إعـــــــلان

Collapse

.

,
See more
See less

عملت صيانة الألف والحمد لله علي قد كده

Collapse
X
 
  • Filter
  • الوقت
  • Show
Clear All
new posts

  • عملت صيانة الألف والحمد لله علي قد كده

    السلام عليكم يا جماعة

    النهاردة الحمد لله عملت صيانة الالف في مركز السبع اللي في زهراء المعادي

    اتحركت من مكان شغلي بالتجمع الخامس الساعة 9 وعلي الدائري خدت زلطة محترمة في سنتر القزاز الامامي عملت نقرة وشرخين دائرين في القزاز الحمد لله

    وصلت حوالي 9:40 صباحا وركنت وخدت رقم وقابلت المهندس المختص وقابلني بترحيب
    أخد البايانات وسألني لو في أي شكوى قولتله في شويه حاجات
    كلمتة علي بدال الفرامل اللي بنزل والحدفة وظبط الزوايا وصوت الزن اللي بسمعه الصبح وكان الدركسيون بيرجرج شويه في الملفات.
    سألته برضه علي صوت القزاز اللي بيخبط والفوجات اللي بتشتغل مع النور الكبير بس وكان في فيبره كده مفارقة جنب التابلوه من فوق شمال (هبقي اصورها أوريهالكو) كانت مفارقة زياده.

    كتب كل اللي قلتله عليه في طلب الاصلاح وطلع جرب معايا عشان صوت الزن بس طبعا مطلعش وكنت قايله إني بسمعه الصبح بس لما بسخن وأطلع وامشي شويه بعد كده بتختفي.

    المهم قالي الساعة 11.30 هتستلم العربية

    قبل ما أطلع الاستراحة سألت مسئول قطع الغيار عن سعر القزاز الأمامي عشان لو هغيره في التوكيل وقالي القزاز هيكلف الاتي:-

    1- قزاز أمامي 1661 جنيه
    2- جوان قزاز 372 جنيه
    3-مجموعة لزق 75 جنيه
    4- مصنعيه تركيب 300 جنيه
    طبعا مننساش ضريبة المبيعات 10 % علي كل الي فوق ماعدا المصنعية التركيب يعني المجموع 2619

    طلعت الاستراحة والحقيقة مريحة تليفزيون ونت وخدمة مشروبات مجانا وفيها قزاز يخليك تتابع العربيه ايه اللي بيحصل فيها

    ركب الفني العربية وقعد يجرب الانوار والزراير ويفتح القزاز ويقفله ويهزه وتقريبا ملقاش حاجه فرفع العربيه

    فك حاجه كده زي غطا تقريبا الكارتيره وغير الزيت وقعد يربط حاجات ورا وقدام ونزل العربيه وواحد طلع جربها ورجع تاني خلصت 11:20 وعلي الغسيل فقط وإستلمتها 12:00

    النتائج :

    أول حاجه معجبتنيش العربيه خلصت وطلعت بره بتاع 10 دقائق ومحدش نده وقال أنها خلصت أنا لقيت الناس بتحاسب لقيت فاتورتي دفعتها وخدت ايصال الاستلام وخدت المفاتيح وطلعت فتحت العربية وبصيت بصه سريعه وملقتش طبعا حد يفهمني ايه اللي حصل واللي سألت عليه فناديت علي المهندس أسأله بقى

    بالنسبة لصوت الزجاج الامامي يمين وشمال لما بفتحة علي التلتين أو أقل قالي ان الصوت ده عادي معظم العربيات النيسان كده .

    طب وظبط الزوايا قاللي الزوايا عندك مظبوطه ده كانت فرده عندك 30 والتانيه 33 فبتحدف طبيعي ناحيه الاقل أستغربت جدا الصراحه لاني مشفتوش حط العجل علي جهاز ظبط مش عارف عرف منيين المهم قولتله طب ظبط ضغط الهوا قالي اه

    بالنسبه للفيبره اللي عند التابلوه قالي الميكسيكي كله كده والفوجات مينفعش تتفصل عن النور الوسط

