ندا لكل مالك سيارة بعد زيادة اسعار البنزين (افعال لا اقوال)

[atlas_u]

نداءهام

يا جماعة لو سمحتكم بلاش نفرط في الحد الادني من حقنا:

الرجاء ثم الرجاء الامتناع من اليوم عن:

- اعطاء عامل البنزينة 50 قرش و لا جنية و لا حتي عشره صاغ لانو مش حقو.
- الامتناع عن اعطاء حرامية الارصفة و الشوارع (الشغلانة الذهبية للعصر) اي فلوس لان دول بلطجية .

تعالو نبدأ بنفسنا من المنتدي دا و نقول لاصحابنا و قرايبنا و زي ما عودنا الناس دي ع الغلط ها نعودهم ع الصح و دا نداء.

شوفو ها توفرو كام ف الشهر من عدم دفع خمسين قرش ف البنزينة و لا 2 جنية ف كل ركنة عربية ف خرابة.

ماهو حرام نتسرق من فوق و من تحت.

و انا بدأت النهاردة ف بنزينة شيل- نادي السكة الحديد - مدينة نصر
و مع بلطجية الركن بجانب سيتي ستارز

و حسبي الله و نعم الوكيل

الرجاء الدعم من اخواني وخصوصا اصحاب الصني ف منتداهم(افعال لا اقوال)

اخوكم..... أســـامــة

[mazen86]

انا مبيدلهمش اساسا

لان بحس اني بسرق بس بالذوق

وانا مطلبتش منه الخدمة دي

[limo]

بص عامل البنزينه ممكن تديله عادى على اعتبار ان الربع جنيه او النصف جنيه ممكن مفرقش معاك بس بيفرق معاهم جدا لانه احيانا بيكون فى بعض البزينات مصدر الدخل الوحيد ليهم
-اما حراميه الارصفه بتوع سيتى ستارز دول انا معاك ان المفروض دول الواحد يمتنع عن اعطائهم اى حاجه (انا اساسا ممتنع عن اعطاء اى فلوس بدون وصل لاى سايس )
وعلى فكره الى بيعملوه ده اسمه اتاوه

[theking2690]

يا جماعه الحراميه بتوع سيتى ستارز و الحتت ديه الواحد بيخاف ما يدلهمش حاجه يطلع يلاقيهم عاملينلوا حاجه فى العربيه اقل حاجه يجرحوها بأى حاجه و دى هتبقى حاجه تضايق

[smartman310]

انا معاك تماما وياريت الناس تخف من المشاوير بالعربيه للحد من الغلاء ده او نخلى يوم فى المنتدى محدش يملى بنزين فيه خالص

[aif]

يا جماعة عامل المحطة ذنبه ايه ؟؟؟؟؟
ده بيشتغل غالبا بدون مرتب .... وفي كثير من الاحوال بيدفع ارضية لصاحب المحطة كمان ... ومعظمهم شباب متعلم ...ودي الوظيفة اللي قدر انه يحصل عليها بعد معاناة .....
يعني حضراتكم كدة بتحرموه من الدخل الاساسي بتاعة .... ده نظام بلدنا ... الاكرامية في بعض الوظائف هي القاعدة والدخل الاساسي ... زي البنزينة ... توصيل الطلبات ..صبي الميكانيكي ... الخ
انا مش معاكم في هذا الرأي
وبعدين ايه علاقة ده بزيادة اسعار البنزين ؟؟؟؟
هو العامل ده سبب الزيادة ... يعني سيادتك ح تدفع الزيادة في البنزين حوالي 10 او 15 جنية في كل مرة تفول سيارتك فيها ... وال50 قرش بتاعت الغلبان ده اللي ما زادتش اساسا هي اللي ح نحاربها ....
اللي عاوز يحارب بجد ما يستعملش السيارة ويستغني عن البنزين من اساسه !!!!!!

[Yarisawy]

ايوا عامل البنزين ملوش ذنب خالص

اما الحراميه بتوع سيتى ستارز فعلا الواحد بيخاف مايديلوش اى فلوش يعملك اى حاجة فى العربيه ولأ واللى يغيظك ياخد الفلوس قبلها وهما 2 جنيه مش اقل

شغل عافيه يعنى

دلوقتى فى اى حته فى مصر لما بركن وملاقيش واحد طلعلى من تحت الارض ويقول تعالى يا باشا بتبسط اوى :)

[hero]

والله انا شايف ان الطلبين صعب تنفيذهم..

