مشكلتي مع السبع موتورز هل ليها حل؟

[amir]

السلام عليكم و رحمه الله
معلش هطول عليكو بس سامحوني بقي
الموضوع و ما فيه اني متابع الصيانه الدوريه بانتظام مع السبع زهراء المعادي
و من فتره كنت بسمع صوت جي من تحت شمال كده (حوالين رجل السواق او تحتها) مع المشي بالذات في الاشارات علي سرعات بطيئه
قلتلهم عليه في صيانه ال 50000 و قالولي حاضر
و انا فاكر اليوم ده كويس علشان كان في رمضان بعد الفطار و الصيانه خلصت حوالي الساعه 10 باليل و كل ما ابص عليهم الاقيهم ماسكين الفانوس امامي و قاعدين يلعبو فيه , نزلت بسألهم بيعملو ايه قالولي اصل النور عندك مش مظبوط فبنظبطهولك و احنا اساسا خلصنا
اليوم ده مشيت من هناك الساعه 12 الا ربع بالليل و الفانوس طافي و مش بينور و قال ايه انت محتاج تغير الفانوس( و عزه جلاله الله ده اللي حصل انا مش بفتري علي حد انا بالي طويل جدا) المهم قلتلهم يقفلو الفانوس و انا هظبطه بره
من احتكاك قبل كده انا عارف انهم خيبه كبيره في اعمال الكهرباء و بروح لكهربائي بينجز كل مشاكلي و كان الله بالسر عليم
المهم نرجع لموضوع الصوت
الصوت و كأنو عايز يجنني رجع تاني
قلت مش مشكله و بقيت اغطي عليه بصوت الكاسيت
و نسيته خالص لغايه ما بدء الصوت يبقي ملحوظ لوحده من غير ما تركز انك تسمعه
رحت هناك تاني اقولهم يا جماعه في صوت في العربيه و مش مريحني, طلع رئيس المهندسين باشمهندس محمد معايا و قالي لأ عادي ده طبيعي اقوله ماهو صوت جديد جد علي العربيه قاللي لو تحب تجرب اي صني هنا هتلاقيها كده برضو
و طبعا لأني نوع من الناس كاد ان ينقرض فبحب اصدق و اثق في الناس الي ان يثبت العكس قولتله خلاص و مشيت
ارجع بعدها بشهر الصوت بقي مسموع بدرجه تقلق
رحت هناك تاني يا جماعه في صوت مش ولابد في العربيه (بس المره دي خليت واحد صاحبي يسوقها و يحكم ﻷانه خبره عني في العربيات نوع من الناس اللي مولوده علي كابوت عربيه كده) المهم قاللي شيك علي الكاوتشات و خد بالك بلي العجل الشمال قدام شكله بينتهي
الحمد لله المره دي ماسك عيب هقولهم عليه و يشوفوه
رحت و قلتلهم ممكن بقي تكشفو علي بلي العجله الشمال قدام و البلب اللي قدام كله قالولي حاضر
و طلعت شغلت اللاب و ساعه و التانيه ببص لقيت العربيه مركونه بره البوابه قلت خلاص فرجت و نزلت اسئل الاقيهم بيقولو البلي تمام و العربيه زي الفل!!
طيب في حساب المره دي ( مش كل مره مدفعش حاجه و يكشفو علي العربيه برضو الواحد ذوق و بيعامل الناس كما يحب ان يعاملوه) لقيته بيقولي زودنا هوا كاوتشات....
و مسيبتوش يكمل قلتله ايه ازاي؟؟؟؟
انا و انا رايح التوكيل مريت علي بنزينه موبيل ظبطت هوا الكاوتشات و فولت العربيه و دخلت عليهم
هوا ايه بس مستحيل مينفعش
و ركبني العند و اتنرفزت من موضوع ظبط الهوا دي بس كنت بأتكلم بأدب و صوت هادي و محترم
الموضوع مشي عادي و مدفعونيش حاجه و اتكلت علي الله و قالولي الكاوتش عندك خشن شويه مع اني مستغرب ليه الصوت طلع مره واحده بلا مقدمات و الكاوتش شكله كويس.

