سؤال عن ثبان الليفينا

[AmorousPharaoh]

سلام الله عليكم و رحمته وبركاته
أنا رحت حجزت صني سوبر صالون من توكيل السبع اللي في المنصورة .. و الحمد لله أنا مستريح قوي للنيسان و خصوصا إنهم بيقولوا في التوكيل إن فيه مركز صيانة هيفتح في بلد قريبة من المنصورة على طريق المحلة
بس العربية لسة لحد دلوقتي ماجتش , و ده جايز يكون خير لأن طول المدة و القعدة ع النت و التفكير الكتير و ( زن خطيبتي ) خلوني أفكر في الليفينا .. و تقريبا كل المواضيع اللي تخص الليفينا هنا أنا قرأتها .. بس مفيش فيها كلام واضح عن موضوع الثبات .. حسب معلوماتي إن العربيات كبيرة الحجم ثباتها مش قد كدة , و إني لو أكلت بها مطب جامد شوية ممكن أفقد سيطرتي ع العربية .. الكلام ده مظبوط ؟؟
للعلم أنا كان معايا نوبيرا و الحاجة الوحيدة اللي كانت بتمتاز بيه العربية دي هو ثباتها النسبي بالنسبة لعربيات تانية كتير ..

ألف شكر للإهتمام

[Ahmed.TV]

حسب معلوماتي إن العربيات كبيرة الحجم ثباتها مش قد كدة , و إني لو أكلت بها مطب جامد شوية ممكن أفقد سيطرتي ع العربية .. الكلام ده مظبوط ؟؟
للعلم أنا كان معايا نوبيرا و الحاجة الوحيدة اللي كانت بتمتاز بيه العربية دي هو ثباتها النسبي بالنسبة لعربيات تانية كتير ..

مين اللى قال لحضرتك المعلومات دى والكلام ده
يعنى لو حد قالك انها بتاخد مطب وبطير فى الجو وبتهبط تانى حتصدق !!!!
هو فى عربية ويابانى حتى لو متقفلة فى الصين بتاخد مطب وبتقلب !!!!

وبعدين العربية حجمها مش كبير اوى للدرجة ده الكارينز اكبر منها حجما
وثبات العربية اكيد كويس لان ارتقارع سقفها اعتقد انه مش اعلى من التيدا اللى معايا
والتيدا اللى معايا سيدان باخد بيها غرز على 120 وبشهادة عضو كان معايا فى العربية وشاف الدنيا ماشية ازاى
ده غير ان بجرى بيها لغاية 160 فل جدا , بس بعد ال160 بحرص طبعا وبمسك فى الدريكسيون , لان الثبات بيقل نظرا لارتفاع سقف العربية , ولكن استجابة الماتور بعد 160 اكثر من رائع وبيشد لغاية 180 وكان عايز تانى بس انا اللى خوفت
وماتور التيدا زى ماتور الليفينا
وانا كنت حجيب الليفينا قبل التيدا
بس نظرا لان عاوز صالون واسع اخترت التيدا , لان القعدة فى التيدا اوسع
ومتسمعش من حد اى كلام يتقال , والمعلومة جيبها من صحابها وعن تجربة افضل
وربنا يوفقك
تقبل تحياتى

[AmorousPharaoh]

ألف شكر يا أخي الفاضل
و أنا فعلا كنت عايز أجيب المعلومة من أهل الثقة عشان كدة دخلت هنا .. يعني رأي حضرتك أتوكل على الله و أجيب الليفينا ؟؟

[Ahmed.TV]

اعمل صلاة استخارة الاول
وبعد كدا اعقد فى العربية وشوفها كويس
وبعدين انت ممكن تعمل تيست دريف فى المنصورة لو بيعملوا او حتتعب شوية وانزل القاهرة واعمل تيست دريف وجرب العربية كمان بنفسك ,
نزولة حتكلفك 100 جنية , عشان تريح دماغك وتكون مقتنع اكتر لان دول 113 الف جنيه
ولا ايه
واحكلنا عملت ايه وربنا يوفقك للصالح دايما
وطمنا عليك
واذا نزلت القاهرة وعاوز اى مساعدة انا تحت امرك

[harizy]

أما مش ها أزود حاجة عن اللى قالها الأستاذ أحمد ده أستاذنا فى قسم النيسان، بس كل اللى ممكن أقوله لسيادتك أن فيه واحد أسمه فى المنتدى (رائد مصر) ممكن يخش على الموضوع ده بدون أى داعى أو سبب فياريت متصدقش اللى هيقوله لأنه غاوى كورى ومغرم بيه جداً، ومعلوماته عن النيسان مش صحيحة بالمرة، فياريت مرة ثانية تعمل بكلام الأستاذ أحمد وتأخذ المعلومة من مصدرها اللى هما ملاك العربية الفعليين.

