مطلوب مساعدة أصحاب الخبرات فى التيدا ..

[tefafathy1]

السلام عليكم ..

أنا محتاج مساعدتكم فى إنى أختار سيارة مناسبة لأحتياجاتى و بفكر جديا فى التيدا بس انا بصراحة سمعت عنها بعض الكلام اللى مش عارف إن كان صح وللا غلط بس اللى واثق منه ان هنا هلاقى أصدقاء معاهم تيدا و ممكن يفيدونى أكتر من اى حد او مكان تانى ..

طبعا البياع اللى فى التوكيل حسسنى انها افضل عربية فى التاريخ وقطع الغيار رخيصة و العفشة مش بتحس معاها بأى مطب و الدنيا فوق الوصف وانها من أفضل السيارات اللى فى السوق والأفضل على الأطلاق فى فئتها ..
بس بصراحة انا سمعت انها حلوة جدا و صوتها هادئ بس خفيفة جدا جدا فى السفر على الطريق بعد 130كم/س و قطع غيار غالية وفيها بعض المشاكل كده ..

أرجو لكل مالكى تيدا او اللى جربوها ينصحونى و يفيدونى بأهم مزايا و عيوب التيدا .. وأسف على الإطالة..

[Ahmed.TV]

اهلا بيك فى قسم نيسان


اولا العربية مفيش فيها مشاكل خالص والحمد لله محترمة كدا واكيد كدا, لانى مسمعتش عن مشاكل كدا !!! فى العربية دى زى ماحضرتك بتقول ان فيها مشاكل وكدا !!!
ومستغرب من الكلام اللى انت سمعته ده مش عارف سمعته منين ,واضح من اللى قالك ان كلامه مش مبنى على تجربة فعلية وعملية , لان ملاك التيدا اجمعوا على انها عربية ممتازة فعلا ,

قطع غيار التيدا معمرة جدا وكمان مش بتتغير الا بعد فترة كبيرة او سنين وده بالنسبة الى العفشة والحاجات التقيلة

اما الحاجات الدورية بتغيرها عادى زى اى عربية زى فلتر هواء وفلتر زيت و تيل فرامل , وحتى البوجيهات مش بتتغير الا عند 100 الف فاطمن منها

عمر ما حد اشتكى من العربية فى العفشة ولا فى اى مشكلة كدا ولو كانت فسفوسة , ولا سمعنا عن تيدا بتتقلب ولا كاوتش بعمل بالونة ولا مقص انكسر ولا مش عارف ايه ولا اى حاجة من المشاكل اللى بنسمعها فى العربيات الاخرى والحمد لله

سحب العربية ناعم جدا وقوى فى النفس الوقت والكيك دون بتعها رهيب, العربية هادية فى صوت الماتور , كابوت الماتور معزول وحتى الكابوت بتاع الشنطة الخلفية . ومش حتسمع معاها اى صوت ودوشة بره

تكيف قوى جدا , مش بياثر على السحب , استهلاك البنزين رائع

وفعلا اللى قالك عليه البياع صح بالنسبة الى انها احسن عربية فى فئتها وكفاية انها عربية يابانى , وغير كدا قطع الغيار متوسطة مش رخيصة بس معقولة وبعدين انت كل فين وفين حتغير قطع غيار , وغير كدا بردوا حتى لو كنت بتشترى قطعة غيار وشايف انها غالية فهى معمرة وبتفضل معاك لفترة , مش تشتغل شهور او سنة او اتنين وفك يا معلم

بالنسبة الى ثبات العربية , العربية بجيب بيها يمكن يوميا وانا مروح 120 و 130 على الدائرى اخر النهار والعربية ثابته والثبات بيقل بعد ال160 لانها محتاجة جنوط 16 و17 ,

