محتار بين التيدا و الصنى الجديده

[kliken]

السلام عليكم و رحمه الله و بركاته
انا سعيد بوجودى هنا فى قسم نيسان اللى بصراحه بحترمه جدا
الفكره انى كنت ناوى اجيب مستعمل و كنت بفكر فى التيدا هاتشباك علشان بحب شكلها و فكرت شويه فى السيفيك 2007
و بعدين حولت اتجاهى انى اجيب زيرو و مرتاح جدا للصنى الجديده بس بصيت لقيتها قريبه من التيدا اول فئه 115000 جنيه
سؤالى بقا هل فى اوبشن او اى حاجه فى الصنى مش موجوده فى التيدا الفئه الاولى بمعنى اصح ايه الفرق فى الاوبشن بين السيارتين
انه سياره فيهم اوسع فى الصالون و اشيك
بوجه عام اراء ملاك السيارتين انه افضل كاختيار علشان انا محتار
و شكرا للجميع

[S O P H O S]

كراي مش مالك للتيدا
بس بحبها جدا عربية جميلة فكل شئ
عدا ثبات فوق 140
غير كده انا اختار التيدا
مجرد راي فقط
ربنا يوفقك للاختيار الافضل ...

[Omar_4ever]

لو معاك فلوس التيدا وتقدر تجيبها هاتها
وبالنسبة لموضوع الثبات بعد ال 140 ده فعلا لو الطريق في رياح قوية
وفي الآخر العربيتين ممتازين بس دي فئة ودي فئة تانية

[kliken]

متشكر لردود حضراتكم بس هو الفرق فى السعر مش كبير و ممكن اجيبها بس هل الفرق يستاهل
انا ركبت الصنى و صالونها واسع هل التيدا زيها و لا اقل و لا اكبر
الاوبشنز هل فى سياره منهم فى اوبشنز اكتر و لا الاتنين زى بعض
مستوى التقفيل فى الاتنين ايهم افضل
هى دى معظم استفساراتى بمعنى اوضح هل يستاهل ادف فرق الفلوس لو اقدر ادفعه
و شكرا

[Ahmed_selmy]

على حسب قرائتى فى الموضوعات هنا لانى كنت بسئل نفس السؤال اللى حضرتك سئلتوا , ايهما افضل؟
ووجدت الاتى:
1- من حيث الوسع فالصنى الجديده اوسع بشئ بسيط عن التيدا, وكذلك بردوا فى مساحة الشنطه
2-الموتور فى صالح التيدا 1600 اما الصنى 1500
3-بالنسبه للخامات التيدا افضل وكذلك التقفيل, بس ده مش معناه ان الصنى وحشه بل بالعكس التنجيد بقى افضل كتير عن الشكل القديم
4- بالنسبه لبعض الكماليات التيدا افضل وخصوصا الفئه العليه اللى ب 128,500 جم , الحاجه الوحيده الافضل فى الصنى هى المروحه للكنبه الخلفيه (وهى مروحه بس مش تكييف)
بالنسبه للتيدا الفئه اللى ب 115,500 جم تعتبر قريبه جدا من الصنى فى الكماليات
5- الثبات فى صالح الصنى على حد علمى (السرعه فوق 140كم/س)
طبعا بالنسبه للفئه السعريه تعتبر الصنى صفقه رابحه جدا, وبردوا التيدا انا شايف انها صفقه رابحه
انا بحاول اشوف اى عربيه اعتماديه ذى التيدا وبنفس السعر والكماليات دى بس بصراحه مش لاقى حاجه ترضينى
انا حاجز التيدامن شهر مايو بس لسه مستلمتش وده اللى خلانى ادور على بديل ولسه مش لاقى حاجه
وانا اعتقد لو التيدا ماجتش حيكون اختيارى هو الصنى ان شاء الله

[Land_Cruiser]

بصراحه انا لو مكانك هاختار التيدا تانى فئه اللى هى ب ١٢٨,٥ الف و هى تقفيلها حلو و موتورها ١٦٠٠ قوى وواسعه . هى المشكله اللى فيها لو بنتكلم عن الهاتشباك ان الشنطه بتاعتها صغيره زيها زى معظم الهاتشباك شنطته اصغر من السيدان اما السيدان فشنطتها واسعه (و ان كنت انا افضل الهاتشباك) و فى حاجه تانيه اعتقد انه هينزل منها جيل جديد بس مش متأكد السنه القادمه و لا اللى بعدها و ممكن تتاكد من المعلومه دى من التوكيل و العربيه دى متجربه لأنها موجوده من كذا سنه اما الصنى الجديده لسه محدش جربها قوى لانها لسه نازله قريب و ان كنت قلقان بصراحه من موضوع ضعف الموتور و كمان فى كلام عن ان الخامات الداخليه بتاعه الصنى ذات جوده منخفضه و الفرق فى صالح التيدا و لو حبينا نلخص المقارنه

