مشكلة دركسيون تيدا

[bassmesh]

يا جماعة دي مش مشكلة أصلا. الحكاية دي مقصوده في التصنيع علشان في خلوص في القطمه متروك عشان في حالات الحوادث -لا قدر الله- الدركسيون ينضغط لجوه ويسيب مساحه أوسع أمام السائق عشان الايرباج متأذيهوه. والكلام ده من مصنع نيسان مصر نفسه واللي قالهولي "مودرن" وكيل نيسان وقاللي أنهم كانوا قبل مايعرفوا السبب ده كانوا فاكرين أنه عيب صنع في العربيه وكانوا بيربطوا قطمة الدركسيون عشان المشكلة تختفي.

[Ahmed.TV]

شوفته بقا عشان تعرفوا ان اليابانين مش بيعملوا حاجة من فراغ ,واحنا عمالين نزن نزن ونقول فى مشكلة , وقال ايه احنا فهمين اكتر منهم
اصلا الشوارع بتعتنا الله يكون فى عون عربيتنا وهى بتمشى فيها , فبلاش نكون حساسين لاى حاجة , لان بالحساسية دى ممكن نعمل مشكلة من لا مشكلة

يعنى كدا الناس اللى راحت لاحمت القطمة دى ممكن تدخل نفسها فى متاهات على كدا ,لان القطمة بتتلحم فى حالة لو اللحام اللى موجود فك , مش تلحمها بلحام زيادة عن اللى موجود
فكرة اللحام ايه من الاصل
عشان عمود علبة الدريكسيون فبيكون ملحوم بلحام خفيف مش بيكون سايب , ومع الحوادث القوية لقدر الله ولما بينضغط بيكسر اللحام وبيتحرك العمود تجاه الايرباجز , لكن لو واخد لحامين حيكون غلط طبعا ومش حيتحرك , فلازم يكون فيه لحام واحد وخفيف
واذا فك اللحام الاصلى بياخد مكانه بونطة خفيفة , وعشان تعرف انه فك بتحس بصوت طق فى الدريكسيون وبالطبات كتير

والقطمة بسيطة وبتحتاج الى تشحيم كل فترة وتربيط وعادى جدا

وشكرا لاستاذ باسم على الخبر المهم ده , عشان بكدا انت ريحت الناس فعلا

[dramir1]

يوم بعد يوم بيزداد احترامي لمنتدي نيسان

[abou_ruqi]

اسمعوا بقه تجربتي مع صوت التكة دي


أنا ابتدت تظهر التكة الي في الدركسيون لما تكسره على الأخر على العشرين ألف كده ,و أنا بعمل الصيانة في مودرن موتورز الحضرة ( اسكندرية ) قالولي برضه دي قطمة الدركسيون لازم تتغير مجانا علشان انت في الضمان بس القطعة غير متوفرة في اسكندرية وحنبعت نجيبها من مصر

العربية عملت الـ 30 ألف ولا حد عبرني كعادة التوكيلات المصرية العظيمة

رحت علشان أعمل صيانة الـ 30 واشوف موضوع القطمة دي , بس قبل ما ادخل العربية التوكيل سألت الأول هي القطمة بتاعتي جت من القاهرة و ألا لسه ؟؟؟ قالولي لسه قلت والله ما انا عامل الصيانة عندكم

بس الأول عديت على حماية المستهلك وعملت الشكوى المحترمة علشان كان في زرار طالبه وقالولي حنبعت نجيبهولك و بقالي دلوقتي سنة و 8 شهور مستني الزرار يجي من القاهرة !!!!!

المهم رحت لمركز صيانة نيسان اللي في مرغم اسمه a.e.c.c ناس محترمة جدا , والمكان فاضي نسبيا عن مودرن موتورز وعندهم استعداد لسماع شكواك ويجرب معاك ومش مستعد يقلبك او يسيبك ماشي مش راضي

وكمان مصنعياتهم أرخص من مودرن موتورز

المهم في هناك مهندس اسمه سيد غاية في الأدب و الإحترام حكيتله موضوع القطمة قالي هما مابصوش على قاعدة موتور الباور الأول ؟؟؟ قلتله والله معرفش


المهم جاب صنايعي وقاله اربط المسمارين بتوع قاعدة الباور , الصنايعي فتح غطاء تحت الدركسيون وربط مسمارين , قالي جرب كلمني على الموبيل و قلي


المفاجأة إن الصوت راح

فكل الحكاية إن موتور الباور فيه مسمارين بيمسكوا قاعدته و دول بيحلوا شوية مع المطبات و كل المطلوب إنك مع تربيط العفشة كل صيانة تربط على المسمارين دول و خلاص


لا في مشكلة في القطمة ولا يحزنون ؟؟؟؟

[Eng_Moh.Dewair]

شكرا على المعلومات يا رجاله وحضرتك شايف يا ابو رقيه الصيانه نعملها فى مرغم ولا الحضره؟ و بعدين انا كده اتلغبطت الحل لمشكله الدريكسيون دى ايه ؟
تشحييم القطمه و لا نربط مسامير الباور ؟

[abou_ruqi]

شكرا على المعلومات يا رجاله وحضرتك شايف يا ابو رقيه الصيانه نعملها فى مرغم ولا الحضره؟ و بعدين انا كده اتلغبطت الحل لمشكله الدريكسيون دى ايه ؟
تشحييم القطمه و لا نربط مسامير الباور ؟

lمرغم أفضل بس لو تقدر خلي حد يروح معاك بعربيته علشان تروحوا مكان تقضوا الوقت فيه علشان القاعدة هناك مملة و ده صحراوي مفيهوش حاجة تتعمل بره التوكيل

[Ahmed.TV]

معلومة مفيدة جدا يا خالد وتسلم ايدك على الايضاح لان فعلا ممكن ميكنش بسبب القطمة ويكون من المسمار ده

و العفشة بتكون عاوزة تربيط ولو حد بيربط العفشة بضمير ومن الاخر صنايعى شاطر وفاهم وبياخد باله من كل حاجة وهو بيربط وعارف ده تبع ايه وده تبع ايه يبقا كل الامور حتتظبط وتبقا تمام,
وفى ناس كتير طلع العيب عندهم بسبب القطمة دى عشان بتكون عاوزة تتشحم مش اكتر
واذا كان فيها مشكلة فبتتغير على طول

المهم ان الامور بسيطة ومفيش اى مشاكل عويصة او كبيرة لقدر الله
وحبقا اوصى فى عمل صيانة ال30 الف انا كمان على انهم يربطوها مع ان الحمد لله مش بشتكى من حاجة

مرة تانية تسلم ايدك يا باشا
ده انا قولت انك بعت التيدا ياراجل
ليك وحشة انت وكل اهل اسكندرية
وتقبل تحياتى

[Eng_Moh.Dewair]

شكرا استاذ خالد