تغيير تيل الفرامل امامي و خلفي للصني بالسبع اليوم

[Hossam_Zaky]

طبعا انا كنت ابتديت الكلام عن التيل في موضوع تاني عن الفانوس الخلفي و كمان سألت عن التيل فقلت اكتب موضوع جديد مع التركيز علي تيل الفرامل لأهميته من وجهة نظري

انا كنت حاجز عند السبع من يوم الأربعاء اللي فات ميعاد اليوم الأثنين

كنت علي باب التوكيل من الساعة 7.30 صباحا عشان قبل زحمة المدارس

نتكلم الأول عن تغيير تيل الفرامل

تكلفة تيل الفرامل من واقع الفاتورة كالأتي :
تيل أمامي 300 جنيه + 50.76 جنيه مصنعية 350.76
تيل خلفي 340 جنيه + 80.84 جنيه مصنعية + 420.84
= 771.6
و الإجمالي في الأخر بيضاف له 10 % ضريبة مبيعات + 77.16
ــــــــ
دفعت 849 جنيه و الحمد لله 848.76

أهم ملاحظة أني لو كنت غيرت التيل في صيانة من صيانات العشرات يعني زي صيانة الـ 40000 اللي عاملها فبل العيد علي طول مكنتش دفعت مصنعيات لتغيير التيل ( 131.6 جنيه) كانت حتكون من ضمن مصنعيات الصيانة و حدفع تمن قطع الغيار بس و انا كنت عرفت الكلام ده زمان بس نسيته و حبيت أفكر الزملاء به

[Hossam_Zaky]

معلش الكتابة اتلخبطت بعد ما اعتمدت الموضوع و حبيت أوضح
350.76 + 420.84 + 77.16 = 847.76 جنيه الإجمالي

[Ahmed.TV]

الف مبروك يا استاذ حسام على الصيانة و الحمد لله انها تمت على خير

وشاكرين على افادتك الغالية والمهمة دى للاعضاء , اللى بتدل على انك انسان طيب , وجزاك الله خيرا على مساعدتك
وهو ده اللى بنقوله عشان الناس كلها تستفاد ويكون فى نقل للخبرات ,ومن كثرة التجارب وتكررها ممكن بنطلع بمعلومة جديدة وهى معلومة المصنعيات اللى حضرتك ذكرتها

بس مش قولتنا على انطباعك فى التعامل المرة اللى روحتها دى كمان

وتقبل تحياتى

[Hossam_Zaky]

للأسف انطباعي المرة دي عن السبع مش 100/100 بسبب واقعتين تحديدا

انا كنت هناك من الساعة 7.30 الصبح قبل زحمة الطريق و هما فتحوا قبل 9 بشوية و ابتدوا يطلعوا العربيات اللي جوة المركز

و الملاحظة الظريفة هنا اني عديت 6 عربيات انفينتي fx350 و حوالي 7 عربيات أرمادا ( ده يدل علي ان المركز بيتعامل مع مستوي عالي بيطلب خدمة اعلي )

المشكلة اللي ضايقتني ان الموظفين بالمركز و هما بيطلعو العربيات دي و من ضمنها صني و تيدا بيعاملوا العربيات اسوأ معاملة يعني فيه واحد منهم مفيش عربية ما أمريكش بيها و معظم العربيات ( حتي الأرمادا الكبيرة و الأنفينتي ) اللي طلعت لازم تعمل سحابة تراب و يفرمل بها علي اخر لحظة علي الرغم من وجود عربيات نقل كتير بتعدي

و طبعا لما علقت علي كدة واحد قالي ان العربيات جوة كتير و هما عاوزين يفضوا المركز عشان ندخل أحنا و كمان السواقين دول فاهمين هما بيعملو ايه ( تقريبا زي ما الفنيين كانو بيغلسوا علي بعض في يونايتد )

و انا منتظر عربيتي جه للصيانة عربيتين تانيين أرمادا و واحدة أنفينتي QX560 و لما السواق الفاهم و المحترف جه يعدي بها من مدخل الصيانة مكنش عارف يدخل لأنه مش مالك ابعاد العربية الكبيرة و المكان ممكن يعديه بسهولة

المهم الواقعة المؤثرة كانت عند استلام عربيتي
لما العربية خرجت كنت مستني تحت في المدخل و لقيت الفني خارج بعربيتي و مشي بها خارج المركز خالص فقلت بيجرب العربية بعد ربع ساعة قلقت رحت مشيت برة ادور كدة لقيت عربيتي مركونة بعيد ضمن العربيات اللي خرجوها الصبح عمودي في الصف اللي جوة يعني اكيد فيه عربية تانية حتيجي عمودي وراها تقفل عليها لأنهم صفين عمودي ورا بعض و انا عربيت كانت بين اتنين ارمادا و كمان ده بعيد نسبيا عن المركز

