أحد الدول العربية وأفكر في شراء سيارة وبعد الفحص وسؤال أهل الخبرة تأكد لي بأن أكثر سيارتين لهما شعبيتين بمصر هما الـ لانسر والهيونداي ولكن كما هو معلوم أن الياباني يربح لاسيما وأن الأخيرة لها باع كبير في مجال السيارات فضلاً عن بلد المنشأ وهي اليابان أيضًا لا يخفى على أحد في حالة إعادة البيع يتفوق الياباني وترجح كفاته على غيره لذلك كان الاختيار والتركيز على اللانسر...

ولكن يبقى لي السؤال الأهم كيف أقوم باختيار سيارة لانسر تلائم ظروف الحياة هنا بالخليج ومن ثمة الاستفادة منها في مصر،،،

والسؤال بشكل آخر على أي أساس أقوم باختيارها هل 1300 أم 1600 وهل عادي ولا اتوماتيك وهل كاملة المواصفات أم عادية،،،

أرجو التوضيح لاسيما وأنني أفكر بيعها بمصر بعد عدة سنوات من استعمالها هنا بالخليج،،، وعلى هذا الأساس أريد المواصفات المرغوبة في اللانسر بمصر على ضوء ما ذكر سالفًا،،،

وجزاكم الله خيرًا،،،

[أبو_حمزة]

كل اللانسر مرغوب فيه فى مصر (بشرط الشكل القديم مش الجديد)
هات اللى تعجبك و ربنا يوفقك

[أبوعبدالرحمن]

أهلاً وسهلاً أخي العزيز Sabbagh

وجزاك الله خيرًا على ردك ومرورك الكريم،،،

لكن أنا شايف اختلاف في أراء بعض الأعضاء فبعضهم يتخوف من 1600 وأيضًا وكما هي طبيعتنا نحن المصريين نفضل العادي أكثر من الاتوماتيك،،،

علمًا بأن فارق السعر هنا كبير ما بين العادي والاتوماتيك وما بين 1300 و 1600 ولكن يتضح لي بأن في مصر أن الفارق ليس كبير ولا يمثل أهمية بمصر لاسيما وأن 1600 تستهلك بترول أكثر أيضًا الاتوماتيك غير مرغوب بشكل كبير في مصر فهل فارق السعر ما بين العادي 1300 كبير و1600 اتوماتيك،،،

لكن معقول القديم مرغوب في مصر أكثر من الشكل الجديد،،، ولماذا؟

[مصراوي جدا]

أولا أهلا بيك يا ابو عبد الرحمن في منتدانا الجميل وكل سنة وانت طيب

ثانيا اكيد طبعا حضرتك عارف قوانين انزال عربية من بره مصر يعني لازم تشتري عربية زيرو وتسجلها في السفارة ومش بس كده ده كمان طالما موديلات 2008 نزلت يبقى لازم تكون 2008 مش 2007 والا ممكن الجمارك ترفضها في مصر( ممكن التأكد من ذلك بسؤال السفارة المصرية) لأن ممكن تلاقي الوكيل عندك عامل خصومات على موديلات 2007 لكن تكتشف ان قوانيننا المصرية الجميلة تمنع دخولها لأن موديلات 2008 نزلت فأرجو التأكد من ذلك

بخصوص الشكل القديم والجديد فالشكل الجديد لسه محدش عارفة ولا جربه وبالتالي طبعا الشكل القديم هو الحصان الرابح والمضمون

بالطبع 1600 أفضل من 1300 واستهلاك البنزين مش عالي فالأفضل تكون 1600 ورأيي الشخصي انها كمان تكون كاملة سبورت يعني فتحة سقف وسبويلر وجنوط سبور وفوج لامب وفرش جلد وطبعا اوتوماتيك لأن كل ده له تمنه سواء عند الشراء زيرو او عند البيع مستعمل وبالتالي فالأفضل تكون سبورت كاملة

أما عن كونها اوتوماتيك فالناس في مصر دلوقتي بتفضل الاوتوماتيك علشان الشوارع كلها واقفة 24 ساعة عرض مستمر والمشي في الاشارات يذل وبالتالي الاوتوماتيك ارحم من المانوال

واخيرا ربنا يوفقك وكل سنة وانتم طيبين جميعا

[أبو_حمزة]

أهلا بك يا أخى
من ناحية الاتوماتيك و المانوال:
فارق السعر فى مصر بسيط و الاتنين مرغوب فيهم و ماشيين جدا و يمكن بالنسبة للانسر الأتوماتيك منتشر اكتر سواء 1300 أو 1600
طبعا اراء الناس تختلف ان كان مانوال أفضل او اتوماتيك بس طبعا ده اختلاف اراء و تفضيل شخصى عشان كده ال2 موجودين وشغالين.

أما عن موضوع الشكل الجديد و القديم:
الجديد (ال1500) سعره مبالغ فيه جدااا و الكثير يتوقع ان تكون مبيعاته ضعيفه فى مصر
عشان كده سعر اعادة البيع متوقع يكون أحسن فى الشكل القديم عن الجديد

[أبو عبدالله]

طبعا 1600 سي سي افضل

اما موضوع الجير مانويل او اوتوماتيك فده براحتك انت

[eng_mkhalaf]

أنا من رأى الشخصى المتواضع لانسر 1600 فول اوبشن سبورت أتوماتيك الشكل القديم - عربية مش محتاجة كلام - أنا كنت هاجيبها خلاص وحجزتها فى الرواس كويتى- بس لظروف خاصة لغيت القرار بس هية أن شاء اللة فى الحسبان بالأضافة إلى النيسان سوبر صالون

[أبو_حمزة]

يا اخوانا
الراجل مش لسه عايز يعرف لانسر حلوة أو وحشة
هو خلاص مقتنع بيها بس عايز يعرف لما يرجع بيها على مصر ان شاء الله ايه اللى يخلى العربية سوقها ماشى عشان لو باع
كلامى صح؟
يبقى الكلام 1300 و 1600 مانوال و اتوماتيك و سبورت و كله
كل ده ماشى سوقه فى مصر و الحمد لله
يبقى تنقى الأصلح لك و المناسب لأسلوب سواقتك و اطمن ان كل لانسر سوقها ماشى فى مصر

[mohey]

طبعأ 1600 أفضل وخصوصاً لو بتفكر فى الأتوماتيك

[dragonsmith]

طالما موديلات 2008 نزلت يبقى لازم تكون 2008 مش 2007 والا ممكن الجمارك ترفضها في مصر

السلام عليكم،

أهم حاجة ان شراء السيارة يكون في سنة الموديل بالإضافة لشرط المالك الأول طبعا. مش مهم لو كان موديل 2008 نزل.
شكرا.

[أبوعبدالرحمن]

أولاً أسف لتأخري في الرد عليكم واستهل كلامي بالشكر لكم جميعًا يا أبناء بلدي الأعزاء،،،

ثانيًا واحد ابن حلال لعب في راسي واقنعني بالدايهاتسو تريوس 2008 وهي الأفضل بالنسبة لي بسبب ظروف عملي وطبيعة الخليج القاسية وسؤالي هل التريوس الشكل الجديد مرغوب في مصر ومحافظ على سعره يعني لما أحب أبعها بعد 5 أو 6 سنوات حلاقي لها مشتري بسعر كويس،،،

وجزاتم خيرًا،،،