أيهما أفضل الشكل الجديد أم الشكل القديم

[أبوعبدالرحمن]

السلام عليكم ورحمة الله وبركاته

أنا عندي سؤال وعاوز إجابته بدون تحيز تفتكروا أيهما أفضل الشكل الجديد أم الشكل القديم للانسر وهل الشكل الجديد راح يحل محل الشكل القديم وهل راح يكون بنفس الكفائة وهل الشركة راح تستغني عن الشكل القديم ومش راح تنزل منه مودلات أخرى جديدة.

أرجو مناقشة الأمر ده لأن بالفعل قرار الشراء في الفترة ديه راح يكون حرج بالنسبة لناس كتير بالأخص إننا بنتكلم في سيارة مختلفة نهائيًا.

وجزاكم الله خيرًا،،،،

[أبوعبدالرحمن]

إيه يا شباب 60 مشاهدة ولا واحد كلف خاطرة يرد عليا،،،

هو أنا بقولكم على موضوع سياسي أنا بسألكم على اللانسر الجديد :roll:

[Ahmed Samy]

بص يا سيدي
الشكل الجديد ده ((كبه)) و مش قادر احبة
و القديم دا فلته فعلا زي السيفيك ال92 كده و هايعمر في قلوب المواطنين حتى ينتهي أجله و يورث حبه لنجله الشكل الجديد
و أهو الموضوع بقى سياسي يا سيدي 8)

[أبوعبدالرحمن]

هههههههههههههههههههههه الله يغربل إبليسك على رأي الخليجيين

بس تتوقع إن حركة كفايه هتتدخل في توريث الشكل الجديد ولا راح يكتفوا بالتنديد والمظاهرات،،،

بجد أنا شايف الشكل الجديد كويس جدًا لكن في عدة أمور تحتاج للتعليق منها التصميم الخارجي للسيارة،،،

التصميم جميل جدًا ورائع لكن مش متوافر فيه عوامل الأمان في حالة الاصطدام ويظهر العيب ده جلي جدًا في مقدمة السيارة لأن الكبوت متقدم عن الاكصدام وده معناه إنه الكبوت راح يكون كبش الفداء في السيارة وأول الأجزاء تضررًا والأدهى لو كان الاصطدام قوي فده معناه إنه ممكن الصدمة تصل إلى المحرك بل والشاصي أيضًا وهذا معناه انتهاء السيارة فعليًا،،،،

وبالفعل إن أحد الأصدقاء شاف السيارة ديه وهي مصدومة من الأيام وفعلاً الاضرار الأمامية كانت قوية جدًا،،،

العيب التاني في السيارة ارتفاع سعرها بالمقارنة مع مثيلتها فسعرها يصل إلى 150000 درهم وهو مبلغ مبالغ فيه جدًا من وجهة نظري،،،

العيب الأخير وهو عدم توافر قطع غيار تجارية وليست أصلية مما يعني أنه في حالة - لا قدر الله التصليح - سوف تتحمل نفقات عالية جدًا،،،

وبرأي الشخصي أن المجال مازال مفتوح أمام الشكل القديم،،،

ولكن يبقى السؤال هل عام 2008 سوف يكون آخر الموديلات في الشكل القديم وهو ما لا أتمناه أبدًا بالأخص في بلد زي بلدنا الحبوبة مصر بعد ما لاقت إقبال شديد من المواطنين على اقتناء هذه السيارة،،،

[Kisho]

أ / أبوعبدالرحمن

كنت عاوز اعرف السعر الى حضرتك كاتبه ده (درهم) بتاع اى بلد
150000 ؟؟؟؟؟؟؟؟؟؟؟؟؟؟؟؟؟؟؟

[أبوعبدالرحمن]

معلش يا باشا غلطة مطبعية المقصود 150 ألف جندي مصري،،،

أي 150 ألف باوند مصري وفي مقولة أخرى جنيه والجنيه يعد من العملة الصعبة وذلك لعدم صرفه جوه ولا بره ويطلع روحك للحصول عليه،،، :mrgreen:

[fahd_628]

الجديد احلى

[أبوعبدالرحمن]

الجديد احلى

احلف بالله،،،،

طيب ممكن أعرف إيه اللى عجبك في الجديد لأن الصراحة يهمني رأئيك ورأي كل الأعضاء هنا لأن فعلاً قرار الشراء صعب جدًا والكل محتار ما بين الجديد والقديم واللى بيقبل القديم بيخاف إن التغيير في الشكل راح يأثر على الشكل القديم من انخفاض قيمته بالمقارنة الآن أو إقبال المشترين على الشكل الجديد وبالتالي يقل عدد الشكل القديم وهكذا دواليب ... دواليب ... دواليب ...

[أبوسيف]

لو الشكل عاجبك وفرق السعر مش هايمثلك مشكلة يبقى اتكل على الله وهات الشكل الجديد ويا سلام لو السبورت منها ، هى طبعا كإمكانيات أعلى بكتير من الشكل القديم وشكلها بيختلف عليه الناس ، فيه اللى بيعجبه وفيه اللى مش عجباه ، انا عن نفسى كان عاجبنى الشكل وكنت بفكر أشتريها بس كان فى دماغى انها هاتنزل زيادة 10000 جنيه عن الشكل القديم ، انما لما تنزل زيادة 40-50 ألف يبقى كدة شكرا ، على فكرة انا أشتريت الشكل القديم.

[ابوحميد]

بص يا سيدى
لو على الشكل انا شايفها شكلها الجديد جامد جدا
لكن الشكل مش كل حاجة عشان سعرها بصراحة مبالغ فيه جدا
مش معقولة اشترى عربية حاسس ان سعرها اعلى من المعدل الطبيعى حوالى 30 او20 الف عشان شكلها بس
لكن لو سعرها مش مشكلة بالنسبة ليك وعاجبك شكلها يبقى اتكل على الله
بس انا رأيى ان استنى شوية اكيد اكيد حترخص مش معقولة تفضل بالسعر المبالغ فيه دا
انت اولى بالفلوس اللى حتوفرها