الوسع الداخلى : الاتنين واسعين
جوده الخامات و التقفيل: التيدا افضل
قوه الموتور : التيدا افضل
الثبات: الصنى افضل على السرعات العاليه (بعد ١٤٠)
وسائل الامان: متوافر فى الاتنين
عزل الموتور: جيد فى الاتنين
الشكل: اذواق طبعا و افضل التيدا
مساحه الشنطه: شنطه الصنى اوسع من التيدا الهاتشباك و قريبه من التيدا السيدان
السعر: الصنى ارخص
الانتشار: لصالح التيدا و مزاياها و عيوبها معروفه و قطع غيارها متوافره وده بحكم انها تنتج منذ سنوات اما الصنى فلسه جديد و لذلك فان المعلومات عنها غير متوافره

[Omar_4ever]

هجيبلك من الآخر
جرب اركب تيدا هاتشباك ! وانت هتتأكد ان الفرق يستاهل

[Bishoy.Girgis]

رأيي الشخصي جدا يا استاذ محمد ..
لو هتجيب تيدا سيدان يبقي هات الصني لأنها اثبت فقط علي السرعات العالية انما لو مش هتجري علي سرعات عالية يبقي هات التيدا وش
لو هتجيب تيدا هاتش باك يبقي انت اللي كسبان

[SonaSteel]

التيدا اول فئة = الصني الجديدة
ككماليات فقط
يعني ال2 ايرباج والabs,ebd,pa
يمكن الصني اوسع من التيدا
بس التيدا بحر برده ومحدش بيتضايق من قاعدتها

انا من راي التيدا طبعا ....... ماتور وفتيس وتقفيل عدادات شيك جدا
ووفوق ال140 بتجري مش بتقول لا ..... مش التعويم اللي يضيع يعني

انا من رأي تيدا ...... وممكن تشوفلك حاجة مستعملة 2009- 2010 تعملها 90 -95 الف وهاتكون اعلي فئة وكمان كانت ياباني بالكامل

كده يبقي انت عديت بفضل الله

عايز زيرو يبقي هات تيدا ...... مش هاتزعلك في حاجة خالص
ومتنساش الاستخارة ........ وربنا ييسرلك الخير

اقعد بالعافية :))

[Mohamed_Hamada]

التيدا فعلا أفضل في كل حاجة عدا الشنطة والثبات لصالح الصني

[kliken]

انا متشكر لكل الردود و لذوق حضراتكم و مساعدتكم فعلا
انا الحمد لله عامل استخاره و بصراحه مايل للصنى شويه و روحت توكيل نيسان فى السويس عندى لقيته احبطنى من التيدا علشان تأخير الاستلام و انا مستعجل فهتوكل على الله ان شاء الله و هجيب الصنى لون برونزى و قالى الاستلام ممكن يبقى بعد اسبوعين و انا بدور كده على حد معرفهيعرف يجيبهالى فى وقت اقل ان شاء الله و دعواتكم يا احلى شباب
تحياتى للجميع و ان شاء الله انضم لصقور نيسان قريبا

[tarekiooo]

تيداااااااااااااااااااااااااا

[motor82]

تيداااااااااااااااااااااااااا

اشمعنى التيدا ! عشان انا كمان محتار نفس الحيرة.. حاسس ان كل الفرق انها تقفيل مكسيكي وشكل التابلو احلى.. لكن هل ده يستاهل فرق فلوس 20.000 جنية !! انا بجد محتار.. خصوصا اني خايف لا يكون استهلاك البنزين في التيدا اعلى من الصني بكتير وخصوصا ان استهلاك البنزين في الصني الجديده بقى كويس جدا.. انا فعلا محتار...

[mhmhmh75]

بيني وبينكم الي ربنا بيسرة بيكون خير المهم يكون الواحد مرتاح نفسيا ومبسوط التيدا انا ركبتها وحبتها قوي مع اني لا املكها لاكن هذا لا يمنع ان هناك عربيات كتير حلوة ومدام العربية مريحة يبقا تمام والاقتناع الشخصي شيء مهم

[د. علاء ابراهيم]

جودة التقفيل الداخلى و خامات التالوه : التيدا تكسب و اشيك بس الصنى جيدة و عملية فى التنظيف و التنجيد ممتاز
الوسع: الصنى تكسب
الموتور : الصنى اوفر سنة فى البزين عشان 1500 التيدا اقوى سنة عشان 1600
الثبات: الصنى تكسب بس التيدا كويسة بردك
الاوبشن : الاتنين فيهم اير باجز الاتنين فيهم abs & ebd لكن اللى وصلنى ان الصنى فيها ba لكن التيدا مافيهاش