ضروري استشارة في النيسان صني

[hosha94]

بسم الله الرحمن الرحيم
اللهم صل على محمد وعلى آله وصحبه أجمعين

كل سنة وانتم طيبين و يعود علينا رمضان بالبركة ان شاء الله
و مبروك الاستايل الرمضاني الجديد !!!


انا مش هطول بس سؤالي هو :

انا كنت بفكر في النيسان صني عشان عربية واسعة و تمنها معقول و تعتبر ياباني و منتشره و ليها تقلها في السوق و ماركة

بس انا لما قريت في النت خوفوني من موضوع فلتر البنزين و قالولي لازم تغير طرمبة البنزين عشان تغير الفلتر ده حقيقي ؟؟؟
ولا التوكيل بيقول كدة عشان يبيع
و هل لها حل يعني ممكن الاقيه برة مثلا و اركبه انا ؟؟؟
ياريت توضحولي الموضوع ده بالتفصيل عشان كمان الطرمبة مش رخيصة تقريبا ب 1800 جنيه

و اخر حاجة بس تقلولي ايه رأيكم بالعربية بشكل عام و ايه عيوبها غير الموضوع ده
وشكرا جزلا

[FBIAhmed]

بص يا باشا الاتنين مفصولين عن بعض بس فكها مؤرف شويه و دي صورة الفلتر و مكانه في التنك بتاع البنزين و بيتفك عادي بس لازم تفكه من التنك الاول

[SonaSteel]

في الاول اهلا ومرحبا بي في اي وقت
و هتلاقي في فهرس نيسان مواضيع لتقيمات الاعضاء عن الصني لاااا حصر لها
وهتلاقي فيها الخير كله ولو لا قدر الله فيها مشكلة اتحلت ازاي
----------------------------------------
بالنسبة للفلتر انا عارف انه كان ممكن يتغير لوحده في الموديلات القديمة ... لكن من اول 2011 تقريبا لازم تغير الطرمبة كلها
وديه مش بتغغير قبل 150000 ولا حاجة ... يعني متفكرش فيها دلوقتي خااااالص ... وادام بتمون من بنزينة محترمة و اقل بنزين 92 ... يبقي متقلقش ان شاء الله
ولو لا قدر الله قدرا ... باظت خلال 3 سنين ولا خلال 100000 بتتغير في الضمان
--------------------------------------
رأي في العربية ... انها الوحيده اللي جامعه مميزات كتير مش موجوده في فئتها فئات اعلي منها
وبتاخد حقك فيها تالت ومتلت وفوقيه بوووسه :))
اقعد بالعافية :))

[szaalouk]

العربيه لا غبار عليها و هي الأفضل في هذه الفئه
Best Value For Money
توكل علي الله و بأذن الله مش حاتندم انك جبتها ابدا .

[mff_629]

100 100

[mohamedbook]

العربية تمام بس الكنبة بتاعتها ديقة مش وسعة زي منتا متخيل
الدركسيون تقيل حبتين
العفشة نشفة شوية وبتدب عشان هي عفشة رياضية
المهم قلب في المنتدي وانت هتعرف عيوب ومميزات السيارة
بس هي احسن سيارة في الفئة السعرية بتاعتها مع كل الامكانات الي فيها كمان التوكيل محترم وبيحولوا يرضوا العميل

[hosha94]

طيب معلش الاخ fbiahmed الفلتر ده بيتباع ولا انضفة ولا ايه حلة بالظبط

[FBIAhmed]

بيتباع زي بتاع التويوتا كورولا هو اكيد غالي يبس مش اغلى من الطرمبه و هسئل و اقلك بس اديني يومين كده

[hosha94]

اوك انا منتظرك و اي حد عند ملاحظات لقولها و الف شكر

[aboamr]

فى حضرة منتدى نيسان صعب تلاقى نيساناوى زعلان من العربيه لو بدور على عربيه محترمه سحب وعفشه وصاج ووحش على الطريق وتوكيل فوق الممتاز اكيد نيسان لو بدور على عربيه تتصور جنبها ويهمك الشكل والاستايل وبتسمع لحوارت التقفيل المصرى واستهلاك البنزين يبقى ابعد عن النيسان وخليك فى الكورى

[hosha94]

يا باشا ابو عمر انا مش بدور على عربية اتصور جنبها انا بدور على عربية تريحني في الصيانة و التكاليف بتاعتها و تكون مليا عنيا ...