المهم سكت مقلتش حاجة قلت لما استلم يجيبوها لي

بعد انتظار نصف ساعة دفعت و اخذت اذن استلام العربية و رحت به لموظف الأمن في الكشك
أخد مني ورقة الأستلام و أداني مفتاحي قلت له فين العربية قالي بص جنب الكشك حتلاقيها ( بدون ما يتحرك اصلا برة الكشك و كان بيتكلم مع صاحبه )
( طبعا انا عارف فين عربيتي و هو ميعرفش )
عملت نفسي ببص كده و قلت له العربية مش موجودة قاللي لأ بص تاني حتلاقيها و طبعا كلامه أستفزني
أديت له المفتاح و قلت عايز عربيتي هنا دلوقت , البيه راح يبص مالقاش العربية قاللي دقيقة , المهم اللي نرفزني أكتر انه اختفي 5 دقايق فأول ما لقيت واحد من المهندسين قلتله انا عربيتي اتسرقت ولا أيه قاللي طبعا لأ و ثواني حتكون هنا
بعد شوية لقيت واحد من المهندسين جايبلي العربية و عادي كأن مفيش حاجة حصلت بعد ربع ساعة أنتظار
قلتله يعني ايه النظام ده و العربية كانت فين أصلا دي بقالها داخلة علي ساعة برة المركز
لما لقاني بتكلم كدة بصراحة أحرجني و أعتذر أن اللي خرج العربية ركنها بعيد بدون سبب فقلتله ماشي طيب إزاي موظف الأمن يديني المفتاح و يقوللي روح دور علي العربية اعتذر تاني ان ده مش حيتكرر و مشيت

أنا عملت كدة مش بتنطط علي حد ولا منظرة دة عشان المتسيب ياخد باله أن الناس ممكن تتكلم و تطالب بحقوقها و معاملة صح

[maged george]

والله برافو عليك ماهو اصلي لما الشغل بيكتر عند حد ذى السبع والطلب بيزيد عليه يبتدوا يهملوا ويتنططوا على خلق الله حتى لو ان الغلطة غلطة بتاع الامن فهو عمل كده عشان مفيش حد بيحاسبوا في وسط الزحمة بس كويس ان حضرتك مسكتش عشان المهمل يتحاسب وده رايي الشخصي وشكرا على معلومة التيل والمصنعيات الف شكر.

[Bishoy.Girgis]

استاذ حسام اولا الف الف مبروك علي تغيير التيل و علي المعلومة الغالية اللي انت قلتهالنا .. متشكرين جدا
طبعا انت عملت موقف صح الصح و كان لازم تعمله لأنك كمان بكده بتساعد العملاء اللي بعدك انه يتم الاهتمام بيهم و ميحصلش كده تاني
و معلش هوا ممكن يكون سهوا خرجوا العربية بعيد عشان فاكررين ان العربية مثلا هتبات لتاني يوم بس انت عملت الصح و الف مبروك مرة تانية و اهم حاجه ان اللي انت كنت عايز تعمله داخل المركز اتعمل علي اكمل وجه

[Ahmed.TV]

فعلا السبع بيتعامل مع عربيات عالية جدا
زى الباترول وزى الانفينتى وزى الارمادا
ودى حاجة مميزة وبتدل على انهم ناس عندهم خبرة عالية
وبخصوص سحابة التراب اللى بيعملوها او الطلعة القوية عشان الجو اللى هما فيه ,وانت عارف انه مكان مفتوح ومكشوف فى الصحرا ,والصحرا حواليهم من كل جه
ويمكن اللى حصل معاك سهو منهم معلش عشان الزحمة والضغط , وشوف كمية العربيات دى كلها
منها اللى بيبات ومنها اللى كشف بسيط ومنا اللى عنده مشاكل عويصة ومنها ومنها
واحنا بشر ومعرضين لاى تقصير او خطا يحصل تحت ضغط فمعلش اذا حصل معاك اى تقصير والمهم ان الخطا تداركوه واعتذرولك
المهم ميكنش فى تقصير فى الصيانة اللى اتعملت
واى حاجة تانية بسيطة وتتعوض
المهم نلاقى مركز عنده ضمير فى الصيانات وتتعمل على اكمل وجه
وعقبال المرة الجاية باذن الله

[egypt0777]

شكرا لنقلك للمعلومه

[Hossam_Zaky]

شكرا للأخوة الأعضاء للأهتمام
و انا صيانتي الجاية بإذن الله اكيد حتكون غي السبع برضه و مش حقف عند المواقف الجانبية لكن وجب التنويه عشان حتي اللي يروح يكون واخد باله و ما يتنازلش عن حق ليه
و شكرا مرة تانية للأهتمام