    نيجي بقي للفرامل اللي بتنزل ورجرجره الدريكسيون قالي الريجلاش كان سايب خالص فكان بيخلي البدال يريح ويبقبى في رجرجه في الدريكسيون واحنا ظبطناه وهتلاقي فرامل اليد بقت تقيله بعد الربط

    الحقيقه بقت تقيله جدا

    مش عارف بقي الجزء ده بالذات في الفرامل والرجرجه فنيا الكلام ده كده تمام ولا لأ

    المهم شكرته وقالي لو في حاجه كلمني

    دورت وطلعت إنطباعي عن العربيه حسيت إنها متماسكه أكتر اعتقد ده بسبب تربيط العفشه
    الحدف تقريبا بنسبه 90% أعتقد انه مش موجود ومحتاج حد غيري يجرب عشان الوساوس

    ظهر صوت داخل الكابينه خفيف حاجه بتوررررر ممكن تكون حاجه متربططش كويس وقررت مديش وداني بقي واعلي الكاسيت واعيش

    طبعا المجمل مش عارف احكم كويس علي مركز السبع وده لقلة خبرتي في التعامل مع التوكيلات حسيبلكوا انتوا التقيم ده

    بالنسبه للقزاز بقي يا هشوف التأمين يا إما الدكتور يصلحها بشكل مؤقت علي مجمع شويه نقر من الدائري اللي بمشي عليه كل يوم

    نيجي بقي للمصاريف :

    190 جنيه زيت 10 الااف
    50 جنيه فلتر
    30 غسيل فوم وبودي وشفط تراب داخلي (المهندس قاللي متغسلش الموتور بره لازم فووم)
    طبعا مننساش الضريبه الحبيبه ويبقي كله 297.50 جنيه

  • #2
    الف مبروك صيانة الالف يا احمد باشا وعقبال صيانة المليون

    قلبى معاك بخصوص الزجاج وقدر الله ماشاء فعل , والحمد لله انها جت على قد كدا ,

    انا كنت مسافر على الطريق وكان فيه طوبة كبيرة واقعة من مقطورة وكانت طايرة ناحيتى والحمد لله انى مكنتش بجرى وعرفت افاديها

    الزجاج ده لو ممكن يتغير تبع التامين يبقا جميل

    اما لو مش حينفع ممكن تروح لحد بتاع زجاج يشوف الشرخ ده ولو كان شرخ بسيط ممكن يعالجهولك , ولو كان صعب وحتغير الزجاج حيكون تمنه فى حدود 500 جنيه تقريبا ارخص من التوكيل

    وبخصوص الصيانة

    ظبط الزوايا اعتقد انه مش حط العربية على جهاز ظبط زوايا لما قاس الكاوتش الاول , فخمن التخمين ده , ويمكن فعلا يكون كلامه صح , وان الحدفة دى كانت بسبب كدا , وطالما حسيت بنسبة 90 % انها اتظبطت يبقا تمام , لان ال10% الفاضلة بتاعت 100% دى بتاعت الطريق , بمعنى انك ممكن تلاقى الطريق مش مستوى ولابد ان العربية تميل منك خفيف اوى
    فكدا الحمد لله انها اتظبطت

    الفوجات انها مظبوطة مع النور الوسط , دى حاجة رخمة طبعا , فاظاهر انها ملهاش حل عندهم هما , لانهم ببساطة خايفين يلعبوا ويعدلوا فى العربية , بس ممكن تروح لاى كهربائى شاطر وموثوق فيه وتساله حل ممكن ليها حل بدون لعب فى اى اجة فى الضفيرة ولالا , واسمع منه حيقولك ايه , حتى لو معملتش

    بخصوص الفرامل ممكن يكون فعلا كانت عاوزة تترجلش , وده امر طبيعى ووارد ان العربية وهى لسه جديدة تكون محتاجة شوية تظبيط فى رجلاش الفرامل او صنفرة تيل او طنابير , والحمدلله انها كانت رجلاش بسيط

    وكنت رجعت تانى لما سمعت الصوت اللى ظهر عندك ده بعد الصيانة وقولتلهم عليه

    ممكن وانت راجع من الشغل تعدى عليهم وحيعملوها , او لو كلموك بعد الصيانة فى التليفون قولهم