1-عامل البنزينة فعلا دة اكل عيشة الوحيد....مافيش صاحب بنزينة بيدفع للعمال ..الناس دي عايشة علي البقشيش...
2-حكاية بلطجية الركن....دول فعلا لو ما دفعتش مرة ولا اتنين وعرفوا العربية ساعتها توقع اي شيء يحصل فيها ...وابقي روح بقي اشتكيهم...

[WalidAdel]

هوه عامل البنزينه مش حينفع مديلوش لان زي ما قال العضو ده مرتيه الاساسي
نيجي لبتوع سيتي ستارز الناس الجامده دول انا شخصياً عمري متدهم 2 جنيه هوه جنيه و بعد ما اركن و لو ساعدني في اني اركن كمان بعني واقفلي علشان مخبطش و بتاع اه بدهوملوا و انا مرضي لكن لو ركنه واسعه بنفضلوا بقولوا و انا خارج و اسيبه و امشي عادي كانه مش موجود
اخرها كان من كام يوم قالي 2 جنيه باركينج قولتلوا هما جنيه و زي الفل كده سكت و خد الجنيه لكن 2 جنيه دي كتيره صراحه

[dr_3eshoo]

انا عمري ما اديت واحد بقشيش لاني مؤمن ان مدفعش فلوس الا لما اخد عليها خدمه مش عشان دمياطي بس دماغي كده و علمت الحج و بقى زييي حتى عمال البنزينه ماتكسفش اني اخد الفلوس الفكه كلها منه و امشي

[atlas_u]

مع احترامي لاراء جميع الاعضاء بس انا شايف الاتي:

- الشغل مش عيب بس العيب هوالاعتماد ع الغير
اي و احد مننا مستعد انو يشتغل اي حاجة بس عمر ما واحد مننا ها يقبل بحد يقبل قرش عطف و حنان من واحد قادر .
- احترامي لعامل البنزينة انو مرتبة قليل بس لو مش مقضية يتعب ويتعلم و يضور ع شغلة احسن.
-ماهو التباع غلبان و العامل ال بيخد البصمة ف الترخيص و عليها 10 جنية غلبان و الغلبان بتاع فحص البيئة و الغلبان بتاع الطفاية و الست الغلبانة بتاعة شباك الملف و الغلبان جدا بتاع النمر ال مكان راض يديهاني غير بعشرين جنية انا لما رخصت دافع بتاع 150 جنية رشاوي (اجبارية) والا ها ترخص ف 3 ايام.
- ياجماعة احنا بلدا غلابة بس اشمعني انا يطلع عيني ف الشغل و الحمد لله في عائد مرضي و اطلع اصرف فلوسي ع المرتزقة ف البلد.
- ال عايز فلوش يتعلم و يشتغل و دا رأيي و مش افترة ع خلق الله .
-احكموا انتو احنا ال علمنا الناس ف البلد ما يعملوش شغلهم الا بمقابل فلوس و اتحدي اي حد ما يكونش كل يوم بيقابل الموضوع دا.
- انا كل الل بقولو انا زي ما احنا عودناهم ع الغلط نعودهم ع الصح
انتم كدة بتسعدوهم ع التواكل

و احب اسمع اراءكم تاني

[pointer]

شوفوا يا اخونا واحكموا
انا متعود احط بنزين في محطة وطنيه اللي جنب مسجد السلام
المهم كل ما ازود بنزين يجيب الراجل جنيهات اقوم مطلع له نص مدهوله طبعا لانه بيستهبل وعاوز يجبرني ادي له جنيه ودي حركه بتغظني اوي طب مافيش غير نص , غير اللطعه اللي بيلطعوها للزبون
المهم ادور عل نص مش لاقي اعمل ايه ما ادلهوش طب حرام زي مانتم بتقولوا يلاااااااااااااااااهوي
طيب ادور لاقيت ربع اعمل ايه ربع العمي ولا العمي كله اوم الراجل يعمل ايه
يرجع الربع جنيه ويقول احنا ما بنخدش تبس طب وفرت يا سيدي بس انا نفسي اعرف جاب تبس دي من فين حرام ايه بقي دي بقت فرده

[waleed24ag]

برده انا من مؤيدي ان عامل البنزينه مرتبه معتمد علي النص جنيه دا و برده الجماعه بتوع الركن ممكن تشوف منهم ناس تحب تديهم و لو علي سبيل نيه الصدقه فانا اعتقد ان الواحد ممكن يدي لواحد هو حاسس انه محتاج صدقه

[سمير يونس]

- احترامي لعامل البنزينة انو مرتبة قليل بس لو مش مقضية يتعب ويتعلم و يضور ع شغلة احسن.