وغير كدا انا حقولك على حاجة وحصلت معايا من فترة قريبة وحمدت ربنا ان عديت بسلام منها , طالع مطلع فيصل وانا جى من فاصل ورايح على الجيزة واول مرة اطلع المطلع ده ومش حافظ اتجاهه , المهم طالع المطلع وكنت جايب 90وكنت واخد بالى من العداد وبشد لسه لغاية ما طلعت فوق كنت تقريبا وصلت الى 100 وببص وانا سايق على حاجة تحت بشاور للناس اللى معايا عليها وفجاءة لقيت الطريق فيه كرف منحنى وفجاءة لقيت نفسى حدخل فيه وروحت عوجت الدريكسيون ناحية اليمين ومرة ناحية الشمال وهديت بالفرامل بس مش بدوسة جامد لان كان فى اتوبيس ورايا بمسافة وشوفته فى المرايا فى الوقت ده وكملت بعد كدا لان عدلت روحى على الطريق عشان الطريق بيكمل عدل
واقسم بالله العربية ولا عومت ولا حصل اى حاجة والحمد لله العربية وقتها اثبتتلى ان استجابتها هايلة جداااااا وثابتة فى المواقف المحرجة والفجائية

والحمد لله ربنا اكرمنى بيها ومبسوط بيها جدااااااااااااااا وحسيت معاها باليابانى بجد كسواقة وماتور وقطع غيار , متنساش انك بتتكلم على نيساننننننننننن , يعنى ماتور معمر لسنين

والعربية برستيج عالى جدا وفخمة من جوة وبره فى كل حاجة , الشكل اذواق طبعا
وممكن تروح لاتوايجيبت وتعمل تيست دريف او عند السبع وتجربها عمليا

وتحت امرك فى اى استفسار

[Hacker5]

مش هاقول حاجة بعد اللى قاله استاذ احمد :)
العربية الحمد لله معايا 65000 كيلو مافيش اى مشاكل من اى نوع سوى الصيانة الدورية الخفيفة لان العربية دى صيانتها قليلة جدا و قطع غيارها معمرة و قطع الغيار سعرها معقول بالنسبة لعربية فى فئتها

[MTAK]

برضه مش هاقول بعد اللى الاخوة قالوه
ممكن تكون عربيتى اقدم واحدة بالمنتدى "2007" و داخله على 75000
و الحمد لله الى الان لم احس معها بأى مشاكل
صلى استخارة و توكل على الله

[Ahmed.TV]

والله ياجماعة الحمد لله العربية دى كنز يجد وعربية ممتازة ومحترمة بحق , وربنا يبارك فيها لكل ملاكها ويكفينا شرها وشر الطريق

واهو ادينا بنحكم عليها من واقع عملى وتجربة سنين للعربية , وعمر ما حد اشتكى منها ,

والتيدا من العربيات المحترمة جدا والمعمرة والهادئة ادائا وقولا وفعلا

[tefafathy1]

أخ أحمد انا متشكر ليك اوى و لكل اللى ردو عليا و فعلا انا مقتنع بيها اوى , رغم تريأة أحمد على طريقة كلامى :) مش عارف ليه اتوجع كده لما قولت ناس قالتلى مشاكل كده ؟!! اصل مافيش حد يدخل يتكلم فى منتدى عربية بعينها و عربية بجد محترمة زى نيسان و يدخل يقول عن حوادث و مشاكل سمع عنها بره .. انا اعتقد انى مش المفروض اكتب عن حوادث و مشاكل سمعت عنها لكن ماشوفتهاش بعينى, يبقى أسأل اللى معاهم و فعلا يقدروا يحكموا مش اللى بيحكى عن اللى سمعه من واحد ..

وأنا فعلا متحمس ليها اوى بجد ,, لو ممكن حد يقولى فين أقدر أعمل تيست درايف ؟؟ و عنوانه عشان معرفوش.. جزل الشكر

[MTAK]

وممكن تروح لاتوايجيبت وتعمل تيست دريف او عند السبع وتجربها عمليا

وتحت امرك فى اى استفسار

[tefafathy1]

ألف شكر يا mtak
بس أنت ماخادتش بالك انى مش عارف المكان نفسه فين ؟؟ يعنى فين اتوايجيبت ؟؟

و سؤال بردو بعد إذنك لو كنت جربت تجرى بالعربية .. هل هيا ثابتة بعد الـ 130 كم ؟؟ وللا بتخف اوى ؟؟

شكرا لردك :)

