ياترى حد يعرف؟

[EhabVet]

كنت مسافر بالتيدا سفر طويل وحاطط 2 سي دي في الكاسيت ومشغل الكاسيت على مدى 5 ساعات متصلة وفجأة لقيته بيقولي اضغط على eject ضغطت عشان أطلع الاسطوانة مرضيتش تطلع وكتبلي mechanism error
ولغاية دلوقتي كل ما أحاول أطلع الاسطوانة يحصل نفس اللي حصل
فهل في حد يعرف يفيدني في الموضوع ده؟؟؟
وجزاكم الله خيرا

[watzmann]

ايه بس اللى خلاك تسمع كلامه و تضغط Eject

يا جماعه مش اى حد يقولنا حاجه نسمع كلامه كدا لازم نفكر الأول علشان ممكن تكون خدعة

[m_love4me]

لا حول ولا قوه الا بالله

معلش حصل خير

ال اسمعه عن الموضوع دا حسب ما قريت ف المنتديات الاجنبيه

انه لازم العربيه تروح التوكيل علشان بيعملوا ريست للسى دى بعد ما بيفكوه
وبيدخلوا السريال نمبر تانى ليه


ف حضرتك حاول بالهدواه كدا اول ما تشغل الكونتاكت و و السى دى يوصله كهربا وهو مطفى مش شغال
تدوس eject تانى

وجرب تشغله وبعدين تستنى لما يكتب mechanism error وتعمل نفس الكلام


جرب وان شاء الله هيطلعوا

[Youssef.Awad]

اجدع حاجة فى الصنى انها بتاخد سى دى واحد وبس
مش اتنين عشان ما يتخانقوش مين يطلع الاول

[samsong]

ايهاب باشا
كل سنه وانت طيب والجميع ورمضان كريم
1-افصل البطاريه لمدة 5 دقائق او اكتر وجرب

[م/محمد]

اجدع حاجة فى الصنى انها بتاخد سى دى واحد وبس :e_braces[1]:
مش اتنين عشان ما يتخانقوش مين يطلع الاول

يعجبني اللي بيبص للنص المليان من الكوبايه

[samsong]

جرب تبقي علي الراديو وتدوس eject
او علي السي دي وتدوس next ,و eject
وكمان جرب تدوس eject مرتين ورا بعض

[EhabVet]

هنجرب ونقولكم بإذن الله

[Youssef.Awad]

يعجبني اللي بيبص للنص المليان من الكوبايه

اى خدمة يا باشمهندس

[EslaM_NagY]

اجدع حاجة فى الصنى انها بتاخد سى دى واحد وبس
مش اتنين عشان ما يتخانقوش مين يطلع الاول

والاجدع والاجدع ايام ما كانت شرايط هههههههه

[MOK3336]

يا عم الحج لما كتبلك Eject كان قصدة انت ايلي تطلع برة العربية عشان الكاسيت اتخنق منك مشغلة لمدة 5 ساعات ليه مسافر مطروح

[EhabVet]

يا عم الحج لما كتبلك eject كان قصدة انت ايلي تطلع برة العربية عشان الكاسيت اتخنق منك مشغلة لمدة 5 ساعات ليه مسافر مطروح

ههههههههههههههه
هو احنا في جواسيس ورانا ولا إيه؟؟؟؟؟

[EhabVet]

أولا عايز أقولكم وحشتوني عشان من أول رمضان وأنا مبقعدش على الكمبيوتر غير نادرا جدا .. وبجد حاسس إن في حاجة ناقصاني عشان مبدخلش عالمنتدى .. بس إن شاء الله متعوضة بعد رمضان وبعد الاعتكاف .. هظبطكم
ثانيا مع إن الكاسيت لسه متصلحش .. بس هقولكم على الغلطة اللي وقعت فيها وكانت السبب في المشكلة عشان محدش منكم يقع فيها .. مع إني بيتهيألي إن معظمكم بيقع فيها .. بس ربنا الل بيستر
الاسطوانة بيبقى على ضهرها ورقة ملزوقة على كامل مساحة الضهر مكتوب عليها المحتوي والشركة وخلافه
مع كتر التشغيل الورقة دي اتفرتكت حتت واتحشرت داخل الكاسيت ومنعت خروج الاسطوانة
عشان كده ياريت لو الاسطوانة ملزوق عليها ورقة تشيل الورقه دي وتكتب عليها بقلم فلوماستر عشان ميحصلش معاك اللي حصل معايا وتتضطر تروح لتوكيل الكاسيت بتاع كلايون أو كيينود إللي أنا مش عارف حتى عناوينهم أو أرقام تليفوناتهم
فياريت لو حد يعرف أرقام تليفوناتهم يكتبه وأنا هظبطه بإذن الله بدعوتين في صلاة التراويح .. وربنا يتقبل منا ومنكم

[DarkMagician]

كلاريون اعتقد عندنا هنا في اسكندرية لو تقدر تيجي هنا اصبر اتاكد الاول :)

[Bishoy.Girgis]

هقول لكم بقي ايه اللي بعمله لما الاسطوانة تعمل الحركة الرخمة ديه بس طبعا لما الاسطوانة بتعمل كده .. بمنعها من دخول الكاسيت مرة تانيه ههههههههههه
اللي بعمله كالآتي :
بعمل eject و في نفس الوقت اقوم مخبط بقبضة ايدي علي الطابلوه من جنب الكاسيت .. بتقوم الاسطوانة تطلع عادي جدا و بعد كده بمنع الاسطوانة ديه من الدخول للكاسيت نهائيا :)))))
و اي خدمة