    وعقبال صيانة المليون ياباشا

    تحياتى ليك
    [CENTER][COLOR=#ff7700][SIGPIC][/SIGPIC][/COLOR][/CENTER]
    [CENTER][FONT=Tahoma][COLOR=#ff7700]محرر فى دعم اتخاذ القرار بوزارة الاعلام[/COLOR][/FONT][/CENTER]
    [CENTER][FONT=Tahoma][COLOR=darkslategray]قليل المشاركة فى [COLOR=blue]الموضوعات [/COLOR]والرسائل [COLOR=blue]الخاصة[/COLOR] لانشغالى بالعمل[/COLOR][/FONT][/CENTER]
    [CENTER][FONT=Tahoma][COLOR=darkgreen][COLOR=darkred]برجاء الاتصال بى[/COLOR] :[/COLOR][COLOR=navy] [U]01288814049[/U][/COLOR][/FONT][/CENTER]

    Comment


    • #3
      مجهود رائع و جبار

      في انتظار المزيد
      [CENTER][frame="7 50"][/CENTER]
      [img3]http://www.nileup.com//uploads/images/domain-db779c04c2.jpg[/img3]
      [CENTER][/frame][/CENTER]

      Comment


      • #4
        المشاركة الأصلية كتبت بواسطة ahmed.tv مشاهدة المشاركة
        الف مبروك صيانة الالف يا احمد باشا وعقبال صيانة المليون

        الله يبارك فيك يا باشا ويسلم مجهودك


        قلبى معاك بخصوص الزجاج وقدر الله ماشاء فعل , والحمد لله انها جت على قد كدا ,

        انا كنت مسافر على الطريق وكان فيه طوبة كبيرة واقعة من مقطورة وكانت طايرة ناحيتى والحمد لله انى مكنتش بجرى وعرفت افاديها

        الزجاج ده لو ممكن يتغير تبع التامين يبقا جميل

        اما لو مش حينفع ممكن تروح لحد بتاع زجاج يشوف الشرخ ده ولو كان شرخ بسيط ممكن يعالجهولك , ولو كان صعب وحتغير الزجاج حيكون تمنه فى حدود 500 جنيه تقريبا ارخص من التوكيل


        الحقيقة أنا مكنتش بجري وجت لحد عندي من الناس اللي حواليا وإن شاء الله أروح أعملها عند اللي بيصلحوا الزجاج لو تنفع لأني نفسي أحافظ علي الزجاج الأصلي أطول وقت لو منفعش هبقي أغيرها في التأمين بس لما أجمع حبه نقر حلوين


        وبخصوص الصيانة

        ظبط الزوايا اعتقد انه مش حط العربية على جهاز ظبط زوايا لما قاس الكاوتش الاول , فخمن التخمين ده , ويمكن فعلا يكون كلامه صح , وان الحدفة دى كانت بسبب كدا , وطالما حسيت بنسبة 90 % انها اتظبطت يبقا تمام , لان ال10% الفاضلة بتاعت 100% دى بتاعت الطريق , بمعنى انك ممكن تلاقى الطريق مش مستوى ولابد ان العربية تميل منك خفيف اوى
        فكدا الحمد لله انها اتظبطت


        هو تقريبا أن شاء الله كده مظبوطه بس حشوف برضه زي ما انت قولتلي لما أرجعلهم في التوكيل

        الفوجات انها مظبوطة مع النور الوسط , دى حاجة رخمة طبعا , فاظاهر انها ملهاش حل عندهم هما , لانهم ببساطة خايفين يلعبوا ويعدلوا فى العربية , بس ممكن تروح لاى كهربائى شاطر وموثوق فيه وتساله حل ممكن ليها حل بدون لعب فى اى اجة فى الضفيرة ولالا , واسمع منه حيقولك ايه , حتى لو معملتش


        أن شاء الله هشوف كهربائي شاطر وأسأله

        بخصوص الفرامل ممكن يكون فعلا كانت عاوزة تترجلش , وده امر طبيعى ووارد ان العربية وهى لسه جديدة تكون محتاجة شوية تظبيط فى رجلاش الفرامل او صنفرة تيل او طنابير , والحمدلله انها كانت رجلاش بسيط


