تقرير بالتفصيل عن امكانيات نيسان صنى الشكل الجديد وتقرير عن تجربة السيارة والاسعار

[Ahmed.TV]

انا مش حتكلم بطريقة اكاديمة عن العربية .. وحكتب بلغة مبسطة عشان اقدر اتكلم عن كل نقطة بالتفصيل الممل
وكل نقطة حنقوم بسردها بمنتهى الحيادية التامة

نبتدى بالرشور

موتور السيارة

* موتور hr15-de من المواتير الاحدث تكنولوجى من الموتور الصنى القديم n16
مميزاته انه موتور 1500 سى سى موتور 2 كاما 16 صباب موفر لاستهلاك البنزين .. تسارع واداء قوى .. 108 حصان والصافى 99 حصان و عزم العربية 134نيوتن

واهم شى مش الهورس باور كام رقمه .. المهم اداء الجير بوكس ميكنش ضعيف عشان ميهدرش كتير من قوة وعزم الموتور .. وهى دى اللى بتهم بيهم دايما نيسان فى صناعة المواتير وفتيس السيارات وبتحاول تحقق معادلة التوافق بين الجيربوكس والموتور
وبدليل نزول سياراتها القاشقاى والجوك بفتيس سى فى تى .. عشان العربية متكنش بطئية فى السحب

* الماتور فيه بوجيهات بلاتنيوم بتتغير كل 100 الف كيلو زى التيدا والبلوبيرد والليفينا والقاشقاى والجوك وطبعا ده بيعطى اداء قوى وتسارع قوى واستهلاك بنزين افضل

* لاحظت وجود عزل فى حوض العربية فى الجزء اللى خلفه الكابينه .. وبالتالى اكيد بيقلل من صوت الموتور ومش بيكون مسموع داخل الكابينة مثل الموديلات القديمة
وايضا كل مواتير الhr بتتميز بهدوء بصوت موتور هادئ

* حوض الموتور مش واسع ولا ضيق .. يمكن من اول وهلة عند مشاهدته من الداخل تحس انه حجمه ضيق .. ولكن لما تمد ايدك بداخل الموتور تلاقى الدنيا سهلة ومش ضيقة

* الدهان الداخلى للموتور وللسيارة ككل جيد جدا

* الكابوت تقيل وفى تدعيمات كثيرة

* الحاجة اللى لفتت نظرى جدا .. وكانت مهمة بالنسبالى وعملية جدا ومهمة وهى
صدر العربية .. مترحل للخلف على عكس الموديلات القديمة انه كان خلف الاصدام الامامى على طول .. وترحيله ده بيفيده طبعا انه يكون بعيد عن اى صدمة حتى ولو بسيطة

* كما يوجد قنطرة حديد كبيرة وعريضة يمكن اعرض من القنطرة اللى راكبة فى التيدا كمان وموجود بعرض الاكصدام الامامى بتحمى الردياتير والسربنتية

* الباور اصبح كهرباء مش زيت .. ومفيش فيه اى مشاكل ميكانيكية ابدا .. لان عمرنا ما سمعنا حد اشتكى من التيدا او البلوبيرد او الليفينا والقاشقاى والجوك اللى فيهم باور كهرباء .. ويمكن التيدا اقدم عربية فيهم نزلت مصر من نيسان من العربيات اللى فيها باور كهرباء .. وسمعت ان فى ناس عملت 300 الف كيلو بالتيدا وعمرها ما اشتكت من الباور الكهرباء فى اى مشكلة ميكانيكية

* وزن الموتور اخف من وزن موتور الصنى الشكل القديم
لان الموتور الصنى الجديد الومنيوم والموتور القديم حديد بلوك زهر وطبعا القديم كان اتقل .. وده كان بياثر على حرارة الموتور وعلى استهلاك البنزين وعلى حاجات كتير

* حتى الانجكشن مختلف .. لان اصبح بيتظبط كمبيوتر زى التيدا .. مش مانيول زى الصنى القديمة