و برضو مشكله الصوت الكئيب موجود لسه

رحت لمحل الكاوتش اللي قدام قسم اول مدينه نصر اكشف يا باشا علي الكاوتشات قاللي تمام
طيب ايه و حكيتله المشكله قاللي روح لعفشجي انا لو عليه هقولك الكاوتش بايظ و هتشتري جديد قلتله انا عارف و الله (ناس محترمين في التعامل و من زمان و انا وياهم)

طيب فضيت النهارده و نزلت رحت للعفشجي اللي بثق فيه و بتعامل معاه من زمان
و النتيجه:
بلي العجل الامامي شمال مرمي في شنطه العربيه حاليا و جبت جديد ركبناه بداله و البلي النازل بايظ بايظ بايظ

و الراجل كتر خيره نبهني ان زيت الفتيس ناقص شويه (مع اني متابع الصيانات الدوريه و مليش علاقه نهائي بما تحت الكبوت)

رحت موبيل و قلت للراجل اكشف علي الزيت علشان لو ناقص ازوده( لحاجه في نفس يعقوب) كشف و قالي الزيت منتهي خالص (و دي الحاجه في نفس يعقوب) و محتاج يتغير
المهم غيرته و كله تمام

و للاسف الشديد لسه الصوت موجود
الميكانيكي في المحطه قاللي اصبر البلي الجديد يطبع شويه و ممكن تنقل الكاوتش اللي قدام وره و تجرب برضو و نصحني اغير البلي اليمين برضو قلتله حاضر هبقي اغيره)
بس انا بصراحه مش قادر النهارده و قلت كفايه كده النهارده

بس بعد القصه دي لو مكاني هتعملو ايه مع التوكيل

لسه اول امبارح كلمني واحد من عندهم و بيعمل مسح survey و قعد يسألني اسئله و انا اجاوبه عليها و و الله مقلتش فيهم حاجه وحشه بس سألته علي مشكله الصوت ولا حياه لمن تنادي

الصوت عامل زي ( عو عو عو عو ) او (طو طو طو ) طول ما العربيه بتتحرك خصوصا مع السرعات تحت ال 20-30 و حاليا بدء يعبر عن نفسه مع سرعات اعلي من كده بس في حدود ال 60-70 مابخدش بالي منه
و بييجي من ناحيه تحت رجلين السواق من النص او من ناحيه الشمال سنه بسيطه
و انا مش مقتنع انه صوت كاوتش لأنه صوت اتقل من صوت كاوتش بيلف دي حاجه بتنقل حركه و لها صوت مكتوم تقيل كده


اللي مضايقني منهم انهم اروح بحجاه يقولي عادي
اروح محددله مشكله يكشف و يلطعني ساعتين بحالهم و يقولي سليم و بعد كده يطلع بايظ و اهو مرمي في الشنطه عندي للي مش مصدق

يعني الواحد يرجع للصنايعيه بتوعه اللي عارفهم و مجربهم كتير و ملوش علاقه بتوكيل تاني؟
فلوس و بدفع و بقول بشتري دماغي و عربيتهم و عارفينها مسمار مسمار
لكن ايه الوضع الغريب ده انا مش عارف
و مع اني مرتاح ليهم من اول يوم ليا هناك الا ان اللي حصل مؤخرا ده مستفز و ينرفذ


ياريت حد يشور عليا في حل الصوت ده انا التوكيل خلاص رميت طوبته و مش عايز منهم حاجه بس حبيت زي ما كتبت في يوم عن مدي روعتهم اعرف الناس بالوجه الاخر , بس انا لو فضيت هبقي اروح هناك بس علشان اثبتلهم ان ادائهم بقي خيبان قوي قوي قوي

[ahmed_khalil]