        لما أروح برضه أشوف عشان العملية لسه زي ما هي والفرامل شدت قوي

        وكنت رجعت تانى لما سمعت الصوت اللى ظهر عندك ده بعد الصيانة وقولتلهم عليه

        ممكن وانت راجع من الشغل تعدى عليهم وحيعملوها , او لو كلموك بعد الصيانة فى التليفون قولهم

        ان شاء الله أروح وأقولهم زي ما قولتلي



        وعقبال صيانة المليون ياباشا

        تحياتى ليك
        الله يبارك فيك وشكرا المجهود

        Comment


        • #5
          المشاركة الأصلية كتبت بواسطة sedyrohy مشاهدة المشاركة
          مجهود رائع و جبار

          في انتظار المزيد
          ألف شكر ليك يا باشا ومجهودكم انتوا اللي جبار

          Comment


          • #6
            مبروك الصيانه

            بالنسبه للزجاج نصيح ما تغيروش وروح اعملوا عند الدكتور مش حد تاني لانهم ناس نضيفه جدا

            انا حصل معايا نفس اللي حصل معاك بس الظلطه عملت شرخ 20 سم وروحت حقنته عند الدكتور والحمد لله كانه مش موجود وهو بيديك ضمان مدى الحياه على الشغل اللي هو عمله

            قوللي بقى بالنسبه للرجرجه اللي في الدريكسيون في الملفات دي بتحسها عامله ازاي جامده يعني ولا بتحس كده ان في زى تنقير خفيف كده او تفويته وانت بتلف وهل لراحت لما عملوها ولا لسه موجوده
            [CENTER][SIGPIC][/SIGPIC][/CENTER]

            [CENTER]سبحان الله [CENTER][/CENTER]وبحمده سبحان الله العظيم[/CENTER]

            Comment


            • #7
              مبروك للصيانة و الف سلامة على الزجاج
              ربنا يستر لك طريقك
              [CENTER][COLOR=black][FONT=Tahoma]د.أحمد أخصائى أطفال[/FONT][/COLOR][COLOR=darkred][FONT=Tahoma]IBCLC[/FONT][/COLOR][COLOR=darkred][FONT=Tahoma] [URL="http://www.nilemotors.net/Nile/154717-a.html"]و حياتي بلا أغاني [/URL][/FONT][/COLOR][COLOR=blue][FONT=Tahoma][URL="http://www.nilemotors.net/Nile/154717-a.html"]لها أسمي [/URL]المعاني[/CENTER]
              [CENTER][FONT=Times New Roman][SIZE=5][URL="http://www.nilemotors.net/Nile/193182-82-11-a.html#post3873181018"][COLOR=darkred]تخيل بضغطه زر واحد يمكن أن تأخذ 82 مليون حسنه أو 11 مليون سيئه.....ولك حريه الاختيار[/COLOR][/URL][/SIZE][/FONT][/CENTER]
              [/FONT][/COLOR]

              Comment


              • #8
                عقبال صيانة ال10000000000000 ان شاء الله
                وربنا يعوض حضرتك خير عن الزجاج ده ......... ومتنساش "اللهم أجرني في مصيبتي وأخلفني خيرا منها"
                والحمد لله علي كل حال
                وفعلا السبع مركز محترم جدا .... المشكلة انهم اوقات بيكون عليهم ضغط شغل وبيكروتوا شويه .... هو حاجة كويسه لان ايديهم نضيفة ووحشه انهم عايزين عدد اكبر للعمالة وجهاز ظبط زوايا ...!!!
                والموضوع انهم سابوا العربية بره ... انت كنت دخلت للمهندس اللي استلم منك وكنت قلتله عايز حد يسلمني العربية .... محدش هايقولك لأ طبعا
                وربنا يتملك بكل خير ان شاء الله
                أقعد بالعافية
                [CENTER][COLOR="Blue"][SIZE="5"]أُمـــ الغوالــــــــــــــــي ..... أُسطــــورة لـــــهــــــا تاريـــــخ :F_eyeb1[1]:[/SIZE][/COLOR]
                [CENTER]
                [img3]https://fbcdn-sphotos-g-a.akamaihd.net/hphotos-ak-prn1/524144_516916281678719_387980934_n.jpg[/img3]
                [/CENTER]
                [CENTER][SIZE="5"][COLOR="DarkRed"][marq="4;right;2;scroll"]Eng.Hussein GaMal[/marq][/COLOR][/SIZE]
                [SIZE="5"][COLOR="Blue"][marq="4;left;2;scroll"]Mob. +20111 960-9399[/marq][/COLOR][/SIZE][/CENTER][/CENTER]

