عفشة الصنى 2009 المانيوال

[adel1212]

السلام عليكم ورحمة الله
اشتريت صنى 2009 مانيوال عاملة 30000 كم ترخيص اكتوبر 2008 الشكل القديم
بس اداء العفشة مش عاجبنى بترزع جامد بالذات فى المطبات الصغيرة
(حصو-عيون القط -فواصل الكبارى البسيطة وهكذا )
+الثبات مش هو دى اللى اعرفة عن الصنى بتعوم بطريقة غريبة
احساسى ان العربية بترقص على الطريق العادى
علما انى كان عندى قبلها صنى 1999 كانت ارسى من كدة بكتير
المهم روحت مودرن الدقى عملت صيانة ال30الف وطلبت الكشف على العربية قبل ما اخلص فيها نهائى
قالوللى تغير الاتى
*الطانبير الامامية والخلفية (لان التيل اللى راكب مش اصلى وبوظهم)
*طقم تيل فرامل امامى وخلفى اصلى
*عدد 2 مساعد امامى + كاوتش التريب (تقريبا)
انا مقتنع بكلامهم بخصوص انى فى حاجة غلط فى العفشة
بس متحفظ على تغير كل ده
استفسارى من حضراتكم لو رسيت على التغير
اركب انواع مساعدين اية انسب للسيارة(مونرو -كونى -اخرى)
وهل ممكن اركب عفشة السوبر صالون مثلا ممكن تكون افضل
لانى ناوى اغير خارج التوكيل
وشكر مقدم لكل من يحاول المساعدة
تحياتى

[محمد ابراهيم 1]

بالشكل ده العربية دى ملعوب فى عدادها

لأن تيل الفرامل فيها بيعيش أكتر من 50 ألف كم ومفيش حد بيعمل فيها حاجه فى العفشة قبل 70 أو 80 ألف

فكون إنها اتغير لها التيل بتيل مش أصلى فده مؤشر مش كويس

وبعدين المفروض إنها لسه فى الضمان يعنى لو العربية معدتش ال 100 ألف كم فالمساعدين وكل ما هو معيوب فى العفشة يتغير ويتصلح فى الضمان

وأنا شايف واحد قدام عينى مغير المساعدين فى الضمان فى توكيل مودرن فى اسكندرية

[adel1212]

اخى الفاضل محمد
تحياتى وتقديرى لردك الكريم
انا اخذت العربية للعفشجى بتاعى كشف عليها وهاتك يا ضحك لما عرف اللى قالوه فى التوكيل
كل ما هنالك دراعين خارجين من علبة الدركسيون مش فاكر اسمهم اية
كان فيهم بوش عملهم (بدون مقابل هدية للسيارة الجديدة)
بس قاللى هم حيمشوك فترة صغيرة ونبقى نغيرهم
وكل ما قالوه فى التوكيل ضحك على الدقون؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
المساعدين كويسين الطنابيرلسة بحالتها التيل كويس يمشى كام الف كمان
(لا تعليق)

[Ahmed.TV]

لو المكانيكى ده شاطر ومتخصص فى نيسان , ياريت تذكر لنا اسمه هنا فى الموضوع ده

http://www.nilemotors.net/Nile/150666-a.html

عشان يستفاد منه باقى الاعضاء

[ahmad--ezzat]

ياريت يا استاذ عادل تقول الميكانيكى اللى بيضحك دة فين :)

[adel1212]

فى الحقيقة هو عفشجى وبس
ولكل السيارات مش بس النيسان
اسم الشهرة احمد سوستة
ش السودان - مابين الكيت كات والمحكمة
لو انت جاى من الكيت كات اول فتحة اشارة شمال فى اول شارع شمال واسأل هناك الكل عارفينة
تحياتى للجميع

[د.أحمد السعيد]

1000 مبروك على السياره و مش عارف اقول ايه على التوكيل .... المهم تكون ظبطت معاك

[adel1212]

د/احمد
بارك الله فيك
موضوع التوكيل ده انا من زمان غير مقتنع بيه
والمره دى بقول بركة جائت منهم
انا والحمد لله بقالى 25 سنة بسوق وبصلح عند ناس كويسة وعايش فى جو العربيات
والحمدلله سوقت اغلب العربيات اللى فى مصر
ولما كنت بسأل فى بداية الموضوع كنت عايز اعرف لو حد جرب انواع مساعدين فى الصنى وادائهم كويس يبقى نغير ليهم
بس الحمد لله طلعت المشكلة اصغر من كده
واعيش انا حياتى فى العربية

كاسيت -على جنوط-على طقم شبورة وافرح بعربيتى براحتى

ولا حد يقولى الضمان ولا بطيخ
الضامن ربنا هو اللى بيسترها معانا

[egypt0777]

اعتقد انك تقصد بارات علبة الدريكسيون

[adel1212]

اعتقد انك تقصد بارات علبة الدريكسيون

تمااااااااااااااااااام
بارات علبة الدريكسيون
الله ينور عليك

[محمد ابراهيم 1]

الحمد لله إن المشكلة طلعت بسيطة

[WalidAdel]

لو هيا بارات علبة الدريكسيون و فيها بوش يبقي تقريبا عايزه تترجلش علي علبة الدريكسيون زي مانا بعمل في عربيتي و دا بفضل توجيهات السيد الفاضل سبعاوي جرب موضوع الريجلاش دا لان البارت دي مش بتتغير دلوقتي خالص انا عامل 92 الف و ليه الحمد لله كويس هو الريجلاش بتاع علبه الدركسيون و شكرا علي كده

[adel1212]

لو هيا بارات علبة الدريكسيون و فيها بوش يبقي تقريبا عايزه تترجلش علي علبة الدريكسيون زي مانا بعمل في عربيتي و دا بفضل توجيهات السيد الفاضل سبعاوي جرب موضوع الريجلاش دا لان البارت دي مش بتتغير دلوقتي خالص انا عامل 92 الف و ليه الحمد لله كويس هو الريجلاش بتاع علبه الدركسيون و شكرا علي كده

ا/وليد
اسعد الله اوقاتك
بالنسبة لموضوع الرجلاش كنت عايز اعرف بيتعمل ازاى
لانى اعتقد انه هو عمل كدة فعلا
بس الواحد يهمه يعرف الطريقة للافادة وللعلم
اشكرك لك كريم اخلاقك

[adel1212]

الحمد لله إن المشكلة طلعت بسيطة

ا/محمد
اسعد الله اوقاتك
الحمد لله على كل الاحوال
افضل ما فى هذا الموضوع انى الواحد فتش فى العربية كويس والحمد لله طلعت كويسة
ادام الله المحبة والاخوة فى الخير