يعنى ايه ان المساعد بيشتغل فى اتجاه واحد

[ايهاب عبد العزيز]

السلام عليكم، كنت فى التوكيل امبارح كنت بعمل ظبط للزوايا، وانا واقف مع المهندس كنت بشتكيله ان المساعد اللى ورا ناحية اليمين عندى فى العربيه بيدب فى المطبات شويه فقالى ده طبيعى فى العربيه النيسان ال ex-saloon علشان المساعدين بتشتغل فى اتجاه واحد، انما النيسان السوبر صالون فعفشتها رياضيه ومش موجود فيها الدبه فى المساعدين دى. طبعا انا قلت له فعلا فعلا وامنت على كلامه علشان يعنى الجهل ما يبانش.
يعنى ايه بقى ان المساعد بيشتغل فى اتجاه واحد؟؟
وهل ينفع ان الواحد يغير المساعدين بتوع الاتجاه الواحد دول لمساعدين تشتغل فى اكثر من اتجاه.
وشكــــــــرا

[memo_hefnawy]

ياعم مع إحترامى لكلام الراجل إللى بيدعى إنه مهندس ده فتى و إسأل سبعاوى :)

[hanyfarrag]

http://www.nilemotors.net/Forum/viewtopic.php?t=1306

فى هذا الرابط سوف تجد ما كتب سبعاوى عن المساعدين وطريقة عملهم

[sab3aawy]

اعتقد ان المهندس ده سمعها من واحد تانى بس هو مفهمش التانى ده كان بيقول إيه

آظن انه ممكن يكون قصده ان المساعدين دى زيت بس فى حين ان المساعدين بتاعة السوبر صالون غاز وزيت

المساعد الزيت بس بعمل عمليه إخماد لخبطة المطب فقط

لكن المساعد اىى لبكون غاز وزيت بيعمل اخماد + ارتداد مرن(سوستة) حيث ان الغاز يقوم بدور السوستة بسبب قابليته للإنضغاط

لكن حكاية اتجاه واحد واتجاهين ويوتيرن دى اعتقد انها فتية

[شريف]

هو فية مساعدين غاز و زيت لاى عربية ولا لعربيات معينة بس

[sab3aawy]

شركات المساعدين بتنتج لمعم موديلات العربيات المعروفة، وتقريبا كل الماركات لها مساعدين زيت فقط ولها ايضا مساعدين غاز وزيت ولها كذا مساعيدن رياضية (أللى هى بتبقى ناشفة شوية زى المونرو) ، وانت تختار لسيارتك ما يلائم رغبتك

سبعاوى

[aymanh5]

سؤال شخصى

سؤال شخصى يا أخ سبعاوى
انت عامل اللوجو بتاعك صورة علم السعودية وعليه إكس وده يضايقنى أنا وكل مسلم
ممكن أعرف السبب

[amrsabet]

ا/ ايهاب كلام المهندس اللى قالوا صح لان فى حاجة اسمها مساعدين double acting اللى موجودة فى النيسان السوبر صالون يعنى المساعد لما بتاخذ مطب بيخلى الجنط ينزل ويطلع بأستخدامه
اما المساعدين اللى فى النيسان ex فهى مساعدين بيسموها one way action عشان كده بتحس ان العربية بتهبد فى المطبات علما بانه تم تغييرالمساعدين الاماميين فى موديل ex ابتداء من شهر 6/2008 والكلام ده مش فتى وانما من مهندسى مصنع نيسان اللى ان سمعته منهم بنفسى وليس على لسان حد تانى وانا متأكد من الكلام ده 100% لانى روحت المصنع وشوفت العربية بتتقفل نت الالف الى الياء وقمت بعمل تيست درايف ل5 عربيات بشكل عشوائى من وسط 50 عربية لان عربيتى كان فيها مشاكل وراحت المصنع واخدت عربية نيسان لمدة 3 ايام لحد العربية لما اتعملت والحاجات دى للعلم هى (تزييق فى الكراسى الامامية بالرغم من تغييرها 3 مرات - بوش فى ظهر الكراسى الامامية -تزييق فى القايم اليمين لانه كان اللحام بتاعة بيكون فى صورة 8 بنط لحام 4 فى يمينة و4 فى شماله كانت عندى اتنين منهم اقل جودة منهم عشان كدة كان القايم بيزيق مع كل دوسة فرامل - مراجعة على الضفيرة اللى تم تغييرها بعد استخدام العربية ب3 ايام وعلى فكرة الضفيرة اللى بتتغير بتكون من قطع الغيار عشان كدة بتكون الضفيرة اليابانى - صوت فى سوستة الفرامل- صوت فى تيل الفرامل الامامى شمال عند الضغط وشيل الرجل فجاة من على دواسة الفرامل - فيبر القايم الشمال الاسود من بره كان عايز يتغيير )

تخيل ان كل الحاجات دى كانت فى عربية واحدة لدرجة انى قعدت شهر ونصف اروح كل يوم السبع فى المعادى ومودرن الهايكستب عشان احل المشاكل دى لحد فى الاخر ما العربية راحت المصنع
لدرجة انى بقيت معروف فى المصنع من مهندسى والفنين فى قسم الجودة وقسم خدمة مابعدالبيع

[أبو عمار]

لان عربيتى كان فيها مشاكل وراحت المصنع واخدت عربية نيسان لمدة 3 ايام لحد العربية لما اتعملت والحاجات دى للعلم هى (تزييق فى الكراسى الامامية بالرغم من تغييرها 3 مرات - بوش فى ظهر الكراسى الامامية -تزييق فى القايم اليمين لانه كان اللحام بتاعة بيكون فى صورة 8 بنط لحام 4 فى يمينة و4 فى شماله كانت عندى اتنين منهم اقل جودة منهم عشان كدة كان القايم بيزيق مع كل دوسة فرامل - مراجعة على الضفيرة اللى تم تغييرها بعد استخدام العربية ب3 ايام وعلى فكرة الضفيرة اللى بتتغير بتكون من قطع الغيار عشان كدة بتكون الضفيرة اليابانى - صوت فى سوستة الفرامل- صوت فى تيل الفرامل الامامى شمال عند الضغط وشيل الرجل فجاة من على دواسة الفرامل - فيبر القايم الشمال الاسود من بره كان عايز يتغيير )

تخيل ان كل الحاجات دى كانت فى عربية واحدة لدرجة انى قعدت شهر ونصف اروح كل يوم السبع فى المعادى ومودرن الهايكستب عشان احل المشاكل دى لحد فى الاخر ما العربية راحت المصنع

الله يكون فى عونك بس هى حاجة غريبة