مشكلة في الفتيس الأوتوماتيك

[mantis7806]

السلام عليكم ورحمة الله وبركاته
زميلي في الشغل معاه صني سوبر صالون أوتوماتيك 2010
بتحصل معاه حاجة غريبة
نكون ماشيين عادي ونلاقي الفتيس منقلش للغيار اللي بعده والار بي ام يوصل 5000 (بالرغم من ان صاحبي لاغي خاصية الأوفر درايف) وبعدين تحصل نتشة جامدة والفتيس ينقل للغيار اللي بعده
نفس النتشة اللي بتحصل لما تكون سايق عربية مانيوال وتاخد غيار وتسيب رجلك من عالدبرياش مرة واحدة
وعلى فكرة الموضوع ده بيحصل على فترات
مش دايما
هل فيه مشكلة في الفتيس؟
وكل عام والجميع بخير وصحة وسعادة

[flavio_egypt]

السلام عليكم ورحمة الله وبركاته

بصراحة حضرتك بكلام ده كركبت بطنى قبل ما اشترى الصنى الاتوماتيك
المفروض ان ده اتوماتيك يابانى يعنى فوق الممتاز
بس علشان اكون صريح مع حضرتك
دلوقت بتقول ان الموضوع ده اتكرر مع صاحبك طيب ليه سكت ومرحش التوكيل وهو لسه فى الضمان
اعتقد المفروض ان حضرتك تخلى صاحبك يروخ التوكيل مباشرة وتقولنا على اللى حصل
يا اما حضرتك كده هتسبب لكل اللى عاوزين يشتروا قلق
واحنا منتظرين ردك

[HOSSAM_GABRE]

وفيه حد يكون عنده عيب زى ده ويستنى ما يروحشى للتوكيل
عموما العيب نادر الحدوث وان شاء الله حلها بسيط فى التوكيل
الدعم الفنى فى نيسان محترم جدا

[memoz]

المفروض ان تكون اللمبه منوره اللي هيه بتاعت الاوفر درايف تكون منوره مش مطفيه

[HOSSAM_GABRE]

على فكرة بردة ممكن يكون اصلا مش فيه مشكلة
ممكن يكون صاحبك فى الاوقات دى بيدوس بنزين جامد
يعنى بيعمل كيك داون
فبالتالى الفتيس بيسقط نقلة وينقل متأخر والار بى ام يعلى

[hatchaya]

مش عارف لية عندى احساس ان العربية دى بتاعت مندوب
يعنى مستلمها من شركة
لان غالبا العربيات اللى بتتسلم من الشركات بيكون فيها اعطال عجيبة وبالهبل
انا شوفت بلاوى من موضوع عربيات الشركات دى واعطال تشد فى شعرك منها
ملكش غير حل واحد زى ما قلت لكل الناس اللى معاها الاعطال الغريبة دى
عليك وعلى التوكيل تنفخهم هناك وتاخد حقك
الناس دى غالبا مبتتظبطش غير لما يتشرشحلهم
اسال مجرب ولا تسالش خبير

[Ahmed.TV]

السلام عليكم ورحمة الله وبركاته

بصراحة حضرتك بكلام ده كركبت بطنى قبل ما اشترى الصنى الاتوماتيك
المفروض ان ده اتوماتيك يابانى يعنى فوق الممتاز
بس علشان اكون صريح مع حضرتك
دلوقت بتقول ان الموضوع ده اتكرر مع صاحبك طيب ليه سكت ومرحش التوكيل وهو لسه فى الضمان
اعتقد المفروض ان حضرتك تخلى صاحبك يروخ التوكيل مباشرة وتقولنا على اللى حصل
يا اما حضرتك كده هتسبب لكل اللى عاوزين يشتروا قلق
واحنا منتظرين ردك

مفيش قلق ولا حاجة اخى العزيز
اومال تعمل ايه لو اشتريت عربية تويوتا ولقيت فيها مشاكل فى الفتيس ومش عربية واحدة وك1ا عربية منها
اللى عاوز اقوله اتخن عربية فى السوق ممكن يكون فيها مشكلة ومشكلة فردية , وده احسن من انه يكون مشكلة عامة على كل الموديلات عشان متتسوحش
لان ابسط المشكلة الفردية علاجها بسهولة جدا طالما انت فى الضمان
وموضوع الاستاذ اللى بيحكى عنه حيكون حاجة بسيطة جدا , ومستغرب ان عربيته فى الضمان ومرحش على هناك
فمش تقلق ابداااا
على كدا بقا محدش مثلا بيشترى تويوتا او سيراتو , واهم منتشرين جدا مع ان فى مشاكل فيهم سواء فى العفشة او الفتيس , ولا ايه يا استاذى

وفيه حد يكون عنده عيب زى ده ويستنى ما يروحشى للتوكيل

عموما العيب نادر الحدوث وان شاء الله حلها بسيط فى التوكيل
الدعم الفنى فى نيسان محترم جدا

وانا كمان مستغرب بصراحة انه ازاى مرحش التوكيل !!!