                Comment


                • #9
                  المشاركة الأصلية كتبت بواسطة bassamhafez مشاهدة المشاركة
                  مبروك الصيانه

                  بالنسبه للزجاج نصيح ما تغيروش وروح اعملوا عند الدكتور مش حد تاني لانهم ناس نضيفه جدا

                  انا حصل معايا نفس اللي حصل معاك بس الظلطه عملت شرخ 20 سم وروحت حقنته عند الدكتور والحمد لله كانه مش موجود وهو بيديك ضمان مدى الحياه على الشغل اللي هو عمله

                  قوللي بقى بالنسبه للرجرجه اللي في الدريكسيون في الملفات دي بتحسها عامله ازاي جامده يعني ولا بتحس كده ان في زى تنقير خفيف كده او تفويته وانت بتلف وهل لراحت لما عملوها ولا لسه موجوده
                  الله يبارك فيك أ/بسام

                  إن شاء الله هعمله عند الدكتور بس قالي هيختفي بنسبة 50% وهو مش شرخ ده نقر
                  ححاول اروح فرع المرغني أو المهندسين بكره بليل إن شاء الله

                  كان في رجرجة مع اللف وعملوها بس كانت مفاجأه بشعة هحكيلكوا عليها تحت


                  المشاركة الأصلية كتبت بواسطة د.أحمد السعيد مشاهدة المشاركة
                  مبروك للصيانة و الف سلامة على الزجاج
                  ربنا يستر لك طريقك
                  الله يبارك فيك يا دكتور ويسلمك

                  المشاركة الأصلية كتبت بواسطة sonasteel مشاهدة المشاركة
                  عقبال صيانة ال10000000000000 ان شاء الله
                  وربنا يعوض حضرتك خير عن الزجاج ده ......... ومتنساش "اللهم أجرني في مصيبتي وأخلفني خيرا منها"
                  والحمد لله علي كل حال

                  الحمد لله علي كل حال

                  وفعلا السبع مركز محترم جدا .... المشكلة انهم اوقات بيكون عليهم ضغط شغل وبيكروتوا شويه .... هو حاجة كويسه لان ايديهم نضيفة ووحشه انهم عايزين عدد اكبر للعمالة وجهاز ظبط زوايا ...!!!



                  والله مش عارف احكم علي الموضوع ده بس إنطباعي عن المركز سئ جداااا

                  والموضوع انهم سابوا العربية بره ... انت كنت دخلت للمهندس اللي استلم منك وكنت قلتله عايز حد يسلمني العربية .... محدش هايقولك لأ طبعا
                  وربنا يتملك بكل خير ان شاء الله
                  أقعد بالعافية

                  ما انا دخلت ناديته وشرحلي بكروته برضه

                  Comment


                  • #10
                    الف الف مبروك يا باشا علي الصيانة و عقبال صيانة الـ 100000
                    [CENTER][FONT=Tahoma][SIZE=5][COLOR=blue][COLOR=blue][IMG]http://img560.imageshack.us/img560/9168/featurew.jpg[/IMG] PeaceMan[/COLOR] [COLOR=sienna]@[/COLOR] [COLOR=green]Nissan[/COLOR] NileMotors [IMG]http://img560.imageshack.us/img560/9168/featurew.jpg[/IMG][/COLOR][/SIZE][/FONT][/CENTER]

                    [CENTER][URL="http://www.nilemotors.net/Nile/226179-a.html"][IMG]http://img194.imageshack.us/img194/2737/presvj.png[/IMG][/URL][/CENTER]