[Ahmed.TV]

اخى الفاضل , حضرتك انا متريقتش عليك مثل ما تزعم , والا مكنتش دخلت تانى وتالت وكمان قولتلك تحت امرك فى اى استفسار , واقراء مشاركتى وانت تعرف اسلوبى , وكمان تطوعى مع الناس اللى بتسال , اللى يمكن كمان لو حد فيهم كان عاوز يجرب يجرب عربيتى مكنتش بتاخر عليه ابدا , , ولكن مجرد استغراب واستغراب حقيقى , لان عمر ماحد سمع عن مشاكل فى التيدا , واستغربت من كلمتك دى , وكان افضل انك تقول لنا عن المشاكل اللى سمعت عنها عشان نعرف ايه هى الاشاعات دى

يمكن عشان حضرتك لسه جديد معانا فى المنتدى , ادخل كويس واقراء فى قسم نيسان اللى كل الموضوعات عن التيدا وعن العربيات الاخرى حتلاقى كل حاجة فى القسم واضحة وبتتناول موضوعية وبصراحة وبتجارب عن كل السيارات اللى تبع قسم نيسان ,

الحمد لله محدش بيشتكى ابدا او بلاش ابدا خاليها نقول نادرا لما تلاقى واحد اشتكى من سياراته سواء تيدا او صنى , وتلاحظ ان القسم هادى مش عشان مفيش موضوعات , لالالا عشان عربيات نيسان عموما محترمة جدا ومفيش اى مشاكل ميكانيكية بنعانى منها مثل باقى الاقسام , والحمد لله على النعمة اللى عندنا "وقلبى ميتوجعش الا على البيت الهادى "

يمكن هوس الناس عشان موضوع شكل العربيات والكماليات الكتير اللى بتنزل فى العربيات الاخرى بيخليهم يطلعوا اى عيوب وخلاص فى التيدا من الناحية الكلامية وليس من الناحية العملية والتجربة

وفعلا العربية دى محترمة جدا , وانت فاكر انى بدافع باستماتة عشان عربيتى , ومش مصدق كلامى لما قولتلك انى بجرى كل يوم على 120 و130 , وصدقنى الصبر شوية وحتشوف ملاك التيدا كلهم حتلاقيهم بيجتمعوا على كلام واحد

وبالنسبة الى معرض اتو ايجيبت مش صعب الوصل ليه هو فى المهندسين , ولو حضرتك اخدت بالك فى اعلى المنتدى اعلان عن اتوايجبت , والرقم المختصر بتاعه 16666 اتصل بيهم واعرف العنوان القريب منك وتفاصيل العنوان
وربنا يوفقك

[Elsayed]

والله يا احمد باشا انت قلت اللى فيه الكفايه ومش لاقى اى حاجه تانيه اقولها بعدك غير انى أأكد على كلامك
يمكن انا اخر واحد اشترى تيدا فى المنتدى 2010 من شهرين وبجد العربيه ممتازه
انا مره ماشى على طريق الاسماعيليه وبكم اللى معايا لقيته بينبهنى انى ماشى 150 وبيقولى خلى بالك واحنا مش حاسين اننا ماشيين بس بعد 160 او اكتر لازم يقل ثبات اى عربيه وبعدين هو احنا كام مره هانمشى بيها 150 او 170
الواحد هايعمل ايه لو الكاوتش ضرب فالهدوء جميل
انا والله بنركب فيها 5 كبار و3 اطفال والشنطه مليانه وبتعدى من المطبات اللى بتحك فيها اى عربيه تانيه حتى وهيه فاضيه
وبعدين هيه عربيه بلا منافس فى فئتها فى الوسع الداخلى والشياكه وجودة الخامات
ويارب ربنا يوفقك للخير

[tefafathy1]