طب يا باشا ما تحط الموضوع فى الورشه عشان تلاقى استجابه اكتر من الاعضاء

[aimank]

كلم نيسان نفسهم و اعمل شكوى بالموضوع ده
اقصد نيسان ايجيبت

[asnady]

للاسف محدش فى مصر بيفضل كويس على طول لازم يخرف
د امير كان من اكبر مناصرى السبع
انا مش فاهم ازاى دا يحصل
ارجو ان السبع تراجع الموضوع دا لانه ممكن ياثر على سمعتهم

[amir]

طب يا باشا ما تحط الموضوع فى الورشه عشان تلاقى استجابه اكتر من الاعضاء

ممكن اعمل كده بس انا قلت خللي غسيلنا في بيتنا الاول يمكن تحصل حاجه و تتحل فبلاش اشوشر علي الفاضي

كلم نيسان نفسهم و اعمل شكوى بالموضوع ده
اقصد نيسان ايجيبت

لو امكن تقولي اماكنهم و ارقامهم يبقي كتر خيرك

للاسف محدش فى مصر بيفضل كويس على طول لازم يخرف
د امير كان من اكبر مناصرى السبع
انا مش فاهم ازاى دا يحصل
ارجو ان السبع تراجع الموضوع دا لانه ممكن ياثر على سمعتهم

و انا كمان ارجو ذلك بس لما تلاقي اللي قدامك بيعمل كل اللي يقدر عليه بس مش كفايه, بمعني انهم عملو اللي عليهم من فحص و كشف و تجريب بس المشكله مازالت موجوده (اللي هو الصوت)

[amir]

هو محدش لاقي حل خلاص؟

[aboezz44]

د| امير
انا واثق من كل كلمه حضرتك قولتها وان كنت اشك ان هناك بعض الأمور الأخرى التى قد تراها بسيطه ولكنها كبيره وقد تورعت حضرتك عن كتابتها لصبرك وادبك الجم
النيسان عربيه مش سيئه لدرجة ان يظهر بها صوت غريب لاينكره احد ويكون رد الأخ مهندس الصيانة ان دا عادى دا على اساس ان حضرتك راكب عربيه مستعمله من 15 سنه ومتصنعه فى بلاد الواى واى
فهذه اول سقطه للتوكيل واتمنى ان تسمح لى ان اعطى نفسى الحق والومك لتهاونك فى حقك واستسلامك لسياسة الأمر الواقع
وانا هاضرب لحضرتك مثل بسيط عن تجربتى مع السبع هما اى نعم ناس محترمين بس هما فى النهايه بشر عربيتى كان الزجاج الخلف بيدخل هواء ودا كان بيسبب صوت مزعج جدا عند سرعة 120كم وبما ان العربيه جربتها معاهم وفشلنا نوصلها لسرعة 120كم \س لأن مافيش طريق ساعدنا حاولوا يقنعونى اولا ان العربيه مافيش فيها حاجه قولت لهم انا مش موسوس
جربوا يدخلوا العربيه الصيانه تانى وقالولى احنا عملنا اختبار تسرييب وطلع الجوان بتاع العربيه فيه مشكله واتحلت قولتلهم شكرا
وانا مروح والطريق فاضى رجعتلى نفس المشكله ولا جديد
روحتلهم تانى يوم (على فكره انا من جمصه)وبمنتهى الأدب والذوق والبرود حرقت اعصابهم بانى فقدت الثقه فيهم وانهم تخلوا عن مبادئ شرف المهنه لما كانت عنيهم هاتدمع
واذا بمن يخرج على من التوكيل ويخبرنى بأن هذه المشكله دارجه فى كل سيارات نيسان وانا متأكد انه بيحاول يبرأ نفسه من الموضوع قولتله الكلام دا على مسؤليتك قالى :نعم
قولتلهم كلهم انا هانتظر استفسار شركة نيسان فى الأتصال المعهود منهم بعد كل صيانه انا باعملها عندكم بس المره دى هايكون ردى ان مركز صيانة السبع بيروج ان السياره بها غيب خلقى لا يمكن علاجه ولابد من التعايش معاه
وكانت هذه نقطة التحول فى الحوار
انا مش عايز اقولك انهم لو كانوا يطولوا يغيروا العربيه كانوا غيروها بس هما اكتفوا بتغيير جميع جوانات الباب والشباك
ومش هاقولك على كم الأتصالات الى حصلت بعد مغادرتى التوكيل من طرفهم للأطمأنان على جودة التصليح
وللأسف هوا دا الأسلوب الوحيد الذى يصلح للحصول على حقك
مشكله تانيه احترت فيها معاهم كان عندى خبطه تحت العربيه وكأن فى حاجه سايبه من يوم ما اشتريتها وفى كل صيانه اقولهم عليه وللأمانه بذلوا مجهودات خرافيه لأكتشافهالكن المحاولات دى بائت بالفشل وكان عندى مشكله تانيه ان العربيه كانت بتعوووم بطريقه مستفزه وهما حاولوا فيها كتير وحاولوا يقنعونى كتيير ان دى اصلا مش مشكله فلما لقيتهم غلب غلبهم فى الموضوعين دوول توكلت على الله ورحت مركز صيانة يونايتد جرووب الى فى الدراسه وحكيت على المشكلتين دوول وربنا جعل الشفاء على اديهم
فأولا حضرتك حاول تلح فى طلبك لحقك ومواجهتهم بأهمالهم
ثانيا جرب يونايتد جرووب لعل وعسى ان تجد الحل عندهم
لأن الكمال لله وحده واكيد الى السبع مش بيعرف يحله يونايتد يعرف
والله الهادى الى سواء السبيل
انا اسف جدا على الأطاله بس والله حضرتك من الناس الى بحبهم لله فى الله ويعز عليا اشوف حد محترم زيك بيتعاقب غلى احترامه وادبه
وبالله عليك طمنا عليك

