صيانة في التوكيل وشكر للأستاذ مصراوي جدا

[elpasha009]

أنا كنت قررت قبل كده اني مش هعمل صيانات غير الزوجية في التوكيل.وفعلا اتصلت يوم الخميس اللي قبل العيد وحجزت في التوكيل الفرع الرئيسي.وخد معاد على الخميس النهاردة.
المهم أنا رحت على الساعة 7:30 تقريبا وكان رقمي 4 (بيفتحو الساعة 8)
المهم المهندس استلم مني العربية وقلتله على ملاحظاتي ومفيش نص ساعة ولقيتهم بينادو عليه أنا طبعا قولت أكيد العربية مخلصستش والا هيبقى معجزة :)
وفعلا كانو عاوزيني عشان يقولولي هيغيروا تيل الفرامل.
المهم بعد ساعة كمان عرفت ان العربية خلصت فقولت أطلع أسلم على الاستاذ طارق زويل اللي هو مصراوي جدا.
أنا أول مروحت الصبح سألت عليه بس قررت اني أطلهله بعد ما أخلص مش قبل.قالولي ان هو بيجي برحته ويمشي برحته(تقريبا هو قريب المدير:):):))بهرج طبعا.
المهم الراجل طلع ذوق جدا جدا جدا وبجد حاجة فوق الوصف وبعد السلام وكده كان مصمم يعمل معايا أي واجب وقالي انت مقولتليش ليه أول ماجيت عشان أعملك خصم أو ادخلك بدري أو أوصيلك على العربية جوه.
المهم سلمت عليه وعلى زميله في المكتب الاستاذ محمد ونزلت.
الورق بتاع العربية اتأخر شوية وبالصدفة الاستاذ محمد شافني وقالي واقف ليه لحد دلوقتي قولتله الورق اتأخر الراجل بصراحة مكدبش خبر ولف المبنى كله عشان يخلصلي الورق وكمان عملي خصم 15% على المصنعية وقطع الغيار.
بصراحة يا جماعة الاستاذ طارق والاستاذ محمد بجد ناس ملهاش حل قمة الذوق والأخلاق والاحترام.ربنا يجزيهم عننا خير ان شاء الله
على فكرة صيانة ال 40 ألف بمبلغ خرافي جدااااااااااااااااااااااااااا
1800 جنيه مصري فقط لا غير:)
حاجة كمان لفتت انتباعي جدا وهي ان أحد العاملين هناك قالي انت بتغير زيت وفلتر برة فين قولتله أي بنزينه قالي ماشي بس نصيحة اشتري الفلتر من هنا وغير في أي مكان عشان أغلب الفلترات اللي في السوق مضروبة وجلهم عربيات فيها عيوب بسبب الفلتر المضروب عشان بينقط زيت

[elpasha009]

أنا كمان نسيت أقولكم ان الفلتر اللى عندهم في علبة متبرشمة وبتتفتح مرة واحدة بس مش زي العلب اللى بره.وكمان مكتوب على الفلتر ميتسوبيشي.
وكمان عندهم منظف دورة البنزين وده بيتحط كل 10 ألاف كيلو.أنا جبت منه واحدة بي 55 جنيه واللى شجعني لي كده انه أصلا ميتسوبيشي هي اللي عملاه يعني نوعة ميتسوبيشي.هو لازم يتحط والتنك قرب يفضى وأنا لسه مفول امبارح.
وعلى فكرة المهندس محمد اللي شغال مع المهندس طارق فيه شبه كبير جداااااااااااااا لي الاستاذ اسلام شاهين:)
بجد أن أول ماشفته الصبح افتكرت ان هو الاستاذ اسلام بس لما دخل الادارة عرفت انه شغال هناك وكمان دورت على أي عربية عليها بادج نايل موتورز ملقتش:)

[إسلام شاهين]

أولا نقدم شكرنا للأستاذ طارق ( مصرواي جدا )

ثانيا ليا طلب عند حضرتك :- ممكن تقولنا الصيانة اللي حضرتك عملتها عملوا فيها إيه بالضبط وإيه اللي اتغير وال 1800 جتيه بتوع إيه بالضبط ؟ يعني قطع الغيار أسعارها كام والمصنعية كام وكده يعين لكي تعم الفائدة .