أنا شاكر ليك جدا يا أحمد و انا مش بتكلم انك بتتريأ وانا زعلان لأ والله انا بقولك انك بداية كلامك وانت حاطط خطوط تحت كلمه كده كان شكلها تريأة شوية .. و عموما انا سعيد جدا بمعرفتكم و أقسملك انى لو هجيب تيدا هيكون 60% إقتناع بالعربية و 40% لكلامكم عنها و شكركم فيها .. أما بالنسبة للسرعة و الثبات لأ انا بحب السرعة بصراحة :) يعنى انا كنت راكب هوندا وماشى 185 و 195 بصراحة كانت رائعة , ودى مش مقارنة على فكرة .. انا أخرى فى السفر 140 او 150 لما اجرى اوى يعنى لأنى مش بحب التهور .. لكن بحس بأمان لما أكون ماشى على 140 فى عربية لما بتجرى أكتر من كده مش بحس بيها .. فاهم قصدى ؟؟
يعنى لو قولتلك ان التوب سبيد فى عربية ما 190 , انت مش هتمشى علي 190 أبدا , بس بتكون ماشى على 140 مطمن
لكن لو قولتلك ان الشركة غير مسئولة عن سرعة أكتر من 120 ؟؟ زى الكورولا كده , بتديك إنذار انها مش مسئولة عن زيادة السرعة عن 120 ؟؟ أكيد فى 130 هكون قلقان .. ده قصدى ..

و مرة تانية .. شكر لأحلى أصدقاء بجد ..

[Ahmed.TV]

لاابدا احنا كلنا اخوات هنا , بس انا كان على كلمة مشاكل كدا وحطيت عليها خط , لانى كنت مستغرب ان فى حد بيقول ان التيدا فيها مشاكل ميكانيكية , وده عمرى ما سمعته فى المنتدى ولا بره المنتدى بصراحة , ولو حصل مشاكل بيكون اهمال اللى سايق لانه مش بيحافظ عليها
الحمد لله ربنا وفقنى لاختيارى للتيدا , فعلا عربية عملية جدا , وطول ما انت محافظ عليها وعلى صياناتك معاها وتكون دورية ومستمرة , يبقا باذن الله مش حيكون فى مشاكل ,
عربية بجد مريحة , وروح معرض اتوايجيبت او معرض السبع اللى فى مصر الجديدة وهات رقمه من الدليل واعمل تيست دريف وشوف العربية عملة ازاى فى الطريق والسحب والعزل وكل حاجة , واتفرج على تقفيل العربية جوة وبره وفى الماتور وفى الشنطة , وصدقنى حتحس بمعنى اليبانى فى كل حاجة فيها
بالنسبة الى السرعة طبعا لو انت عاوز تشد دايما فوق ال170 يبقا انسى التيدا مش عشان العربية خفيفة , عشان العربيية مرتفعة عن الارض وطبعا كل ما كانت العربية واطية الى العرض بتعطى ثبات كبير زى ما انت بتقول على الهوندا مثلا
لكن السرعة لغاية 150 مش حتحس بيها ابدا ولو عايز التيدا وتجرى بيها اكتر من 170 يبقا جنط 16 او 17

على فكرة انا جبت 170 بيها وكانت بتجمع بسهولة جدا وكانت عاوزة اكتر من غير ما تضغط بعنف ولا تعانى عشان تزود بعد 170
بس الطريق مكنش مريح , واحكيلك بصراحة انا معنديش قلب فى الجرى واخرى 140 على الطريق

صوت الماتور هادى لغاية 130 ولكن بعد كدا مسموع بس مش مزعج
وصدقنى حترتاح معاها وفيها جدا
بس ياريت تعمل تيست دريف وتجرب كل انواع العربيات اللى فى السوق وخالى التيدا فى الاخر زى ما انا عملت وربنا اكرمنى بيها , وبعدت عن الكماليات والدلع واخترت الحاجة العملية فى بلدنا واللى تعيش معايا
واهلا بيك صديق لينا فى قسم نيسان

[fouaa]

انا معايا تيدا 2007 بصراحه ارق عربيه ممكن تركبها فحياتك توكل على الله وموش هتندم عايز اقولك ان الرقه موش معناها ضعف العربيه فيها ماتور جبار وعفشه ممتازه فرامل كويسه جدا كمان شنطه كبيره اوى وصالون واسع عدادات واضحه كلها تحفه بس هات الكامله الى فيها جنوط وربنا يكرمك ان شاء الله