[amir]

متشكر و الله علي الكلام ده
انا يمكن انزل النهارده ابدل الكاوتشات الاماميه بالخلفيه و اعمل ظبط زوايا و اشوف
و بكره ان شاء الله عندي امتحان شفوي اخلصه و امر عليهم لعل و عسي

[princex1]

شكرا يا د/أمير على المشاركه و ربنا يصلح الحال
مازلت أعتقد أنهم أفضل من غيرهم و لكن
يبدو أن توفر الأمانة و الفني الماهر في بلدنا أمر مستحيل

[D . a .\ AYMAN]

طبعا أنا ماسمعتش الصوت

بس مش باقي من الأصوات اللى بتعمل طو طو طو في العجل غير الكبالن بعد ما غيرت البلي

أعتقد كدا والله أعلم

بس الكبالن المفروض صوتها مايطلعش غير في الملفات بس يعني وإنت ماشي طوالي ماتسمعش حاجة

وربنا يوفقك لحل المشكلة

ومعلش هية توكيلات مصر أعتقد بقى معظمها كدا

أنا مرتين أروح أعمل الصيانة وأحس إن مافيش حاجة بتتعمل في العربية اللهم إلا تربيط العفشة والله أعلم لأن ده بيبقى مجرد إحساس مش أكتر

[asnady]

على فكرة انا جالى الصوت دا و اكتشفت حاجة غريبه جدا
الصوت طلع من احتكاك الطاسات بالجنوط
جبت شدادات اللى بتربط الطاسات دى و ربطت كويس جدا
الصوت اختفى تماما
جرب كدا يمكن , الله اعلم
الشدادات دى هتلاقيها عند اى بتاع كماليات و كمان ممكن عند الكهربائيه

[amir]

على فكرة انا جالى الصوت دا و اكتشفت حاجة غريبه جدا
الصوت طلع من احتكاك الطاسات بالجنوط
جبت شدادات اللى بتربط الطاسات دى و ربطت كويس جدا
الصوت اختفى تماما
جرب كدا يمكن , الله اعلم
الشدادات دى هتلاقيها عند اى بتاع كماليات و كمان ممكن عند الكهربائيه