انا كل قصدي ان الحوار بتاع الفلتر ده بيقولوا انه مش بيتغير غير لما أغير الطرمبة كلها كدة انا هغير الطرمبة كل كام شهر ولا سنة وده عيب كبير بس ولو ليها حل انا اصلا بفكر اشتيرها انها بجد عربية ممتازة جدا بالنسبة لسعرها والف شكر

[Youssef.Awad]

كلام حضرتك غير واقعى لأنك لو طبقت نفس القاعدة على كل العربيات اللى بتتباع فى مصر مستورد ومحلى ولا يابانى وكورى وغيرها هتلاقى فى كل حاجة عيب على الشاكلة دى
السيراتو بتتسرق
الالانترا باور كهرباء بيفصل
الفولكس الفتيس بيتغير بربع تمن العربية
وخد من ده كتير
حضرتك بتتكلم على عيب ماحدش فى المنتدى قابله ولا هايقابله باذن الله
وحتى لو قابله زى الاخ ايهاب مع التيدا سيدان المستعملة اللى اشتراها
العيب اتصلح من غير تغيير
وبعدين عن تجربة واقتناع قبل كل شىء وثقة لا حدود لها
بعد اللى شوفته جوة مراكز خدمة نيسان
مفيش ماركة فيكى يا مصر بتغير كل اجزاء العربية فى الضمان لمجرد وجود عيب لا يذكر ومن غير ولا مليم
وعندك من الامثلة كتير اووووووووووى من فتيس لدبرياج لكلاكس لضفيرة كهرباء وغيرها كمان
عكس اسامى رنانة كتير وتلاقى معاملة زى الزفت مع ناس دافعة قد تمن الصنى 3 مرات ع الاقل !!!!!!!!!!!

[hosha94]

الف شكر ليك بجد يا باشا يعني انا مخفش خالص من الموضوع ده انا والله مش بشكك في جودة العربية انا بس خايف اتلط فيها بعد كدة زي العربيات اللي انت قلت عليها في قطع الغيار و ده من حقي اني ادور على عربية ترحني بعد كدة خصوصا اني مش هجيب غيرا غير في اخر الزمن لو ربنا كرم ان شاء الله و لو في اي ملاحظات ياريت تفيدونا و الف الف شكر لكم ...
و ياريت تفيدونا هو بيتغير كل أد ايه عشان في ناس قالت 3 سنين او 100,000 الف كيلو ؟ وشكرا

[FBIAhmed]

باشا متقلقش ده موضوع في كل اسعار قطع الغيار الاصلي جوه التوكيل و الاسعار تقريبا هي هي

و الي عامل الموضوع المعلم بتاع المنتدى استاذ احمد TV

http://www.nilemotors.net/Nile/157121-2010.html

[Youssef.Awad]

الف شكر ليك بجد يا باشا يعني انا مخفش خالص من الموضوع ده انا والله مش بشكك في جودة العربية انا بس خايف اتلط فيها بعد كدة زي العربيات اللي انت قلت عليها في قطع الغيار و ده من حقي اني ادور على عربية ترحني بعد كدة خصوصا اني مش هجيب غيرا غير في اخر الزمن لو ربنا كرم ان شاء الله و لو في اي ملاحظات ياريت تفيدونا و الف الف شكر لكم ...
و ياريت تفيدونا هو بيتغير كل أد ايه عشان في ناس قالت 3 سنين او 100,000 الف كيلو ؟ وشكرا

ده واجبنا يا فندم ما تقولش كده
واحنا الحمد لله مش بنقبض من نيسان مصر عشان نعملها دعاية
بالعكس احنا اول المتضررين لو العربية فيها عيوب زى دى لأن حضرتك ماعندكش نيسان
بس زى ما قولتلك وطمنتك اللى صنعوا وباعو العربية بيضمنوها لابعد مدى فما تقلقش خالص وتظهر وقت ما تظهر وكل مشكلة ليها حل باذن الله فى وقتها
بلاش تستعجل على رزقك وركز فى تمن الصيانات الدورية والاستعمال الجيد للعربية اللى بيطول عمرها الافتراضى