تجربتى مع مركز السبع

[Bishoy.Girgis]

ميرسى يا بيشوى
ربنا يخليك ده بس من ذوقك :_alshmokh23[1]:
مش هتجيب المدام وتيجى بقا ولا اقاطع قسم نيسان ده خالص

بصراحة يا بسكوتة اسكندرية دلوقتي كل جمهورية مصر العربية بتصيف فيها .. ان شاء الله هنيجي في رمضان و بعدين قسم نيسان مش هيبقي ليه طعم من غيرك

[noon_eg]

نرجع تانى للكلام فى الموضوع . العميل زى متفضل قال انة نزل بعد ساعة ولاقى العربية لسة مدخلتش ودة مش اهمال زى متفضل وقال... دة لان السيارة اتحددلها ميعاد تسليم من البداية العميل موافق علية وموقع فى محضرة الاستلام بالموافقة على ميعاد استلام 4 ونص وحيث انة جة الساعة 1 و 40 دقيقة ونزل ولاقى العربية زى مهيا بعد ساعة يعنى الساعة كانت تقريبا 2 و 40 دقيقة او 3 وطبعا الصيانة بتاخد ساعة ونص زى مقولنا فى البداية يبقى المهندسة كانت وضحه فى شغلها من البداية لما حددت ميعاد الساعة 4ونص فعلا الموضوع مش اهمال وتقصير وبرود الموضوع مش اكتر من نظام للشركه الموظفين والمهندسين والادارين بيطبقوة والا اكيد ميزعلش حد
ملحوظه : الشركه مسئولة عن ميعاد تسليم السيارة للعميل بعد الاصلاح وطالما العميل موافق يبقى الكلام على ميعاد التسليم مش التسلم
طبعا مش حتكلم كتير عن موضوع سرقة السيارات من عندنا لان عدد السيارات المسروقه لحد دلوقتى يفوق الخيال والوصف حوالى 0 حالة سرقة وثانيا لان "مفيش" افراد امن موجود فى مكان السيارة وثالثا لان العميل تقريبا مش بياخد بالة ان دة هوة النظام الموجود فى اى مركز صيانة تانى
نتكلم عن " الولد " الا المفروض انة يكون فنى مدرب وفاهم وواخد كورسات فى نيسان مصر فى الاصلاحات الا اذا مكنش واحد من الفنين الا بيسافرو الامارات كل سنة على حساب الشركة عشان يخدو كورسات على اعلى مستوى فى نيسان الشرق الاوسط وبعيدا عن كلمة "ولد" والا طبعا بتوحى بعدم اقتناع العميل بشكل الفنى الا بيشتغل فى السيارة فممكن يحصل فعلا ان فية مشاكل تحصل فى السيارة ومتشوفهاش غير بعد متخرج من المركز ودة مش بيحصل فى السبع بس دة ممكن يحصل فى اى مركز فى العالم كلة والا مكنوش عملو خدمة عملا اساسا لمعرفة رأى العميل فى الاصلاح وشكواه . واكيد خدمة العملا عندنا اتصلو زى ماكل العملا الكرام بيجو عندنا وبنتصل بيهم وساعتها ممكن وياريت تقولنا هما ردو على شكوة حضرتك ازاى ومسبقا اى عميل بيشتكى من اى مشكلة فخدمة العملا بحددة ميعاد تانى يجيى يفحص فية السيارة مع مدير الورشة او مدير المجموعة شخصيا وكمان العميل بيقدر يحدد الميعاد الا يناسبة
طبعا فى النهاية اسف على طول ردى وازعاجى لحضراتكم واحب ابلغ من دلوقتى انى مش برد بشكل رسمى على شكوى العميل لانى مش مسئول عن دة انا برد بدافع عن احترامى للشركة الا شغال فيها وبحس فيها بكل تقدير للعملاء سوا كانو على حق او لا
واخير احب اقدم كامل احترامى لكل كلمة تفضل العميل وقلها وارجو انة يلاقى معاملة افضل وخدمة افضل لسيارتة فى اى مكان يختارة

وشكرا ..,,

الحقيقه كلام كله ذوق وفى قمه اللياقه

ولكن انا لما باكتب عن راى فى خدمه قدمها لى مركز خدمه مشهور زى السبع الذى كنت اتوقع منه مستوى عالى من الاحترافيه