عوامل الامان

* اهم شئ بتركز عليه نيسان فى عربياتها عوامل الامان .. وده بيسعد العملاء لان بيلاقوا كل عوامل الامان متوفرة فى سيارات نيسان وبسعر منافس للغاية
وكل عوامل الامان اللى حقوم بسردها استندر واساسية فى العربية الجديدة

* العربية فيها ايمبوليزر .. مانع للسرقة .. ومفتاح العربية بقا مشفر
اتنين اير باجز .. واحد للراكب الامامى والتانى للسائق
فيها abs , ebd , ba

الشكل الخارجى

* شكل العربية اختلف تماما عن الشكل القديم .. وبصراحة شكلها افضل على الطبيعة من الصور وانسيابية وعصرى وحديث وراقى .. ويوحى بالهدوء

* التصميم تم فى مصلحة العميل .. بمعنى ادق .. الميزة الكبرى فى التصميم انه مش معقد ومفهوش تعقيد مثل السيارات المنافسة من ناحية الصاج والتعرجات والانحناءات الكبيرة اللى بتكون فى الصاج فى العربيات الاخرى .. وفى النهاية بنجد نحن ملاك السيارات صعوبة فى التعامل والتصليح .. لكن نيسان راعة النقطة دى بامانة

* وايضا راعوا فى التصميم انه يقلل من مقاومة الهواء .. الاكصدامات الامامية فيها بومبيهات جانبية عشان ميكونش فى مقاومة للهواء والهواء يتحرك بسهولة .. وميكنش فى مقاومة

* فى خطين على السقف محفورين .. عشان الهواء يعدى من خلالهم ويعمل ثبات للعربية زى فكرة الاسبويلر وكمان يعدى بانسيابية وكمان الخطين دول بيساعدوا على عدوم وجود صوت لب فى صاج السقف

كل ذلك بالتالى له اثر كبير فى تقليل استهلاك البنزين

وكمان الجزء الخلفى فى االسقف نازل للخلف بميل قريب من السيارات الهاتش باك وطبعا ده بيعطى ثبات للعربية

والفوانيس مصنوعة ايضا بطريقة هندسية ليمر عليها الهواء بدون اى مقاومة

* فيها فوجات اساسية فى كل الفئات

* العربية طاسات مش جنوط

* مقاس الكاوتس فى كل الفئات 185/15/65

* نواكل خارجية على الابواب

* فوانيس الامامية كبيرة .. والفانوس اليمين اللمبة اللى فيه كاشفة الجانب اليمين .. لما سالت السبب عشان توضح الرؤية فى الجانب الايمن اكثر .. عشان المارة

نظام التعليق

العفشة فى الامام ماكفيرسون وفى الخلف تروشم بيم والعفشة دى بتعطى ثبات قوى
وايضا العفشة اخف وزنا من التيدا ومشوار المساعد اطول من مساعدين التيدا
فيها عمود اتزان امامى وخلفى .. وده وظيفته بيعطى ثبات للعربية وبالاخص فى المنحنيات

صاج السيارة والابواب والدهان

* على قد ما وزن العربية خفيف ولكن صاج العربية تقيل وده اللى بيميز نيسان فى النقطة دى وكمان الابواب الجانبية فيها دعامات جانبية

* الدهان جيد جدا فى العربية

التقفيل

* افضل بمراحل من السيارة الصنى الموديل القديم

* الابواب عند غلقها ماتحسها انك بتهبد الباب عشان يتقفل .. وبيتقفل معاك بكل راحة وسهولة ويسر

* تقفيل الشنطة ممتاز والماتور والعربية من الداخل

الصالون

* واسع جدا .. العربية اجمل حاجة فيها بمعنى الكلمة وسع الكابينة .. سواء من الامام او فى الخلف

* الكراسى افضل من الكراسى الموديلات القديمة والكنبة الخلفية اوسع
و3 افراد يقعدوا مرتاحين .. واللى يجلس فى خلف السائق مهما لو السائق او الراكب الامامى رجع الكرسى للخلف حيكون قاعد مرتاح جدا

* يوجد مروحة خلفية بتسحب هواء من التكيف الامامى .. يعنى بتقعد ورا وبيجيلك هواء ساقع .. اختراع طبعا عشان تنزل فى العربية وبالسعر المنافس ده

