سؤالين ياريت الاجابه عنها

[Dr.M.Mowafy]

سلام عليكم
اولا بشكركم علي القسم الرائع
والمعلومات الكامله بجد حاجه جميله جدا
وكان ليا كذا استفسار كده
اولا انا عربيتي نيسان صني 2010 عامله 11 الف كم وشاريها من سنه
شاريها من مودرن موتورز
والصيانه بعملها هناك ع طول
ومش مستريح معاهم خالص وناس متعبه اخر حاجه ومفيش اهتمام باي شكوي للعميل ولو اشتكيت 4 شكاوي هايتحل منهم اتنين واحمد ربنا علي كده
المهم اخر شكوي ودي الي بسأل علي حلها لاني مش عارف ايه حلها مع العلم العربيه في الضمان لسه طبعا
ان العربيه بعد سرعه 100 الدركسيون بيرعش جامد جدا لدرجه ايدي بتوجعني وببقي مجبر اني اقلل السرعه لااقل من 100 علشان الرعشه دي وكمان بحس ان العربيه طايره كده ومش متحكم فيها
وكمان بتحدف شويه نحيه الشمال معايا مع السرعه
دول كانت مشكلتين قولتهم ومتحلوش في اخر مره بس قالولي كل حاجه تمام يادكتور وكله تمام ولو في حاجه بلغنا
وطبعا كالعاده مفيش اي حاجه اتصلحت
والعربيه زي ما هي
فانا عايز منكم تقوليلي ايه حل المشكله دي وهل بتتحل في التوكيل ولا ممكن احلها برا
وكمان ايه افضل مكان اعمل فيه صيانه يكون افضل من مودرن موتورز
وجزاكم الله خيرا

[Dr.M.Mowafy]

نسيت اضيف ان التوكيل الي اقصده
موديرن موتور الي في ابو رواش

[NOURHASAN2002]

دي في الغالب مشكله في علبة الدركسيون او جانط الأول اعمل ترصيص وزوايا اذا متعدلتش شوف علبة الدركسيون بعدين بيض البارات او المقصات كده بالترتيب وربنا يجبها خفيفه
بس لو نصيحه اجيب الصاني ولا ابعد وايه اخبار الصالون

[fady_anis]

ياريت حضرتك تروح لأقرب مركز صيانة نيسان تابع للسبع اوتوموتيف دول ناس كويسين وكفاءه وهيقوموا بالواجب

[mem]

روح توكيل السبع بصراحة ممتازيين وكل اللى تقول عليه بيتعمل وده عيب بسيط لا تقلق منه هتلاقى العفشة
عايزة تتربط كويس وبالنسبة للحدفه هو ها يشفها ان كان عيب فى مقاسات الاطارات ولا عايزة اتزان على الجهاز
لان ده حصل معايا وطلع العفشة عايزة تتربط وكان الاطارات مقاستها مش مظبوطة كان بيخلى العربية تحدف منى

[WalidAdel]

علي التوكيل علطول ياباشا و ماتخليش حد يلعب في العربيه بره لانها ليسه في الضمان و لو عايزه حاجه تتغير هما يغيروها حضرتك ممكن تروح توكيل السبع اللي في المعادي
و ممكن تعمل شكوي هنا بردوا لان في موضوع تبع ادارة مودرن موتوز للتبليغ عن اي شكوي

http://www.nilemotors.net/Nile/162051-a.html

و بعدين ياباشا العيب دا ممكن يكون بداية من علبه الدريكسيون لحد الكاوتش ممكن يكون فيه عالي وواطي او السلك باظ و عامل فارق عالي و واطي في النقشه نفسها
بس هيا الرجه دي الاول بتروح لما بتزود السرعه ولا لأ لو مش بتروح او بتروح بعد فرق في السرعه كبير يعني مثلا مابين ال100 و 120-130 كده يعني غير الكاوتش هات اللي ورا قدام و جرب تاني

بس انا راي الشخصي انهم كاوتش مش معقوله حاجه تحصل في علبة الدريكسيون او البيض او اي مشكله كبيره زي دي العربيه عامله 11 الف فان شاء الله الكاوتش و ابقي بلغنا باخر الاخبار ياباشا

[harizy]

ياباشا إن شاء الله بسيطة وياريت تقولنا عملت إيه ووصلت لحد فين مع الناس دى، والأخ nourhasan2002 اللى بيسأل يشترى ولا لأ بأقوله توكل على الله بعد ما تستخيره واشترى النيسان لأنها تعتبر من أفضل السيارات فى فئتها ومقابل سعرها، تعتبر بالفعل صفقة هايلة

[Bishoy.Girgis]