                    Comment


                    • #11
                      روحت تاني لمركز السبع

                      يوم الاربعاء اتصلت بالمهندس اللي قابلني عشان أقوله علي الصوت اللي ظهر قالي انه مش موجود وبعتني للمهندس أحمد ناجي بس للأسف روحتله متأخر بسبب الحادث اللي كان علي الطريق الدائري المهم مشكورا قابلني وجرب وسمع اللي بشتكي منه وقالي تعالى بكره بدري شويه وهنعمل كل الحاجات دي
                      المهم كلمت أ/أحمد مصطفى مشكورا وقالي روح للمهندس /محمد عمر ده مدير الصيانة هناك وعرفه بنفسك وانك من المنتدي واشرحلة كل حاجه

                      المهم رحت النهارده الساعة 3 وقابلت المهندس محمد عمر راجل ذوق الصراحة طلع معايا بنفسة جرب العربية وسمع الصوت اللي بشتكي منه والفرامل وقالي حيحط العربيةة علي الجهاز ظبط الزوايا وعمل امر شغل وكتب الملاحظات وقالي لوفي حاجه تانيه وكتب كل اللي قولتله عليها ومن ضمنها صوت في الدريكسيون عند اخلر اللفه كتبه انه قطم في الدركسيون مفهمتش وقلت ماعلينا

                      المهم قالي اتفضل في الاستراحة وقعدت العربية اترفعت قدامي وبصه تحت ربطوا شويه حاجات وبعد كده نداني قالي تعالي انزل الورشه وراني وقالي هو ده الي بيعمل الصوت

                      كان عباره عن كارتيره يمين ورا العجلة اليمين مربوطة بجوان بمسمارين بيخبطوا في الصاج متثبت بكلبس في الصاج

                      قاللي الفني هيعملهولك واتفضل انت في الاستراحة طلعت فوق وقعدت اتابع لقيت الفني بيجيب حته كرتونه بيقصها بكتر وبيعمل تخشينة للكلبس طبعا اتغاظت بس ماشي لما نشوف عبقرية المصرين قدام اليابانين طبعا والمكسيك

                      طبعا التخشين الكرتون هتثبت اكتر !!!!!!!!!!!!!!!!!!!

                      المهم العربية نزلت وطلعت بره الورشة وجالي تليفون وطلعت بره الاستراحة اتكلم وانا بتمشي وبكلم لقيت عربيتي في ورشه جنبهم طلعت بتاعت سمكرة ودوكو المهم سألت العربية واقفه هنا ليه قالي بنلحم القطم !!!!!!!!

                      نعم بتلحموا أيه !!!! فين اللحام ده ممكن أشوفه لأ معلش لازم المهندس اللي معاك عشان محدش يكلمنا

                      طبعا اتجننت دورت علي مهندس محمد عمر أختفي جبت تليفونه ورد بعد خامس مره قولتله عايزك ضروري

                      المهم جالي واتنرفزت قلتله يا باشمهندس انا عايز اعرف ايه اللحام اللي اتعمل في العربية والقطم ده فين وازاي تلحموا حاجه من غير ما ترجعولي

                      قالي حاضر بس اهدى هفهمك يا أ/ احمد دي عباره عن قطمه الدريكسيون لما بتلف علي الاخر مع المطبات بتحس برجرجة واحنا بنلحمها لان كان جايلنا اوامر نغيرها بالكامل بس بترجع تاني او ندق عليها بس برضه بترجع تاني فبنلحمها وبتختفي

                      قولتله بس كان لازم تقولي قالي انا مستعد اغيرهالك بالكامل دلوقتي بس هتجيلي وتقولي انها رجعت تاني

                      الصراحة كلمت أ/ أحمد مصطفي مشكورا طمني قاللي لو كنت قريت موضوعات بتاعت قطمت الدركسيون ببتاعت التيدا كنت عرفت متقلقتش ده بنطه لحام عادي قلت طيب الحمد لله

                      قولتله يا باشمهندس دلوقت الفني عملت تخشينه كرتون للكارتيره اكيد دي هتقع مع اول مطب يدوبك هو مسكها بإيده وراحت واقعه نده فني تاني ورفعوا العربية وفكوا العجله وجابوا دبل فيس وحطوه علي الالمسامير اللي بتخبط في الصاج عشان يقلل الصوت وكلبس جديد وثبتوه وبقت ماسكه قلنا الحمد لله

                      قولتله طب معلش يا باشمهندس هي كانت اصلا جايه ازاي يعني كان في عفريت ماسكها قالي معرفش احنا معملناش شغل في الجنب ده استغربت !!