مع كامل تقديري و إحترامي لرأي سعادتك

بس أنا شايف إن لو كل الناس إتعلمت و إشتغلت شغلة أحسن _ مش هنلاقي حد يشتغل في البنزينة و يفول لك السيارة و لا حد ينظف الشوارع و بالتالي الحياة هتقف

ومعظم الشباب اللي شغالين في البنزينات مبياخدوش مرتبات و بيعتمدوا على النص جنيه اللي بياخدوه مننا و لو ما اديناهوش النص جنيه ده هيسيبوا البنزينة و ساعتها إحنا الخسرانين

وبعدين أنا لو مفول العربية ب 120 جنيه مثلاً كل اسبوع فمش هيفرق معايا النص جنيه اللي هياخده عامل البنزينة الغلبان

و بالنسبة لسايس موقف السيارات فده أكل عيشه و احنا مفروض نساعده عشان مصلحتنا مش مصلحته لأنه معندوش بديل غير الإنحراف خصوصا إن الكثير منهم كان منحرف أصلاً و عايز يتوب

تقبل تحياتي

[Khalid_Mostafa]

برده انا من مؤيدي ان عامل البنزينه مرتبه معتمد علي النص جنيه دا و برده الجماعه بتوع الركن ممكن تشوف منهم ناس تحب تديهم و لو علي سبيل نيه الصدقه فانا اعتقد ان الواحد ممكن يدي لواحد هو حاسس انه محتاج صدقه

مع إحترامي ليك بس الصدقه تكون بإردتك مش غصب عنك و إلا إلي يسرق منك فلوس و يطلع يجري ممكن بنفس المنطق تقول حسبهمله و حأعتبرها صدقه !! طبعاً كلام مش منطقي

مع كامل تقديري و إحترامي لرأي سعادتك

بس أنا شايف إن لو كل الناس إتعلمت و إشتغلت شغلة أحسن _ مش هنلاقي حد يشتغل في البنزينة و يفول لك السيارة و لا حد ينظف الشوارع و بالتالي الحياة هتقف

ومعظم الشباب اللي شغالين في البنزينات مبياخدوش مرتبات و بيعتمدوا على النص جنيه اللي بياخدوه مننا و لو ما اديناهوش النص جنيه ده هيسيبوا البنزينة و ساعتها إحنا الخسرانين

وبعدين أنا لو مفول العربية ب 120 جنيه مثلاً كل اسبوع فمش هيفرق معايا النص جنيه اللي هياخده عامل البنزينة الغلبان

و بالنسبة لسايس موقف السيارات فده أكل عيشه و احنا مفروض نساعده عشان مصلحتنا مش مصلحته لأنه معندوش بديل غير الإنحراف خصوصا إن الكثير منهم كان منحرف أصلاً و عايز يتوب

تقبل تحيات

وانا شايف ان مش ده السيناريو الوحيد الي ممكن يحصل لو الناس امتنعت عن اعطاء البقشيش في محطات البنزين ..واحنا مش خسرانين ولا حاجه لو سابوا محطات البنزين لأن محطة البنزين دي مش عشان خدمة سيدتك و لكن عشان تحقيق ارباح لصاحبها و لو كل العماله مشيت و سابت المحطه المحطه حتقف وانت مش حتخسر حاجه وحتروح تمون من محطه اخري..ساعتها اصحاب المحطات حيبتدوا يوفروا مرتب للناس دي ...يحني احنا كده بنساعد الشباب الي حضرتك بتقول عليهم دول

اما السايس فأختلف معاك بشده ..مش معني ان الأمن مقصر في القبض علي البلطجيه دول يبقي انا اعتبر ان ده اكل عيشهم ..وحكاية الإنحراف دي مش سبب ..وفيه مليون شغلانه بتدر عائد وبدون ما تحتاج اي مستوي تعليم ..حد يعرف متوسط دخل الحلاق العادي كام ؟؟؟

انا مع صاحب الموضوع في إتجاهه و بالفعل انا مبديش فلوس للعنال في محطة البنزين بس بدي العامل الي بيمسحلي الزجاج مثلاً ..لأنه عمل خدمه قصاد الفلوس