وأنا عن نفسى شفت اللفينا واتفرجت عليها هى عربية ــ مشاء الله لا قوة إلا بالله ــ مفرحة جداً، مفرحة بمعنى الكلمة، أوبشن عالى جداً حتى حكاية الاسمارت كى مش موجودة فى التيدا، سينسور لايت، ووسع داخلى فى الصالون، وشنطة ملعب سواء رأسياً أو أفقياً علاوة على الشبكة الموجودة على السقف؛ يعنى من الأخر هى اختيار استراتيجى (حلوة استراتيجى دى) يعنى تمشى كل الأغراض عائلية ماشى، شبابية ماشى، رحلات ماشى، رياضية ماشية، اجتماعية ماشى، ما شاء الله عليها.

بس أنا بعد ما صليت استخارة ربنا هدانى للسوبر صالون، فأنصحك أو أذكرك بنصيحة الأستاذ أحمد مرة أخرى صلى استخارة، ثم توكل على الله وربنا يعمل لك ما فيه الخير.

وكل عام وحضرتك بخير.

[AmorousPharaoh]

قبل أي حاجة أنا بأعتذر جدا عن تأخري في الرد بس فعلا مكنتش عارف أدخل ع النت خالص اليومين اللي فاتوا دول .. مفيش غير خمس دقائق قرأت فيهما رد حضراتكم و النت فصل ساعتها و بعد كدة إنشغلت جدا

بجد ألف شكر على الأهتمام و على النصائح الغالية دي .. و انا فعلا صليت إستخارة و رسيت على الصني ( الظاهر العربية دي فيها حاجة لله ) ..

و حاليا الصني تحت البيت و إن شاء الله بكرة هعلق نمر .. الغريب إني لما رحت أستلمها لقيتها سخنة و عرفت إنها جاية من القاهرة ماشية ع الطريق مش مرفوعة , و طبعا أكيد اللي سايقها مكنش مراعي أي إعتبارات لكونها في فترة التليين .. يللا حصل خير بس السؤال دلوقتي أنا مش عارف العربية مشيت قد إيه لأن عداد الكيلومترات كانوا فاصلينه فبالنسبة لصيانة الألف أروح أعملها إمنى بالظبط , و لو أنا رحت عملتها بعد الألف دون إعتداد لكونها كانت ماشية قبل كدة على الأقل 150 كيلو ده يبقى غلط ع الماتور ؟؟؟

ثاني مرة أكرر إعتذاري و شكري

[dramir1]

يسعدني اني اكون اول واحد يقولك الف مبروك وابقى قولنا تقييمك عنها

[Ahmed.TV]

بس مش شرط ان العربية عشان سخنة تكون جية من القاهرة مثلا ومشيت 150 كيلو , ممكن تكون جية من مخزن قريب من المعرض اللى استلمت منه
او هما كانوا مشغلينها فترة كبيرة عقبال ما تسخن عشان يجربوها ويغسلوها والله اعلم

بس على العموم عادى
ممكن تروح على الاف عادى وتعمل صيانتك مفيش مشاكل

وبعدين العربية بتكون متجربة فى المصنع قبل ما تطلع ومتلينة متقلقش
وبعدين برضوا ازاى افترضنا ان جه بيها من مشوار بعيد وطوالى كويس بردوا بيفيد التلين

[AmorousPharaoh]

الله يبارك فيك أخي dramir1

أخي الفاضل ahmed.tv
بجد ألف شكر على إهتمامك و أخلاقك العالية و بالنسبة لموضوع مشوار مصر فالكلام أكيد مش إستنتاج لإني كنت حاجز العربية من مدة و النهاردة كلموني الصبح و أكدت الحجز و رجعوا كلموني المغرب و قالوا لي العربية في الطريق من مصر و أول ما وصلت رحت المعرض لقيتها سخنة سألتهم فقالوا لي إن هي جاية ماشية عشان دي عربية واحدة و مش مستاهلة تيجي مرفوعة و إن ده عادي جدا و بيحصل كتير

[harizy]

يا باشا ألف مبروك على العربية وإن شاء الله ربنا يعطيك خيرها ويكفيك شرها، وبالنسبة لموضوع السفر ده مفيهوش مشكلة إن شاء الله، وزى ما الأستاذ أحمد قال بيفيد فى التليين جداً جداً جداً.

[Bishoy.Girgis]

الف الف مبروك يا باشا علي العربية و ربنا يديك خيرها علي طول و احنا كلنا هنا تحت امرك في اي سؤال و ان شاء الله اول ما تعمل الالف متنساش تقريرك الجميل

[basemsaeed]

الف مبروك يا فندم على العربية و ربنا يديك خيرها و يكفيك شرها