التلييين حقيقة ام خيال !!!!!!؟

[tareq_khamesy]

بالنسبة لموضوع التليين انا احتارت بصراحة .. ناس كتير قوى قوى بتقول ان العربيات اللى متجمعة فى هى بس اللى محتاجة تليين انما المستورد كله بييجى متلين جاهز ولا داعى للتليين ... منهم ناس شغالة فة توكيلات و معارض كبيرة زى غبور و ابو غالى
.. ف الجواب النهائى ايه يا جمااااااااااعة ألين ولا لا ء ؟؟؟ (اريد حلا)

[أبو عبدالله]

لا اعمل التليين مهما كان هيبقى في مصلحتك برضه

[goodwave]

والله سألت نفسي نفس السؤال إمبارح وانا على الصحراوي.......... كنت ماشي 120-130 كم/س ويقوم يعدي جنبي عربيات إلنترا لسة بالبلاستيك بتاعها ومن غير نمر......... سرعتهم لا تقل عن 150-160 كم/س ودول تقريبا ناس شاغلين في معرض وبينقلوا العربيات من مكان لمكان.

ساعتها سألت نفسي تليين غية إلي بيقولوا علية :roll:

[fahd_628]

مش حتخسر حاجة لين هما كلهم 1000 كم

[Dr Ahmed]

أنا فى أول يوم بالعربية وانا راجع بيها ولا خدت بالى من التليين ولا حاجة ورجعت على 100
والعربية أصلا واخدها عدادها عامل حوالى كام وعشرين كيلو
واظن والله أعلم إن دا كان مهم زمان إنما دلوقت لم يجد أحد أى فارق بين اللى ليّن واللى مالينش!

[ehab]

انا برضة محتار في موضوع التليين دا بس اظن الي ممكن يحكم فيه بشكل نهائي واحد يكون مهندس ميكانيكا او مهندس من التوكيل .

[yahyanaabil]

لو فتحت الكتالوج بتاع العربيه حتلاقيه بيقولك ازاى تمشى فى التليين زى مثلا ماتعديش 3 rpm او ما تقطرش عربيه تانيه
يبقى اكيد فى تليين

[Nader]

بلاش نقول محتارين.. خلينا نقول اننا خايفين على عربياتنا اللي مدفوع فيها دم قلبنا.. نستحمل 1000 كيلو ولا نخاطر؟؟

[مصراوي جدا]

شوفوا يا جماعة

زمان في السبعينات والتمانينات كانت العربيات الفيات (128 و 131 و 132) وغيرها لما حد بيشتريها زيرو من شركة النصر للسيارات كان لازم تقعد شوية تلين في الموتور لأنه مصنع في الشركة وتلين دي يعني تمشي بسرعة يمكن 50 كيلو بالكتير يعني صباح الملل

طبعا دلوقتي الكلام ده انتهى والعربيات الحديثة كلها بتتلين في مصانعها انما نقدر نقول ان العملية اللي العربيات محتاجاها مش تليين بالمعنى القديم انما يعني نوع من الحرص على الموتور في بداية تشغيله

الرأي العلمي في الموضوع ده (وده مش رأيي الشخصي انما ده رأي مدير الصيانة في التوكيل)
ان العربيات الميتسوبيشي خلال الألف كيلو متر الأولى يجب انها متمشيش اكتر من سرعة 90 كيلو متر وسألته بوضوح في موضوع الناس تشغل التكييف ولا لأ لأن فيه ناس بتقول ان برضه محدش يشغل التكييف فقال لي مفيش اي مشكلة من تشغيل التكييف في الألف الأولى

وطبعا ان عدد لفات الموتور متزيدش عن 3000 لفة ده كلام صح طبعا

اما عن السواقين اللي سايقيين عربيات زيرو بسرعات عالية فدول معندهمش ضمير

احنا مثلا في توكيل ميتسوبيشي عربياتنا بتيجي على تريلات من بورسعيد لمخزن قليوب ومن مخزن قليوب كل معرض بيبعت السواقين بتوعه ياخدوا العربيات لمعرضه

ففيه سواقين محترمين وعندهم ضمير بيراعوا ربنا ويسوقوا بحرص وطبعا فيه سواقين معندهمش ضمير

[إسلام شاهين]

أنا فى أول يوم بالعربية وانا راجع بيها ولا خدت بالى من التليين ولا حاجة ورجعت على 100
والعربية أصلا واخدها عدادها عامل حوالى كام وعشرين كيلو
واظن والله أعلم إن دا كان مهم زمان إنما دلوقت لم يجد أحد أى فارق بين اللى ليّن واللى مالينش!

يا دكتور الفرق مش بيبان دلوقتي خالص يعني مثلا شوف العربية اللي لينت صح بعد حوالي 3 أو 4 سنين وقارنها باللي مالينتش وإنت تعرف الفرق والموضوع ده عن تجربة واقعية ممكن أبقى أحكي لحضرتك عليها .

[TAG_Turbo0]

يا دكتور الفرق مش بيبان دلوقتي خالص يعني مثلا شوف العربية اللي لينت صح بعد حوالي 3 أو 4 سنين وقارنها باللي مالينتش وإنت تعرف الفرق والموضوع ده عن تجربة واقعية ممكن أبقى أحكي لحضرتك عليها .

ياريت توضحلنا أكتر يا أستاذ اسلام

[إسلام شاهين]

والله يا ميدوم موضوع التليين ده له حكاية معايا :-

أنا واحد صاحبي عنده مصنع في بلبيس وساكن في الرحاب ومشاويره كثيره جدا هو معاه بولو موديل ألفينات مش متذكر بصراحه كام وكان معاه قبلها شاهين 1400 باعها لأخو مراتي مش قادر أقولك بقه بلين في العربية قد إيه تخيل قعد يلين في الإثنين مسافة 5000 كيلو ، المهم من حوالي شهرين كان عارض البولو للبيع فواحد صاحبي تاني اشتراها بس قبل ما ياخدها قله نكشف عليها في التوكيل المهم رحنا ( العربية عامله 350 ألف كيلو !!!!!!!!!!! ) تخيل في التوكيل كبس الموتور يطلع قد إيه ؟؟؟ 85% تخيل !!!

طبعا المهندس هناك نفسه استغرب إزاي عربية ماشية كل ده وموتورها 85 % وعن شرط والله متورها ماتفك منه مسمار خالص لدرجة إنهم هناك صوروا العربية صور كثيرة من جوه ومنن بره كحالة نادره يعني ولما المهندس سأله قاله علشان أنا لينتها لغاية 5000 كيلو وكان إيه كمان بلين واقف وماشي يعني أول ما جابها كان بيسيبها دايره قدامه في أي حته على طول .

عرفت الفرق ؟؟

[hatem_badawe]

يعني اية يلين واقف

[hatem_badawe]

انا عندي فكرة
ممكن في اول 1000 متزيدش السرعة عن 80

والف التانية متزيدش عن 90

والف الثالثة متريدش عن 100


وبعدين خالاص

ودا علشان يطمئن قلبك انك عملت الي عليك


وفي حاجة كمان انك في التليين مخليش العربية تشد جامد بيها يعني براحتك لغاية ما توصل الي السرعة المسموح بيها في فترة التليين
\

[إسلام شاهين]

يعني اية يلين واقف

يعني يا حاتم يسيب العربية دايره فترات طويلة على قد ما يقدر من غير ما تتحرك .