علي التوكيل علطول ياباشا و ماتخليش حد يلعب في العربيه بره لانها ليسه في الضمان و لو عايزه حاجه تتغير هما يغيروها حضرتك ممكن تروح توكيل السبع اللي في المعادي
و ممكن تعمل شكوي هنا بردوا لان في موضوع تبع ادارة مودرن موتوز للتبليغ عن اي شكوي

http://www.nilemotors.net/nile/162051-a.html

و بعدين ياباشا العيب دا ممكن يكون بداية من علبه الدريكسيون لحد الكاوتش ممكن يكون فيه عالي وواطي او السلك باظ و عامل فارق عالي و واطي في النقشه نفسها
بس هيا الرجه دي الاول بتروح لما بتزود السرعه ولا لأ لو مش بتروح او بتروح بعد فرق في السرعه كبير يعني مثلا مابين ال100 و 120-130 كده يعني غير الكاوتش هات اللي ورا قدام و جرب تاني

بس انا راي الشخصي انهم كاوتش مش معقوله حاجه تحصل في علبة الدريكسيون او البيض او اي مشكله كبيره زي دي العربيه عامله 11 الف فان شاء الله الكاوتش و ابقي بلغنا باخر الاخبار ياباشا

انا مع الاستاذ وليد في كل اللي قاله

[Dr.M.Mowafy]

ربنا يجزيزكم خير يا جماعه والله
خلاص هاروح السبع الي في المعادي واقولهم المشاكل في صيانه ال 15 الف
ولا ممكن اروحلهم الايام دي قبل ما اخلص ال 15 الف
اصل في موجيرن موتور لو رحت في معاد غير الصيانه بيبقي الساعه صيانه ليها تكلفه وحسبه تانيه كده ومكلفه ع الفاضي
فهل ده بردوا بيحصل في السبع ولا ايه النظام

[Dr.M.Mowafy]