* ارضية الصالون مستوية ومفيش فيها اى تعرجات

*يوجد مخادع راس على الكنبة متحركة مش ثابتة على عكس الموديل القديم

*يوجد كنسول خلفى فى الكنبة

سعر السيارة

* سعر السيارة المانيول 94.900
* سعر السيارة الاتوماتيك 99.900

سعر تنافسى .. ومغرى .. لان شركة نيسان بتراعى العملاء .. وبتحط مواصفات عملية وهامة وعوامل امان تساوي ربع تمنها وباسعار فى متناول الاسرة المصرية

اترككم مع صور للعربية بالشرح

[Ahmed.TV]

الشبكة الامامية كبيرة
فيها فتحات تهوية كثيرة من الامام ومن الاسفل كما موضوح بالصور



الفوانيس الامامية عن قرب
ايضا يوجد فيها بعض الانحناءات لكى يمر الهواء بدون مقاومة بانسيابية



الخطين اللى فى السقف كما وضحنا فى بداية الموضوع


شكل المفتاح والريموت اتغير
وكمان المفتاح اصبح مشفر لان العربية فيها ايموبليزر .. مانع سرقة



شكل القنطرة اللى خلف الاكصدام اللى بتحمى الردياتير والسربنتينة
شكل القنطرة اللى عليها لوجو نايل موتورز



فوجات اساسية فى كل الفئات



الابواب واماكن التخزين


الفرش اتحسن عن الفرش القديم واصبح تنجيده افضل
الكراسى القديمة اعطيها 4.5/10 والجديدة اعطيها 6.5/10




شكل التكيف الامامى .. زراير مانيول
والكاسيت اصبح دبل دن



مروحة التكيف الخلفى اللى فعلا اختراع ومفيش سيارة فى فئة ال100 الف فيها كدا





مهما رجعت الكراسى الامامية تقدر تقعد فىا لخلف مرتاح جدا
وطولى حوالى 176



مكان تخزين فى خلف فرش الكرسى الامامى اللى بجانب السائق
ولا يوجد مثله فى كرسى السائق فى الخلف !


مخدع متحرك فى الكنبة الخلفية .. والصنى القديمة مكنش فيها .. واللى كان فيها كان ثابت ومش ظاهر



يوجد لمبة فى منتصف السقف للصالون ويوجد لمبة اخرى للقراءة فى الامام



الكاوتش مكسيم صينى
كنت اتمنى انه يكون بريدج ستون
ولكن الكاوتش عليه ضمان



الشنطة بامانة كبيرة جدا وعميقة وعالية .. تشيل فعلا كتير .. وافضل من شنطة الصنى القديمة

[Ahmed.TV]

بعض الصور للعربية بفرش بيج

الابواب واماكن التخزين







الطابلوه



الطابوه الخلفى بقا اكبر واعرض من الطابلوه الصنى القديمة



الدريكسيون وزراير المرايا الكهرباء .. والمرايات مش ضم



شكل الفتيس الاتوماتيك



العدادات



لون الانوار على الكاسيت وزراير التكييف



مخدع فى الكنبة الخلفية فى كل الفئات



شكل الموتور

[Ahmed.TV]

تجربة القيادة

21 مايو وجهت لنا دعوة كريمة من نيسان موتور ايجيبت لنايل موتورز لرئيس مجلس الادارة الاستاذ كريم منير ولمنسق قسم نيسان فى مصنع نيسان ب6 اكتوبر لاختبار نيسان صنى الجديدة ورؤيتها عن قرب وجها لوجه وكان فى استقبالنا الاستاذ محمد حفنى والاستاذ سعد محمد والاستاذ اسلام خضير من التخطيط والانتاج







صور للسيارة فى الشو روم فى مصنع نيسان









صدر السيارة مترحل للخلف شوية زى ما وضحنا من قبل فى بداية الموضوع





العربية من اسفل .. مفيش اى حاجة بارزة


العفشة الخلفية



راحة فى الجلوس الخلفى



عزل فى صدر الموتور فى الجزء الاصق للكابينة الداخلية .. مكنش موجود فى الصنى القديمة