المفروض ان تكون اللمبه منوره اللي هيه بتاعت الاوفر درايف تكون منوره مش مطفيه

اللمبة بتكون مطفية مش منورة , اما منورة دى انا اول مرة اسمع عنها , انا عندى فى التيدا مطفية , ولما بشغلها وعشان استخدمها بدوس على الزرار وبتنور , واعتقد ان الكل واحد

على فكرة بردة ممكن يكون اصلا مش فيه مشكلة

ممكن يكون صاحبك فى الاوقات دى بيدوس بنزين جامد
يعنى بيعمل كيك داون
فبالتالى الفتيس بيسقط نقلة وينقل متأخر والار بى ام يعلى

فعلا انا معاك وممكن يكون السبب زى ما حضرتك ذكرت وهو عشان جديد يمكن مش عارف يتعامل معاها


=========================
واذا مكنش بسبب زرار الاوفر دريف وياريت يخلي لمبه مقفولة مطفية , وكمان مكنش بسبب انه مش عارف يتعامل مع الكيك دون
يبقا ممكن يكون ضفيرة الكهرباء فيها مشكلة وهى اللى عاملة البرجلة دى
او من حاجة اسمها مقاومة الفتيس ودى بتبقا داخل الفتيس متوصلة بقيشة عشان يدخل فيها ضفيرة الكهرباء فممكن تكون المقاومة دى بايظة

فلازم تروح مركز صيانة محترم يشوفلك الدنيا طالما العربية فى الضمان ولسه 2010
وتقبل تحياتى

[memoz]

فعلا تكون مطفيه مش منوره اسف علي المعلومه الغلط انا اللي اتلغبط

[flavio_egypt]

السلام عليكم ورحمة الله وبركاته

الاخ الفاضل صاحب الموضوع
حضرتك كتبت موضوعوك وطلبت الاراء و المشكلة سببت القلق للبعض زى حالاتى
فعلى الاقل كنت اتمنى من حضرتك انك تدخل فى الموضوع تانى وتقولنا رايك فى الردود او اللى صاحبك عمله
لأننا اهتممنا بموضوعك ومع ذلك لم تدخل مرة اخرى على الموضوع وتعلق بأى كلمة
لذلك أعتب عليك كثيرا يا اخى الفاضل

[harizy]

الحكاية دى فعلاً غريبة مش شوية لأ أووىىىىىىى ى لأن الشكاوى المعتادة بتكون بالنسبة للعفشة أو ضيق الكنبة الخلفية أو استهلاك البنزين بس إنما الفتيس أنا أعقتد أنك أول واحد بيقول إن فيه مشكلة.


بص أخى الفاضل إن شاء الله المشكلة بسيطة وتعالى ناخدها واحدة واحدة:ـ

....* أنت متأكد أنك قفلت أوفر درايف إزاى يعنى هل اللمبة منورة ولا مطفية فى الطابلوة؛ عشان الموضوع ده عامل مشاكل كثيرة لبعض الأعضاء مش كلهم.

سيدى العزيز الأوفر درايف مقفول يعنى اللمبة فى الطابلوة مطفية والعكس بالعكس؛ وبعدين الأوفر درايف ده تستخدمه ـ زى ما أساتذنا فى المنتدى قالوا ـ فى النقلات من الأول حتى الثالث لو عايز قيادة رياضية شوية وعزم كبير للموتور فى مساحات قليلة ومسافات قصيرة يعنى هو يكون مفيد معاك لو سرعتك 90 أو 100 كيلو إنما أكثر من كده بيعيق قيادتك وتحس كأنك بتجر جبل وراك والأر بى إم بيعلى فعلاً عن العادى والنقلة بتتأخر دى لو جت أساساً.

....* كمان فيه ملاحظة ثانية إنت بتحرك الفتيس على إى حرف يعنى لو على 1 أو 2 ففعلاً النقلة بتتأخر والعربية بتكون مخنوقة لحد ما النقلة تتناسب مع السرعة اللى أنت ماشى بيها، فيجب تكون النقلة بتاعتك على حرف (d) هو ده الطبيعى للعربية والمناسب ليها.

أخيراً ياريت تعذرنى لو كلامى مش عاجبك أو ملاحظتى بسيطة أو حتى هايفة بس فعلاً الفتيس بالذات أنا شايف أنه من مميزات الصنى مش من عيوبها، وحضرتك لو كنت أول واحد يشتكى منه فإن شاء الله تكون أخر واحد كمان؛ فياريت تتقبل نصائحى بصدر رحب وتطمنا عليك أولاً ثم على الفتيس ثانياً.

وتقبل تحياتى يا زعيم.

[mr_sameh]

ان شاء الله بسيطه والموضوع هيتحل في التوكيل
واعتقد ان المشكله في كنترول الفتيس الخاص بالنقلات

[vet_hulk83]

انا كان عندي نفس المشكله حاول تغير فلتر الهوا بواحد جديد من التوكيل لان كل اللي بره (......) للأسف انا لما غيرته العربيه رجعت كويسه وممكن يكون من فلتر البنزين برده انا الحمد لله دلوقتي العربيه معايه فل الفل انا نضفت فلتر البنزبن عند الميكانيكي وغيرت زيت الفتيس برده وبمون بنزين والحمد لله كل تمام دلوقتي92

-----------------------------
تنبيه : للعضو بعدم التجاوز فى الكلمات

5:45 pm
17-9-2010

مشرف القسم
19ب

[ahmedhawas]

الكنترول فالف

المشكلة في الكنترول فالف بتاع الفتيس الأوتوماتيك
لو أهملت في تغيير زيت الفتيس الاوتوماتيك وتعديت المسافة المقررة ليه وهي غالبا 40,000 كم
بيحصل لجزيئات الزيت عملية أكسدة وتزنخ وتتكون جزيئات صلبة تسد الفتحات الصغيرة جدا في الكنترول فالف
وبالتالي تعوق عمل بلوف الفتيس الأوتوماتيك في توقيتها السليم وتتأخر الغيارات وتحس بالنتشة دي

الحل : تروح التوكيل وينزللك الكنترول فالف وليس الفتيس كله وينطفه بضغط الهوا
ويغيرلك زيت الفتيس