                      بعد كده روحنا لجهاز ظبط الزوايا وظبط طلع -4 في الشمال قلت الحمد لله الواحد مركز انها بتحدف مكنش تهيؤات المهم قاللي للفني اظبط وظبط وصفرت علي الجهاز تمام واصر المهندس محمد يغسلها تاني


                      ومدفعتش حاجه تانيه تماما وشكرته جدا وقالي لو في حاجه كلمني وطمني

                      المهم قلت بسم الله وطلعت الصوت هدي كتير وصوت الرجرجه راحت وكلمت أ/ احمد شكرته وقلتله كله تمام

                      مكملتش طلعت علي الدائري وبجرب بقي الزوايا العربية بتحدف يمين لازم اسوق والدركسيون معوج شمال

                      شويه في طريق في شويه تكسير الصوت رجع تاني ومع صوت تاني بيرن المدام كانت جنبي قالتلي ايه اللي بيلق تحت ده قولتلها مش عارف

                      طبعا حرقه الدم متتوصفش من مركز الصيانه والصنايعيه اللي هما اصلا ميكانيكية الورش اللي بره بس موظفين والواد بليه برضه موجود عندهم بس أكتر شويه

                      انا الصرحه مش عارف اعمل ايه اغير مركز الخدمه ولا اروح اتخانق تاني

                      بس النهارده بقي الحقيقي اقدر اقول ان تقيمي لمركز السبع سئ جدا جدا جدا

                      قولولي انتوا ايه رأيكم

                      Comment


                      • #12
                        انت كده قلقتني ...جرب كده تروح لمودرن موتورز؟ وطمني عليك.
                        *اللهم اصلح احوال مصر واصرف عنها الفتن*

                        Comment


                        • #13
                          معلش للاسف هما لازم تكون عينك عليهم وتبين لهم انك فاهم الدنيا فيها ايه

                          انا كان عندي مشكله في الطنابير وكانت هاتتغير على حسابي لولا كلمت احمد مصطفى ومحمد عمر وزعقت شويه في الاول عشان يعرفوا ان انا ها رخم عليهم لو ما اتغيرتش في الضمان

                          وعلى فكرة ان حاسس بيك قوي لاني عارف يعني ايه الواحد يشتري عربيه زيرو ويلاقي فيها مشاكل

                          معلش جرب تروح مودرن
                          [CENTER][SIGPIC][/SIGPIC][/CENTER]

                          [CENTER]سبحان الله [CENTER][/CENTER]وبحمده سبحان الله العظيم[/CENTER]

                          Comment


                          • #14
                            لا تقلق من موضوع الحدفة ده

                            اطلع على بتوع بردجستون ب 10 ج شيك على الزوايا و ان شاء الله حتلقيها مضبوطة نفس اللى حصل معايا .

                            ولما قست العجل لقيته مش مضبوط فلما اضبط الضغط و نتروجين كمان -- لقيت العربية اللهم صلى على النبى --- فطلع ضبط هوا

                            المهم الرجرجة ده جرب ترصيص العجل

                            عشان انا كان عندى نفس المشكله و طلع من الترصيص -- مكانش معمول صح اصلا

                            Comment


                            • #15
                              المشاركة الأصلية كتبت بواسطة egypt0777 مشاهدة المشاركة
                              لا تقلق من موضوع الحدفة ده

                              اطلع على بتوع بردجستون ب 10 ج شيك على الزوايا و ان شاء الله حتلقيها مضبوطة نفس اللى حصل معايا .

                              ولما قست العجل لقيته مش مضبوط فلما اضبط الضغط و نتروجين كمان -- لقيت العربية اللهم صلى على النبى --- فطلع ضبط هوا

                              المهم الرجرجة ده جرب ترصيص العجل

                              عشان انا كان عندى نفس المشكله و طلع من الترصيص -- مكانش معمول صح اصلا
                              فين بتوع بريدجستون

                              Comment

                              Working...
                              X