الكابوت




انطباعى عن السيارة



فى ملخص سريع العربية صفقة اكثر من رابحة لكل مقتنيها
العربية كما سردت فى بداية الموضوع عن كل امكانياتها تحقق كل المطلوب منها

احساسى عند قيادة العربية ان العفشة فعلا اختلفت وبقت نعمة جدا فى المطبات
وطلعت بيها على رصيف وهبدت العربية محستش باى دب فيها وكانت نعمة جدا .. وكمان لما كريم ساق العربية وكنت قاعد ورا
بردوا حسيت بنعومية العربية فى المطبات

الجلوس فى مقعد السائق مريح جدا فى القعدة وفي فرد الارجل

استجابة العربية على السرعات المنخفضة كانت ممتازة من غير التكيف .. ولما شغلت التكييف محستش انها تقيلة ..

اداء التكييف .. ملحقتش احكم عليه لان المسافة كانت قصيرة بصراحة

والدريكسيون خفيف جدا ويمكن اخف من التيدا كمان

معدتش سرعة 50 عشان اقدر احكم على ثبات العربية .. بس سمعت من بعض الناس اللى جربوا العربية ان ثباتها جيد

صوت الماتور مش مسموع

قفل الابواب سلس مش زى القديمة .. وفتح الابواب الخلفية اوسع شوية من القديمة


وقريب جدا باذن الله حيكون فى تيست دريف للعربية خلال الفترة القادمة عشان نحكم عليها اكتر وكل العملاء يجربوها

واسف على تاخير التقرير .. وان التقرير يحوز على اعجباكم
وممنتظرين تجاربكم ايضا وارائكم عن السيارة على الطبيعة باذن الله
تحياتى

اخوكم فى الله
احمد مصطفى

[Sehsss]

الله ينور يا أبوحميد.. تقرير ولا أروع

[mohaismail]

تقرير ممتاز
عاوزين نعرف عملوا ايه فى العزل بالتفصيل يعنى بقت زى التيدا مثلا ولا افضل ولا اقل
وطبعا مستنين تجربة قيادة عشان نعرف استهلاك البنزين بالارقام
والفئة الاعلى اللى فى شهر 10 هتكون فيها ايه زيادة ؟
والخلوص عن الارض كام سم ؟

[assaf]

الله ينور تقرير اكتر من رائع

[ls1090]

شكرا على التقرير الرائع
مجهود جبار
بس شكل العربية ................. لا تعليق الناس ديه بتتصرف غلط فى التصميم

[Ramy_2R]

التقرير ممتاز و مفصل
و مجهود كبير أوي تشكر علية
لكن كان نفسي يكون فى كلام شوية عن العيوب ال شوفتها من وجهة نظرك

[boody_hb]

شكرا على التقرير الاكثر من رائع

[mody3on]

تقرير ممتاز ومتعوب فيه , لكن اسمحلي يا استاذ احمد في بعض النقط ..
-التقرير دعائي اكتر منه شخصي , يعني مفيهوش عيوب العربية ( بيتكلم عن المميزات بس ) وبصراحة شايفه مبالغ فيه في بعض النقاط ( تورشن بيم يعني ثبات قوي الخ )
-الموتور مشفتش في اي حتة انه 108 حصان , هو هو اللي بينزل في الخليج والهند ( 99 حصان ) ومعتقدش ان ده الرقم ال net ( العربية مش هتنزل 9 حصان بس ) لان مفيش شركة بتعلن ال net اصلا
تحياتي لحضرتك يا فندم :)

[Land_Cruiser]

تقرير ممتاز يا باشا و تسلم ايدك

[enggeorge]

شكرا ومنتظرين تجربة القيادة الكاملة

[night_whisper]

تقرير رائع من شخص أكثر من رائع
أشكرك جزيلآ على التقرير و المجهود الكبير المبذول فية
تحياتى و احترامى لشخصكم الفاضل
و أرق الأمانى بدوام التألق

[bayoumisoft]

ممكن الاسعار تفصيليا .

وامتى العربية العربية ها تكون متاحة للشراء ؟