و الله دي تبقي حاجه ميه ميه
انا هجرب كده

[sab3aawy]

امير هو العربية عندك عاملة كام ألف

لو العربية عدت 50 ألف جرب غير اماكن الكاوتشات

جرب امشى من غير الطاسات

هل لديك مشكلة فى الغيارات؟

الزيت كانت بيعلم لحد فين قبل ما تغيره؟

غيرت الزيت بنوع ايه وبيعلم لحد فين ديلوقتى والعربية باردة وساخنة

حاول تعرفنى اجابات الأسئلة دى عشان نفكر مع بعض

[amir]

56 الف كيلو و الكاوتشات الراجل اللي شاري منه مغيرها
هاجرب المشي من غير طاسات
انا بدلت الكاوتش قدام و ورا و اتضح ان الامامي مبزز
العربيه قبل ما اروح للعفشجي كانت تقيله و الغيارات بطيئه نوعا ما و لما رحن البنزينه كان الزيت ناقص و منتهي كزيت
حطيت 3.5 لتر موبيل

[amir]

حاليا مقاس زيت الفتيس بعد مشوار طويل و لما وقفت غيرت وضعيه الفتيس كذا مره المقاس واصل لفوق الشرطتين المتشرطين دول و واصل لحد اول اعوجاجه في المقاس
و الزيت قبل التغيير كان واصل بين الشرطتين المتشرطين بس كان اقرب للجزء الاول عن التاني

لسه هفك الطاسات و امشي من غيرها النهارده ان شاء الله
و طبعا متشكر لكل اللي متابعيني و مزهقوش مني لحد دلوقتي و اكيد اكيد متشكر جدا ليك يا سبعاوي ربنا يا رب يصبرك انت و المدام و كل من في موقفك من اباء و امهات و يارب يجعلها سبب في رحمته عليكم و اكيد طبعا انت عارف الحديث القدسي اللي بيقول:
(حديث قدسي) نَا نَا نَصْرٌ ، نَا قُتَيْبَةُ ، نَا يَعْقُوبُ بْنُ عَبْدِ الرَّحْمَنِ ، عَنْ عَمْرِو بْنِ أَبِي عَمْرٍو ، عَنْ سَعِيدٍ الْمَقْبُرِيِّ ، عَنْ أَبِي هُرَيْرَةَ ، أَنَّ رَسُولَ اللَّهِ , قَالَ : يَقُولُ اللَّهُ : " مَا لِعَبْدِي الْمُؤْمِنِ عِنْدِي جَزَاءٌ إِذَا قَبَضْتُ صَفِيَّهُ مِنْ أَهْلِ الدُّنْيَا ثُمَّ احْتَسَبَهُ دُونَ الْجَنَّةِ " .

الحكم المبدئي: إسناده حسن رجاله ثقات عدا نصر بن داود الصاغاني وهو صدوق حسن الحديث ، وعمرو بن أبي عمرو القرشي وهو صدوق يهم.

و الله يا باشمهندس انا للاسف عرفت متأخر جدا و قعدت ادعيلكم بالصبر و التثبيت و الله حتي في ناس عندي متعرفهمش ولا يعرفوك قعدو يدعولكم و يدعولها
ربنا يصبركم و يعوضكم بالخير و الرحمه
و الله يا بشمهندس انت اخ عزيز مش عليا انا بس بجد و الله ده علي كل من اتعامل معاك لأنك شخص خلوق و طيب و محترم, من الناس اللي الواحد يفخر و يتفاخر بس انه اتعامل معاهم في حياته
انا كنت حاولت اتصل بيك علي نمرتك بس مقفوله ياريت تعذرني و والله كنت بفكر اجيلك البيت بس اتكسفت قوي خصوصا اني عرفت متأخر بس اعتبرني اخوك الصغير و قصر في حقك