باقيم الخدمه كالتالى :

المشاكل اللى كانت فى العربيه ومدى امكانيه حل المشاكل ولو حضرتك قريت كلامى بتركيز حتلاقى فيه اللى ممكن يضايق اى بنى ادم طبيعى وهو خروج العربيه بعيب ما كناش موجود فيها وهى داخله وهو ضعف السحب مع تشغيل التكييف

وكذلك عدم حل مشكلتين وهما:
1- تاخر الدواره صباحا
2- صوت الونه فى التكييف

مش حاطول كتير علشان يبقى فيه تركيز فى الكلام

لو ده فى رايك حاجه متضايقش اى عميل يدخل عندكم يعمل صيانه 1000 يبقى انا اللى عندى حاجه غلط مش انتم

[tigerman]

عزيزى العميل اولا شكرا على ردك وتجاوبك معانا
ثانيا انا معاك ان ممكن تضايق لو فية حاجة كنت طالبها ومتعملتش او عيب ظهر بعد خروج العربية من الصيانة
لكن الا كنت اقصد اوجهه لسيادتكم ان دة مش حيبقى نهاية الدنيا
لان اى انسان معرض انة يغلط وانا ان كان فية اهتمام من الشركه على الرد على العملاء والتجاوب معاهم فدة لاننا فعلا بنهتم بالعميل وبحل كل مشاكلة
وطبعا عشان مطولش تانى على سيادتك فانا حبعتلك رقم تليفونى الخاص على رساله خاصة ولو حضرتك حبيبت تتصل عليا فى اى وقت وانا باذن الله حنسق معاك ونحل كل المشاكل الا قولتها طبعا مع مساعدة قسم خدمة العملا فى الشركه دة لو عند سيادتكم رغبة فى كدة
وبكرر فى النهاية لكل الاخوة والاعضاء فى المنتدى انى هنا مش موجود بشكل رسمى للرد على الشكاوى لانى فى قسم المعلومات مش خدمة العملاء لكن طبعا طالما فية مشكلة واقدر اساعد فى حلها فانا مش حتأخر
ومرة تانية سعيد برد حضرتك وتجاوبك معانا

[Samah AbdAllah]

بصراحة يا بسكوتة اسكندرية دلوقتي كل جمهورية مصر العربية بتصيف فيها .. ان شاء الله هنيجي في رمضان و بعدين قسم نيسان مش هيبقي ليه طعم من غيرك

معاك حق
خلاص استنى لما تيجوا فى رمضان عشان انا كمان مش بخرج فى الزحمة دى
لك حذارى ييجى رمضان وما تجوش
عامة كلها اقل من اسبوعين

[noon_eg]

ثواني بس يا رجالة
أزاى وطوا الدبرياج وهو أساسا مش بيعلي ولا يوطي عشان علي زيت
و حكاية الدوران الصبح دي و الله اعلم من البطارية
و النور العالي فعلا كان عندى زيك بالظبط كان ضارب لفوق خالص و الواطى كمان بس و انا بعمل صيانه ال1000 قولتلهم عليه و دخلت كمان الورشة غتاته في البريك بتعهم و خليت الفنى ايلي هناك يعمله قدامى
يعنى المشاكل دى تتحل عادى
و تقريبا برضة صوت التكييف عادى عشان بيحمل علي الموتور فده طبيعي متقلقش

بص يا سيدى

اى دبرياج فى الدنيا سواء كان بيعمل بسلك او هيدرولك له رجلاش يمكن الضبط منه سواء تعلى او توطى

بدليل ان كان عندى زمان فى مرسيدس زلمكه 1986 دبرياج هيدرولك وكان بيتم ضبط الرجلاش بتاعه -- يعنى الحكايه قديمه مش اختراع جديد

فشيل من دماغك المعلومه الخطأ دى

[noon_eg]