بالنسبه نصيحه تجيب الصني ياباشا ولا لأ
صراحه هي تعتبر من افضل افضل افضل العربيات في فئتها مفيش عريبه بامكانيتها بسرعه 106 الف
فشايف انها عربيه مناسبه
والي خلاني افضلها غن غيرها
ثباتها رائع جدا جدا لو العربيه مفهاش مشاكل وتقدر تناور بيها علي سرعات عاليه
فراملها شايفها ممتازه جدا مع وجود abs ,abd,bd
كمان امكانتيها مرايات بتتفتح وبتتقفل بزرار وصراحه الامكانيه دي كنت شايفها في الكرولا ومهووس بيها وكان نفسي اجيب عربيه فيها الامكانيه دي بس الكورولا وقت ما جيت اجيب عربيه كانت ب 150 وكان كتير جدا صراحه عليا اجيبها
كمان شكلها حابه جدا مع ان الناس بتقول كلاسيكي وكده بس حاسه فخر وجميل وليه استايل خاص كده متقدرشي تضيف عليه حاجه يعني كان نفسي اضيف اسبويلر طبعا منفعشي شكلها هايكون وحش فتحس انها لوحدها كده بلا اضافات
ايضا كمان الصالون بتاعها من جوه شكله قريب من التيوتا فكان عاجبني شويه
والشنطه بتاعتها بحر الصراحه وتشيل كويس
يعني بقي عيوبها ودي بجد عيوب جوهريه والي ميقدرشي عليها يبعد عنها
اولا العربيه طويله وكبيره مهياش صغيره فلو انت ملكشي في التحكم الكويس في العربيات وبتعرف تركن كويس وكده يعني منصحكشي خالص بالعربيه دي يعني من ضمن الحاات الي ندمتني في العربيه انها حجمها زياده شويه فصعبه في المناورات وطبعا الركنات بس خلاص الواحد جبها مش هانغيرها يعني فربنا يسترها
كمان التوكيل بتاعها اه انا مجربتش غير مودرن موتورز بس بس التوكيل مش حلو خالص عكس الكرولا فيه صحبي معاه كورولا 2007 بيسلم عربيته ساعتين للتوكيل بيستلمها جديده وانا بنفسي سقتها قبل الصيانه وبعدها وكانت حاجه تانيه بجد ولا اكنها جديده
كمان التوكيل عنده مبدا تروح بدري تمشي بدري بمعني انا جيت احجز علشان الصيانه لل 10 الف قالولي تعالي بعد شهر واسبوع
اقولهم ليه ربنا يهديكم علينا امتحانات والعربيه فيها مشاكل عايز تتحل يقولولي مفيش معاد غيره
وعلشان انا علي علم بالي بيحصل
فتاني يوم
خت نفسي الصبحيه الساعه 6 ونزلت ورحت التوكيل
انا ساكن للعلم في 6 اكتوبر المهم بستني اول ما البوابه تتفتح واخد رقم واحد واركن العربيه وافضل قاعد فيها اعمل اي حاجه
وبعدين اول ما بيجيوا المهندسيين علي الساعه 9 يستلموا العربيه مني علشان انا رقم واحد اه مش حجز بس رقم واحد ما انا جيت بدري
والحركه دي ضايقتني جدا جدا من التوكيل ومركز الصيانه جدااااااااااا غانيك بقي عن ان عربيتك منتاش عارف هايحصل فيها ايه اساسا مش بتشوفها وهي بتتصلح مع العلم كورولا بتقعد في الرسبشين وبتبقي شايف عربيتك بيتعمل فيها ايه علي الاقل متطمن انهم شغالين فيها
فالتوكيل متبع مبدا تروح بدري هاتخش بدري بس ابقي قابلني هاتمشي الساعه 1 ولا 2 ده بعد ما تقعد تقولهم مشغول ولازم امشي وحرام كل ده
كمان من ضمن عيوب العربيه خامتها اديها جيد مرتفع مش جيد جدا زي ما الناس بتقول
بمعني مثلا مكان تخزين النظاره هايقع لوحده مكان الي بتعين فيه الرخص والكرت هايقع لوحده بردوا وانت ركبه بس المهم انه هايقع وتحس الخامات جوه والتقفيل مش قد كده
عربيتي ع فكره سوبر صالون
الباور بتاعها مقدرشي اتكلم عليه بس فيه الي اخف من كده واحلي من كده بس هو بشكل عام جيد جدا جدا جدا جدا بالنسبه لواحد ساق الشاهين قبلها
اه كمان من اوحش الاسباب فيها وبجد منصحكشي بيها لو انت ناوي تشد بالعربيه وتجري جري الوحوش زي ما بنقول
ابعد عنها سبحها مش قد كده اه عربيه بتجري وانا جبت بيها قبل كده 170 اه حلو الكلام ده بس عما تجيب ال 170 دي فيها فتره شويه فسحبها مش قد كده وتقيله يمكن ده راجع لتقل العربيه وحجمها بس منصحكشي خالص لو سواقتك عمتا فيها اسلوب الجري الشديد
سيان من هذا فهي عربيه زي ما قولتلك فوق ممتازه في فئتها جدا يمكن هي ا لافضل من رايي
بالاضافه للنعومه نعمه وجميله جدا ولو حافظت عليها هاتحفظك او هاتديك يعني راحه ونعومه
وكمان صوت المتور اه عالي بس حلو يعني متفاعل مع السرعه وكمان صوته شبه صوت متور العربيه فانا بحب صوت الماتور جدا لانه بيحسسني اني راكب كورولا :p
كمان موضوع العفشه وكده وانها ناشفه في المطبات يعني انا شايف لا بل بالعكس ناعمه جدا ومش بحس قوي بالمطب لو خته بطريقه صح طبعا
يعني حبيت اديك تقرير عنها عمتنا معلشي مش بعرف ادي انطباع او تقرير عن حاجه
بس ده يعني حاجه تساعدك من واحد جربها وحب يقول الامكانيات بكل وضوح علشان الي يشتري يبقي عارف بيجيب ا يه
وربنا يوفق الجميع

[WalidAdel]

لو هاتستني حضرتك صانة ال 15 روح اكشف علي الكاوتش في اي حته بس يكون توكيل بريدجيستون اي فرع و قولهم علي المشكله و قولهم انك شاكك في الكاوتش انه يكون بايظ و شوف هايقولوك ايه و لو بايظ بدلهم و جرب علشان ماتفضلش مضايق من العربيه فتره طويله كده مشكله نفسيه عندي انا بالاخص اني مابحبش ان يكون في مشكله في العربيه و مش عارف احلها انا ممكن مانمش بليل اصلا

[Ahmed.TV]

انا من راى استاذ وليد بردوا

والحدفة دى ظبط زوايا وترصيص باذن الله او فى حاجة فى الكاوتش
وبخصوص مركز الصيانة
طالما مش ارتحت مع مودرن موتورز

يبقا خاليك مع السبع او يونايتد

وربنا يوفقك

[Dr.M.Mowafy]

تسلموا يا شباب ربنا يكرمكم يارب

[Ahmed.TV]

ياريت تطمنا وتقولنا عملت ايه والمشكلة اتحلت ولالا , وايه الاخبار معاك

[Dr.M.Mowafy]

أن شاء الله
وانا هاحجو معاهم من بعد العيد علشان رمضان والانشغال بس بتاع تدريبي في المستشفي
فان شاء الله بعد العيد بقولكم الاخبار جزاكم الله خيرا