[elpasha009]

أنا أسف جدا والله أنا أصلا فاشل في موضوع الكتابة ده وعشان كده نسيت أقول حصل ايه أصلا:)
أنا معرفش هما عمله ايه أصلا لأن انت مش بتشوف العربية خالص من أي مكان نهائي.بس كل لما أسئل حد بيقولي بنعمل اللي مكتوب في الجدول وهو نفس اللي الاستاذ طارق نزله هنا.على فكرة أنا كنت بعمل صيانة العشرين.وكلفتني 100 جنيه الصيانة و20 سرفيس كهرباء و30 جنيه تغير تيل الفرامل وتيل أمامي بي 220 جنيه.رخيص جدا التيل على ما أعتقد.
صيانة الاربعين بقى عبارة عن تغير فلتر هواء 135
تغير فلتر بنزين 400
تغير زيت فتيس 250
تغير بوجيهات 100
تغير زيت وفلتر 250
تغير تيل فرامل 250
كان فيه حاجة كمان بس مش فاكر هي ايه؟؟؟؟؟

[hatem_badawe]

افتكر لانك وقعت قلبي


1800 ليييييييييية

[hatem_badawe]

وشكرا الاستاذ طارق

[hatem_badawe]

وشكرا الاستاذ محمد

[Dr Ahmed]

فاضل حوالى 415 جنيه .. يكونوا بتوع:
تغيير زيت الكرونة؟
طاقم الكاتينة؟
فلتر التكييف؟
السيور؟

[Sharky]

أولا شكرا للأستاذ طارق
ثانيا هو مش 1800 جم دول كتير قوى على صيانة الـ40.000 الف فى اللانسر و كان بعد الخصم :shock: :shock:

[atolba]

di shaklaha 2btadet tanada3 ! eh el 2s3aar di ! anyway am very concerned about the 55 item that u put to clean the fuel system talk about it for a while and did u notice any improvement after using it ?!

[مصراوي جدا]

عزيزي الأستاذ أحمد elpasha009

يا باشا شكرا لذوقك واحنا معملناش غير الواجب واهلا وسهلا بأي عضو من اعضاء منتدى نايل موتورز في مركز الخدمة الرئيسي بقليوب وباذن الله نقدم اي خدمة ممكن نعملها (انا باتكلم بصيغة الجمع باسمي انا والمهندس محمد اللي معايا في ادارة الكمبيوتر)

بس انا حبيت اوضح موضوع الأسعار ده لأني حسيت ان كتير من الأعضاء اتخضوا من تكلفة صيانة الاربعين الف

اولا يا جماعة الاستاذ أحمد elpasha009 عمل صيانة عشرين ألف وتكلفة الصيانة زي ما هي في الجدول 120 جنيه (100 ميكانيكا و 20 كهرباء) وعربيته طلعت محتاجه تغيير تيل فرامل يمكن برضه رجله تقيله شوية على الفرامل فهو ب 220 جنيه وتركيبه ب 30 جنيه يعني اجمالي الفاتورة 370 جنيه وضريبة مبيعات 10 % 37 جنيه وخصم 27 جنيه 5% قطع غيار و 10% مصنعية وده اللي نقدر عليه يكون المجموع 380 جنيه

انما هو سأل عن صيانة الأربعين الف تكلفتها كام والظاهر برضه اللي رد عليه جمع له كل الاحتمالات الممكنة علشان ميقولوش رقم وتطلع عربيته محتاجه حاجه اضافية فالرقم يكبر انما هما هنا متبعين نظام انه يقول لك كل الاحتمالات فلما تطلع الفاتورة اقل من المتوقع نتيجة ان فيه حاجات مكانتش العربية محتاجاها فالعميل يفرح انه وفر :lol:

المهم تفاصيل المبلغ كالتالي

الصيانة الزوجية 120 جنيه زي الجدول ما بيقول (100 ميكانيكا و 20 كهربا)
تيل فرامل (لو محتاجه) 220 جنيه + 30 تركيب
فلتر هواء 135 جنيه
تغيير زيت فتيس للعربيات 1600 أوتوماتيك زيت CVT تسعة لتر ب 250 جنيه + 35 جنيه مصنعية
بوجيهات 100 جنيه + 25 جنيه تغيير
فلتر بنزين 400 جنيه + 40 جنيه تغيير
زيت موبيل وان وفلتر زيت 250 جنيه
سير تكييف وسير دينامو ( لو محتاجه) 200 جنيه
------------------------------
هو طبعا المبلغ كبير انما التكلفة العالية دي كل 40 ألف كيلو يعني تقريبا كل سنتين أو اكثر حسب الاستعمال وده لضمان ان عربيتك تفضل محافظة على حالتها وجودتها
واكيد لما بتتغير الأجزاء حسب اعمارها المحددة من الشركة يبقى انت كده بتطول عمر عربيتك

مع الشكر

[lolo_nody]

شكراً يا استاذ مصراوى على التوضيح علشان احنا قلبنا وقع الصراحة.........

[hatem_badawe]

شكرا يا استاذ طارق


شكرا يا استاذ محمد

[mada121977]

الف شكر للباشمهندس طارق على تعاونه مع اصحاب المتسوبيشى فى منتدانا الجميل

[atolba]

الصيانة الزوجية 120 جنيه زي الجدول ما بيقول (100 ميكانيكا و 20 كهربا)
تيل فرامل (لو محتاجه) 220 جنيه + 30 تركيب
فلتر هواء 135 جنيه

teel faramel eh 2lly ba 220 ! ana lessa gaybo ba 315 mel tawkeel ana 3arabayaty lancer 2007 !! 2da7ak 3alaya walla eh ?