السلام عليكم اعضاء نيسان الكرام
اسمحولى اشارك معاكم برأى بسيط
ده بعد اذنكم طبعا مع العلم ان ماليش اى تجربة مع سيارات نيسان او توكيلها
انا شايفة ان اى عميل من حقه يعبر عن رأيه فى اى توكيل واللى بيكون شق كبير منه نفسى بمعنى ان الانطباع الاول غالبا عند بعض الاشخاص بيكون مؤثر على علاقة العميل بالتوكيل يعنى ثقته فى التوكيل بتعود بجزء كبير منها للراحة النفسية لاول تعامل
ده امر لا يعيب العميل ولا يعيب التوكيل
ومقدرش الوم زميلنا العضو الكريم على نقل تجربته بالعكس انا احييه لانه نقلها بكل امانة ووضوح
ربما اختلف معه فى الرأى او فى انطباعاته الشخصية لما حدث
لكن اكن له كل التقدير على نقل التجربة بكل وضوح وصراجة
فقد وصف لنا انطباعاته ورأيه الشخصى واسباب هذه الانطباعات
واكيد كل عضو له من الشخصية اللى هتكون انطاعات مختلفة لو حصل معاه نفس الموقف
يعنى انا مثلا مش هقدر اعيب على مهندسة او اقيس مدى كفائتها او اتقانها لعملها بسقوط المقتاح من ايدها من عدمه
والا كنت هقول على نسبة كبيرة مننا مش بنعرف نسوق استنادا لمعيار سقوط المفتاح من ايدنا او نسيانه داخل السيارة او فى البيت اوحتى فقدانه
نبقا كلنا مش مركزين ومش بنعرف نسوق
كمان مش هقدر اقول ان ده توكيل سئ او اعيب عليه تفانيه واخلاصه فى خدمة عملاؤه وهو ارسل للعميل يطالب منه اعادة التوجه لاعادة الصيانة وحل اى مشكلة لازالت موجودة

من حقى كعميل رفض التعامل مع اى توكيل او اتخاذ موقف نفسى منه
لكن لا يحق لى ان اعيب فيه مادام لم يقصر فى متابعة مشكلتى

شكرا tigerman على اهتمامك بتوضيح الصورة للعضو صاحب المشكلة ولكل اعضاء نيسان نايل موتورز
واهلا بيك عضو معانا
شرفت نايل موتورز

الاستاذه الفاضله بسكوته

الحقيقه كلامك فى محله الى حد كبير وانا مش حاعلق على حاجه غير موضوع المفتاح

الواقع ان اى واحد بيتعامل مع شخص او جهه تقدم له خدمه بتتكون عنده صوره متكامله عن الشخص او الجهه ده من خلال التعامل

صحيح ممكن فى بادىء الامر يحصل شىء تافه ( مثل وقوع المفاتيح ) ولكن من خلال 4 ساعات ونصف قدرت احكم و اقيم اداء المهندسه المذكوره مقارنه بعدد 4 مهندسين اخرين ( ومنهم بنت برضه ) كانوا موجودين فى نفس الوقت وكان الفرق واضح وشاسع بينهم وده اللى خلانى كتبت انطباعاتى عنها من الاول و تقيمى لها فى الاخر

انا حبيت اوضح النقطه دى للعلم فقط -- انا لا احكم على شخص الا من خلال الموضوع كله من اوله لاخره وليس من اول وهله فقط -- وان كان الانطباع الاول بيكون مؤشر عام لمدى كفائه الشخص فى عمله من عدمه

تقبلى تحياتى

[mohamedhamam]

كل منا ينقل و يعبر عن تجربته الشخصية فى التعامل مع أى توكيل و لو واحد منا كان تجربته موفقة بيطلع التوكيل اللى تعامل معه إلى سابع سما و العكس صحيح تماماً و وقتها بيخسف به الأرض و لكن الواقع و الصدق بدون أن نضحك على بعض أن خدمة العملاء و سياسة و فن إرضاء العميل غير موجودة فى مصر و خدمة العملاء فى شتى المجالات فى مصر سواء فى السيارات أو المحمول أو الأجهزة الإلكترونية أو غيرهم يفتقدون كيفية التعامل مع العميل و كيفية إحترام عقله فى التخاطب و التعامل فى حل مشاكله و من الممكن خلال الـ 10 سنوات القادمة أن يحدث طفرة ملموسة و سيكون سببها الرئيسى زيادة الثقافة و الفهم الكامل للمعنى الحقيقى لخدمة العملاء

[noon_eg]

اثلجت صدرى يا رجل